2. Moʻunga Komolá mo e Feituʻu Manisesitā-Palemailá

ʻOku hanga fakatokelau, pea ʻoku hā ʻi he tā ko ʻení ʻa e Moʻunga Komolá, ʻi Manisesitā, ʻi Niu ʻIoke. ʻOku kamata ʻa e kiʻi moʻungá ʻi he tafaʻaki toʻomataʻu ki lalo ʻo e taá pea lele mei ai ki ʻolunga ʻo laka siʻi hake ʻi he vaeua mālie ʻo e taá. Ko e maka fakamanatu hinehina ko ia ʻoku ʻasi ofi hake ki he tumutumu ʻo e moʻungá ko hono fakamanatu ia ʻo e ʻāngelo ko Molonaí pea mo hono ʻomi ʻo e Tohi ʻa Molomoná. ʻOku tuʻu ʻa e Moʻunga Komolá ʻi ha kilomita ʻe nima ki he tonga-hahake ʻo e Vao ʻAkau Tapú. ʻOku hā mai ʻi he tafaʻaki ki ʻolunga ʻo e taá ʻa Palemaila ʻa ia ʻoku kilomita ʻe ono mo e konga ki ai. ʻOku ʻasi mei he tafaʻaki toʻohema ki ʻolunga ʻo e taá ʻa e faama ʻa e fāmili Sāmitá mo e Vao ʻAkau Tapú.

Ngaahi Meʻa Mahuʻinga naʻe Hoko aí: Naʻe nofo ʻa e fāmili ʻo e Palōfita ko Siosefa Sāmitá ʻi he feituʻu ko ʻení ʻi he taimi ʻo e ʻUluaki Mata Meʻa-hā-maí (SS—H 1:3). Naʻe hanga ʻe Molonai ʻo tanu ʻa e ngaahi peleti koula ʻa ia ʻoku ʻi ai ʻa e hisitōlia ʻo hono kakaí ʻi he taʻu T.S. 421 ʻi he Moʻunga Komolá (Ng. Lea ʻa M. 1:1–11; Molom. 6:6; Molonai 10:1–2). Naʻe fakahā ʻe he Molonai pē ko iá kia Siosefa Sāmita ʻa e feituʻu te ne maʻu ai ʻa e ngaahi peletí—ki he fakatokelau ʻo e moʻunga, ʻi he faʻahi fakahihifo, ʻo ofi ki hono tumutumú. Naʻe foaki mai ʻa e ngaahi peletí ʻe Molonai kiate ia ʻi he 1827 (T&F 27:5; 128:20; SS—H 1:33–35, 51–54, 59).