၃ နီဖိုင်း ၅

အခန်းကြီး ၅

နီဖိုင်းအမျိုးသားတို့သည် နောင်တရ၍၊ သူတို့၏အပြစ်များကို စွန့်ပစ်ကြ၏—မော်မုန်သည် မိမိလူမျိုးတို့၏သမိုင်းကြောင်းကို ရေး၍၊ ထာဝရတည်မြဲသောနှုတ်ကပတ်တော်ကို သူတို့အား ဟောကြား၏—ဣသရေလအမျိုးသည် ၎င်း၏ကြာမြင့်လှသော ပြန့်ကျဲခြင်းမှ စုဝေးခံရလိမ့်မည်။ အေဒီ ၂၂–၂၆ ခန့်။

၁ ယခုမူကား၊ ရှုလော့၊ ခပ်သိမ်းသောနီဖိုင်းလူမျိုးတို့၌၊ ဟောပြောခဲ့သူ သန့်ရှင်းသော ပရောဖက် ခပ်သိမ်းတို့၏စကားများကို အနည်းငယ်မျှပင် ယုံမှားသံသယဖြစ်သည့် အသက်ရှင်သူ တစ်ဦးမျှမရှိ။ အကြောင်းမူကား၊ သူတို့သည် ထိုစကားများ ပြီးပြည့်စုံစေရမည်မှာ လိုအပ်ကြောင်းကို သိကြ၏။

၂ ပရောဖက်တို့၏စကားများအတိုင်း ပေးထားတော်မူလေသည့် များစွာသော နိမိတ်လက္ခဏာများကြောင့် ခရစ်တော်ကြွလာတော်မူရန် မဖြစ်မနေလိုအပ်ကြောင်းကိုလည်း သိကြ၏။ ဖြစ်ပျက်ပြီးနှင့်လေသောအရာများကြောင့်၊ ဟောပြောပြီးလေသည့်အတိုင်း၊ ခပ်သိမ်းသောအရာတို့ ဖြစ်ပျက်လာရမည်မှာ လိုအပ်ကြောင်းကိုလည်း သိကြ၏။

၃ ထို့ကြောင့်၊ သူတို့သည် သူတို့၏ခပ်သိမ်းသောအပြစ်များ၊ ထို့အတူ သူတို့၏စက်ဆုပ်ရွံရှာဖွယ်အမှုများ၊ ထို့အတူ သူတို့၏မတရားသောမေထုန်အမှုများကို စွန့်ပစ်၍၊ ဘုရားသခင်ကို လုံ့လဝီရိယရှိသမျှနှင့် နေ့ရော ညပါ အစေခံကြ၏။

၄ ယခုမူကား၊ အချိန်တန်လာသောအခါ၊ သူတို့သည် ဓားပြခပ်သိမ်းကို စစ်အကျဉ်းသားများအဖြစ် ဖမ်းဆီးလေပြီးလျှင်၊ ကွပ်မျက်မခံရသောသူ အဘယ်သူမျှ ထွက်မပြေးနိုင်စေကြောင်း၊ မိမိတို့ စစ်အကျဉ်းသားများကို ထောင်ထဲ၌ လှောင်ထား၍၊ သူတို့ထံသို့ ဘုရားသခင်၏နှုတ်ကပတ်တော်ကို ဟောပြောစေ၏။ မိမိတို့အပြစ်များမှ နောင်တရ၍၊ လူ့အသက်ကို မသတ်တော့ဟူသော ပဋိညာဉ်ကို ပြုလိုသူမှန်သမျှသည်လည်း လွတ်လပ်၏။

၅ သို့ရာတွင်၊ ပဋိညာဉ်ကိုမပြုဘဲ၊ သူတို့စိတ်နှလုံး၌ ထိုလျှို့ဝှက်သောလူ့အသက်သတ်ခြင်းကို ဆက်၍ပြုမြဲရှိသူမှန်သမျှ၊ ထိုမှတစ်ပါး၊ သူတို့၏ညစ်အစ်ကိုတို့ကို ဆန့်ကျင်၍၊ ခြိမ်းခြောက်လျက် ပြင်းစွာပြောဆိုလျက်ရှိသည်ကို တွေ့ရသူမှန်သမျှသည် ဥပဒေအတိုင်း ပြစ်ဒဏ်ချမှတ်၍၊ အပြစ်ဒဏ်ပေးခံရ၏။

၆ ထိုကဲ့သို့အားဖြင့်၊ သူတို့သည် အလွန်များစွာသောဆိုးညစ်ခြင်းနှင့် အလွန်များစွာသော လူ့အသက်သတ်ခြင်းတို့ကို လွန်ကျူးသော ထိုဆိုးညစ်၍၊ လျို့ဝှက်၍ စက်ဆုပ်ရွံရှာဖွယ်ကောင်းသည့် ဂိုဏ်းခပ်သိမ်းတို့ကို အဆုံးသတ်ကြ၏။

၇ ထိုကဲ့သို့အားဖြင့်၊ နှစ်ဆယ်နှစ်နှစ်မြောက်နှင့် နှစ်ဆယ်သုံးနှစ်မြောက်၊ ထို့အတူ၊ နှစ်ဆယ်လေးနှစ်မြောက်၊ ထို့အတူ နှစ်ဆယ်ငါးနှစ်မြောက် ကုန်လွန်သွား၏။ ထိုကဲ့သို့အားဖြင့်၊ နှစ်ဆယ်ငါးနှစ်မြောက် ကုန်လွန်သွား၏။

၈ များစွာသောအရာတို့ ဖြစ်ပျက်သည်မှာလည်း၊ အချို့သောသူတို့၏အမြင်၌ ကြီးမြတ်၍ အံ့ဩဖွယ်ကောင်းပေလိမ့်မည်။ သို့သော်လည်း၊ ထိုအရာခပ်သိမ်းကို ဤကျမ်းထဲ၌ မရေးနိုင်။ ထိုမှတစ်ပါး၊ နှစ်ဆယ်ငါးနှစ်ကာလအတွင်း၌ အလွန်များစွာသောလူမျိုးတို့၌ ဖြစ်ပျက်သည့်အရာတို့၏ အနည်းငယ်မျှပင် ဤကျမ်း၌ မပါရှိနိုင်။

၉ သို့ရာတွင်၊ ရှုလော့၊ ဤလူမျိုးတို့၏ ခပ်သိမ်းသောလုပ်ဆောင်မှုများ ပါဝင်သည့် မှတ်တမ်းများ ရှိ၏။ ပို၍တိုသော်လည်း မှန်ကန်သည့် မှတ်တမ်းကို နီဖိုင်းရေးသားထားခြင်းဖြစ်၏။

၁၀ ထို့ကြောင့်၊ ငါသည် ဤအရာတို့၏အကြောင်း ငါ၏မှတ်တမ်းကို နီဖိုင်း၏ပုရပိုက်ပြားများဟုခေါ်သည့် ပုရပိုက်ပြားများပေါ်၌ ရေးထွင်းသော နီဖိုင်း၏မှတ်တမ်းအတိုင်း ပြုစု၏။

၁၁ ရှုဦးလော့၊ ငါသည် ငါ့လက်ဖြင့်ပြုလုပ်ထားသော ပုရပိုက်ပြားများပေါ်၌ မှတ်တမ်းကို ပြုစု၏။

၁၂ ရှုဦးလော့၊ ငါ့ကို မော်မုန်ဟုခေါ်၏၊ လူမျိုးတို့၌ အယ်လမာ တည်ထောင်သည့် အသင်းတော်၊ အထူးသဖြင့်၊ သူတို့၏လွန်ကျူးခြင်းနောက်တွင်၊ သူတို့၌ တည်ထောင်သည့် ပထမဦးဆုံးအသင်းတော် တည်ရှိရာပြည်ဖြစ်သည့် မော်မုန်ပြည်အတိုင်း ခေါ်၏။

၁၃ ရှုလော့၊ ငါသည် ဘုရားသခင်၏သားတော်ယေရှုခရစ်တော်၏ တပည့်တော်တစ်ပါးဖြစ်၏။ ငါသည် သူ၏လူမျိုးတို့ ထာဝရတည်မြဲသောအသက်ကို ရရှိနိုင်ကြစေခြင်းငှာ၊ သူတို့၌ သူ၏နှုတ်ကပတ်တော်ကို ဟောကြားစေရန် သူ့အားဖြင့် ခေါ်သွင်းတော်မူခြင်းကို ခံရ၏။

၁၄ ငါသည် ထိုကွယ်လွန်သွားပြီးသူ၊ သန့်ရှင်းသူများဖြစ်သောသူတို့၏ ဆုတောင်းခြင်းများကို သူတို့၏ယုံကြည်ခြင်းအတိုင်း ပြီးပြည့်စေခြင်းငှာ၊ ဖြစ်ပျက်လေသည့် ဤအရာတို့အကြောင်းမှတ်တမ်းကို ဘုရားသခင်၏ အလိုတော်အတိုင်း၊ ပြုစုရမည်မှာ သင့်လျော်လာပေ၏—

၁၅ အထူးသဖြင့်၊ လေဟိ ယေရုရှလင်မြို့ကို စွန့်ခွာသည့်အချိန်မှစ၍၊ မျက်မှောက်ကာလအထိပင် ဖြစ်ပျက်လေသောအရာတို့အကြောင်း မှတ်တမ်းငယ်တစခုဖြစ်၏။

၁၆ ထို့ကြောင့်၊ ငါသည် ငါမတိုင်မီမှ ငါ့အသက်တာအစအထိ ရှိလေသောသူများရေးလေသည့် မှတ်တမ်းများမှထုတ်၍ ငါ၏မှတ်တမ်းကို ပြုစု၏။

၁၇ ထိုနောက်တွင်၊ ငါ့မျက်စိဖြင့် မြင်ရလေသည့်အရာများ အကြောင်းမှတ်တမ်းကို ပြုစု၏။

၁၈ ငါပြုစုသည့် မှတ်တမ်းမှာ ဖြောင့်မတ်မှန်ကန်သော မှတ်တမ်းတစ်ခုဖြစ်ကြောင်းကိုလည်း သိ၏။ သို့သော်လည်း၊ ငါတို့၏ဘာသာစကားကြောင့်၊ ငါတို့မရေးနိုင်သည့်အရာများစွာရှိ၏။

၁၉ ယခုမူကား၊ ငါ၏စကားကို လက်စသတ်၍၊ ငါမတိုင်မီက ရှိပြီးလေသောအရာများအကြောင်းဖြစ်သည့် ငါ၏မှတ်တမ်းကို ဆက်၍ရေး၏။

၂၀ ငါသည် မော်မုန်ဖြစ်၏၊ လေဟိ၏အမျိုးအနွယ်အစစ်လည်း ဖြစ်၏။ ငါ၏ဘုရားသခင်နှင့် ငါ၏ကယ်တင်ရှင်ယေရှုခရစ်တော်ကို ငါချီးမွမ်းစရာ အကြောင်းရှိသည်မှာ ငါတို့ဘိုးဘေးတို့ကို ယေရုရှလင်နယ်မြေမှ ဆောင်ယူတော်မူခဲ့သောကြောင့်၊ (ထိုအမှုကို သူကိုယ်တိုင်နှင့် ထိုပြည်မှ သူဆောင်ယူခဲ့သောသူတို့မှတစ်ပါး အဘယ်သူမျှမသိကြ) ငါနှင့် ငါ၏လူမျိုးတို့အား ငါတို့စိတ်ဝိညာဉ်များ၏ကယ်တင်ခြင်းအတွက် အလွန်များစွာသော အသိပညာကို ပေးတော်မူခဲ့သောကြောင့်ပေတည်း။

၂၁ သူသည် ယာကုပ်အမျိုးသားတို့ကို ဧကန်အမှန် ကောင်းချီးပေးတော်မူ၍၊ ယောသပ်၏အမျိုးအနွယ်ကိုလည်း ကရုဏာကြီးတော်မူ၏။

၂၂ လေဟိ၏သားသမီးတို့သည်လည်း သူ၏ပညတ်တော်များကို စောင့်ထိန်းကြသမျှ၊ သူတို့ကို ကောင်းချီးပေးလျက်၊ သူ၏စကားများအတိုင်း သူတို့ကို အောင်မြင်စေတော်မူ၏။

၂၃ ထိုမှတစ်ပါး၊ ယောသပ်အမျိုးအနွယ်၏ ကျန်ကြွင်းသောသူတို့ကို သူတို့၏ဘုရားသခင်ကိုယ်တော်ရှင်အကြောင်းကို သိခြင်းပညာသို့ ဧကန်အမှန် တစ်ဖန်ဆောင်ယူတော်မူလိမ့်မည်။

၂၄ ကိုယ်တော်ရှင်အသက်ရှင်တော်မူသည့်အတိုင်း၊ မြေကြီးမျက်နှာပြင်တစ်ခုလုံးပေါ်၌ ကွဲပြားပြန့်ကျဲသည့် ယာကုပ်အမျိုးနွယ်၏ကျန်ကြွင်းသောသူခပ်သိမ်းတို့ကို မြေကြီးလေးမျက်နှာမှ စုဝေးလိမ့်မည်။

၂၅ သူသည် ယာကုပ်အမျိုးသားခပ်သိမ်းတို့နှင့် ပဋိညာဉ်ပြုသဖြင့်၊ ထိုကဲ့သို့ပင်၊ ယာကုပ်အမျိုးသားတို့နှင့် သူပြုတော်မူသည့် ပဋိညာဉ်သည် သူ၏ကာလအချိန်တန်သောအခါ၌ ပြီးပြည့်စုံလိမ့်မည်မှာ၊ ယာကုပ်အမျိုးသားခပ်သိမ်းတို့ကို၊ သူတို့နှင့် ပြုတော်မူသည့် ပဋိညာဉ်အကြောင်းကိုသိခြင်းပညာသို့ ပြန်လည်ဆောင်ယူသည့်တိုင်အောင်ပင်တည်း။

၂၆ ထို့နောက်တွင်၊ သူတို့သည် သူတို့၏ရွေးနှုတ်ရှင်၊ ယေရှုခရစ်တော်တည်းဟူသော၊ ဘုရားသခင်၏သားတော်ကို သိကြလိမ့်မည်။ ထိုနောက်တွင်၊ ပြန့်ကျဲရာအရပ်မှ၊ မြေကြီးလေးမျက်နှာတို့မှ သူတို့၏နေရင်းပြည်များသို့ စုဝေးခံရလိမ့်မည်။ ထိုမှတစ်ပါး၊ ကိုယ်တော်ရှင်အသက်ရှင်တော်မူသည့်အတိုင်း၊ ထိုအမှု ဖြစ်လိမ့်မည်။ အာမင်။