Icandelo 54
Isityhilelo esinikwe ngoJoseph Smith uMprofeti sisiya kuNewel Knight, eKirtland, eOhio, Juni 10, 1831. Amalungu eBandla awayehlala eThompson, eOhio, lahlukene kwimibuzo enento yokwenza nongcwaliso lwezakhiwo neempahla. Ukuzicingela nokunyoluka kwabonakala. Emva kwemishini yakhe kwiShakers (bona isihloko secandelo 49), uLeman Copley wawophula umnqophiso wakhe wokungcwalisela ifama yakhe enkulu njengendawo yelifa labaNgcwele abafikileyo bevela eColesville, eNew York. Njengesiphumo, uNewel Knight (inkokeli yamalungu awayehlala eThompson) nabanye abadala baya kuMprofeti bebuza ukuba bangaqhubekeka njani na. UMprofeti wabuza eNkosini waza wafumana esi sityhilelo, siyalela amalungu aseThompson ukuba emke kwifama kaLeman afudukele eMissouri.
1–6, AbaNgcwele bamele ukugcina umnqophiso wevangeli ukuzuza inceba; 7–10, Bamele ukuba nomonde ezinkxwalekweni.
1 Qaphela, itsho njalo iNkosi, nkqu uAlfa no-Omega, isiqalo nesiphelo, nkqu lowo wabethelelelwa izono zehlabathi—
2 Qaphela, inene, inene, ndithi kuwe, sicaka sam Newel Knight, uya kuma nkqi e-ofisini endikonyulele yona.
3 Kwaye ukuba abazalwana bakho banqwenela ukuphuncula ezintshabeni zabo, bavumele baguquke ezonweni zabo zonke, baze bazithobe ngokwenene phambi kwam kwaye betyumkile.
4 Kwaye njengomnqophiso abawenza kum abathe bawophula, nkqu kunjalo uthe waphutha kwaye awabinamsebenzi.
5 Kwaye yeha kulowo esithe esi sikhubekiso seza ngaye, kuba bekuya kuba ngcono kuye ukuba ubethe watshona enzulwini yolwandle.
6 Kodwa basikelelekile abo bathe bawugcina umnqophiso baza baqwalasela umyalelo, kuba baya kuzuza inceba.
7 Ngako oko, hamba ngoku kwaye usabe elizweni, hleze iintshaba zakho zize phezu kwakho; uze uthathe uhambo lwakho, uze wonyule lowo uya kumthanda abe yinkokeli yakho, aze akuhlawulele iimali.
8 Kwaye ngoko uya kuthabatha uhambo lwakho ukuya kwiingingqi zangasentshonalanga, kumhlaba waseMissouri, ukuya kwimida yamaLeymenayithi.
9 Kwaye emva kokuba ugqibe uhambo, qaphela, ndithi kuwe, funa indlela yokuphila enjengeyabantu, ndide ndikulungiselele indawo.
10 Kwaye kwakhona, yiba nomonde ezinkxwalekweni ndide ndize; kwaye qaphela, ndiyeza kamsinya, kwaye umvuzo wam ukum, kwaye aba bandifuna kusekutsha baya kufumana ukuphumla emiphefumlweni yabo. Nkqu kunjalo. Amen.