Icandelo 99
Isityhilelo esinikwe ngoJoseph Smith uMprofeti sisiya kuJohn Murdock, Agasti 29, 1832, eHiram, eOhio. Kangaphezu konyaka, uJohn Murdock ebethe washumayela ivangeli noxa abantwana bakhe babengenamama emva kokufa kwenkosikazi yakhe, uJulia Clapp, ngoAprili 1831—babehlala nezinye iintsapho eOhio.
1–8, UJohn Murdock ubizelwa ukubhengeza ivangeli, nabo bamamkelayo bamkela iNkosi kwaye baya kuzuza inceba.
1 Qaphelani, itsho njalo iNkosi kwisicaka sayo uJohn Murdock—ubizelwe ukuya emazweni asempumalanga ukusuka endlwini uye endlwini, ukusuka kwidolophana ukuya kwidolophana, nokusuka esixekweni ukuya esixekweni, ukubhengeza ivangeli yam yanaphakade kubo abemi bazo, phakathi kwentshutshiso nenkohlakalo.
2 Kwaye abo bamkela wena bamkela mna; kwaye baya kuba namandla okubhengeza ilizwi lam ekuqondakaliseni koMoya wam oNgcwele.
3 Kwaye abo bamkela wena njengomntwana omncinane, bamkela ubukumkani bam; kwaye banoyolo, kuba baya kuzuza inceba.
4 Kwaye nabanina ongakufuniyo akayi kufunwa nguBawo nendlu yakhe; kwaye uya kucoca iinyawo zakho kwiindawo ezifihlakeleyo ecaleni kwendlela ngokobungqina obuchasene nabo.
5 Kwaye qaphela, kwaye yabona, ndiyeza kamsinya emgwebeni, ukuqinisekisa bonke okwezenzo zabo zokungahloneli thixo abazenzileyo ngokuchasene nam, njengoko kubhaliweyo ngam emqulwini wencwadi.
6 Kwaye ngoku, inene ndithi kuwe, okokuba akufanelekanga okokuba uhambe bade abantwana bakho babe balungiselelwe, baze bathunyelwe phezulu ngokulunga kubhishophu yeZiyon.
7 Kwaye emva kweminyaka embalwa, ukuba unqwenela mna, unokunyukela kanjalo kumhlaba olungileyo, ubange ilifa lakho.
8 Ngenye indlela uya kuqhubeka ubhengeza ivangeli yam ude ube uthathiwe. Amen.