Ngaahi tā ʻo e Ngaahi Feituʻu ʻi he Hisitōlia ʻo e Siasí

ʻOku fakaʻaliʻali atu ʻe he ngaahi tā ko ʻeni ʻo e ngaahi feituʻu mahuʻinga ʻi he hisitōlia ʻo e Siasí ʻa e ngaahi feituʻu fonua naʻe fefonongaʻaki holo ai ʻa e Kau Māʻoniʻoni ʻi he Ngaahi ʻAho Kimui Ni ʻi muʻá, pea nofo mo akonaki ai ʻa e kau palōfita ʻo onopōní, pea naʻe hoko ai ha ngaahi meʻa fakafolofola lahi. ʻOku ʻoatu fakataha mo e tā taki taha ha kiʻi fakamatala nounou ke tokoni atu kiate koe ʻi hoʻo akó. ʻOku hoa ʻa e fika ʻo e fakamatalá mo e ʻuluʻi fakamatalá mo e tā ko ia ʻoku fika mo ʻuluʻi fakamatala tatau mo iá. ʻOku hanga ʻe he ʻuluaki palakalafi ʻi lalo ʻi he ʻuluʻi fakamatalá ʻo fakamatalaʻi ʻa e feituʻu ʻo e tā ko iá, pea ʻoku kau ai ʻa e ngaahi meʻa mahuʻinga ke te vakai ki ai, pea mo e tafaʻaki ʻoku hanga ki ai ʻa e tokotaha faitaá. Hili ia ʻoku hoko hake leva ʻa e ngaahi meʻa mahuʻinga taha naʻe hoko ʻi he folofolá ʻi he feituʻu ko iá, fakataha mo e ngaahi potufolofolá koeʻuhí ke ke lava ʻo ʻiloʻi ʻa e feituʻu ke ke lau mei ai ke ʻilo ha ngaahi fakamatala lahi ange ʻo kau ki he ngaahi meʻa naʻe hoko ko iá.