Icandelo 106
Isityhilelo esinikwe ngoJoseph Smith uMprofeti, eKirtland, eOhio, Novemba 25, 1834. Esi sityhilelo sijoliswe kuWarren A. Cowdery, umkhuluwa kaOliver Cowdery.
1–3, UWarren A. Cowdery ubizwa njengegosa elongameleyo lasekhaya; 4–5, UkuBuya kweSibini akuyi kubaphangela abantwana bokukhanya njengesela; 6–8, Iintsikelelo ezinkulu zilandela ukusebenza okuthembekileyo eBandleni.
1 Yintando yam okokuba isicaka sam uWarren A. Cowdery onyulwe aze amiselwe abe ngumbingeleli omkhulu owongamele ibandla lam, emhlabeni waseFreedom neengingqi ezingqongileyo;
2 Kwaye ashumayele ivangeli yam yanaphakade, aze aphakamise ilizwi lakhe aze alumkise abantu, ingabi kuphela endaweni eyiyeyakhe, kodwa kwiikhawunti ezikufuphi;
3 Kwaye anikele ixesha lakhe lonke kolu bizo lukhulu nolungcwele, ngoku endilunika yena, efuna ngenkuthalo ubukumkani bezulu nobulungisa babo, nazo zonke izinto ezi ziya kongezelelwa apho kubo; kuba umsebenzi uwufanele umvuzo wakhe.
4 Kwaye kwakhona, inene ndithi kuni, ukuza kweNkosi kusondele, kwaye kuphangela ihlabathi njengesela ebusuku—
5 Ke ngoko, bhinqani izinqe zenu, ukuze nibe ngabantwana bokukhanya, kwaye loo mhla awusayi kuniphangela njengesela.
6 Kwaye kwakhona, inene ndithi kuni, kwakukho uvuyo emazulwini xa isicaka sam uWarren waqubuda kwintonga yam yobukhosi, waza wazahlula ebuqhingeni babantu;
7 Ke ngoko, sisikelelekile isicaka sam uWarren, kuba ndiya kuba nenceba kuye; kwaye, nangona enekratshi lentliziyo, ndiya kumphakamisa njengokuba eya kuzithoba phambi kwam.
8 Kwaye ndiya kumnika ubabalo nokuqiniseka apho anokuma khona; kwaye ukuba uqhubekeka elingqina elinyanisekileyo nokuba lukhanyiso ebandleni ndimlungiselele isithsaba kwiindawo zokuhlala zikaBawo. Nkqu kunjalo. Amen.