1 Cheqamanta, cheqamanta niykichis: Wajchasman kapuyniykihismanta qonaykichista munani. Chaywampis ama runasqa ñawpaqempi chayta ruwaychischu, paykunawan rikuchikunallaykichispaj; ajinata ruwajtiykichisqa, mana t’inkaykichis kanqachu, janaj pachapi kashaj Tataykichispa ñawpaqempi.

2 Chayrayku qolqeykita qospaqa, ama putututa ñawpaqeykipi waqachiychu; imaynatachus puraj uya runas, sinagogaspi, callespi ima, ruwanku runakunawan allinta qhawachikunankurayku, jinataqa. Cheqamanta niykichis, ñapis paykunaqa t’inkayojña kanku.

3 Chayrayku mana qoshajtiyki kapuyniyojkunaman ama yachachunchu lloq’e makiyki, imatachus paña makiyki ruwasqanta.

4 Wajchasman pakayllamanta khuyay. Pakaypi khuyasqaykita rikusoj Tataykitaj t’inkachisonqa runas chawpipi.

5 Diosmanta mañakuspataj, ama puraj uyas jina ruwaychischu. Paykunaqa sayaykukuspa Diosmanta mañakunku, sinagogaspi, calle esquinaspi ima: runaswan rikuchikunankupaj. Cheqamanta niykichis, ñapis paykunaqa t’inkayojña kanku.

6 Chaywampis qan Diosmanta mañakuspaqa, wasiyki ukhuman yaykuy; wasi punkuykita wisq’aykamuspataj, pakaypi, Tataykimanta mañakuy. Pakaypi rikoj Tataykitaj t’inkaykita qopusonqa runas chawpipi.

7 Diosmanta mañakuspataj, ama ashkhata parlaychischu Diosta mana rejsejkuna jinaqa. Imaraykuchus paykunaqa yuyanku Dioswan uyarichikunankuta, ashkhata parlasqankurayku.

8 Ama qankunaqa paykuna jina kaychischu; imaraykuchus Tataykichisqa yachanña imaykichischus pisisqanta, manaraj paymanata mañakushajtiykichis.

9 Chayrayku qankunaqa, kay jinata mañakunkichis: Janaj pachapi kashaj Tatayku, sutiyki jatunchasqa kachun.

10 Munayniyki ruwasqa kachun; imaynatachus janaj pachapi, ajinallatataj kay pachapipis.

11 Juchasniykuta pampachawayku, imaynatachus ñoqaykupis juchallikuwajniykuta perdonayku ajinata.

12 amataj saqewaychu juchaman urmanaykuta; astawampis jark’awayku sajramanta.

13 Imaraykuchus qampatamin reino, atiy, janaj pacha k’anchay ima; wiñaypaj wiñayninkama. Amen.

14 Chayrayku runakuna qankunapaj juchallisqankuta perdonankichis chayqa, ajinallatataj, janaj pachapi kashaj Tataykichispis juchasniykichista pampachanqa.

15 Runakunaj juchallisqankutachus mana perdonankichis chayqa, Tataykichispis manallataj juchasniykichista pampachanqachu.

16 Ayunaspataj, ama llakisqas kaychischu, puraj uyas jina; paykunaqa uyasninkuta uj jinayachinku, ayunasqankuta runaswan rikuchikunankupaj. Cheqamanta niykichis, ñapis paykunaqa t’inkayojña kanku.

17 Qanrí, ayunaspaqa umaykita jawikuy, uyaykitataj mayllakuy.

18 Ama ayunasqaykita runas yachanankupaj; pakaypi kashaj Tatallaykitaj yachachun. Pakaypi rikoj Tataykitaj t’inkaykita qopusonqa runas chawpipi.

19 Ama kay mundopeqa qhapajyayta munaychischu; ky mundopeqa thuta k’utun, tukuy impais qorwariyapun, suwaspis perqasta jusk’uspa suwanku.

20 Chayrayku tukuy kapuyniykichista janaj pachapaj tantaychis. Chaypi mana thuta ni ismuypis tukuchinchu, nitaj suwas kanchu jusk’uspa suwanankupaj.

21 Maypichá kapuyniyki kashan, chayllapitaj sonqoykipis.

22 Ñaweqa cuerpoj k’anchaynin. Ñawiyki allin kajtenqa, tukuy cuerpoykipis k’anchaypi kanqa.

23 Ñawiykitajchus mana allin kanman chayqa, tukuy cuerpoyki laqhapi rikhurenqa. Chay qampi kashaj k’anchaytajchus laqhayapunman chayqa, ¡Imayna yana laqhapunitaj kanman chay laqhari!

24 Mana pipis iskay patronespa kamachin kayta atinchu, imaraykuchus ujninta chejnenqa, ujnintataj munakonqa; chayrí, ujninman kutikonqa, ujnintataj qhesachanqa. Imaraykuchus mana atinkichischu ujllapi k’umuykukuyta Diosman nitaj qolqemampis.

25 Jinataj Jesus kaykunata parlaspaña, chunka iskayniyoj ajllasqasninta qhawarerqa, paykunaman nerqataj nispa: yuyariychis qankunaman parlasqayta. Imaraykuchs ñoqaqa qankunata ajllarqaykichis kay runasta sirvinaykichispaj. Chayrayku niykichis: Ama phutikuychischu kawsayniykichismanta, mikhunaykichismanta, ujyanaykichismanta ima; nillataj phutikuychischu imawanchus p’achallikunaykichismantapis. ¿Manachu kawsaynikichisqa astawanraj mikhunamanta; cuerpoykichispis astawanraj p’achamantaqa?

26 Qhawariychis phawaykachaj p’isqosta; mana tarpunkuchu, nitaj ruthunkuchu; ni pirqaspipis waqaychankuchu. Chaywampis janaj pachapi kashaj Tataykichis paykunataqa mikhuchin. ¿Manachu qankunaqa, asqan munasqaraj kankichis p’isqosmanta nisqaqa?

27 ¿Mayqentaj qankunamanta, mashkhatapis afligispa, atinman uj makillatawampis sayayninman yapaykuyta?

28 ¿Imaraykutaj p’achamanta llakikunkichisrí? Qhawariychis campo lirio t’ikasta, imaynatachus wiñasqankuta; paykunaqa mana llank’ankuchu, nitaj phushkankuchu.

29 Cheqamanta niykichis, Salomompis, tukuy qhapaj atiynimpi, manapuni ujnin t’ika jinallapis p’achallikorqachu.

30 Chay campo qhora kunan p’unchay kashan, q’ayataj hornoman wijch’usqa; chay qhoratapis Diosqa k’achituta p’achallichin, ajinallatataj qankunata p’achallichisonqachis mana pisi feniyoj kankichis, chayqa.

31 Chayrayku ama phutikuychischu: ¿Imatataj mikhusun, imatataj ujyasun; chayrí, imawantaj p’achallikusun? nispa.

32 Janaj pacha Dios Tataykichisqa yachanña kay tukuy imamanta pisichakusqaykichista.

33 Ñawpajtaqa Diospa reinonta, cheqa kaynintawan mask’aychis; kay tukuy imatataj yapata jina Dios qosonqachis.

34 Ama phutikuychischu ari, q’aya p’unchaymanta; imaraykuchus, q’aya p’unchayqa, pay kikinmanta llakiyniyoj. Sapa p’unchaypata tiyan llakiynin.