1 Jinataj maypachachus Jesus kaykunata nerqa, chaypacha kaykunata shkha runasman sut’incharqa; tukuy imata sut’incharqa, juch’uy kajkunatapis, jatun kajkunatapis.

2 Nerqataj: Kay escriturasqa, mayqenkunachus mana kapusorqachischu, Tata kamachiwarqa chaykunata qankunaman qonayta; imaraykuchus jinata munarqa paypa yachayninman jina kaymanta qhepanman jamojkunaman qosqas kanankupaj.

3 Paytaj tukuy imata sut’incharqa, qallariymantapacha, watejmanta k’anchaynimpi kutimunankama. Arí, tukuy kay pachaman jamojkunamanta willarqa, tukuy ima sinchi ruphaywan unuyanankama, kay pachataj uj papel jina mayt’usqa kanankama, kay pachawan janaj pachawan chinkasqas kanankukama.

4 Jatun qhepa p’unchaykamapis, maypachachus tukuy runas, tukuy familias, tukuy llajtas, parlaykunaswan Diospa ñawpaqempi sayarenqanku ruwasqasninkumana jina juzgasqas kanankupaj, allin kajtinkupis, sajra kajtinkupis.

5 Allin ruwayniyoj kanku chayqa, wiñay kawsayman kawsarimonqanku; sajra ruwayniyoj kanku chayrí, wiñay juchachayman kawsarimonqanku. Kuskata pusasqa kanqanku, ujkuna uj laduman, wajkunataj waj laduman khuyayman jina, justiciaman jina, llimphu kayman jinataj, mayqenkunachus Cristopi kanku, pichus kawsarqa manaraj kay jallp’a kasqanmantapacha.

6 Kunantaj, imatachus Jesus cheqamanta runasman yachacherqa, tukuy chaymanta mana uj pachajnin partellapis escribisqa kanmanchu.

7 Chaywampis tukuy runasman yachachisqasninmanta kuraj parte Nefij planchasnimpi kan.

8 Kaykunata escribini, mayqenkunachus yachachisqasninmanta sullk’a parte. Kaykunata escribinitaj watejmanta kay runasman yachachisqas kanankupaj gentilesnejta, Jesuspa nisqanman jina.

9 Paykunaqa kayta jap’ejtinku, imatachus ñawpajta jap’inanku tiyan, feniyoj kasqankuta rikuchinampaj. Kaykunatachus creenku chayqa, aswan jatun imasta paykunaman qhawachisqas kanqanku.

10 Paykunatajchus mana kaykunata creenku chayqa, aswan jatun imasqa paykunamanta jark’asqas kanqanku, juchachasqas kanankupaj.

11 Tukuy Nefij planchasnin patapi escribisqasta escribisaj nisharqani, chaywampis Señorqa escribejta jark’awan, nispa: Llajtaypa feninta qhawasaj nispa.

12 Chayrayku ñoqa, Mormon, escribini imatachus Señor kamachiwan, chayta. Kunantaj ñoqa, Mormon, parlayta tukuchani, imatachus Dios kamachiwan chayta escribini.

13 Chayrayku yachanaykichista munayman cheqamanta Señor kay runasta yachacherqa kinsa p’unchaypaj. Chaymanta sapa kuti paykunaman rikhurimorqa, sapa kuti t’antata parterqa, chayta bendicerqa, paykunaman jaywarqataj.

14 Paytaj kay runaspa wawasninkuta yachacherqa, sirverqataj, qallusninkuta kacharicherqataj. Wawas tatasninkuman sumaj t’ukuchina palabrasta parlarqanku. Jesuspa parlasqanmanta nisqaqa, paykunaqa aswan jatuchas cosasta parlarqanku. Paytaj qallusninkuta kacharicherqa parlanankupaj.

15 Jinataj watejmanta janaj pachaman wicharerqa — iskay kaj kutita paykunawan rikuchiskusqanmanta, Tataman risqanmanta, tukuy onqosqasninkuta, suchusninkutawan thañichisqantawan, ciego runasninkoj ñawisninkuta kicharisqantawan, llojt’u runasta uyarichisqantawan, tukuy imaymana thañichiykunata paykuna ukhupi ruwasqantawan, wañusqa runata wañusqakunamanta kawsarichisqantawan, atiyninta paykunaman rikuchisqantawantaj Tataman wicharisqantawantaj —

16 Chaymanta q’ayantin ashkha runas watejmanta tantakorqanku. Paykunaqa kay wawasta rikorqanku, uyarerqankutaj; arí, juch’uy wawitaspis simisninkuta kicharerqanku t’ukuchina cosasta parlarqankutaj. Runastaj jark’asqas karqanku wawaspa parlasqankuta escribinankumanta.

17 Jinataj Jesuspa ajllasqa yachachisqasnin tukuy paykunaman jamojkunata bautizayta, yachachiytawan qallarerqanku. Tukuy Jesuspa sutimpi bautizakojkunataj Santo Esprituwan junt’asqas karqanku.

18 Ashkhastaj rikorqanku, uyarerqankutaj mana parlana kajkunata, chaykunatataj mana escribiyta atikunmanchu.

19 Jinataj yachacherqanku, yanapanakorqankutaj. Tukuy imataj ujllapi kaporqanku, sapa uj cheqanta purispa runa masinwan.

20 Paykunataj tukuy imata ruwarqanku Jesuspa kamachisqanman jina.

21 Jesuspa sutimpi bautizakojkunataj, Cristoj igelesian sutichasqas karqanku.