Ketilani, ʻOhaiō, 1830–38

ʻApi ʻo Niueli K. Uitenī Naʻe nofo heni ʻa Siosefa mo ʻEma ʻi ha ngaahi uike lahi hili ʻena ʻuluaki hiki mai ki Ketilani ʻi he 1831.

Faama ʻo ʻAisake Moalií Naʻe nofo heni ʻa Siosefa mo ʻEma mei Māʻasi ʻo aʻu ki Sepitema ʻo e 1831. Naʻe fakanofo heni ʻa e ʻuluaki kau taulaʻeiki lahí. Naʻe ngāue ai ʻa Siosefa ki he Liliu ʻa Siosefa Sāmitá (LSS).

Fale Koloa ʻo Niueli K. Uitenií Naʻe foaki mai heni ki he Kau Palesiteni ʻUluaki ʻo e Siasí ʻa e ngaahi kī ʻo e puleʻangá. Naʻe ʻuluaki kamata ʻi heni ʻa e Akoʻanga ʻo e Kau Palōfitá. Naʻe fakaʻosiʻosi heni ʻa e ngāue ki he LSS ʻi he 1833. Naʻe nofo heni ʻa Siosefa mo ʻEma mei he 1832 ki he 1833. Naʻe maʻu heni ʻe Siosefa ha ngaahi fakahā lahi.

Fale Tali-fononga ʻo Sione Sionisoní Naʻe ui heni ʻa Siosefa Sāmita, ko e Lahí ko e ʻuluaki Pēteliake ʻo e Siasí ʻi he 1833. Naʻe ʻi he fale tali-fonongá ʻa e ʻōfisi paaki ʻi Ketilaní. Naʻe pulusi ʻi heni ʻa e nusipepa The Evening and the Morning Star, hili hono fakaʻauha ʻo e fale paaki ʻi he Vahefonua Siakisoni, ʻi Mīsulí. Naʻe mavahe atu mei heni ʻa e Kau ʻAposetolo ʻe Toko Hongofulu-Mā-Uá ʻi heʻenau ʻuluaki ngāue fakafaifekaú ʻi he ʻaho 4 ʻo Mē 1835.

ʻApi ʻo Siosefa Sāmita, ko e Siʻí Naʻe nofo ʻi heni ʻa Siosefa mo ʻEma mei he 1834 ki he 1837. Naʻe kamata heni hono liliu ʻo e tohi ʻa ʻĒpalahamé.

ʻŌfisi Paaki Naʻe fai ʻi he fale ko ʻení ʻa e Lectures on Faith (Ngaahi Malanga Fekauʻaki mo e Tuí). Naʻe ui pea fakanofo heni ʻa e Kau ʻAposetolo ʻe Toko Hongofulu-Mā-Uá mo e Kōlomu ʻUluaki ʻo e Kau Fitungofulú. Naʻe pulusi ʻi heni ʻa e Tokāteline mo e Ngaahi Fuakavá (ʻuluaki pulusí), ko e Tohi ʻa Molomoná (pulusi hono 2), nusipepa ko e The Evening and the Morning Star, Latter Day Saints’ Messenger and Advocate, pea mo e ngaahi ʻuluaki tatau ʻo e Elders’ Journal.

Temipale Ketilaní Ko e ʻuluaki temipale ʻeni ʻi he kuonga ko ʻení. Naʻe hā mai ʻa Sīsū Kalaisi ʻo tali ʻa e temipalé. Naʻe hā mai ʻa Mōsese, ʻIlaiase, mo ʻIlaisiā ʻo fakafoki mai ʻa e ngaahi kī ʻo e lakanga taulaʻeikí (vakai ki he T&F 110). Naʻe toe fai foki heni ʻa e ako ʻa e Akoʻanga ʻo e Kau Palōfitá. Ko e ngaahi fakahā ʻeni naʻe maʻu ʻi heni: T&F 109, 110, 137.

Ketilani (ʻoku ʻikai fakapapauʻi hono tuʻungá) Naʻe tali ʻi he ʻaho 17 ʻo ʻAokosi 1835 ʻa e Tokāteline mo e Ngaahi Fuakavá ke hoko ko ha tohi folofola. ʻOku kau ʻi he ngaahi fakahā naʻe maʻu ʻi Ketilaní ʻa e T&F 41–50, 52–56, 63–64, 102–104, 106–110, 134, mo e 137. ʻOku fakamahinoʻi mai ʻe he vahe 104 ha ngaahi koloa ʻe niʻihi ʻa ia ʻe lava ʻo foaki ki he kāingalotu ʻo e Siasí ʻa ia naʻa nau kau ki he lao ʻo e meʻa tahá ke hoko ko honau lakanga tauhi (vakai ki he veesi 19–46).