23 Capitulo
Salvadorqa kamachin faltasqa escribisqasta nefitakunaj escribisqankuman escribisqa kanankuta. Lamanita Samuelpa sut’inchasqan chayman yapasqa.
1 Kunantaj niykichis, kaykunata allinta amañanaykichis tiyan. Arí, kamachiykichis kaykunata sumajta amañanaykichispaj; imaraykuchus Isaiaspa nisqasnin may allin kanku.
2 Imaraykuchus cheqamanta pay parlarqa tukuy llajtaymanta imasmanta, pikunachus Israelpa wawasnin kanku; chayrayku payqa gentilesmampis parlanan tiyan.
3 Tukuy imatachus pay parlarqa junt’akunña, junt’akonqarajtaj, parlasqanman jina.
4 Chayrayku parlasqayta uyariychis; imatachus niykichis, chayta escribiychis; Tataj tiemponman jina, munayninman jinataj gentilesman renqanku.
5 Pillapis parlasqayta kasun, Diosman kuritikuntaj, bautizakuntaj, salvasqa kanqa. Profetasta allinta qhawaychis, imaraykuchus ashkha kanku kaykunamanta willajkuna.
6 Jinataj maypachachus Jesus kaykunata nerqaña, chaypacha watejmanta nerqa, escriturasmanta sut’inchasqantawampacha nerqa: Waj escriturasta escribinaykichista munayman; chaykunas mana kapusunkichischu.
7 Jinataj Nefiman nerqa: Apamuway waqaychasqayki escribisqata.
8 Nefi escribisqasta apamojtinkama, ñawpaqenman churajtinkamataj, escribisqasta allinta qhawarqa, nerqataj:
9 Cheqamanta niykichis lamanita Samuel kamachiyta kamacherqani kay llajtaman willananta, ima p’unchaypichus Tataqa sutinta ñoqapi jatunyachinman, chaypacha ashkha allin kawsajkuna wañusqakunamanta kawsarimunankuman karqa, ashkha runasman rikhurimunanku karqa, paykunata yachachinankutaj karqa. Paykunata taporqa: ¿Manachu chay jina karqa?
10 Ajllasqasnintaj kuticherqanku nispa: Arí, Señor, Samuel sut’incharqa tukuy nisqasniykiman jina, tukuy chaykunataj junt’akorqanku.
11 Jesustaj paykunaman nerqa: ¿Imajtintaj manaraj kayta escriberqankichischu, ashkha allin kawsajkuna kawsarimusqankumanta, ashkha runasman rikhurimusqankumanta, paykunata yachachisqankumantawan?
12 Jinataj Nefi yuyareqa manaraj escribisqa kasqanta.
13 Jinataj Jesus kamacherqa escribisqa kananta. Chayrayku kamachisqanman jina escribisqa karqa.
14 Jinataj Jesus ujllapi tukuy escriturasta sut’inchaspaña, mayqen escriturastachus paykuna escriberqanku, chaypacha kamacherqa tukuy sut’inchasqanta yachachinankuta.