M̧ool Indeeo

Ālkin an kōrā eo ippa, Anne, im n̄a bōk juon kūr n̄an jerbal in mijenede, baam̧le eo aō ekar ļōmņak in jeļā kajjien etan aolep mijenede ro m̧okta jen am̧ tōparļo̧k mijen eo. Kōm kar būki pija ko, kaat ko, im jino jeļā kajjein mejeer im keememej etaer.

Ke kōm̧ij tōparļo̧k, kōm kar kōm̧m̧ane juon kweilo̧k in ba kajjien ippān mijenede ro. Ilo am̧ kar iiaio̧, iaar ron̄ ainikien ļaddik eo nejum̧ ratimjuon an iiō:

“M̧ōņōņō in lo eok, Sam!”

“Rachel, kwoj jān ia?”

“Wow, David, kolukkuun aetok!”

Ebōd, iaar ilo̧k im unoojdikdik n̄an ļaddik eo nejum̧, “a, jen keememej im kūr mijenede ro Elder ak Sister.”

Eaar kōmediki tok mejen im ba, “baba, ikar ļōmņak jej kajjieon̄ keememej etaer.” Ļaddik eo nejum̧ ekar kōm̧m̧ane ta eo ejim̧we pedped ioon an jeļā.

Kōn menin, ta jeļā eo ad kōn m̧ool eo ilo laļin rainin? Emakijkij ad leļo̧k kāālet ko reppen, riboot in meļeļe ko, im data ko rejjan̄in dedeļo̧k. Ilo ejja iien eo wōt, jon̄an eo im kein jipan̄ ko an meļeļe kein rej ļapļo̧k wōt. Ilo ad aikuj kile m̧ool in ejjañin kar lukkuun aorōk.

Elukuun aorōk bwe jen jinoe im kōkajoorļo̧k jem̧jerā eo ad ippān Anij, pukōt aenōm̧m̧an im m̧ōņōņō, n̄an tōpar aorōk eo ad ekwojarjar. Rainin, jen ļōmņaki kajjitōk kein ilaļ:

• Ta in m̧ool, im etke eaorōk?

• Elmen ad lo m̧ool?

• N̄e jej lo m̧ool, elmen ad leto letak?

Irooj eaar katakin kōj ilo jeje ko rekwojarjar bwe, “m̧ool ej jeļāļo̧kjeņ kōn men ko āinwōt aer kiiō, im āinwōt aer kar waļo̧k, im āinwōt aer naaj waļo̧k tokālik” (Katak im Bujen Ko 93:24). Ekar “jab kōm̧anm̧an ak kōm̧m̧an” (Katak im Bujen Ko 93:29) im “ejjeļo̧k jemļo̧kkin” (Katak im Bujen Ko 88:66).¹ M̧ool ejejjet, pen, im ban oktak. Ilo bar jet naan, m̧ool ej indeeo.²

M̧ool ej jipan̄ kōj bōbrae m̧ōņ,³ jeļā em̧m̧an jen nana,⁴ bōk kōjparok,⁵ n̄an lo aenōm̧m̧an im kōmour.⁶ M̧ool emaron̄ bar tōlļo̧k kōm̧m̧an ko ad,⁷ kanemkwoj kōj,⁸ kokwojarjar kōj,⁹ im tōlļo̧k kōj n̄an mour indeeo.¹⁰

Anij ej kwaļo̧k m̧ool indeeo n̄an kōj kōn network of revelatory relationships ekoba E Make, Jisōs Kraist, Jetōb Kwojarjar, rikanaan ro, im kōj. In m̧ōk kōmeļeļeik jerbal kein rejenoļo̧k kōn ro rej bōk kuņaer ilo menin.

Juon, Anij ej unjen m̧ool indeeo.¹¹ E im Nejin, Jisōs Kraist,¹² ewōr aer meļeļe eweppān kōn m̧ool im aolep iien jerbal ilo aenōm̧m̧an ippān katak im kien ko rem̧ool.¹³ Kajoor in ej kōtļo̧k Er bwe ren kōm̧m̧ane im tōl laļ ko¹⁴ barāinwōt n̄an iakwe, tōl, im kōkaajririik kajjojo iaad ilo jejjet.¹⁵ Rekōņaan bwe jen meļeļe im bōk m̧ool bwe jen maron̄ m̧ōņōņō kōn kōjeraam̧m̧an ko āinwōt Er.¹⁶ Remaron̄ leļo̧k m̧ool n̄an armej ak, bar juon wāween, jen rileļo̧k ennaan āinwōt Jetōb Kwojarjar, enjel ro, im rikanaan ro remour.

Kein karuo, Jetōb Kwojarjar ej kam̧ool kōn aolep m̧ool.¹⁷ Ej kajju kwaļo̧k m̧ool ko n̄an kōj im kam̧ool m̧ool eo kar kwaļo̧ke jen ro jet. Eñjake ko jen Jetōb ekkā aer itok āinwōt kōļmenļo̧kjeņ ilo ļōmņak ko ad im eñjake ilo būruwōd.¹⁸

Kein kajilu, Jisōs Kraist eaar bōk m̧ool in jān Anij n̄an kwaļo̧k m̧ool eo n̄an kōj.¹⁹ Jej katak m̧ool eo jen rikanaan ro m̧okta ilo jeje ko rekwojarjar²⁰ im jen rikanaan ro remour ilo kweilo̧k eo eļap im ilo kilen leto letak naan ko.

Āliktata, kwe im n̄a jej kōm̧m̧ane juon m̧ōttan elukkuun aorōk ilo jerbal in. Anij ekōņaan bwe jen kappukote, kile, im jerbal ilo m̧ool. Maron̄ eo ad n̄an bōk im mour kake m̧ool ej pedped ioon kajoor in jem̧jerā eo ad ippān Jemed im Nejin, uwaak eo ad n̄an im̧we eo an Jetōb Kwojarjar, im ad juon wōt ippān rikanaan ro ilo raan kein āliktata.

Jej aikuj in keememej bwe jerbal eo an Setan ej n̄an bōk kōj jān m̧ool in. E ejeļā bwe n̄e ejjeļo̧k m̧ool, jeban bōk mour indeeo. Ej kapok m̧ool eo kōn katak ko an laļin im kapo kōj jān ta eo Anij ekar ba.²¹

Ilo ad pukot m̧ool indeeo,²² kajjitōk kein ruo renaaj jipan̄ kōj kile elan̄n̄e juon karōk ej itok jān Anij ak jen bar juon jikin:

• Karōk kein emakijkij ke aer kwaļo̧ki jen jeje ko rekwojarjar im jān rikanaan ro remour?

• Katak eo ej ke kapen m̧ool eo an Jetōb Kwojarjar?

Anij ej kwaļo̧k katak ko rem̧ool n̄an rikanaan ro an, im Jetōb Kwojarjar ej kapen m̧ool ko n̄an kōj im jipan̄ kōj mour kaki.²³ Jej aikuj kapukot im keppopo n̄an bōk en̄jake kein an jetōb n̄e rej itok.²⁴ Epidodo an peļļo̧k kōļmenļo̧kjen ko ad n̄an kam̧o̧ol kōn Jetōb n̄e jenaaj ettā,²⁵ lukkuun m̧ool in jar im katak naan ko an Anij,²⁶ im kojparok kien ko An.²⁷

Elan̄n̄e Jetōb Kwojarjar enaaj kwaļo̧k juon m̧ool n̄an kōj, jeļāļo̧kjeņ eo ad em̧wilaļļo̧k ilo ad likūt pedped in katak im kōjerbale. Ilo jejjo iien, ilo an ikutkut ad mour kake katak ko, jej bōk juon jeļāļo̧kjen eo ejim̧we kōn m̧ool eo.²⁸

N̄an waanjon̄ak, iaar kōm̧m̧an bōd im kar en̄jake būromōj kōn kāālet ko rej jab em̧m̧an. Ak kōn jar, ekkatak, im tōmak ilo Jisōs Kraist, iaar bōk juon kam̧ool kōn katak eo kōn ukweļo̧k.²⁹ Ilo aō waanmaanļo̧k im ukweļo̧k, meļeļe eo aō kōn ukweļo̧k ekajoorļo̧k. Ikar en̄jake epaakeļo̧k n̄an Anij im Nejin. Kiiō ijeļā bwe jerawiwi emaron̄ jeorļo̧k bōd kōn Jisōs Kraist, kōnke ij en̄jake kōjeraam̧m̧an ko an ukweļo̧k kajjojo raan.³⁰

Im, ta eo jej aikuj kōm̧m̧ane n̄e jej lukkuun pukōt m̧ool meñe ejañin walok? Ewōr aō tūriam̧o kōn ro rej ikdeelel n̄an uwaak ko me rejjab itok.

N̄an Josep Smith, Irooj eaar ba, “Kwōn ikōn wōt m̧ae Aō naaj lale ekkar ke n̄an kōm̧m̧an bwe men otemjej laļ en jeļā … kaki kōn menin” (Katak im Bujen Ko 10:37).

Im n̄an Emma Smith, Eaar ba, “Jab ellotaan kōnke men ko me kwōj jan̄in loi, bwe em̧ōj dāpiji jān eok im jān laļ in, men eo emālōtlōt ilo N̄a ilo juon iien eo ej itok” (Katak im Bujen Ko 25:4).

Bar n̄a iaar pukot uwaak ko n̄an kajjitōk ko. Elōn̄ uwaak ko rekar itok; jet rejan̄in.³¹ Ilo ad dāpdep wōt—lōke meletlet im iakwe eo an Anij, pokake kien ko an An, im pedped ioon ta ko jejeļā—E ej jipan̄ kōj kapukot aenōm̧m̧an m̧ae Enaaj kwaļo̧k m̧ool an men otemjeļo̧k.³²

N̄an pukōt mool, ejipan̄ n̄an meļeļe ta oktak in ikōtaan katak im kakien. Katak ekoba m̧ool ko indeeo, āinwōt meļeļe Doulul eo an Anij, karōk in lo̧mo̧o̧r, im pinmuur in en̄taan eo an Jisōs Kraist. Kien ej pedped in katak eo kiiō. Kien ej jipan̄ kōj tōl Kabun̄ in ilo wāween eo ejim̧we.

Ilo an katak ko ban oktak, kien emaron̄ oktak jen iien n̄an iien. Jerbal eo an Irooj kōn rikanaan ro rej dāpij An katak im n̄an kakōm̧anm̧an kien ko an Kabun̄ in ekkar n̄an aikuj ko an ajri ro Nejin.

Ejerata, jet iien jej kapok kien ippān katak. N̄e jej jab meļeļe oktak eo, jej pād ilo kauwōtata n̄e kien ko ren oktak im maron̄ kajjitōkin māletlet eo an Anij ak jerbal in revelesōn eo an rikanaan ro.³³

N̄e jej bōk m̧ool jān Anij, Ej rōjan̄ kōj n̄an kwaļo̧k meļeļe in n̄an ro jet.³⁴ Jej kōm̧m̧ane menin n̄e jej katakin juon kūlaaj, tōl juon ajri, ak kōnono kōn m̧ool ko an gospel in ippān eo m̧ōttad.

Kōttōpar eo ad ej n̄an katakin m̧ool ilo juon wāween eo ej bōktok juon oktak eo em̧ool kōn Jetōb Kwojarjar³⁵ Inaaj kwaļo̧k jejjo karuwainene ko repidodo jān Irooj im rikanaan ro An me remaron̄ jipan̄.³⁶

1. Pād io̧ļapen Jemedwōj Ilan̄, Jisōs Kraist, im katak ko Aer raorōk.³⁷

2. Pād wot ilo pen ilo jeje ko rekwojarjar im katakin ko an rikanaan ro raan kein āliktata.³⁸

3. Pedped ioon katak ko kaļōki ippān rikam̧ool ro ewōr ad maron̄.³⁹

4. Ellā jen m̧ool, ļōmņak ko ad make, im ļōmņak ko an laļin.⁴⁰

5. Katakin juon meļeļe ilo juon katak eo ej konono kōn m̧ool ko an gospel in.⁴¹

6. Kōjerbale kein katakin ko rej karuwainene im̧we eo an Jetōb.⁴²

7. Kōnono ilo alikkar n̄an anjo̧ ioon jab meļeļe.⁴³

Wāween ad katakin kōn m̧ool eo elukkuun aorōk. Paul ej rōjan̄ kōj bwe jen kōnono “m̧ool ilo yokwe” (lale Epesōs 4:14–15). M̧ool em̧m̧antata n̄an kōjeraam̧m̧an ro jet n̄e ej ilo iakwe ĀinwōtKraist.⁴⁴

Kwaļo̧k m̧ool ilo ejjeļo̧k iakwe ekōm̧m̧an en̄jake ko rejekkar, ebweer, im ajimakeke. Ekkā an tōl ļo̧k n̄an dike im jenoļo̧k jān doon—aaet em̧ool jab errā. Ilo bar juōn wāween, iakwe ilo ejjeļo̧k m̧ool ejjeļo̧k kobban im elikjab kallim̧ur ko n̄an eddōkļo̧k.

Jim̧or m̧ool im iakwe rej aorōk n̄an eddōkļo̧k eo an jetōb ko ad.⁴⁵ M̧ool ej letok katak, pedped ko, im kien ko remenin aikuj n̄an bōk mour indeeo, ilo an iakwe boktok ikdeelel eo aikuji n̄an dāpij im jerbal ioon ta eo em̧ool.

Eban jako aō kam̧m̧oolol ro raar kijenmej im katakin eō kōn m̧ool indeeo ilo iakwe.

N̄an kōjemļo̧ke, kōtļo̧k bwe in kwaļo̧k m̧ool ko indeeo rekar erom̧ em̧jak n̄an jetōb eo aō. Em̧ōj aō itok n̄an jeļā m̧ool kein n̄an ļoori katak ko kōnono kaki rainin.

Ijeļā bwe Anij ej Jemedwōj Ilan̄.⁴⁶ E ejeļā aolep men,⁴⁷ aolep kajoor,⁴⁸ im iakwe eo eweppān.⁴⁹ Ekar kōm̧m̧ane juon karōk n̄an kōj n̄an bōk mour indeeo im erom̧ āinwōt E.⁵⁰

Āinwōt m̧ōttan karōk eo, E ekar jilkintok Nejin, Jisōs Kraist, n̄an jipan̄ kōj.⁵¹ Jisōs ekar katakin kōj n̄an kōm̧anm̧an ankilaan Jemen⁵² im n̄an iakwe doon.⁵³ E ekar pinmuur kōn jerawiwi ko ad⁵⁴ im letok mour eo An ilo ioon debwāāl.⁵⁵ E ekar jerkakpeje jen mej ālkin jilu raan.⁵⁶ Kōn Kraist im tūriam̧o eo An, jenaaj jerkakpeje,⁵⁷ jemaron̄ jeorļo̧k ad bōd,⁵⁸ im jemaron̄ loe kajoor ilo apan̄.⁵⁹

Ilo iien kar jerbal in karejar eo An ilo laļin, Jisōs ekar kajutak Kabun̄ eo An.⁶⁰ Ālikin elōn̄ iiō ko, Kabun̄ in ekar oktak, im m̧ool ko rekar jako.⁶¹ Jisōs Kraist ekar kōjeplaaktok Kabun̄ eo An im m̧ool ko an gospel in n̄an Rikanaan Josep Smith.⁶² Im rainin, Kraist ej waanmaanļo̧k n̄an tōl Kabun̄ in An jen rikanaan im rijilōk ro remour.⁶³

Ijeļā bwe ilo ad itok n̄an Kraist, jenaaj “weeppān ilo E,” (Moronai 10:32), bōk “tarlep in lan̄lōn̄;” (Katak im Bujen Ko 93:33), im bōk “aolep men ko an Jema” (Katak im Bujen Ko 84:38). Kōn m̧ool kein ij lukkuun kam̧ool ilo etan Jisōs Kraist, amen.