ແລະ ນີ້ແມ່ນຊີວິດນິລັນດອນ
ພຣະເຈົ້າຮູ້ຈັກທ່ານ ແລະ ເຊື້ອເຊີນທ່ານໃຫ້ຮູ້ຈັກພຣະອົງ.
ຂ້າພະເຈົ້າຂໍກ່າວກັບພວກທ່ານ ຄົນລຸ້ນໃໝ່—ຊາວໜຸ່ມ ແລະ ໜຸ່ມສາວ, ຜູ້ເປັນໂສດ ຫລື ແຕ່ງງານແລ້ວ—ພວກທ່ານເປັນຜູ້ນຳໃນອະນາຄົດຂອງສາດສະໜາຈັກຂອງພຣະຜູ້ເປັນເຈົ້າ. ໂດຍທີ່ມີຄວາມຊົ່ວຮ້າຍ, ຄວາມວຸ້ນວາຍ, ຄວາມຢ້ານກົວ, ແລະ ຄວາມສັບສົນຢູ່ເທິງໂລກໃນທຸກວັນນີ້, ຂ້າພະເຈົ້າຂໍກ່າວຕໍ່ພວກທ່ານດ້ວຍຄວາມແຈ້ງຊັດກ່ຽວກັບເດຊານຸພາບ ແລະ ພອນຕ່າງໆທີ່ມາຈາກການມາຮູ້ຈັກພຣະເຈົ້າ.
ພຣະເຢຊູຄຣິດໄດ້ສອນຄວາມຈິງຫລາຍຢ່າງທີ່ອະທິບາຍກ່ຽວກັບແຜນແຫ່ງຄວາມສຸກຂອງພຣະບິດາເທິງສະຫວັນ ແລະ ບົດບາດຂອງທ່ານໃນນັ້ນ. ຂ້າພະເຈົ້າຈະເຈາະຈົງໃສ່ສອງຂໍ້ທີ່ຈະຊ່ວຍທ່ານໃຫ້ເຂົ້າໃຈ ເອກະລັກ ຂອງທ່ານ ໃນຖານະທີ່ເປັນລູກຂອງພຣະເຈົ້າ ແລະ ຮູ້ຈັກ ຈຸດປະສົງ ຂອງທ່ານໃນຊີວິດນີ້.
ໜຶ່ງ: “ເພາະວ່າພຣະເຈົ້າຮັກໂລກຫລາຍທີ່ສຸດ ຈົນໄດ້ປະທານພຣະບຸດອົງດຽວຂອງພຣະອົງ ເພື່ອທຸກຄົນທີ່ວາງໃຈເຊື່ອໃນພຣະບຸດນັ້ນຈະບໍ່ຈິບຫາຍ ແຕ່ມີຊີວິດຕະຫລອດໄປເປັນນິດ.”1
ສອງ: “ນີ້ແມ່ນຊີວິດນິລັນດອນ ຄືໃຫ້ພວກເຂົາຮູ້ຈັກພຣະອົງ ຜູ້ເປັນພຣະເຈົ້າທ່ຽງແທ້ແຕ່ອົງດຽວ, ແລະ ຮູ້ຈັກພຣະເຢຊູຄຣິດ ທີ່ພຣະອົງໃຊ້ມາ.”2
ຂໍໃຫ້ເກັບເອົາຄວາມຈິງເຫລົ່ານີ້ໄວ້ໃນໃຈ—ມັນຈະສອນເຖິງເຫດຜົນ ຂະນະ—ທີ່ຂ້າພະເຈົ້າສະແຫວງຫາທີ່ຈະບັນຍາຍ ວິທີທີ່ ທ່ານ ແລະ ເຮົາທຸກໆຄົນຈະສາມາດມາຮູ້ຈັກພຣະເຈົ້າໄດ້ແນວໃດ.
ຮູ້ຈັກພຣະອົງຜ່ານທາງການອະທິຖານ
ເພື່ອນໜຸ່ມຂອງຂ້າພະເຈົ້າທັງຫລາຍ, ເຮົາເລີ່ມຮູ້ຈັກພຣະເຈົ້າໄດ້ ຜ່ານທາງການອະທິຖານ.
ເມື່ອວັນທີ 7 ເດືອນເມສາ, 1829, ອໍລີເວີ ຄາວເດີຣີ ຜູ້ມີອາຍຸ 22 ປີ ໄດ້ເລີ່ມຕົ້ນວຽກງານຂອງເພິ່ນ ໃນຖານະທີ່ເປັນຜູ້ຂຽນໃຫ້ແກ່ ໂຈເຊັບ ສະມິດ ຜູ້ມີອາຍຸ 23 ປີ. ພວກເພິ່ນຍັງໜຸ່ມ, ເໝືອນກັນກັບພວກທ່ານ. ອໍລີເວີ ໄດ້ທູນຂໍການຢືນຢັນຈາກພຣະເຈົ້າ ກ່ຽວກັບການຟື້ນຟູ ແລະ ວຽກງານຂອງເພິ່ນໃນນັ້ນ ວ່າ:
ອໍລີເວີ ຄາວເດີຣີ ໄດ້ທູນຖາມຄຳຖາມດຽວກັນນີ້ກັບພຣະຜູ້ເປັນເຈົ້າມາແລ້ວ ແລະ ພຣະຜູ້ເປັນເຈົ້າໄດ້ຕອບເພິ່ນໄປແລ້ວ. …
ພຣະຜູ້ເປັນເຈົ້າໄດ້ບອກອໍລີເວີ ວ່າບໍ່ມີຄົນໃດເລີຍນອກຈາກພຣະເຈົ້າ ທີ່ຮູ້ຈັກຄວາມນຶກຄິດ ແລະ ຄວາມເຈດຕະນາຂອງໃຈເພິ່ນ. …
… ຖ້າ ອໍລີເວີ ປາດຖະໜາການເປັນພະຍານຕື່ມອີກ, ເພິ່ນຕ້ອງນຶກເຖິງຄືນທີ່ເພິ່ນໄດ້ເອີ້ນຫາພຣະຜູ້ເປັນເຈົ້າຢູ່ໃນໃຈຂອງເພິ່ນ. …
ພຣະຜູ້ເປັນເຈົ້າໄດ້ບອກອໍລີເວີ ວ່າພຣະອົງໄດ້ກ່າວໃຫ້ຄວາມສະຫງົບແກ່ຈິດໃຈຂອງເພິ່ນແລ້ວ … . ເພິ່ນຈະບໍ່ມີພະຍານໃດທີ່ຍິ່ງໃຫຍ່ໄປກວ່າພະຍານຈາກພຣະເຈົ້າ.3
ເມື່ອ ທ່ານ ອະທິຖານດ້ວຍສັດທາ, ທ່ານຈະຮູ້ສຶກເຖິງຄວາມຮັກຂອງພຣະເຈົ້າ ເມື່ອພຣະວິນຍານກ່າວຕໍ່ຈິດວິນຍານ ຂອງທ່ານ. ບໍ່ວ່າທ່ານຈະຮູ້ສຶກໂດດດ່ຽວ ຫລື ບໍ່ແນ່ນອນໃຈຫລາຍເທົ່າໃດ ເປັນບາງຄັ້ງບາງຄາວກໍຕາມ, ແຕ່ທ່ານບໍ່ໄດ້ຢູ່ຕາມລຳພັງໃນໂລກນີ້. ພຣະເຈົ້າຮູ້ຈັກ ທ່ານ ເປັນສ່ວນຕົວ. ເມື່ອທ່ານອະທິຖານ, ທ່ານຈະມາຮູ້ຈັກ ພຣະອົງ.
ຮູ້ຈັກພຣະອົງຜ່ານທາງການສຶກສາພຣະຄຳພີ
ເມື່ອທ່ານສຶກສາພຣະຄຳພີ, ທ່ານບໍ່ພຽງແຕ່ຈະຮຽນຮູ້ ກ່ຽວກັບ ພຣະຜູ້ຊ່ວຍໃຫ້ລອດເທົ່ານັ້ນ, ແຕ່ທ່ານສາມາດ ຮູ້ຈັກ ພຣະຜູ້ຊ່ວຍໃຫ້ລອດນຳອີກ.
ໃນເດືອນເມສາ 1985, ແອວເດີ ບຣູສ໌ ອາ ມັກຄອງກີ ໄດ້ກ່າວຢູ່ໃນກອງປະຊຸມໃຫຍ່ສາມັນ—ພຽງແຕ່ 13 ມື້ ກ່ອນເພິ່ນໄດ້ເສຍຊີວິດໄປ. ເພິ່ນໄດ້ຈົບການປາໄສດ້ວຍປະຈັກພະຍານນີ້ວ່າ:
“ຂ້າພະເຈົ້າເປັນພະຍານຄົນໜຶ່ງຂອງພຣະອົງ, ແລະ ໃນວັນເວລາທີ່ຈະມາເຖິງ ຂ້າພະເຈົ້າຈະໄດ້ລູບຄຳຮອຍຕະປູໃນພຣະຫັດ ແລະ ພຣະບາດຂອງພຣະອົງ ແລະ ຈະອາບພຣະບາດຂອງພຣະອົງດ້ວຍນ້ຳຕາຂອງຂ້າພະເຈົ້າ.
“ແຕ່ຂ້າພະເຈົ້າຈະບໍ່ ຮູ້ ໃນເວລານັ້ນ ດີໄປກວ່າທີ່ຂ້າພະເຈົ້າ ຮູ້ ໃນເວລານີ້ ວ່າພຣະອົງເປັນພຣະບຸດຜູ້ຊົງລິດອຳນາດຍິ່ງໃຫຍ່ຂອງພຣະເຈົ້າ, ວ່າພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ແລະ ວ່າຄວາມລອດມີມາໃນ ແລະ ຜ່ານໂລຫິດທີ່ຊົດໃຊ້ຂອງພຣະອົງ ແລະ ບໍ່ແມ່ນຜ່ານທາງອື່ນໃດເລີຍ.”4
ພວກເຮົາຜູ້ທີ່ໄດ້ຍິນແອວເດີ ມັກຄອງກີ ກ່າວໃນວັນນັ້ນ ບໍ່ເຄີຍລືມເລີຍວ່າ ເຮົາໄດ້ຮູ້ສຶກແນວໃດ. ເມື່ອເພິ່ນໄດ້ເລີ່ມກ່າວຄຳປາໄສຂອງເພິ່ນ, ເພິ່ນໄດ້ເປີດເຜີຍວ່າ ເພາະ ເຫດໃດ ການເປັນພະຍານຂອງເພິ່ນຈຶ່ງມີພະລັງຫລາຍແທ້ໆ. ເພິ່ນໄດ້ກ່າວວ່າ:
“ໃນການກ່າວເຖິງສິ່ງທີ່ໜ້າອັດສະຈັນໃຈເຫລົ່ານີ້ ຂ້າພະເຈົ້າຈະນຳໃຊ້ຖ້ອຍຄຳຂອງຕົນເອງ, ເຖິງແມ່ນວ່າທ່ານອາດຈະຄິດວ່າ ມັນເປັນຂໍ້ຄວາມທີ່ມາຈາກຂໍ້ພຣະຄຳພີກໍຕາມ. …
“ມັນກໍຈິງ ທີ່ທຳອິດ ມັນກໍຖືກປະກາດໂດຍຄົນອື່ນໆ, ແຕ່ບັດນີ້ ມັນເປັນຖ້ອຍຄຳຂອງຂ້າພະເຈົ້າ, ເພາະພຣະວິນຍານສັກສິດຂອງພຣະເຈົ້າ ໄດ້ເປັນພະຍານຕໍ່ຂ້າພະເຈົ້າວ່າມັນຈິງ, ແລະ ບັດນີ້ມັນກໍເໝືອນສາວ່າ ພຣະຜູ້ເປັນເຈົ້າໄດ້ເປີດເຜີຍມັນຕໍ່ຂ້າພະເຈົ້າຕັ້ງແຕ່ຕົ້ນແລ້ວ. ໂດຍທາງນັ້ນ ຂ້າພະເຈົ້າ ໄດ້ຍິນ ສຸລະສຽງຂອງພຣະອົງ ແລະ ຮູ້ຈັກ ພຣະຄຳຂອງພຣະອົງ.”5
ເມື່ອທ່ານສຶກສາ ແລະ ໄຕ່ຕອງຂໍ້ພຣະຄຳພີ, ທ່ານກໍຈະໄດ້ຍິນສຸລະສຽງຂອງພຣະເຈົ້າ, ຮູ້ຈັກພຣະຄຳຂອງພຣະອົງ, ແລະ ມາຮູ້ຈັກພຣະອົງເໝືອນກັນ. ພຣະເຈົ້າຈະເປີດເຜີຍຄວາມຈິງຂອງພຣະອົງຕໍ່ທ່ານເປັນສ່ວນຕົວ. ຄຳສອນ ແລະ ຫລັກທຳເຫລົ່ານີ້ ຈະກາຍເປັນພາກສ່ວນຂອງຕົວຕົນຂອງທ່ານ ແລະ ມັນຈະມາຈາກພາຍໃນຈິດວິນຍານຂອງທ່ານແທ້ໆ.
ນອກເໜືອໄປຈາກການສຶກສາສ່ວນຕົວແລ້ວ, ການສຶກສາພຣະຄຳພີເປັນຄອບຄົວ ກໍສຳຄັນຫລາຍ.
ໃນບ້ານຂອງພວກຂ້າພະເຈົ້າ, ພວກຂ້າພະເຈົ້າຢາກໃຫ້ລູກຮຽນຮູ້ທີ່ຈະຮູ້ຈັກສຸລະສຽງຂອງພຣະວິນຍານ. ພວກຂ້າພະເຈົ້າເຊື່ອວ່າສິ່ງນັ້ນໄດ້ເກີດຂຶ້ນ ຂະນະທີ່ພວກຂ້າພະເຈົ້າໄດ້ສຶກສາພຣະຄຳພີມໍມອນເປັນຄອບຄົວແຕ່ລະວັນ. ປະຈັກພະຍານຂອງພວກຂ້າພະເຈົ້າໄດ້ຮັບການເສີມສ້າງ ຂະນະທີ່ພວກຂ້າພະເຈົ້າໄດ້ສົນທະນາກັນກ່ຽວກັບຄວາມຈິງທີ່ສັກສິດ.
ການສຶກສາພຣະຄຳພີກາຍເປັນຊ່ອງທາງສຳລັບພຣະວິນຍານ ທີ່ຈະໃຫ້ການສິດສອນແກ່ເຮົາແຕ່ລະຄົນໂດຍສະເພາະ. ເມື່ອທ່ານສຶກສາພຣະຄຳພີແຕ່ລະວັນ, ຕາມລຳພັງ ແລະ ກັບຄອບຄົວຂອງທ່ານ, ທ່ານ ຈະຮຽນຮູ້ທີ່ຈະຮູ້ຈັກສຸລະສຽງຂອງພຣະວິນຍານ ແລະ ຈະມາຮູ້ຈັກພຣະເຈົ້າ.
ຮູ້ຈັກພຣະອົງໂດຍການກະທຳຕາມພຣະປະສົງຂອງພຣະອົງ
ນອກເໜືອໄປຈາກການອະທິຖານ ແລະ ການສຶກສາພຣະຄຳພີແລ້ວ, ເຮົາຕ້ອງກະທຳຕາມພຣະປະສົງຂອງພຣະເຈົ້ານຳອີກ.
ພຣະຜູ້ຊ່ວຍໃຫ້ລອດຄືຕົວຢ່າງທີ່ດີພ້ອມຂອງເຮົາ. ພຣະອົງໄດ້ກ່າວວ່າ, “ເພາະເຮົາໄດ້ລົງມາຈາກສະຫວັນ ບໍ່ແມ່ນເພື່ອເຮັດຕາມໃຈຂອງຕົນເອງ, ແຕ່ເພື່ອເຮັດຕາມຄວາມປະສົງຂອງພຣະອົງຜູ້ທີ່ໄດ້ໃຊ້ເຮົາມາ.”6
ເມື່ອພຣະຜູ້ຊ່ວຍໃຫ້ລອດທີ່ໄດ້ຟື້ນຄືນພຣະຊົນແລ້ວ ມາປະກົດຕໍ່ຊາວນີໄຟ, ພຣະອົງໄດ້ກ່າວວ່າ, “ແລະ ຈົ່ງເບິ່ງ, ເຮົາເປັນຄວາມສະຫວ່າງ ແລະ ຊີວິດຂອງໂລກ; ແລະ ເຮົາໄດ້ດື່ມຈາກຈອກອັນຂົມຂື່ນ ຊຶ່ງພຣະບິດາໄດ້ປະທານໃຫ້ເຮົາແລ້ວ, ແລະ ຖວາຍບາລະມີພຣະບິດາໂດຍຮັບເອົາບາບຂອງໂລກມາໄວ້ກັບເຮົາ, ຊຶ່ງໃນເລື່ອງນີ້ ເຮົາໄດ້ຍອມປະຕິບັດຕາມ ພຣະປະສົງ ຂອງພຣະບິດາ ໃນທຸກສິ່ງທຸກຢ່າງ ຕັ້ງແຕ່ຕົ້ນມາ.”7
ທ່ານ ແລະ ຂ້າພະເຈົ້າ ກະທຳຕາມພຣະປະສົງຂອງພຣະບິດາໂດຍການໃຫ້ກຽດພັນທະສັນຍາຂອງເຮົາ, ໂດຍການຮັກສາພຣະບັນຍັດ, ແລະ ໂດຍການຮັບໃຊ້ພຣະເຈົ້າ ແລະ ເພື່ອນມະນຸດຂອງເຮົາ.
ຣອນດາ, ພັນລະຍາຂອງຂ້າພະເຈົ້າ ແລະ ຂ້າພະເຈົ້າມີພໍ່ແມ່ທີ່ເປັນຄົນທຳມະດາສາມັນ—ອາດເໝືອນພໍ່ແມ່ຂອງທ່ານນັ້ນແຫລະ. ແຕ່ມີສິ່ງໜຶ່ງທີ່ຂ້າພະເຈົ້າມັກຫລາຍກ່ຽວກັບພໍ່ແມ່ຂອງພວກຂ້າພະເຈົ້າກໍຄືວ່າ ພວກເພິ່ນໄດ້ອຸທິດຊີວິດຂອງພວກເພິ່ນເພື່ອຮັບໃຊ້ພຣະເຈົ້າ, ແລະ ພວກເພິ່ນໄດ້ສອນພວກຂ້າພະເຈົ້າໃຫ້ກະທຳເໝືອນກັນ.
ຕອນພໍ່ແມ່ຂອງ ຣອນດາ ຫາກໍໄດ້ແຕ່ງງານກັນເປັນເວລາສອງປີ, ພໍ່ຂອງນາງທີ່ມີອາຍຸ 23 ປີ ກໍຖືກເອີ້ນໃຫ້ໄປສອນສາດສະໜາເຕັມເວລາ. ເພິ່ນໄດ້ໄປຈາກພັນລະຍາສາວ ແລະ ລູກສາວນ້ອຍອາຍຸ 2 ປີຂອງເພິ່ນ. ແລ້ວພັນລະຍາກໍຖືກເອີ້ນໃຫ້ໄປຮັບໃຊ້ນຳເພິ່ນໃນລະຫວ່າງເຈັດເດືອນສຸດທ້າຍຂອງການເຜີຍແຜ່ຂອງເພິ່ນ—ແລະ ໄດ້ປະລູກສາວນ້ອຍຄົນນັ້ນໄວ້ໃນການດູແລຂອງຍາດພີ່ນ້ອງ.
ຫລາຍປີຈາກນັ້ນ, ຕອນມີລູກ ສີ່ຄົນ, ພວກເພິ່ນໄດ້ຍົກຍ້າຍໄປຢູ່ເມືອງ ມິຊູລາ, ລັດມອນທານາ, ເພື່ອວ່າພໍ່ຂອງນາງຈະໄດ້ເຂົ້າມະຫາວິທະຍາໄລ. ເຖິງຢ່າງໃດກໍຕາມ, ພວກເພິ່ນຫາກໍໄດ້ຢູ່ທີ່ນັ້ນພຽງສາມສີ່ເດືອນ ເມື່ອປະທານ ສະເປັນເຊີ ດັບເບິນຢູ ຄິມໂບ ແລະ ແອວເດີ ມາກ ອີ ພີເຕີເຊັນ ໄດ້ສະເໜີການເອີ້ນໃຫ້ພໍ່ຂອງນາງ ເປັນປະທານສະເຕກ ທີ່ຫາກໍຖືກຈັດຕັ້ງຂຶ້ນໃໝ່ ຂອງເມືອງມິຊູລາ. ເພິ່ນໄດ້ມີອາຍຸພຽງແຕ່ 34 ປີ. ຄວາມຄິດກ່ຽວກັບການສຶກສາທີ່ມະຫາວິທະຍາໄລນັ້ນ ກໍຖືກປະໄວ້ກ່ອນ ຂະນະທີ່ເພິ່ນໄດ້ສະແຫວງຫາທີ່ຈະກະທຳຕາມພຣະປະສົງ ຂອງພຣະຜູ້ເປັນເຈົ້າ —ແລະ ບໍ່ແມ່ນຕາມຄວາມປະສົງຂອງເພິ່ນເອງ.
ພໍ່ແມ່ ຂອງຂ້າພະເຈົ້າ ໄດ້ຮັບໃຊ້ຢູ່ໃນພຣະວິຫານ ດົນນານກວ່າ 30 ປີ—ພໍ່ເປັນຜູ້ຜະນຶກ, ແມ່ເປັນພະນັກງານພິທີການ. ພວກເພິ່ນໄດ້ຮັບໃຊ້ເປັນຜູ້ສອນສາດສະໜາເຕັມເວລາຫ້າເທື່ອ—ທີ່ ຣີເວີຊາຍ ລັດຄາລີຟໍເນຍ; ອູລານບາທາ ປະເທດມົງໂກລີ; ໄນໂຣບີ ປະເທດເຄັນຍາ; ພຣະວິຫານນາວູ ລັດອິລີນອຍ; ແລະ ພຣະວິຫານ ມອນທະເຣ ປະເທດແມັກຊີໂກ. ໃນປະເທດແມັກຊີໂກ ພວກເພິ່ນໄດ້ພະຍາຍາມຢ່າງໜັກເພື່ອຈະຮຽນພາສາໃໝ່, ຊຶ່ງບໍ່ເປັນເລື່ອງງ່າຍສຳລັບຄົນທີ່ມີອາຍຸ 80 ປີ. ແຕ່ພວກເພິ່ນໄດ້ສະແຫວງຫາທີ່ຈະກະທຳຕາມພຣະປະສົງຂອງພຣະຜູ້ເປັນເຈົ້າ ແທນທີ່ຈະໄຕ່ຕາມຫາຄວາມປາດຖະໜາໃນຊີວິດຂອງພວກເພິ່ນເອງ.
ຕໍ່ພວກເພິ່ນ, ແລະ ຕໍ່ໄພ່ພົນຍຸກສຸດທ້າຍທີ່ອຸທິດຕົນທຸກໆຄົນຕະຫລອດທົ່ວໂລກ, ຂ້າພະເຈົ້າຂໍກ່າວຢ້ຳພຣະຄຳທີ່ພຣະຜູ້ເປັນເຈົ້າໄດ້ກ່າວຕໍ່ສາດສະດານີໄຟ, ລູກຊາຍຂອງຮີລາມັນ ວ່າ: “ເຈົ້າເປັນສຸກແລ້ວ, ... ເພາະສິ່ງທີ່ເຈົ້າເຮັດໄປນັ້ນ ... ໂດຍບໍ່ຮູ້ຈັກເມື່ອຍ … , [ເພາະເຈົ້າ] ບໍ່ໄດ້ສະແຫວງຫາເພື່ອຊີວິດຂອງຕົນເອງ, ແຕ່ກະທຳຕາມຄວາມປະສົງຂອງເຮົາ, ແລະ ຮັກສາບັນຍັດຂອງເຮົາ.”8
ເມື່ອ ເຮົາ ສະແຫວງຫາທີ່ຈະກະທຳຕາມພຣະປະສົງຂອງພຣະເຈົ້າ ໂດຍການຮັບໃຊ້ພຣະອົງ ແລະ ເພື່ອນມະນຸດຂອງເຮົາຢ່າງຊື່ສັດ, ເຮົາຈະຮູ້ສຶກເຖິງຄວາມເຫັນດີເຫັນຊອບຂອງພຣະອົງ ແລະ ມາຮູ້ຈັກພຣະອົງແທ້ໆ.
ຮູ້ຈັກພຣະອົງໂດຍການກາຍເປັນເໝືອນດັ່ງພຣະອົງ
ພຣະຜູ້ຊ່ວຍໃຫ້ລອດບອກເຮົາວ່າ ສິ່ງທີ່ດີທີ່ສຸດທີ່ຈະຮູ້ຈັກພຣະເຈົ້າ ຄືການກາຍເປັນ ເໝືອນດັ່ງ ພຣະອົງ. ພຣະອົງໄດ້ສອນວ່າ: “ສະນັ້ນ ເຈົ້າຄວນເປັນຄົນແນວໃດ? ຕາມຈິງແລ້ວ ເຮົາກ່າວກັບເຈົ້າວ່າ ເຖິງແມ່ນດັ່ງທີ່ເຮົາເປັນ.”9
ການມີຄ່າຄວນແມ່ນຈຳເປັນຕໍ່ການກາຍເປັນເໝືອນດັ່ງພຣະອົງ. ພຣະອົງໄດ້ບັນຊາວ່າ ເຮົາຄວນຊຳລະຕົນເອງໃຫ້ບໍລິສຸດ; ເຮົາຄວນເຮັດໃຫ້ຫົວໃຈຂອງເຮົາບໍລິສຸດ, ແລະ ຊຳລະມືຂອງເຮົາ ... ເພື່ອວ່າພຣະອົງຈະເຮັດໃຫ້ເຮົາສະອາດ.10 ໃນການເລີ່ມຕົ້ນຂັ້ນຕອນທີ່ຈະກາຍເປັນເໝືອນດັ່ງພຣະອົງ, ເຮົາກັບໃຈ, ຮັບເອົາການໃຫ້ອະໄພຂອງພຣະອົງ, ແລະ ພຣະອົງຈະເຮັດໃຫ້ຈິດວິນຍານຂອງເຮົາສະອາດ.
ເພື່ອຊ່ວຍເຫລືອເຮົາ ຂະນະທີ່ເຮົາກ້າວໄປໜ້າຫາພຣະບິດາ, ພຣະຜູ້ເປັນເຈົ້າໄດ້ປະທານຄຳສັນຍານີ້ວ່າ ທຸກຄົນທີ່ໄດ້ປະຖິ້ມບາບຂອງຕົນ ແລະ ມາຫາພຣະອົງ, ເອີ້ນຫາພຣະນາມຂອງພຣະອົງ, ເຊື່ອຟັງສຸລະສຽງຂອງພຣະອົງ, ແລະ ຮັກສາພຣະບັນຍັດຂອງພຣະອົງ, ຈະເຫັນພຣະພັກຂອງພຣະອົງ ແລະ ຮູ້ ວ່າພຣະອົງເປັນຢູ່.11
ຜ່ານສັດທາຂອງເຮົາໃນການເສຍສະລະຊົດໃຊ້ຂອງພຣະອົງ, ພຣະຜູ້ຊ່ວຍໃຫ້ລອດຈະເຮັດໃຫ້ເຮົາສະອາດ, ປິ່ນປົວເຮົາ, ແລະ ເຮັດໃຫ້ເຮົາສາມາດ ຮູ້ຈັກ ພຣະອົງ ໂດຍການຊ່ວຍເຫລືອເຮົາໃຫ້ກາຍເປັນເໝືອນດັ່ງ ພຣະອົງ. ມໍມອນໄດ້ສອນວ່າ, “ຈົ່ງອະທິຖານຫາພຣະບິດາດ້ວຍສຸດພະລັງແຫ່ງໃຈ, ... ເພື່ອທ່ານຈະໄດ້ກາຍເປັນບຸດ [ແລະ ທິດາ] ຂອງພຣະເຈົ້າ; ເມື່ອພຣະອົງສະເດັດມາ ເຮົາຈະເປັນ ເໝືອນດັ່ງ ພຣະອົງ.”12 ເມື່ອເຮົາພະຍາຍາມຈະກາຍເປັນເໝືອນດັ່ງພຣະເຈົ້າ, ພຣະອົງສາມາດເຮັດໃຫ້ເຮົາກາຍເປັນໄດ້ຫລາຍກວ່າທີ່ເຮົາສາມາດຈະເຮັດໄດ້ດ້ວຍຕົວເຮົາເອງ.
ຮູ້ຈັກພຣະອົງໂດຍການເຮັດຕາມຄູປຶກສາ
ເພື່ອຊ່ວຍເຫລືອເຮົາໃນຄວາມພະຍາຍາມຂອງເຮົາ, ພຣະເຈົ້າໄດ້ປະທານຕົວຢ່າງ ແລະ ຄູປຶກສາໃຫ້ແກ່ເຮົາ. ຂ້າພະເຈົ້າຢາກແບ່ງປັນຄວາມຮູ້ສຶກຂອງຕົນກ່ຽວກັບຕົວຢ່າງຄົນໜຶ່ງຂອງຂ້າພະເຈົ້າ, ແອວເດີ ນຽວ ເອ ແມ໊ກສະແວວ. ເພິ່ນໄດ້ສະແຫວງຫາທີ່ຈະເຮັດຕາມພຣະປະສົງຂອງພຣະບິດາສະເໝີ ໃນຄວາມພະຍາຍາມຂອງເພິ່ນທີ່ຈະກາຍເປັນເໝືອນດັ່ງພຣະເຈົ້າ.
ນານກວ່າ 20 ປີ ຜ່ານມາ, ເພິ່ນໄດ້ແບ່ງປັນຄວາມຮູ້ສຶກຂອງເພິ່ນກັບຂ້າພະເຈົ້າ ຫລັງຈາກຫາກໍຖືກກວດເຫັນວ່າເປັນໂຣກມະເລັງ. ເພິ່ນໄດ້ບອກຂ້າພະເຈົ້າວ່າ, “ຂ້ອຍຢາກຢູ່ໃນທີມນັ້ນ, ໃນໂລກນີ້ ແລະ ໃນໂລກວິນຍານ. ຂ້ອຍບໍ່ຢາກນັ່ງເບິ່ງຢູ່ຫ່າງໆ. ຂ້ອຍຢາກມີພາກສ່ວນໃນວຽກງານຂອງພຣະເຈົ້າ.”13
ຫລາຍອາທິດຕໍ່ມາ ເພິ່ນລັງເລໃຈທີ່ຈະທູນຂໍໃຫ້ພຣະເຈົ້າປິ່ນປົວເພິ່ນ; ເພິ່ນພຽງແຕ່ຢາກກະທຳຕາມພຣະປະສົງຂອງພຣະເຈົ້າເທົ່ານັ້ນ. ໂຄລີນ, ພັນລະຍາຂອງເພິ່ນ ໄດ້ຊີ້ບອກວ່າ ຄຳອ້ອນວອນຄຳທຳອິດຂອງພຣະເຢຊູຢູ່ທີ່ສວນເຄັດເຊມາເນ ແມ່ນວ່າ “ຖ້າເປັນໄປໄດ້ ຂໍໃຫ້ຈອກເລື່ອນໄປຈາກລູກທ້ອນ.” ຫລັງຈາກນັ້ນ ພຣະຜູ້ຊ່ວຍໃຫ້ລອດ ຈຶ່ງກ່າວວ່າ, “ແຕ່ເຖິງຢ່າງໃດກໍດີ, ຂໍຢ່າໃຫ້ເປັນໄປຕາມໃຈປາດຖະໜາຂອງລູກ, ແຕ່ໃຫ້ເປັນໄປຕາມ ຄວາມປະສົງຂອງພຣະອົງ.”14 ເພິ່ນໄດ້ຊຸກຍູ້ ແອວເດີ ແມ໊ກສະແວວ ໃຫ້ເຮັດຕາມແບບຢ່າງຂອງພຣະຜູ້ຊ່ວຍໃຫ້ລອດ, ໃຫ້ທູນຂໍການບັນເທົາ, ແລະ ແລ້ວ ໃຫ້ເຮັດຕາມພຣະປະສົງຂອງພຣະເຈົ້າ, ຊຶ່ງເພິ່ນໄດ້ເຮັດ.15
ຫລັງຈາກໄດ້ທົນທຸກທໍລະມານຕະຫລອດການປິ່ນປົວ ທີ່ເຮັດໃຫ້ອ່ອນເພຍເກືອບໜຶ່ງປີ, ເພິ່ນກໍໄດ້ກັບຄືນມາສູ່ວຽກງານຂອງພຣະເຈົ້າຢ່າງເຕັມທີ່. ເພິ່ນໄດ້ຮັບໃຊ້ຕໍ່ໄປອີກນານກວ່າເຈັດປີ.
ຂ້າພະເຈົ້າໄດ້ໄປປະຕິບັດໜ້າທີ່ມອບໝາຍກັບເພິ່ນ ໃນຊ່ວງເວລາຫລາຍປີຕໍ່ຈາກນັ້ນ. ຂ້າພະເຈົ້າໄດ້ຮູ້ສຶກເຖິງຄວາມກະລຸນາ, ຄວາມເຫັນອົກເຫັນໃຈ, ແລະ ຄວາມຮັກ. ຂ້າພະເຈົ້າໄດ້ເຫັນການຫລໍ່ຫລອມທາງວິນຍານຂອງເພິ່ນເພີ່ມທະວີຂຶ້ນ ຕະຫລອດການທົນທຸກທໍລະມານ ແລະ ການຮັບໃຊ້ທີ່ຕໍ່ເນື່ອງຂອງເພິ່ນ ຂະນະທີ່ເພິ່ນໄດ້ພະຍາຍາມທີ່ຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດ.
ຕົວຢ່າງ ແລະ ຄູປຶກສາ ທີ່ດີເລີດທີ່ສຸດ, ທີ່ມີໃຫ້ເຮົາທຸກຄົນ, ນັ້ນຄືພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ທີ່ໄດ້ກ່າວວ່າ, “ເຮົານີ້ແຫລະ ເປັນທາງນັ້ນ, ເປັນຄວາມຈິງ ແລະ ເປັນຊີວິດ: ບໍ່ມີຜູ້ໃດມາເຖິງພຣະບິດາເຈົ້າໄດ້ ນອກຈາກມາທາງເຮົາ.”16 “ຈົ່ງຕາມເຮົາມາ.”17
ນ້ອງຊາຍ ແລະ ນ້ອງສາວຂອງຂ້າພະເຈົ້າເອີຍ, ການຮູ້ຈັກພຣະເຈົ້າເປັນການສະແຫວງຫາຕະຫລອດຊີວິດ. “ນີ້ ແມ່ນ ຊີວິດນິລັນດອນ ຄືໃຫ້ [ພວກເຮົາ] ຮູ້ຈັກ ... ພຣະເຈົ້າທ່ຽງແທ້ແຕ່ອົງດຽວ, ແລະ ພຣະເຢຊູຄຣິດເຈົ້າຜູ້ທີ່ [ພຣະບິດາ] ໃຊ້ມາ.”18
ສາດສະດາໂຈເຊັບ ສະມິດ ໄດ້ຊຸກຍູ້ໃຫ້ເຮົາກ້າວຕໍ່ໄປໃນອຸດົມການອັນຍິ່ງໃຫຍ່ນີ້, ມີຄວາມກ້າຫານ, ແລະ ໄປເຖິງໄຊຊະນະ!19
ພຣະເຈົ້າຮູ້ຈັກ ທ່ານ ແລະ ເຊື້ອເຊີນ ທ່ານ ໃຫ້ຮູ້ຈັກ ພຣະອົງ. ຂໍໃຫ້ອະທິຖານຫາພຣະບິດາ, ສຶກສາພຣະຄຳພີ, ສະແຫວງຫາທີ່ຈະກະທຳຕາມພຣະປະສົງຂອງພຣະເຈົ້າ, ພະຍາຍາມກາຍເປັນເໝືອນດັ່ງພຣະຜູ້ຊ່ວຍໃຫ້ລອດ, ແລະ ເຮັດຕາມແບບຢ່າງທີ່ຊອບທຳ. ເມື່ອທ່ານເຮັດດັ່ງນັ້ນ, ທ່ານ ຈະມາ ຮູ້ຈັກ ພຣະເຈົ້າ ແລະ ພຣະເຢຊູຄຣິດ, ແລະ ທ່ານຈະໄດ້ຮັບຊີວິດນິລັນດອນເປັນມູນມໍລະດົກ. ນີ້ຄືຄຳເຊື້ອເຊີນຂອງຂ້າພະເຈົ້າຕໍ່ທ່ານ ໃນຖານະທີ່ເປັນພະຍານພິເສດ ທີ່ຖືກແຕ່ງຕັ້ງຄົນໜຶ່ງຂອງພວກພຣະອົງ. ພວກພຣະອົງຊົງພຣະຊົນຢູ່. ພວກພຣະອົງຮັກທ່ານ. ຂ້າພະເຈົ້າເປັນພະຍານ ໃນພຣະນາມຂອງພຣະເຢຊູຄຣິດ, ອາແມນ.