Maungatabu ni Kabuta: Kakorakoraan te Onimaki ao te Kakoaua

Ko rabwa, Beretitenti Monson, ibukin am angareirei ao te kakairii ni katotongan te mwakuri n aron Kristo ao tabem ibukira ni kabane bwa ti na mitinare. Ti aki toki n tataro ibukim.

I nanon ara bong, e taekinna te Tia Kamaiu Iesu Kristo bwa ikotakiia Aika Itiaki bon “au maungatabu ni kabuta.”¹

Bwa ti mena ia n te aonaaba aei, ti kanga ni karekei rongorongo aikai, I kakoaua bwa ti ikotaki n Ana maungatabu. I kakoaua naba bwa ti na ongo Ana taeka, ibukina bwa E taekinna, “Bwa tao n oin bwanau ke ni bwanaia au toro, bon ti te arona.”²

A aki toki maungatabu n riki bwa mwakoron Ana Ekaretia Iesu Kristo ae koaua. E ikotiia ana kariki Atam ao e taetae ni burabeti ibukin bwaai aika a na roko. E botiia tibun Iteraera Mote ao e reireiniia tua ake e a tia n anganaki. Te Tia Kamaiu e reireiniia aomata aika uanao ake a ikotaki n te Aba are Tabu ao i aon te kontenanti n Amerika. Betero e bootiia tan onimaki i Ierutarem. Te moan maungatabu ni kabuta ni boong aika kaitira aikai e karaoaki ti uoua namwakaina i mwiin tein te Ekaretia, ao a tia maungatabu n reitinako karaoakiia ni karokoa te bong aei.

Maungatabu aikai a aki toki ni mena i aan ana kairiiri te Uea, ni kairaki iroun Tamneina.³ Ti aki anganaki atun reirei aika onoti. Inanon wiiki ma namwakaina, n taainako rinanon tairiki n aki mamatu, ti tataninga te Uea. Rinanon te aki mamatam, te tataro, te kamatebwai, ao iangoakina raoi, ti reiakina te rongorongo are E tangiriira bwa ti na anga.

A na bae n titiraki tabeman, “Ibukin tera e aki roko ni bebete riki ao n waekoa te kairi mai ieta?” E reireina Oliver Cowdery te Uea, “Ko riai ni kamatebwaia n am iango, ao ngkanne ko riai n tuanga te Uea ngkana e eti.”⁴ A roko iroura rongorongo n te maungatabu i mwiin te katauraoi n te tataro ae korakora, rinanon te Tamnei ae Raoiroi.

E koaua te reirei aei ibukiia membwa ni kabane n te Ekaretia ngkana ti katauraoi n ongo te kanakobwana n ara uote, titeiki, ao ni maungatabu ni kabuta nako. Ti kamatebwai n ara iango bwa tera ae ti kainnanoia ma n tangiria mai iroun Tamara are i Karawa, ao ti tataro bwa ti na ota ao ni karaoi baike ti reiakinaki. Ngkana e roko tain te maungatabu, ti katikui mwakuri riki tabeua ao ti “katina[nikui] bwain nako te aonaaba aio ni kakaaean baika raraoi riki.”⁵ Ngkanne ti botiia ara utu bwa ti na ongora nakon ana taeka te Uea, n aron are a karaoia ana aomata te Uea are Beniamina.⁶

A tangiria ataei ao kairake ni warekaki. Ti kaairua n ae rang ni korakora ngkana ti iangoia bwa te maungatabu bon te bwai teuana are a na aki kona n ota iai n aia iango ao n tamneiia. Nakoiia membwa aika ataei n te Ekaretia, I berita bwa ngkana kam na ongora, kam na namakina te Tamnei n rikirake i nanomi. E na tuangkami te Uea bwa tera ae E tangiri ngkami bwa kam na karaoia ma maium.

Ni maungatabu nako ti kona ni karekea nanon ana taeka te Uea bwa e tii kainetira. E kakoaua temanna te membwa: “Ngke I ongora nakon am taetae, I bon mimi. … Am taetae bon te kairi mai ieta mairoun te Uea nakon au utu. I bon tuai n rinanon te aeka n namakin mairoun te Tamnei ae korakora anne inanon maiu inanon miniti aikanne ngke e taetae ni kaineti nakoiu te Tamnei ae Raoiroi.”

E taku are temanna, “I tuai ni karekea te aeka n namakin ae rangi ni korakora n aron te taetae ae I anganaki.”

E kona n riki aio ibukina bwa e uota ana taeka te Uea te Tamnei ae Raoiroi nako nanora n te aro are ti na kona n ota iai.⁷ Ngke I tau rongorongon te maungatabu, I aki koroi raoi baike e taekin te tia taetae, I koroi kaetieti ake e anganai te Tamnei ae Raoiroi.

Tera ae taekinaki e aki kakawaki nakon are tera are ti ongo ao tera ae ti namakinna.⁸ Anne bukina ngkai ti kekeiaki ni karekea namakinan te maungatabu n te kawai are e na kona iai bwanaan te Tamnei ae maraara, man uarereke ni kona n ongoraeaki raoi, namkinaki, ao n oota raoi iai.

Oo, ti kanga ni kainnanoa te maungatabu ni kabuta! Rinanon maungatabu ao ara onimaki a kamatoaaki ao ara koaua a kakorakoraaki. Ao ngkana ti rairaki, ti kakorakoraira n tatabemanira n tiku n aki neneaki ngkana ti a katobibiaki n ekakinakoakira ao kabwakabwaka ni boong aika kaitira.⁹

Bwi n ririki aika tibwa nako, te Ekaretia ni buburan tabena e na aki riai n reke iai te aki ota ao te bwainikirinaki ae kakamaku arona ake a bwakaraki iai moan kaain te Ekaretia Ake a Itiaki. E na bon aki reke aron aio n tai nako. A moanna n riki aomata n te aonaaba n raroakinokino n tamneia mai iroun te Uea ni waekoakoa riki ao n raroanako riki n aron are mai mwaaina. Ae e wawakina mwaakana ma ana anainano ara kairiribai i aon te aonaaba. Ti mamataku, ti ongo, ti wareware, ti kamatebwai ao ti tibwauai aia taeka burabeti bwa a aonga ni kauringaki ni moantaai ao ni kamanoaki. N aron te katooto, “Te Utu: Te Katanoata nakon te Aonaaba” ti a kaman anganaki imwain are ti noori kabuanibwai aika e a kaitarai te utu. “Te Kristo ae Maiu: Aia Kaotioti Abotoro” e moantaai ni katauraoaki bwa n ni ngai are ti na rang ni kainnanoia iai.

Tao ti na aki kona n atai bukin bwaai ni kabane bwa bukin tera burabeti ao taan taetae n tain te maungatabu a taetae n taekan atu n iango tabeua n te maungatabu, ma e ataia te Uea. E reirei Beretitenti Harold B. Lee: “Ti te anga ni kamaiu ae iai iroura ngaira aika membwa n te ekaretia aei ti na … anga taningara nakon taeka ma tua ake e na anga te Uea rinanon Ana burabeti. E na iai bwaai tabeua ake a na tangira te taotaonaki n nano ao te onimaki. Tao ko na aki tangira te bwai are roko mai iroun te mataniwi n te Ekaretia. E na kona ni kaitarai oin [am] iango. E kona ni kaitarai am iango n aomata. E na kona ni kamangaoi tabeua maium n reitaki ma aomata. Ma ngkana ko kakauongo nakon bwaai aikai, ae kanga a nako mai win te Uea, ma te taotaona n nano ao te onimaki, te berita iai bwa ‘e na aki kataea am kai mataroan n neia tamneia mate; … ao te Uea te Atua e na karekea angan kamaunaan mwaakan nako te buakaka ma iaom ao ni karekea angan te mwaaka ae raoiroi ke mai iroun te Uea bwa e na mwamwakuri ibukim ibukin mimitongina’ (D&C 21:6).”¹⁰

E kanga Beretitenti Lee n ataia bwa tera are ti na kaaitarai ni maiura? E a kaman atai ibukina bwa bon te burabeti, te tia mamata, ao te tia kaotioti. Ao ngkana ti kakauongo ao n iri nanoia burabeti ngkai, n ikotaki ma naake a na taetae n te maungatabu aio, ti na kakorakoraaki ao ni kamanoaki.

Kakabwaia aika kabanea n tamaroa n te maungatabu ni kabuta a roko nakoira i mwin bwaran te maungatabu. Uringa te banna are e koreak n angiin te tai ni koroboki aika tabu: ti botaki n ongoraai ana taeka te Uea, ao ti oki rikaki nakon mwengara ni maiuakin.

I mwiin are e reireinia ana aomata te Uea are Beniamina, “e a kainaomata te botanaomata, ao a oki, ni kabane, n aron aia utu, nakon mweengaia.”¹¹ Ni maiuna, te Uea Rimwaai e karaoa naba aron arei.¹² I mwiin ana angareirei ao ana ibuobuoki nakoia aomata n te tembora i Bountiful, e kaokiia aomata te Tia Kamaiu, “ma ngaia, naako okiri batami, man iangoi taeka ake I a tia n taekin, ao bubutia te Tama n arau bwa kam na oota iai, ao katauraoi raoi ami iango ibukin te ingabong, ao N na manga roko riki nakoimi.”¹³

Ti butimwaea ana kakao te Tia Kamaiu ngkana ti iangoia raoi ao ti tataro bwa ti na ota ni baike a tia n reiakinaki ao ngkanne ni waaki nako ao ni karaoa Ana kantaninga. Uring ana taeka Beretitenti Spencer W. Kimball: “I a tia ni katia n au iango bwa ngkana I nako ni mweengau man te maungatabu ni [kabuta] aei … a rangin ni bati, taabo inanon maiu ake I kona n rang ni katamaroai. I a tia ni koroi ni karinani au iango, ao I kantaningaia ni moana mwakuriakiia ni katamaroai ni waekoa n te tai are ti a waaki rinanona.”¹⁴ E tibwa taekinna Beretitenti Monson: I kaungai ngkami ni wareki taetae ... ao n iangoi raoi rongorongo ake inanoia. I a kunea ni maiu bwa e a raka ongou riki man kabwarabwara aika iraki iroun te Tamnei aikai ngkana I kamatebwai raoi rongorongoia.”¹⁵

Irarikin are kaoakira bwa ti na karaoa te kamatebwai n taeka aika tabu iroun te aomata ma te utu, e tangirira Tamara are i Karawa bwa ti na kamatebwai n tai nako ao ni karaoi nanon ake ti reiakin n tain te maungatabu. I kakoaua bwa naake a onimakina Iehova ao n ongo te reirei aei ma te onimaki e na karekea te korakora ae bubura ni kakabwaiaiia ma aia utu ibukin roro aika bati aika a na roko.

E a tia Tamara are i Karawa ni karekea te kawai. N te maungatabu aio, a kona n ongo 97 te betienti kaain te Ekaretia rongorongo aikai ni bon oin aia taetae. Mirion kain te aro n aba aika 197 aika a na matakuakina te maungatabu aei n taetae aika 95 mwaitina. I nanon ti uabong ke tenibong ao a kona n nooraki rongorongo aikai n te taetae n Imatang i aon LDS.org, ao i nanon teuana te wiki a kona n ongoraeaki n taetae aika 52 mwaitina. Ngkai ti a karekei ana maekatin te Ekaretia i nanon teniua te wiki i mwin te maungatabu ni kabuta. Ti a aki manga tataninga inanon namwakaina ma namwakaina ibukin rokon taetae n te meeri. N te kombiuta, aekan tarebon nako ke bwai n rabakau tabeua, ti a kona ni wareki, n ongoraai, ni matakuakin, ao n tibwai reirei mai irouia burabeti. Bwa te tai ra, te tabo ra, ti a kona ni kabuburai wanawanara, ti kakorakorai ara onimaki ao ara koaua, ti kamanoia ara utu, ao ti kairiia nakon mwengaia n akea te kabuanibwai.

Rongorongo n te maungatabu aio a na karinaki naba rinanon aia bwainreirei kairake i aonrain. Kaaro, kam a kona ni karekei aia reirei kairake ibukimi n te LDS. Org. Kakaea bwa tera bwaai aika a kamatei ami ataei, ao karekea bwa te bwai naba n oin am kamatebwai, maroro n utu, bootaki n utu n te mweenga n te tairiki, boowi n utu, ao maroro ma natimi n tatabemaniia ni kaineti ma te bwai ae a kainnanoia bwa ana reiakinna n tatabemaniia.

I kaungaia membwa ni kabane bwa ana kabonganai bwaai i aon ana uebutiaite nako te Ekaretia ma mwakurin kombiuta n te mobwaire. A aki toki ni karikirakeaki raoiroia bwa a aonga ni bebete riki kabonganaakiia ao n nakoraoi nakon maiura. I iaon LDS.org ko na noori bwai n ibuobuoki ibukin kamatebwaiakan te euangkerio, kakorakorakin mweengam ao am utu, ao ni mwakuria am beku. Ko kona naba ni kakaeia am bakatibu ake a kainnanoi otenanti n te tembora ao bwaai ni boutokaiko n te mwakuri ni kamaiu, n ikotakina ma tibwatibwaakin te euangkerio. A kona karo ni kairiiri ni katauraoakiia natim ibukin te bwabetito, te nakonibonga, ao mwakuri ni mitinare aika bwanin taiia, ao te tembora. A kona ni buokira n toua kawain otenantin ao berita n te tembora aika tabu ao n tau ibukin kakabwaiaan te maiu ae akea tokina.

N te maungatabu n Eberi ae nako, ni bootakin te nakoanibonga ni kabuta, I taekina rongorongon tamau ngke e korea tamnein te tia toka i aon te aoti ae te tautia ma ana bwai ni buaka bwa e na reireinai aron katokaan ana bwai ni buaka ni kabane te Atua ao te kamanomano n tamnei are e uotia.

I mwiin bwaran te tetere n Eberi ae nako, e ribotinna temanna te tama nakon ana utu te bwai are e a tia n reiakinna. Raonakina iroun te Tamnei, natiia te mwaane ae Jason e kakaae iaon LDS.org bwa e na ongora nakon te rongorongo. Tabebong imwiina e kaoti n te bootaki n utu n te tairiki n tibwaua te reirei arei ma tarina ao mwaanena. E kabwarabwara te tamnei Unimwaane Hales, are e kaotaki nakoia taan ongora.

Tamnei

Here he is.

Teuana te rongorongo ae kakaonogora n te maungatabu, are e raonaki iroun te Uea, are e reke iroun temanna te ataei, e reiakinaki nakon teuana te utu n te anga ae rang ni mwaaka ma ni kaineti nakon te aomata. I tangira ana taanga are te raoiroi. I tangira ana otanga are te onimaki ni kaitara ana kai ni katebe te uare e buakaka. Aikai kakabwaia man te maungatabu.

Tariu ao mwaneu, I kaota au kakoaua ae onoti bwa te Uea Iesu Kristo e maiu ao e tei bwa atun te Ekaretia aio. Aei Ana maungatabu ni kabuta. I berita nakoimi n Arana bwa ngkana ko tataro ma te tangira ae koaua n ongoraeakinan bwanaan Tamam are i Karawa n ana rongorongo te maungatabu aio, ko na kunea ae E a tia n taetae nakoim ni buokiko, ni kamarurungko, ao ni kairiko nakon te mweenga i Matana. N aran Iesu Kristo, amen.