အခန်းကြီး ၇
တရားသူကြီးချုပ် အသတ်ခံရ၏၊ အစိုးရ ဖျက်ဆီးခံရ၍ လူတို့သည် မျိုးနွယ်စုများအဖြစ် ကွဲပြားကြ၏—အန္တိခရစ် ယာကုပ်သည် လျှို့ဝှက်ဂိုဏ်း၏ ရှင်ဘုရင်ဖြစ်လာ၏—နီဖိုင်းသည် နောင်တရခြင်းနှင့် ခရစ်တော်ကို ယုံကြည်ခြင်းအကြောင်း ဟောပြော၏—ကောင်းကင်တမန်တို့သည် သူ့ကို နေ့စဉ်အမှုတော်ဆောင်၏။ သူသည် မိမိညီကို သေခြင်းမှ ထမြောက်စေ၏—များစွာသောသူတို့သည် နောင်တရ၍၊ ဗတ္တိဇံခံကြ၏။ အေဒီ ၃၀–၃၃ ခန့်။
၁ ယခုမူကား၊ ရှုလော့၊ သူတို့သည် ထိုပြည်၌ ရှင်ဘုရင်ကို မတင်မြှောက်ကြ။ သို့ရာတွင် ဤတစ်နှစ်ထဲ၌၊ အထူးသဖြင့်၊ သုံးဆယ်နှစ်မြောက်၌ ထိုပြည်၏တရားသူကြီးချုပ်ကို တရားပလ္လင်၌ ဖျက်ဆီးကြောင်း သင်တို့ကို ငါဖော်ပြမည်။
၂ လူမျိုးတို့သည်လည်း တစ်ဦးနှင့်တစ်ဦး ဆန့်ကျင်၍ကွဲပြားကြ၏၊ လူတိုင်း သူ့မိသားစု၊ သူ့ဆွေမျိုးနှင့် အဆွေခင်ပွန်းတို့အလိုက် မျိုးနွယ်စုတို့အဖြစ် တစ်ဦးနှင့်တစ်ဦး သီးခြားစီခွဲကြ၏။ ထိုကဲ့သို့အားဖြင့်၊ သူတို့သည် ထိုပြည်၏အစိုးရကို ဖျက်ဆီးကြ၏။
၃ မျိုးနွယ်စုတိုင်းသည်လည်း မိမိတို့အပေါ်၌ ဦးစီးသူ၊ သို့မဟုတ် အကြီးအကဲတစ်ဦးကို ခန့်အပ်ထားကြ၏။ ထိုကဲ့သို့အားဖြင့်၊ သူတို့သည် မျိုးနွယ်စုများနှင့် မျိုးနွယ်စုတို့၏အကြီးအကဲများ ဖြစ်လာကြ၏။
၄ ယခုတွင်၊ ရှုလော့၊ သူတို့၌ များစွာသောမိသားစု၊ ထို့အတူ များစွာသောဆွေမျိုးနှင့် အဆွေခင်ပွန်းမရှိသောသူ တစ်ယောက်မျှမရှိ။ ထို့ကြောင့်၊ သူတို့၏မျိုးနွယ်စုတို့သည် အလွန်ကြီးမားလာကြ၏။
၅ ယခုတွင်၊ ခပ်သိမ်းသောဤအမှုတို့ဖြစ်လျက်၊ သူတို့၌ စစ်တိုက်ခြင်း မရှိကြသေး။ စာတန်၏တန်ခိုးသို့ သူတို့ကိုယ်သူတို့ အရှုံးပေးသောကြောင့်၊ ဤခပ်သိမ်းသောဒုစရိုက်သည် လူတို့အပေါ် ကျရောက်၏။
၆ အစိုးရ၏စည်းမျဉ်းများသည်လည်း ပရောဖက်တို့ကို သတ်သောထိုသူတို့၏ အဆွေခင်ပွန်းများနှင့် ဆွေမျိုးတို့၏ လျှို့ဝှက်ဂိုဏ်းကြောင့် ပျက်စီး၏။
၇ သူတို့သည်လည်း ထိုပြည်၌ ကြီးစွာသောရန်တွေ့ခြင်းကိုဖြစ်စေ၍၊ လူတို့အထဲမှ သာ၍ဖြောင့်မတ်သောသူများမှာ အားလုံးနီးပါး ဆိုးညစ်လာကြ၏။ ထိုမှတစ်ပါး၊ သူတို့အထဲ၌ ဖြောင့်မတ်သောလူ အနည်းငယ်သာရှိလေ၏။
၈ ထိုကဲ့သို့အားဖြင့်၊ ခွေးသည် မိမိအန်ဖတ်ဆီကို ကဲ့သို့၊ သို့မဟုတ်၊ ဝက်သည် မိမိလူးရာ ရွှံ့ဆီကို ကဲ့သို့ လူတို့မှ အများစုမှာ မိမိတို့၏ဖြောင့်မတ်ခြင်းကို စွန့်ပစ်လေသည်ကတည်းက ခြောက်နှစ်ပင် မကုန်လွန်ခဲ့ပေ။
၉ ယခုတွင်၊ လူတို့အပေါ်၌ ကြီးစွာသောဒုစရိုက်ကို ဖြစ်စေသည့် ဤလျှို့ဝှက်ဂိုဏ်းသည် သူတို့ကိုယ်သူတို့ အတူတကွစုဝေးကြ၏။ ယာကုပ်ဟု သူတို့ခေါ်သောသူတစ်ဦးကိုလည်း သူတို့၏အကြီးအကဲအဖြစ် ခန့်ထားကြ၏။
၁၀ သူ့ကို သူ့တို့၏ဘုရင်ဟုလည်း ခေါ်ကြ၏။ ထို့ကြောင့်၊ သူသည် ဤဆိုးညစ်သောအဖွဲ့အပေါ်၌ ရှင်ဘုရင်တစ်ပါး ဖြစ်လာ၏။ ယေရှုအကြောင်းကို သက်သေခံသည့်ပရောဖက်တို့ကို ဆန့်ကျင်၍ ဟောပြောသည့် အကြီးဆုံးသောသူတစ်ဦးလည်း ဖြစ်၏။
၁၁ ဤသို့အားဖြင့်အချိန်တန်လာသောအခါ၊ သူတို့သည် အကြီးအကဲများက သူတို့မျိုးနွယ်စုအလိုက် ဥပဒေများကို တည်ထောင်၍ မျိုးနွယ်စုအလိုက်သာ အတူတကွစုဝေးကြသော လူတို့၏မျိုးနွယ်စုများကဲ့သို့ အရေအတွက်၌ အလွန်အားမကြီးကြ။ သို့သော်လည်း ထိုမျိုးနွယ်စုတို့နှင့် ရန်ဘက်များဖြစ်ကြ၏။ ထိုမျိုးနွယ်စုတို့သည် ဖြောင့်မတ်သောလူမျိုးများ မဟုတ်သော်ငြားလည်း၊ အစိုးရကို ဖျက်ဆီးရန် ပဋိညာဉ်ပြုသောသူတို့၏အမုန်းတရား၌ စည်းလုံးကြ၏။
၁၂ ထို့ကြောင့်၊ ယာကုပ်သည် မိမိတို့ရန်သူများ မိမိတို့ထက်အလွန်မြောက်မြားလှသည်ကို သိလျက်၊ ထိုအဖွဲ့၏ရှင်ဘုရင်ဖြစ်သည့် အလျောက်၊ မိမိလူမျိုးတို့အား ထိုပြည်၏မြောက်ဘက်အစွန်းဆုံးအရပ်သို့ ထွက်ပြေး၍၊ သဘောကွဲလွဲသောသူတို့နှင့်ပူးပေါင်းသည့် အချိန်အထိ၊ (သဘောကွဲလွဲသောသူ များစွာရှိလိမ့်မည်ဟု သူမြောက်ပင့်၍ ပြောဆိုခဲ့သောကြောင့်) ထိုအရပ်၌ သူတို့ကိုယ်တိုင်အတွက် နိုင်ငံတစ်ခုကို တည်ဆောက်ရမည့်အကြောင်း အမိန့်ပေး၏။ သူတို့သည်လည်း လူတို့၏မျိုးနွယ်စုတို့ကို တိုက်ခိုက်ရန် လုံလုံလောက်လောက် အားကြီးလာကြ၏။ မိန့်သည့်အတိုင်းလည်း ပြုကြ၏။
၁၃ သူတို့၏ချီတက်ခြင်းမှာလည်း အလွန်မြန်ဆန်လှ၍၊ သူတို့ကို လူတို့ မိနိုင်သည့်နေရာကိုလွန်သည့်တိုင်အောင် မဟန့်တားနိုင်ကြ။ ထိုကဲ့သို့အားဖြင့် သုံးဆယ်နှစ်မြောက် ကုန်ဆုံး၏။ ဤရွေ့ကား၊ နီဖိုင်းလူမျိုးတို့၏ အမှုအမျိုးမျိုးဖြစ်လေသတည်း။
၁၄ ဤသို့အားဖြင့်အချိန်တန်လာသောအခါ၊ သုံးဆယ်တစ်နှစ်မြောက်၌၊ သူတို့သည် လူတိုင်း သူ့မိသားစု၊ ဆွေမျိုးနှင့် အဆွေခင်ပွန်းတို့အလိုက် မျိုးနွယ်စုများအဖြစ်သို့ ကွဲပြားကြ၏။ သို့သော်လည်း၊ သူတို့သည် အချင်းချင်းစစ်တိုက်လိမ့်မည်မဟုတ်ဟု သဘောတူကြ၏။ သို့ရာတွင်၊ သူတို့၏ဥပဒေများနှင့် သူတို့၏အာဏာစက်အမျိုးအစား၌ မညီညွတ်ကြ။ အကြောင်းမူကား၊ ထိုအရာတို့ကို သူတို့၏အကြီးအမှူးများနှင့် သူတို့၏အကြီးအကဲများ၏ စိတ်သဘောအတိုင်း တည်ထောင်ထား၏။ သို့ရာတွင်၊ မျိုးနွယ်စုတစ်စုမှ တခြားတစ်စုအား ဆန့်ကျင်၍မလွန်ကျူးနိုင်စေခြင်းငှာ၊ အလွန်တင်းကျပ်သော ဥပဒေများကို တည်ထောင်ကြသဖြင့်၊ ထိုပြည်၌ ငြိမ်းချမ်းခြင်းအတော်အတန်ရရှိ၏။ သို့သော်လည်း၊ သူတို့၏စိတ်နှလုံးမှာ၊ သူတို့၏ဘုရားသခင်ကိုယ်တော်ရှင်ထံမှ စွန့်ခွာ၍၊ သူတို့သည် ပရောဖက်တို့ကို ကျောက်ခဲ့နှင့်ပစ်ကြ၊ သူတို့ကြားမှ နှင်ထုတ်ကြ၏။
၁၅ ဤသို့အားဖြင့်အချိန်တန်လာသောအခါ၊ နီဖိုင်းသည်—ကောင်းကင်တမန်များနှင့် ကိုယ်တော်ရှင်၏အသံအားဖြင့်လည်း အကြည့်အရှုကြွရောက်တော်မူသည်ကို ခံရလျက်၊ ထို့ကြောင့်၊ ကောင်းကင်တမန်တို့ကို မြင်ရလျက်၊ မျက်မြင်သက်သေဖြစ်လျက်၊ ခရစ်တော်၏ အမှုတော်ဆောင်ခြင်းအကြောင်းကို သူသိနိုင်စေခြင်းငှာ သူ့ကိုပေးထားသောတန်ခိုး ရှိလျက်၊ ထို့အတူ၊ ဖြောင့်မတ်ခြင်းမှနေ၍ ဆိုးညစ်ခြင်းနှင့် စက်ဆုပ်ရွံရှာဖွယ်အမှုများဆီသို့ သူတို့၏ လျင်မြန်စွာပြန်လှည့်ခြင်းကို မျက်မြင်သက်သေဖြစ်လျက်၊
၁၆ ထို့ကြောင့်၊ သူတို့စိတ်နှလုံး၏မာကျောခြင်းနှင့် သူတို့၏အသိစိတ်ကွယ်ခြင်းတို့ကြောင့် ဝမ်းနည်းပူဆွေးလျက်—ထိုတစ်နှစ်တည်း၌ သူတို့ထံသို့ ထွက်သွား၍၊ နောင်တရခြင်း၊ ထို့အတူ ကိုယ်တော်ရှင်ယေရှုခရစ်တော်အားဖြင့် အပြစ်များမှလွှတ်ခြင်းတို့ကို ရဲရင့်စွာ သက်သေခံစပြု၏။
၁၇ သူတို့အား များစွာသောအရာတို့ကိုလည်း သွန်သင်၏။ ထိုအရာခပ်သိမ်းကို မရေးနိုင်။ ထိုအရာတို့၏ တစ်စိတ်တစ်ပိုင်းသည်လည်း လုံလောက်မည်မဟုတ်၍၊ ထို့ကြောင့်၊ ဤကျမ်းထဲ၌ ရေးမထား။ နီဖိုင်းသည် တန်ခိုးနှင့် ကြီးစွာသောအခွင့်အာဏာတို့ဖြင့်လည်း အမှုတော်ဆောင်၏။
၁၈ ဤသို့အားဖြင့်အချိန်တန်လာသောအခါ၊ သူတို့သည် သူ့၌ သူတို့ထက် ပို၍ကြီးသော တန်ခိုးရှိသောကြောင့်ပင် သူ့ကို အမျက်ထွက်ကြ၏။ အကြောင်းမူကား၊ ကိုယ်တော်ရှင်ယေရှုခရစ်တော်အပေါ်၌ သူ၏ယုံကြည်ခြင်းမှာ အလွန်ကြီးမား၍၊ ကောင်းကင်တမန်တို့က သူ့ကိုနေ့စဉ် အမှုတော်ဆောင်ကြသောကြောင့်၊ သူ၏စကားများကို သူတို့မယုံကြည်ဘဲနေနိုင်ဖို့မှာ မဖြစ်နိုင်။
၁၉ ယေရှု၏နာမတော်အားဖြင့်၊ သူသည် နတ်ဆိုးများနှင့် ညစ်ညူးသောနတ်များကို နှင်ထုတ်၏။ သူ၏ညီကိုလည်း လူတို့က ကျောက်ခဲနှင့်ပစ်၍ သေခြင်းကို ခံစားရပြီးနောက် သေခြင်းမှပင်ထမြောက်စေ၏။
၂၀ လူတို့သည်လည်း ထိုအမှုကို ကြည့်၍မြင်လျှင်၊ သူ့တန်ခိုးကြောင့်၊ သူ့ကို အမျက်ထွက်ကြ၏။ သူကလည်း သာ၍များစွာသော အလွန်တရာအံ့ဩဖွယ်အမှုတို့ကို ယေရှု၏နာမတော်အားဖြင့်၊ လူတို့၏မြင်ကွင်း၌ ပြု၏။
၂၁ ဤသို့အားဖြင့်အချိန်တန်လာသောအခါ၊ သုံးဆယ်တစ်နှစ်မြောက် ကုန်လွန်သွား၍၊ ကိုယ်တော်ရှင်ထံသို့ ပြောင်းလဲသူ အနည်းငယ်သာရှိ၏။ သို့ရာတွင်၊ ပြောင်းလဲသမျှသောသူတို့သည် မိမိတို့ ယုံကြည်သည့် ယေရှုခရစ်တော်၌ ရှိသည့် ဘုရားသခင်၏တန်ခိုးနှင့် ဝိညာဉ်တော်အားဖြင့် အကြည့်အရှုကြွရောက်တော်မူခြင်းခံရကြောင်းကို လူတို့အား အမှန်ပင် ဖော်ပြ၏။
၂၂ နတ်ဆိုးများကို ကိုယ့်ထံမှ နှင်ထုတ်ခံရသူမှန်သမျှသည်လည်း သူတို့၏ဖျားနာခြင်းတို့နှင့် ချည့်နဲ့ခြင်းတို့မှ အနာငြိမ်းလျက်၊ ဘုရားသခင်၏ဝိညာဉ်တော် အရှိန်ဩဇာသက်ရောက်တော်မူသည်ကို ခံရ၍၊ အနာငြိမ်းကြကြောင်းကို လူတို့အား အမှန်ပင် ထင်ရှားစွာပြ၏။ သူတို့သည် နိမိတ်လက္ခဏာများကိုလည်း ပြ၍၊ လူတို့ ၌ အလွန်တရာအံ့ဩဖွယ်သောအမှုအချို့ကို ပြုကြ၏။
၂၃ ထိုကဲ့သို့အားဖြင့် သုံးဆယ်နှစ်နှစ်မြောက်သည်လည်း ကုန်ဆုံး၏။ သုံးဆယ်သုံးနှစ်မြောက်၏အစ၌လည်း နီဖိုင်းသည် လူတို့ကို ဟစ်ကြော်လျက်၊ နောင်တရခြင်းနှင့် အပြစ်များမှလွှတ်ခြင်းကို ဟောပြော၏။
၂၄ ယခုတွင်၊ ရေဖြင့် ဗတ္တိဇံမခံ၍ နောင်တရခြင်းသို့ ဆောင်ယူမခံရသူ တစ်ဦးမျှမရှိကြောင်းကို သင်တို့သတိရကြစေခြင်းငှာ ငါအလိုရှိ၏။
၂၅ ထို့ကြောင့်၊ ဤအမှုတော်ဆောင်ခြင်းအတွက် လူများကို နီဖိုင်းအားဖြင့် ခန့်အပ်ထား၍၊ သူတို့ထံသို့လာမည့် ထိုကဲ့သို့သောသူခပ်သိမ်းကို ရေဖြင့် ဗတ္တိဇံခံစေရပေမည်။ ဤအမှုသည်ကား၊ ဘုရားသခင်ရှေ့၌၊ ထို့အတူ သူတို့သည် နောင်တရ၍၊ သူတို့၏အပြစ်များမှလွှတ်ခြင်းကို ရရှိကြောင်း လူတို့ထံသို့ သက်သေနှင့် သက်သေခံချက်အဖြစ် ရှိပေ၏။
၂၆ ဤနှစ်၏အစ၌လည်း၊ နောင်တရခြင်းအလို့ငှာ ဗတ္တိဇံခံသောသူများစွာရှိ၍၊ ထိုကဲ့သို့အားဖြင့်၊ ဤနှစ်၏ကာလအများ ကုန်လွန်သွားလေသတည်း။