Icandelo 137
Umbono onikwe uJoseph Smith uMprofeti, etempileni eKirtland, eOhio, Januwari 21, 1836. Ithuba lalilelokunikwa kwemimiselo ukulungiselela ubingelelo lwetimpile.
1–6, UMprofeti ubona umntakwabo uAlvin kubukumkani beselestiyali; 7–9, Imfundiso yosindiso lwabafileyo ityhiliwe; 10, Bonke abantwana basindisiwe kubukumkani beselestiyali.
1 Amazulu ayevulekile phezu kwethu, kwaye ndabona ubukumkani beselestiyali bukaThixo, nobuqaqawuli babo, nokokuba ndandisemzimbeni okanye ngaphandle andinakutsho.
2 Ndabona ubuhle obugqithileyo besango iindlalifa zobo bukumkani eziya kungena ngalo, elalinjengesangqa samadangatye omlilo;
3 Kanjalo netrone evuthayo kaThixo, kuyo kwakuhleli uYise noNyana.
4 Ndabona izitrato ezihle zobo bukumkani, obabunembonakalo yokugangathwa ngegolide.
5 Ndabona uBawo uAdam noAbraham; nobawo nomama wam; umntakwethu uAlvin, owayesele kukudala okoko walalayo;
6 Kwaye ndamangaliswa ukuba walizuza njani na ilifa kobo bukumkani, ndibona okokuba wayehambe kobu bomi phambi kokuba iNkosi yenze isandla sayo sihlanganise uSirayeli ixesha lesibini, kwaye wayengabhaptizelwanga uxolelo lwezono.
7 Njalo kweza ilizwi leNkosi kum, lisithi: Bonke abo bafe ngaphandle kolwazi lwale vangeli, ababengethe bayamkela ukuba babevunyelwe ukuhlala, baya kuba ziindlalifa zobukumkani beselestiyali bukaThixo;
8 Kanjalo bonke abaya kufa ngoku ukuya kwixesha elizayo bengenalo ulwazi lwayo, ababengebeyamkele ngeentliziyo zabo zonke, baya kuba ziindlalifa zobo bukumkani;
9 Kuba mna, iNkosi, ndiya kugweba bonke abantu ngokwemisebenzi yabo, ngokunxulumene neminqweno yeentliziyo zabo.
10 Kwaye ndabona kanjalo okokuba bonke abantwana abafa phambi kokufika kwiminyaka yokuziphendulela basindisiwe kobukumkani beselestiyali bezulu.