Weteaki Irouna Bwa N Na Taekina Ana Taeka

Ngke I katabuaki bwa te Mataniwi ni Kabuta n Eberi ae nako, I beku bwa te beretitenti n te mition i Inria. I kamatebwaia bon irou te bwai ae e a tia te beretitenti ma imwaina n tuangai: “Mitinare n te Ekaretia aei a bon rangin ni kamimi.”¹

Temanna te mitinare ae rianako are I tabeakinna ma Titita Funk bon Unimwaane Pokhrel mai Nepal. Imwiin ae e kaaina te Ekaretia inanon ti uoua te ririki, e weteaki bwa e na mwakuri i Inria Bangalore Mition, te mition ibukin te taetae n Ingiriti. E na tuangko bwa e aki tauraoi raoi. Anne e matata raoi. E tuai n noora te mitinare ni karokoa are e a mitinare ibukina bwa akea te kairake ni mitinare ae mwakuri i Nepal  E aki kona ni wareware raoi n te taetae n Ingiriti n ata te kaetieti are e kairaki ma weteana. Ngke e a roko n aia tienta mitinare ni kataneiai, irarikin are uotakin ana kawaerake ae tikiraoi, kabaraki aika mainaina, ao neketai, e uotia ma ngaia, n ana taeka, “nimaua ana bea ni kawaerake te rii, tabeua te karinano, ao bwain katikiraoan te ira aika mwaiti.”²

E ngae ngke I mwiin reken ana kunnikai aika tau, e taku bwa e namakinna ae e aki tau ni katoabong inanon moan wiiki tabeua. E kabwarabwara te tai anne n ana tai ni mitinare ngke e namakinna bwa e aki tau: “Tiaki te kaangaanga te Ingiriti, ma te mwakuri e bon rangi ni matoatoa. … Irarikin kakaewenako aikanne I baki, kua, ao n uringaaba. … E ngae ngke a matoatoa kaangaanga, I rangi ni kekeiaki. I namakinna ae I a mamaara ao n aki tau. N na tataro n taai aika I mamara ao n aki tau iai nakon Tamau are i Karawa bwa e na buokai. N na aki bwaka, ngkana I tataro n tainako, I namakinna ae karauaki nanou.”³

E ngae ngke e boou te mwakuri ni mitinare ma ni matoatoa ibukin Unimwaane Pokhrel, e beku ma te onimaki ae korakora ma te nanomatoa, n ukoukoria bwa e na oota ao n ira te bwai ae e a tia n reiakinna man booki aika tabu, Tataekina Au Euangkerio, ao ana taan kairiiri n te mition. E riki bwa te tia reirei ae moan te nakoraoi n te euangkerio—ni kabongana te Ingiriti—ao te tia kairiiri ae rangin n tamaroa. Imwiin ana mition ao tabeua te tai i Nepal, e oki nako Inria n reita nako ana reirei. E a tia ni beku bwa te beretitenti n te mwaanga i New Delhi man Tianuare. Ibukin te rikirake ni koaua ae a tia n rinanona ngke e mitinare, e teimatoa n ibuobuoki nakon te rikirake ni koaua n te Ekaretia i Inria.

E kanga te ataeinimwaane ae tuai n noora te mitinare n riki bwa temanna ae iai irouna te korakora n tamnei anne? Ko na kanga ni karekea te mwaaka n tamnei ngkana te mitinare ngkoe ni karinaki nakon mweenga, ni karoko irouia aomata rinanon te i-meeri ke n aeka n reitaki riki tabeua iaon te intanete ao nanoia naake ko na beku ibukiia inanon te mition? Ni bon arona, kaekaaia a kona ni kuneaki inanon booki aika tabu ao ni wiia burabeti ao abotoro aika maiu.

Ngke e moan tataekinaki te euangkerio i England n Turai 1837, te Uea e kaotia [nakoia Abotoro] bwa antai ae a na kanakoa n Arana, man bwanaia tarina, te Tengaun ma Uoman ae baireaki ao ni kariaiakaki irouia, a na karekea te mwaaka ni kauka mataroan abanueau nakon aba aika e na kanakoia iai.”⁴

Te tabo ra ae ko kanakoaki iai, nakon te mition are ko kanakoaki iai, ko ataia bwa e a tia te membwa man te Tengaun ma uoman ni karaoa te tibwanga anne ao ko weteaki iroun ana burabeti te Uea. Kam weteaki n te “taetae ni burabeti, ao man te katoka bai.”⁵

Ngkanne te Uea e anga babaire ibukin te berita aei bwa e na kakoroaki bukina. E taekinna te Uea bwa ti ngkana e [nanonaki bwa e na kakoroaki nanon te berita ngkana] a [nanona mitinare ake a kanakoaki] a riai n [1] ni kananorinanoia imatau, ao [2] tei ibukin au taeka, ao [3] n ongo nakon bwanaan Tamneiu.”⁶

A mataata ana berita te Uea. N te aro bwa ti na karekea mwaakan te tamnei ni kauka mataroan abanuean te Atua n te aba are ko kanakoaki iai, ko riai n nanorinano ao n ongotaeka, ao ni karekea te konabwai n ongo ao n ira te Tamnei.

Katei aika teniua aikai bon iai irekerekeia. Ngkana ko nanorinano, ko na tangiria n ongotaeka. Ngkana ko ongotaeka, ko na namakina te Tamnei. E kakaawaki te Tamnei, ibukina, n aron are e reirei Beretitenti Ezra Taft Benson, “N akean te Tamnei, ko na bon aki kona n tokanikai n aki tarai am tarena ao am konabwai.”⁷

Ngkai ngai te beretitenti n te mition, I aki toki n intawiunia mitinare ake iai aia kaangaanga (n aia mwakuri) ibukina bwa a tuai n rangi ni kororaoi. A mena maiuia iaan aia konabwai n tamnei. E ngae ngke aekara ae a tia ni karaoia ke mwaitira te raoiroi ae a karaoia, a aki kona n namakina te rau ao kakukurein ana iraorao te Tamnei ae Raoiroi, ni karokoa ae a tia ni bwaina te nanorinano, n rairinanoia raoi, ao ni katoonga ana nanoanga ao ana tangira te Tia Kamaiu.

E reireiniia te Uea ana Toro bwa a na nanorinano, ibukina bwa kawain te kamaiu n tamnei e moanaki ma te uruaki n nano. Iangoa te raoiroi ae roko man bwaai aika uruaki: E uruakaki te tano bwa e na unikaki te uiita. E uruakaki te uiita bwa e na karaoaki iai te kariki. E uruakaki te kariki bwa e na riki bwa te kanikina ibukin te toa. Ngkana te aomata ae rairananona e katoonga te toa ma nanona ae uruaki ao tamneina ae raraoma, teuanne ke neienne e kamaiuaki⁸ Ngkana ti rairinanora ao ni kamaiuaki rinanon ana Mwakuri ni Kamaiu Iesu Kristo, e mwaiti riki ae ti angan te Uea nakon ae ti beku Ibukina. “Eng, kam na nakoina, ao kam na anganna tamneimi bwa ami karea nakoina.”⁹

Ngkana ko karawawataki n te bure ao n tangiria n rairananom, taiaoka karaoia n te tai naba anne. Ngke e kamaiuia naake a karawawataki, E aki toki ni kaoia bwa a na teirake. A koreaki ni booki aika tabu bwa a karaoia ngkekei naba.¹⁰ N te aro bwa ko na kamaiuaki man karawawatakim n tamnei, taiaoka kariaia Ana kakao n teirake. N aki waeremwe, taetae ma am bitiobi, beretitenti n te mwaanga, ke te beretitenti n te mition ao moana te kawai n rairannano ngkai.

Ana mwaaka ni kamaiu te Mwakuri ni Kamaiu e na uota te rau nako nanon tamneim ao ni kona n namakina te Tamnei ae Raoiroi. Ana anga karea te Tia Kamaiu e bon akea kabotauana, ma ara bure, e ngae ngke a mwaiti ao ni kakaiaki, a kona ni warekaki ao ni kaotaki, kabwaraaki ao ni mwaninga taekaia. E taekinna te Uea bwa E korakora kimwareireina ngkana e rairananona te aomata!”¹¹

Te berita aio inanon te Doctrine ao Covenants bon moan te mwaaka ngke E taekinna bwa ngkana ti kariaia te tamaroa bwa e na katamaroai ara iango n akea tokina, ao ara onimaki e na rikirake ni korakora imatan te Atua.”¹² Ngkana ko maiuakina te maiu ae tamaroa, ko na namakina te onimaki ae rau ni kororaoim imatan te Atua ao mwaakan te Tamnei e na memena iroum.¹³

Tabeman aika a tibwa rairaki nakon te Ekaretia ke a tibwa oki ma te kakaonimaki a kona ni kangai, “I a tau ngkai ao n iai nanou ni beku, ma I aki ataia ngkana I ata ae tau.” Inanon Eberi, e reireiniira Beretitenti Thomas  S. Monson, “Ataakin te koaua ao kaekaan ara titiraki aika korakora a roko nakoira ngkana ti ongotaeka nakon ana tua te Atua.”¹⁴ E rangi ni kakukurei ataakin ae rinanon ara ongotaeka ti kona ni karekea te atatai.

Tabeman a namakinna ae aki tau aia tarena, aia konabwai, ke aia atatai n anga. Ngkana iai iroum te aeka n tabeaianga anne, uringa ana atatai Unimwaane Pokhrel. Katauraoi n aron ae ko kona ao ataia bwa Tamara are i Karawa e na kakorakora am kekeiaki ae nanorinano man ongotaeka. Unimwaane Richard G. Scott e anga ana reirei ae kaunganano: “Ngkana ti ongotaeka nakon ana tua te Uea ao ni buokiia Natina n aki babakanikawai, mwiina ae ti kona ni karekea bon te mwaaka mairoun te Atua—te mwaaka ni karaoa riki ae bati n aron are ti kona ni karaoia bon iroura. Ara waaki, ara tarena, a karababaki ara konabwai ibukina bwa ti karekea te korakora ao te mwaaka mairoun te Uea.”¹⁵

Ngkana ko onimakina te Uea ma Ana raoiroi, te Atua ae Mwaaka e na kakabwaiaia Ana ataei rinanom.¹⁶ E reiakinna anne Unimwaane Hollings mai Nevada ni moan ana mition. Te bong are imwiin rokona i Inria, e mwananga ma Titita Funk ao ngai nakon Rajahmuandry, ana moan n aono. N te tawanou anne Unimwaane Hollings ao Unimwaane Ganaparam a nako ni kawara temanna kaain te Ekaretia ma tinana. Te tina e tangiria n reirei taekan te Ekaretia, ibukina bwa e a tia n nooria bwa e kanga te euangkerio ni kakabwaia maiun natina te aine. Titita Funk e raoniia ni karekea raoia. Ibukina bwa e na karaoaki te reirei n te Ingiriti ao te tina e bwaati n taetae n Telugu, te tari n te mwaanga e mena ikekei bwa e na raira te bwai ae reiakinaki.

Taben Unimwaane Hollings n ana moan tai n anga reirei e na reirei te Moan Kaotioti, ni kabonganai ana taeka te Burabeti Iotebwa. N tokin te angareirei anne e kanakoa te tai nakon Titita Funk ao n titiraki, “I kona n taekinna raoi n nanona?” n ataia bwa e na rairaki.

E kaeka, “Taekinna n te taeka imwiin te taeka bwa e aonga te Tamnei ni kakoaua te bwai ae ko taekinna.”

Ngke te mitinare ae boou aei e anga reirei ma nanona ae koaua taekan te Moan Kaotioti, ni kabonganai ana taeka te Burabeti, moamoan te titita ae tangiraki anne e bitaki. E moanna n tang. Ngke e a bane te rongorongo ane mimitong anne iroun Unimwaane Hollings, ao imwain ae taekina te bwai ae kona n rairaki, e titiraki ngke e tang n oin ana taetae, “I kona ni bwabetitoaki? Ao ko kona n reireina natiu te mwaane?”

Raou n ibuobuoki aika kairake, mataroa ao naano a uki ni katoa bong nakon rongorongon te euangkerio—te rongorongo are e uota te kantaninga, te rau ao te kimwareirei nakoia natin te Atua ni kabuta te aonaaba. Ngkana ko nanorinano, ao n ongotaeka, ao n iira bwanaan te Tamnei, ko na karekea te kukurei ae korakora n am mwakuri ni mitinare.¹⁷ Te tai ae moan te tamaroa te riki ni mitinare—te tai are e kawaekoa iai Ana mwakuri te Uea!

I kaota au koaua iroun ara Tia Kamaiu Iesu Kristo ao Ana “tua mai karawa”¹⁸ n “nako ni kakiritiania botanaomata ni kabaneia.”¹⁹ Aio Ana Ekaretia. E kairia rinanoia burabeti ao abotoro aika maiu. Inanon aoa aika imwiina, e na reireinira te Moan Beretitentii. Ti kona ni bane ni kai ni “waekoa n oota ni bwaai nako,”²⁰ n aron ngkoa Moomon, bwa ngkana e roko te wewete, ti a tau ao ni kona ni katanoata ma mwaakan te Tamnei: “Nooria, bon Ngai ana reirei Iesu Kristo, are Natin te Atua. I a tia ni weteaki irouna bwa N na taekina ana taeka ibuakoia ana botanaomata, bwa e aonga n reke irouia te maiu are aki totoki.”²¹ N aran Iesu Kristo, amen.