Paotok Kwojarjar im Mejān Kajjik Indeeo eo Am̧

Sister ro rejitōn bōro, kom̧ em̧m̧ool kōn ami pād ijin. Ij utiej n̄an bōk kuņaō ilo m̧wen̄an in an kōrā ro an kweilo̧k eo eļap. Ilo juon iien ikar barāinwōt utiej n̄an pād ilo kūlaaj ko an Doulul eo an Jiron̄ ro. Bōtaab in kwaļo̧k juon men ealikkar—Ijjab juon jiron̄, im ijjab juon kōrā! Ikar ekkatak, ijo wōt ke, bwe ij en̄jake an dikļo̧k aō jab uwaan eļan̄n̄e imaron̄ riiti ilo aō jab lale unin tōl eo an Doulul eo an Jiron̄ ro ippān jiron̄ ro. Katak eo eļap kar katakin ilo unin tōl eo an Doulul eo an Jiron̄ ro¹ ej aorōk n̄an jiron̄ ro, bōtaab ej jerbal n̄an aolep, ekoba kōj ro me rejjab jiron̄ ro.

Unin Tōl eo an Doulul eo an Jiron̄ ro ej ijjino kōn, “N̄aij juon leddik jitōn bōro nejin jemād im jined ilan̄, kōn juon piktok ekwojarjar im mejānkajjik indeeo.”² Ennaan in epād ie emān m̧ool ko raorōk. Juon, kwoj juon nejin leddik jitōn bōro. Ejjeļo̧k men kwoj kōm̧m̧ane—ak jab kōm̧m̧ane—emaron̄ ukōt men in. Anij ej iakwe eok kōnke kwoj leddik in jetōb Nejin. Jet iien jemaron̄ jab en̄jake iakwe eo An, bōtaab ej aolep iien pād. Iakwe eo an Anij ej weppāān.³ Maron̄ eo ad emaron̄ jab en̄jake iakwe jab in.

Jetōb eo ej kōm̧m̧ane juon jerbal aorōk ilo kwaļo̧k iakwe eo an Anij n̄an kōj.⁴ Kōn menin kareel eo an Jetōb Kwojarjar maron̄ jab kile “jān en̄jake ko rekajoor, ko āinwōt illu, kōjdāt … [ak] mijak, … āinwōt kajjieon̄ nemake nām eo ejōkajoor an juon grape ilo ami kan̄e juon peppa aļpineo. … [Juon nām] ekajoorļo̧k jān nām eo juon.”⁵ Menin barāinwōt, m̧wil ko me rōkōttoļo̧k kōj jān Jetōb Kwojarjar eo, ekoba jerawiwi,⁶ ekōm̧m̧an an pen n̄an kile iakwe eo an Anij n̄an kōj.

Āinļo̧k wōt, en̄jake eo ad kōn iakwe eo an Anij emaron̄ katinaad kōn jekjek ko reppen im nan̄inmej in kanniōk ak kōļmenļo̧kjeņ, ibwilijin men ko jet. Ilo aolep jekjek kein, kapilōk eo an ritōl ro lōke ak ritijem̧ļo̧k ro emaron̄ emakijkij an kōjeraam̧m̧an. Jemaron̄ barāinwōt kajjieon̄ kōkkōm̧anm̧anļo̧k ad bōk iakwe eo an Anij kōn kajitikin kōj make, “Iakwe eo aō n̄an Anij ej ke jab oktak ak ij ke iakwe E n̄e raan ko aō rem̧m̧an ak ejjab kanooj n̄e ejjab em̧m̧an raan ko aō?”

M̧ool kein karuo ej bwe ewōr jined im jemād ilan̄, juon jemān im juon jinen.⁷ Katak eo an juon Jined Ilan̄ ej itok kōn revelesōn im ej juon tōmak emakeļo̧k ibwilijin Armej ro Rekwojarjar ilo Raan-ko Āliktata. Būreejtōn Dallin H. Oaks ekar kōmeļeļeik aorōk eo an m̧ool in: “Katak eo ad ej jino ippān ro jemād im jined ilan̄. Kōjatdikdik eo an eutiej tata ej n̄an erom āinwōt er.”⁸

Elukkuun dik kar kwaļo̧k kōn Jined ilo Lan̄, bōtaab ta eo jejeļā ej kwaļo̧k ilo tukadu in ilo gospel topic eo loi ilo Gospel Library application eo ad.⁹ N̄e em̧ōj ami riiti ta eo ej pād ijo, kom̧ naaj jeļā aolep men me ijeļā kōn unin kōnono in. Iakwe n̄e in kar jeļā eļapļo̧k. Kom̧ barāinwōt maron̄ in wōr wōt kajjitōk im kōņaan kappukōt elōn̄ļo̧k uwaak ko. Pukōt eļapļo̧k meļeļe ej juon m̧ōttan aorōk an eddōkļo̧k ilo jetōb eo ad, ak jouj im mejmej karuo. Unin ejjab maron̄ bōk jikin revelesōn.

Kajjidede ejjāmin naaj tōlļo̧k n̄an jeļā eļapļo̧k ilo jetōb, bōtaab emaron̄ in tōlļo̧k n̄an m̧oņ ak kōjaaļo̧k jibadbad eo ad jān ta eo kar kwaļo̧ke.¹⁰ N̄an waanjon̄ak, Rilo̧mo̧o̧r eo ekar katakin rikaļoor ro An, “Iien otemjej jar n̄an Jema ilo eta.”¹¹ Jej ļoor jon̄ak in im tōl kabun̄-jar eo ad n̄an Jemedwōj Ilan̄ ilo etan Jisōs Kraist im jab jar n̄an Jined Ilan̄.¹²

Jān ke Anij ekar jitōn̄ rikanaan ro, kar kōmālim er n̄an kōnono ilo Etan. Bōtaab rejjab kwaļo̧k katak ko n̄an ejaki “kōn [aer] make pepe”¹³ ak katakin ta eo ejjan̄in de kwaļo̧k. Ļōmņak kōn naan ko an rikanaan eo ilo Kallim̧ur M̧okta Balaam, eo kar leļo̧k n̄an e juon menin wiaik bōro n̄an kaje RiIsrael ro n̄an kōjeraam̧m̧an Moab. Balaam ekar ba, “Eļan̄n̄e [kiin̄ in Moab eo] enaaj letok m̧weo im̧ōn e obrak kōn silver im gold, i ban ilo̧k jān naan eo an Jeova aō Anij, im kōm̧m̧an e dik ak eļap jān e.”¹⁴ Rikanaan ro ilo raan ko āliktata ewōr ippāer ejja mo kein wōt. Kajjitōk in kowadon̄ revelesōn jān Anij ej jim̧or kabbwil im jakkūk. Ijello̧kin, jej kōttar Irooj im iien eo An n̄an kwaļo̧k m̧ool ko An kōn jekjek ko me Ekar ejaki.¹⁵

M̧ool eo kein kajilu ilo perokūrāāp eo im̧aan an unin tōl eo an Doulul eo an Jiron̄ ro ej bwe ewōr ippād “juon piktok ekwojarjar.” Menin ej juon paotok aorōk kōn wōn kōj. Ej juon “bōdan̄,” ilo jetōb kar bōke jān jemād im jined ilan̄,¹⁶ im ejjeļo̧k men aikuji jān kōj. Menin ej paotok eo ad aorōk tata, jekdo̧o̧n ekōjkan ad kāālet n̄an kwaļo̧k kadkadid make. Meļeļe m̧ool in eļap ej aorōk n̄an aolep bōtaab eļap tata n̄an kajjojo armej ro me rej uwaan kumi ko me ilo bwebwenato raar kōjaorōk, jipede, ak peek. Keememej bwe kōjellūm̧ ej aorōk tata ej iookļo̧k paotok kwojarjar eo am̧ āinwōt juon nejin Anij.

M̧ool eo kein kemen ej bwe ewōr ippād juon “mejānkajjik indeeo.” Kain mejānkajjik in ejjāmin naaj letok n̄an kōj ilo anemkwoj. Ālkin mej, jenaaj bōk ta eo kar kajetjet n̄an kōj im “lan̄lōn̄ [wōt] ioon men eo me [jej] kōņaan bōke.”¹⁷ Kile mejānkajjik indeeo eo ad ej pedped ioon kāālet ko ad. Ej aikuji kōm̧m̧an im kōjparok bujen ko rekwojarjar ad. Iaļ in bujen in ej iaļ eo jemaron̄ itok n̄an Kraist im ej pedped ioon kien eo elukkuun m̧ool, indeeo, ejjab oktak. Jejjab maron̄ ejake iaļ eo ad make im kōtmene tōprak ko kar kallim̧ur kaki an Anij. N̄an kōtmene kōjeraam̧m̧an ko An ilo jab ļoor kien ko indeeo me rej pedped ioon¹⁸ ej tōl pilo, āinwōt ļōmņak jemaron̄ jibwe juon jitoob ebwil im “ļōmņak” bwe jeban bwil.

Kom̧ maron̄ jeļā bwe ikōn kōm̧adm̧ōde rinan̄inmej ro ewōr jorrāān in menono ippāer. Men ko rem̧m̧an tata rej waļo̧k kar būki jān ļoor karōk in kōm̧adm̧ōd ko kar ejaki, em̧ōj kam̧ool. Kōjekdo̧o̧ņ jeļā menin, jet rinan̄inmej ro raar kajjieon̄ n̄an kōnono juon karōk in kōm̧adm̧ōd eoktak. Rekar ba, “Ijjab kōņaan bōk elōn̄ uno ko” ak “Ijjab kōņaan kōm̧m̧ane elōn̄ teej ko ālkin bar juon.” Aaet, rinan̄inmej ro raar anemkwoj n̄an kōm̧m̧ani jokāālet ko aer make, bōtaab eļan̄n̄e raar etal jān karōk in kōm̧adm̧ōd ko rem̧m̧an tata, tōprak ko aer raar jorrāān. Rinan̄inmej ro ewōr aer jorrāān menono ippāer reban maron̄ kāālet juon iaļ enanaļok innām ņa ruon taktō in menono eo aer kōn tōprak eo enana.

Ejja āinwōt in em̧ool n̄an kōj. Iaļ eo Jemed Ilan̄ ekar kōm̧m̧an ej tōlļo̧k n̄an tōprak indeeo ko rem̧m̧an tata. Jej anemkwoj n̄an kāālet, bōtaab jejjab maron̄ kāālet kaje ko an jab ļoor iaļ eo kar kwaļo̧k.¹⁹ Irooj ekar ba, “Men eo ej rupe juon kien, im jab mour ekkar n̄an kien, ak kappukot n̄an erom juon kien n̄an e make, … ej jab maron̄ kokwōjarjar e jān kien, im jab jān tūriam̧okake, jim̧we, ak ekajet.”²⁰ Jejjab maron̄ ilo̧k jān iaļ eo an Jemedwōj Ilan̄ innām ņa Ruōn kōn tōprak ko reddik.

Pārokūrāāp eo kein karuo ilo unin tōl eo an Doulul eo an Jiron̄ ro ej ba: “Āinwōt juon rikaļoor an Jisōs Kraist, Ij kajjieon̄ n̄an eromļo̧k āinwōt E. Ij kappukōt im jerbale revelesōn an juon make im jerbal in karejar n̄an ro jet ilo Etan ekwojarjar.” Jemaron̄ kaddōkļo̧k juon naan in kam̧ool kōn Jisōs Kraist kōn jerbal ilo tōmak.²¹ Jemaron̄ bōk menin letok eo in jetōb “n̄an jeļā bwe Jisōs Kraist ej Nejin Anij, im bwe kar dōbwāāle kōn jerawiwi ko an laļ.” Ak jemaron̄ bōk menin letok eo n̄an tōmak ioon naan ko an ro me rejeļā,²² m̧ae iien jejeļā kōn kōj make. Jemaron̄ ļoor katak ko an Rilo̧mo̧o̧r im jipan̄ ro jet itok n̄an E. Ilo wāween in, jej koba Ippān ilo jerbal eo An.²³

Unin tōl eo an Doulul eo an Jiron̄ ro ej wōnm̧aanļo̧k wōt, “Inaaj jutak āinwōt juon rikam̧ool an Anij ilo aolep iien im ilo aolep men otemjeļo̧k im ilo aolep jikin.” Aolep ro uwaan Kabun̄ in rej aikuj āinwōt rikam̧ool ro an Anij,²⁴ mekarta Rijilōk ro im Jiljilimjuonn̄oul ro kar jitōn̄ er āinwōt rikam̧ool ro rejenolo̧k kōn etan Kraist.²⁵ Pijaikļo̧k juon jiāe in soccer me rikōjparok goal eo wōt ej bōbrae goal eo. An ejjeļo̧k jipan̄ jān rikkure ro jet m̧ōttan, rikōjparok goal eo ejjamin naaj bwe n̄an bōbrae goal eo, im kumi eo enaaj aolep iien luuj. Ejja wōt, aolep rej aikuji er ilo kumi eo an Irooj.²⁶

Pārokurāāp eo āliktata an unin tōl eo an Doulul eo an Jiron̄ ro ej ijjino, “Ilo aō kajjieon̄ n̄an karbōb n̄an mour eo eutiej, Ij kaorōk menin letok eo an ukweļo̧k im kappukōt n̄an em̧m̧anļo̧k kajjojo raan.” Kōnke kōn en̄taan in pinmuur eo an Rilo̧mo̧o̧r eo, jemaron̄ ukweļo̧k, ekkatak jān bōd ko ad, im jab kaje kōn er. Būreejtōn Russell M. Nelson ekar katakin: “Ebooļ armej ro rej ļōmņak ukweļo̧k ej āinwōt kaje. … Ak en̄jake in kōn kaje ej kōm̧m̧an jān Setan. Ej kajjieon̄ kabōjrak kōj jān ad reilo̧k n̄an Jisōs Kraist, eo ej jutak kōn pā ko reppeļļo̧k, kōjatdikdik im m̧ōņōņō n̄an kōmour, jeorļo̧k bōd, karreo, kōkajoorļo̧k, karreo, im kokwojarjare kōj.”²⁷

N̄e jej m̧ool in ukweļo̧k, ejjeļo̧k malen kurar ko ilo jetōb, jekdo̧o̧n ta eo jaar kōm̧m̧ane, ewi kar jon̄an an ļap, ak jete alen ad kar āliji.²⁸ To̧o̧n wōt ad ukweļo̧k im pukōt jeorļo̧k bōd kōn kōttōpar em̧ool, maron̄ jeorļo̧k ad bōd.²⁹ Juon menin letok ekabwilōn̄lōn̄ jān ad Rilo̧mo̧o̧r, Jisōs Kraist!³⁰ Jetōb Kwojarjar eo emaron̄ kam̧ool n̄an kōj bwe emōj jeorļo̧k ad bōd. Ilo ad en̄jake lan̄lōn̄ im aenōm̧m̧an,³¹ bōd ej bōkļo̧k,³² im ejako ad en̄taan kōn jerawiwi eo ad.³³

Jekdo̧o̧n ālkin juon ukweļo̧k em̧ool, mekarta, jemaron̄ tipn̄ōl. Tipn̄ōl ejjab meļeļe in bwe ukweļo̧k ekar jabwe bōtaab emaron̄ in kwaļo̧k m̧ōjņo̧ eo an armej. Ewi kaenōm̧m̧an in n̄an jeļā bwe “Irooj ej lo m̧ōjņo̧ ko eoktak jān An [lo] jum̧ae.” Jej aikuj jab pere maron̄ eo an Rilo̧mo̧o̧r eo n̄an jipan̄ kōj kōn m̧ōjņo̧ ko ad kōnke “n̄e Irooj ej kōnono kōn m̧ōjņo̧ ko, ej aolep iien kōn tiram̧o.”³⁴

Unin tōl eo an Doulul eo an Jiron̄ ro ej kōjem̧ļo̧k, “Kōn tōmak, Inaaj kōkajoorļo̧k m̧weo im̧ō im baam̧le eo aō, kōm̧m̧an im kōjparok bujen ko rekwojarjar, im bōk kain̄i ko im kōjeraam̧m̧an ko an tampeļ eo ekwojarjar.” Kōkajoorļo̧k m̧weo im baam̧le eo emaron̄ meļeļe in ejake ekkejel eo im̧aan tata ilo juon to an ritiljek, wōnm̧aanļo̧k kōn juon bwebwenato in tōmak, ak bar kōjepļaaktok .³⁵ Mekarta, kajoor eo ej itok kōn tōmak ilo Jisōs Kraist im jān kōm̧m̧ani bujen ko rekwojarjar.

Ilo tampeļ, jej ekkatak wōn kōj im ia eo jekar pād ie. Rirom philosopher eo Cicero ekar ba, “N̄an erom jajeļo̧kjeņ kōn ta eo ekar kōm̧m̧an m̧okta jān am̧ kar ļotak ej n̄an iien otemjej pād wōt āinwōt juon ajri.”³⁶ Ekar, aaet, kōnono kōn bwebwenato in kabun̄, bōtaab kapeel in ekkatak eo an emaron̄ depakpakļo̧k. Jej mour n̄an indeeo āinwōt ajri ro eļan̄n̄e jej jajeļo̧kjeņ jān kōļmenļo̧kjeņ indeeo eo kar bōke ilo tampeļ ko. Ijōņ jej eddōkļo̧k ilo Irooj, “bōk juon tarlep an Jetōb Kwojarjar eo,”³⁷ im erom lukkuun wujlepļo̧k āinwōt rikaļoor ro an Rilo̧mo̧o̧r.³⁸ Ilo ad kōjparok bujen ko ad, jej bōk kajoor eo an Anij ilo mour ko ad.³⁹

Ij kajjitōk ippāmi n̄an likūt mour eo ami ioļapļap ilo Jisōs Kraist im keememej m̧ool ko im̧aan tata ilo unin tōl eo an Doulul eo an Jiron̄ ro. Eļan̄n̄e kom̧ij m̧ōņōņō in kōm̧m̧ane, Jetōb Kwojarjar eo enaaj tōl kom̧. Jemādwōj Ilan̄ ekōņaan bwe kom̧win erom An rijolet im bōk aolep men ko An.⁴⁰ E eban maron̄ lewaj n̄an kom̧ eļapļo̧k. E eban maron̄ kallim̧uri kom̧ eļapļo̧k. E ej iakwe kom̧ eļapļo̧k jān ami jeļā im ekōņaan bwe kom̧in m̧ōņōņō ilo mour in im ilo mour eo ej itok. Ilo etan Jisōs Kraist, amen.