Ti Ataia Bwa Tera ae Iai Iroura?

Inanon “Te Utu: Te Katanoata nakon te Aonaaba,” te Moan Beretitentii ao te Kooram n Abotoro n te Tengaun ma Uoman a taekina: “Aomata ni kabane—mwaane ao aine—a karikaki ni katotongan te Atua. N tatabemaniia bon te tamnei ae tangiraki aika natiia kaaro aika kaain karawa aine ao mwaane, ao n aron anne, ni kabane iai rikiia ao tokin kawaia.”¹ Kakoroan nanon te kawai anne mai i karawa, ni kabane natin te Atua mwaane ao aine a kainnanoi otenanti n te nakoanibonga ao berita aika a tabu.

Ti kainnanoa te bwabetito. Ngkana ti kateboaki n te ran ni bwabetito, ti berita bwa ti na katoka aran Kristo iaora, n taainako n Ururingnga, kawakin Ana tua, ao ni beku Ibukina ni karokoa te toki, bwa Tamneina e na memena iroura n taainako.²

Ti kainnanoa ana bwaintangira te Tamnei ae Raoiroi. Rinanon te otenanti anne, ti kona ni karekea raonakira ae teimatoa iroun te Tamnei. Beretitenti Wilford Woodruff e reirei: “Ni kabane mwaane ao aine ake a tia n rin n ana ekaretia te Atua ao n tia ni bwabetitoaki ibukin kabwaraan bure e na reke irouna te kaotioti, te inaomata nakon te Tamnei ni buokiia n aia mwakuri, ni kaikawakiia natiia, ao n reireinia natiia ao naake a weteaki nakoia n tararuaia. Te Tamnei ae Raoiroi e aki katabuaki nakoia mwaane, ke nakoia ana abotoro ke burabeti; aia bwai mwaane ao aine aika kakaonimaki ao nakoia nati ake a tau ni karekea ana euangkerio Kristo.”³

Ti kainnanoa karekean te entaumente n te tembora e taku Unimwaane M. Russell Ballard: Ngkana a nako mwaane ao aine nakon te tembora, a uaia n entaute ma te mwaaka, are e kabwarabwaraaki are n te nakoanibonga. … Te entaumente bon te bwaintangira ae mwaaka.”⁴

Ti kainnanoa te otenanti ni kabaebae, are e kairiira nakon te maiu ae akea tokina, bon te kabanea n rietata mai buakon ana bwaintangira ni kabane te Atua.”⁵ Te Otenanti n te nakoanibonga aei e reke tii iroun te mwaane n ikotaki ma te aine. Unimwaane Russell M. Nelson e reirei, “E a tia te nakoanibonga ni kaokaki bwa aonga utu ni kona ni kabaeaki n te maiu are akea tokina.”⁶

Ti kainnanoa te tai ni kaboui ara berita aika tabu ao n taua te toa ni katoa wiiki. A tia burabeti ni boong aika Kaitira ao Abotoro n reirei bwa ngkana ti kororaoi ao ikanne ti a kona n tau n ana te toa, n aki ti kona ni kaboui ara berita ae tabu n te bwabetito ma ‘“ni kabane berita ake a roko iroun te Uea.”⁷

Otenanti aikai ma te nakoanibonga ao berita aika a tabu a kona n reke ni bwanin man kakabwaia ake e berita iai nakoira mai iroun te Atua, ake a kona n reke man ana Mwakuri ni Kamaiu te Tia Kamaiu. Ngaia nati mane ao nati aine iroun te Atua ma te mwaaka, mwaakan te Atua,⁸ are e a tia ni katauraoia nakoira bwa ti na kona ni karekea te maiu ae akea tokina — bwa tia aonga n okira te Atua ni maeka ma Ngaia N Ana utu ae akea tokina.

E aki maan nako I airi ma taan kairiiri n te nakoanibonga ni kawariia aine aman i Honduras. Aine aikai ao aia utu a kainnanoa te kiing ao te kariaia ao otenanti n te nakoanibonga ao berita aika a tabu, ao mwaaka n te nakoanibonga ma kakabwaia.

Ti kawara te aine ae tangiraki are e a tia n iein ao iai natina uoman aika titikiraoi. E kakaonimaki ao e irira ana waaki te Ekaretia, ao e reireinia natina n rinea ae eti. Kainnabana e boutokai ana waaki n te Ekaretia, ma bon tiaki kaain te aro. Aia utu e korakora, ma ni karekean te kukurei ae raka riki a kainnanoi kakabwaia aika raka n te nakoanibonga. A kainnanoa te karo bwa e na karekei otenanti n te bwabetito ao ana bwaintangira te Tamnei ae Raoiroi ao ni karekea te nakoanibonga. A kainnanoa mwaakan te nakoanibonga are e na kona n reke irouia rinanon te entaumente ao te kabaeaki.

Ara kakawari are imwiina bon kawaran mweengaia aine aika uoman aika tuai iein, aine aika a korakora aia onimaki. Temanna te aine iai natina te mwaane ae katauraoi ibukin ana mition. Te aine are temanna e bwainaorakiaki ibukin te kaentia. Inanon aia tai e a reke irouia te bwarannano ao te raraoma, a uringa ana Mwakuri ni Kamaiu te Tia Kamaiu ao a kaonaki n te onimaki ao te kantaninga. A uaia ni kainnanoa raonakiia n te kakabwaia ao te mwaaka are e tauraoi rinanon otenanti n tembora. Ti kaungaia bwa a na raoniia mitinare n taai aika a na roko ni mweengaia ni katauraoi ni karekei otenanti akanne.

Ara kabanea ni kakawari bon kawaran mweengan te aine ae tibwa mate buuna n te kabuanibwai. E a tibwa rairaki neiei nakon te Ekaretia, e tuai n oota bwa e kona ni karekea oin ana entaumente ao ni kabaeaki ma kainnabana. Ngke ti reireinna bwa kakabwaia a kona n reke nakoina ao buuna are e a tia ni mate, e kaonaki n te onimaki. Ataakin anne rinanon otenanti n te tembora ao berita ma ana utu bwa a kona ni bane ni kabaeaki, e karekea te onimaki ao te nanomatoa ni kaitarai kataaki ake imwaina.

Natina te mwaane e tauraoi ni karekea te Nakoanibonga ae te Aaron. Kamatoakina bon te kakabwaia ae e korakora nakoina ma ana utu. A na karekea te nakoanibonga inanon mweengaia. 

Ngke I kaitibo ma aine aika kakonimaki aikai i Honduras, I kona n noria bwa a kataia ni kawakiniia aia utu inanon te euangkerio ae maiu. A kaota aia kakaitau ibukin berita aika tabu-kawakinaia membwa n te uoote ake a tararuaia ao ni buokiia ni kainnanoia n te maiu n rabwata ao n tamnei. E ngae n anne, iai kainnanoia aine aikai aika tuai ni buokaki.

Ni katoa mweenga aika teniua ake ti kawari, te tia kairiiri n te nakoanibonga e titirakiniia aine aikai bwa ngkana a tia ni karekea te kakabwaia n te nakoanibonga. N aia kaeka bon akea. A bubuti karekeana ao a karekea te kakabwaia n te nakoanibonga n te bong arei. A tang ngke a kaota kukureia ibukin te mwengaraoi, kairiiri ao te kaunganano, ao namakin are e roko mai iroun Tamana are i Karawa rinanon te nakoanibonga ae tau.

A kaunga nanou aine aikai. A kaota te karinerine nakon te Atua ao Mwaakana ao ana kariaia. I rangi ni kakaitau naba ibukiia taan kairiiri ake a roko nakon mweenga aikai ma ngai. Ngke ti kitani mweenga n tatabeua nako, ti uaia ni bootaki n iangoa aron buokaia utu aikai ni karekean otenanti ake a kainanoi n rikirake iaon te kawai ni berita ao ni kakorakorai mweengaia.

Ni boong aikai te kainnano ae korakora irouia mwaane ao aine ni karikirakea te karinerine imarenaia n aroia nati mwaane ao nati aine iroun te Atua ao te karinerine iroun Tamara are i Karawa ao Ana nakoanibonga―Mwaakana ao ana kariaia.

Iai ana babaire ibukira, ao ngkana ti kamwakuri ara onimaki ao onimakinan Ana baire, ara karinerine ibukina ao ibukin mwaakana n te nakoanibonga ao te kariaia e na kakorakoraaki.

Inanon te kataneiai irouia taan kairiiri ni kabuta te aonaaba Kakorakorakin te Ekaretia rinanon te Nakoanibonga, ti reireiaki aroia bwa aine ake akea ni mweengaia te nakoanibonga ao aki namakina te maroa. A kakabwaiaki ao a kakorakoraaki rinanon otenanti ake a karekei ao berita aika a tabu ake a kawakin. A riai n aki maaku ni karoko irouia naake a kainnanoa te ibuobuoki. Unimwaane M. Russell Ballard e reirei bwa ni kabane aine n te Ekaretia a riai n ataia bwa iai aia bitiobi, te beretitenti ni kooram n unimwaane, te tia reirei n te mweenga, ao tabeman riki kaain te nakoanibonga aika a tau ake a kona ni katan irouia ake ana kona n roko n te mweenga ao ni buokiia ao, n aron are e reitia Titita Rosemary M. Wixom reitia, n “anga te kakabwaia.”⁹

Unimwaane Ballard e reireinira naba bwa: “Tamara are i Karawa e atatai aomata ma Mwaakana. Ni kabane mwaane ao ni kabane aine a kona n reke irouia te mwaaka aei n ibuobuoki inanon maiuia. Ni kabane a bane ni karaoi berita aika tabu ma te Uea, ao ana karinei berita aika a tabu akanne, a kona ni karekea oin aia kaotioti, ni kakabwaia iroun te anera n ibuobuoki, [ao] n reitaki ma te Atua.”¹⁰

Ti bane ni kainnanoira imarenara. Nati mwaane iroun te Atua a kainnanoia natin te Atua aine, ao nati aine a kainnanoia natin te Atua mwaane.

Iai ara bwaintangira aika kakaokoro ao korakorara aika kakaokoro. Te moan I-Korinto mwakoro 12 e kabwarabwara te bwai ae a kainnanoia natin te Atua mwaane ao aine, ngaira n tatabemaniira, ti riai ni kakoroa nanon tibwangara ao tabera ni kaineti ma ana baire te Uea bwa ti na bane ni kabwaia iai.¹¹

Natin te Atua mwaane, kam ataia bwa antai ngkami? Kam ataia bwa tera ae iai iroumi? Kam tau ni kamwakura te nakoanibonga ao ni karekea te mwaaka ao kakabwaia n te nakoanibonga? Kam taui tibwangami ao katabeami ni kakorakorai mweenga ngkai ngkami kaaro, tibu, nati, tari, ao ai te karo? Kam kaota te karinerine nakoia aine, aro n aine, ao te nakoa n tina?

Natin te Atua aine, ti ataia bwa antai ngaira? Ti ataia bwa tera ae iai iroura? Ti tau ni karekea te mwaaka ao kakabwaia n te nakoanibonga? Ti a tia ni karekea te bwaintangira are ti anganaki ma te kakaitau, akoi, ma te karinerine bon iroum? Kam taui nakoami ao tibwangami ni kakorakorai mweenga bwa tina, tibuaine, natiaine, tari, ao ai te tina? Ti kaota te karinerine ibukiia mwaane, nakoanimwane, ao nakoanikaro?

Ngkai ngaira naati mwaane ao aine inanon te berita, iai te onimaki iroura iroun Tamara are i Karawa ao Ana baire ae akea tokina ibukira? Iai ara onimaki iroun Iesu Kristo ao Ana Mwakuri ni Kamaiu? Ti kakoaua bwa iai arora mai i karawa ao tokin kawaira? Inanon ara mwakuri ni karekea te tibwanga ao ni karekei ni kabane are iai iroun Tamara,¹² ti oota ni kakawakin karekean otenanti n te nakoanibonga ao karaoan, kawakinan ao kabouan ara berita aika tabu ma te Uea?

Ngaira naati n tamnei mwane ao aine irouia ara karo ake i karawa, ma rikira mai i karawa ao tokin kawaira. Ara Tia Kamaiu, Iesu Kristo, e tangirira n te aro are E anga maiuna ibukira, ao Ana Mwakuri ni Kamaiu e katauraoa te kawai ibukira n tokanikai iaon kawaira nakon mwengara i karawa rinanon otenanti aika a tabu n te nakoanibonga ao berita aika tabu.

Otenanti n nakoanibonga ao otenanti aika tabu a kaokaki nakon te aonaaba rinanon te Burabeti Iotebwa Timiti, ao n te bong aei Beretitenti Thomas S. Monson e taui kiingin te nakoanibonga ni kabane iaon te aba.

E reirei Unimwaane D. Todd Christofferson.“N ana Euangkerio ana Ekaretia Iesu Kristo ni Boong Aika Kaitira e kunea ana kariaia te nakoanibonga ni karaoi otenanti are ti kona n rin inanon berita ni kabaebae ma Tamara are i Karawa n aran Natina ae tabu. … te Atua e na kawakina Ana berita nakoimi ngkai kam karinei ami berita ma Ngaia.”¹³

Man bwaai aikai I kakoauai n aran Iesu Kristo, amen.