Reirei ma te Mwaaka ao Ana Kariaia te Atua

Ti kakaitau iaon are ti tataneiai ibukiia taan tia reirei rinanon te Ekaretia. Ti tangiri ngkami ni iai onimakinami iroura. Ngkoe temanna te kakai ae moan te korakora n te euangkerio ae kaokaki.

Bon iai te bwai ae raba ngkana ko tekeraoi n riki bwa te tia reirei n te euangkerio, n reirei ma te mwaaka ao ana kariaia te Atua. I kamanena te taeka ae raba bwa te koaua n tekeraoin te tia reirei e kona n ataki tii irouia ake iai aia koaua n te bwai are riki n te ingabong ae tamaroa, te bong ae itiaki, n tain te tiburing n 1820.

Ni kaekan ana tataro n nanorinano te ataeinimwane ae 14 ana ririki, e kaukaki karawa. Te Atua are te Tama ae Akea Tokina, ao Natina Iesu Kristo e kaoti ao n taetae nakon Iotebwa Timiti. Manin tataningan kaetan bwai ni kabane e a moanaki ao koauan te kaotioti are akea tokina e a karikaki n ara tai. Ana rongorongo Iotebwa Timiti, ao ara rongorongo nakon te aonaaba, a kona ni karaoaki inanon taeka aika uoua: “E taetae te Atua.” E taetae nakoia aomata ngkoa, E taetae nakon Iotebwa Timiti, ao E na taetae nakoim. Aio are kaokoroi ngkami ma taan tia reirei ake tabeman n te aonaaba. Aio bukina are kam aki kona ni bwaka.

Kam a tia ni weteaki iroun tamnein te taetae ni burabeti ao te kaotioti ao ni kaokoroaki n ana kariaia te nakoanibonga. Tera nanon aei?

Te Moan, e nanonna bwa ko mena iaon Ana mwakuri te Uea. Ngkoe te tia tei Ibukina, ao ko kariaiakaki ao ni mwiokoaki n onea Mwiina ao ni mwakuri Ibukina. Ngkai te tia tei Ibukina ngkoe, ko katauaki nakon ana buoka. Ko riai n titirakiniko “Tera ae na taekinna te Tia Kamaiu ngkana E anga reirei nakoia au kiraati n te bong aei, ao E na kanga n atonga? Kam na katotonga ni karaoia.

Te tabetabe aio e kona ni karikia tabeman bwa a namakina te aki tau ke ni karika te maku. E aki kangaanga te kawai. E a tia te Uea ni katauraoa te kawai ibukiia membwa aika a tau bwa a na anga reirei n Ana kawai te Tia Kamaiu.

Te kauoua, ko weteaki bwa ko na taekana ana euangkerio Iesu Kristo. Ko aki riai n anga reirei n oin am iango ke ara reirei, ake a raonaki ni boki aika tabu. Te euangkerio bon “mwakan te Atua nakon te kamaiuaki,”¹ ao bon tii inanon te euangkerio are ti kamaiuaki iai.

Kateniua, ko tuangaki bwa ko na reirei reirein te euangkerio ake a mena inanon boki aika kariaiakaki n te Ekaretia ake aia taeka abotoro ao burabeti aika ngkai, ao n reirei n te bwai are ko reiakinaki iai iroun te Tamnei are Raoiroi

Ai ngaia are ti na moanna ma ia?

Tabera ae moan te kakannato bon te maiu n te aro bwa ti kona ni karekea te Tamnei are Raoiroi bwa kairara ao raora. Ngke e kan katabeaki Hyrum Smith ni mwakurin te ekaretia, E taku te Uea. “Noria, aio am mwakuri, bwa ko na kawakin au tua, eng ma am kona, am iango, ao korakoram ni kabane.”² Bon aio te tabo ni moan waaki. Te maroro, ae tia ni katauraoaki iroun te Uea nakon Hyrum, bon titebo ma te maroro are anganiia Aomata aika Itiaki n roro nako

N taetae nakoia taan tia reirei n te bong aio, e taku te Moan Beretitentii: “Mwakoron ami mwakuri ae moan te bongana bon ami katauraoi n tamnei ni katoa bong, n raonaki n te tataro, kamatebwaiakin boki aika tabu, ao n ongeaba nakon taian tua. Ti kaungai ngkami ni katabui maiumi nakon te euangkerio ma te mwakuri korakora nakon are mai mwaina.”³

E kakawaki bwa te Moan Beretitentii e aki kangai bwa te bwai ae moan te bongana n am mwakuri bon katauraoan am reirei raoi ke n rabakau ni kawai aika kaokoro n anga reirei. Eng, kam na katauraoi ni koaua ibukin reirei n tatabeua nako ao ni kakorakora n iangoia bwa ko na kanga n anga reirei ni buoka am ataei n te aro bwa ko na buokiia ni kammwakura inaomataia n rinerine ao ni kariaia te euangkerio n rin inanoia, ma te moan ao e rangi ni bongana ni mwakoron am mwakuri bon am katauraoi i bon iroum n tamnei. Ngkana ko ira nanon te reirei aio ae e a tia ni beritaia te Moan Beretitentii “E na buoki ngkami te Tamnei are Raoiroi n ataa te bwai ae kam na karaoia. E na rikirake oin am koaua, e na korakora bitakin nanom ao ko na kakorakoraaki ni kaitarai kangaangan te maiu.”⁴

Tera te kakabwaia ae korakora riki ae na tangiria te tia reirei?

Imwina, E a tia te Uea n tua imwain ae ti ukoukora taekinan Ana taeka, ti riai ni ukoukoria ni karekea.⁵ Kam bon riai n riki bwa mwane ao aine aika a korakora ami atatai man ami kakae inanon Boki aika tabu man kawakinaia inanomi Ngkanne ngkana ko bubuti nakon te Uea te buoka, E na kakabwaiako n Tamneina ao n Ana taeka. E na reke iroum mwakan te Atua ibukin kairakia aomata.

E tuangira Bauro bwa te euangkerio e roko nakoia aomata ni kawai aika uoua, n te taeka ao te mwaaka.⁶ Taekan te euangkerio e koreaki inanon boki aika tabu, ao ti kona ni karekea te taeka man ara kakae mwaaka. Mwaakan te euangkerio e roko inanon maiuia ake a maiu ao raoia te Tamnei are Raoiroi ao are a ira nanon te bwai are a tuangaki ni waetata. Tabeman a kaatuua nanoia iaon tii iaon karekean te taeka ao a riki bwa taan rabakau n taekinan rongorongo. Tabeman a aki mwannanoa aia katauraoi ao a kantaninga bwa E na buokiia te Uea n rinanon tain te reirei. Ko aki kona ni kantaninga te Tamnei be na buokiko ni kauring boki aika tabu ao koaua ake ko aki kamatebwai ke n iangoi. N te aro bwa e na nakoraoi am anga reirei n te euangkerio, ko riai ni karekea iroum te taeka ao mwaakan te euangkerio inanon maium.

E ota Aramwa n taian reirei aikai ngke e kukurei iroun natin Motiaea ao aroia n anga reirei ma te mwaaka ao Ana kariaia te Atua. Ti warekia:

“Bon mwane ngaia aika a raoiroi aia atatai ao a bon tia n ukoukori koroboki aika tabu ma nanomwakaia, bwa aonga n ataa ana taeka te Atua.

“Ma tiaki tii ngaia aio; a bon tia naba ni kakorakoraia n tataro, ma n aki mamatam; ngaia ae iai irouia…tamnein te kaotioti.”⁷

Imwina ko riai n ongo are e reirei iai Unimwane Jeffrey R. Holland nakoia mitinare, N na kaota te bwai are taekinna Unimwane Holland bwa e a tia n ana te inaomata n onean mwin taeka aika mitinare ao taan kakae n taeka aika taan reirei ao ataein te reirei ni kaokoroi: “Kauoua tii nakon tabeia [taan reirei] bwa a na kakauongo nakon te Tamnei bwa tabeia a na kakauongo nakoia [ataein te reirei].… Ngkana ti kakauongo n onimakina te Tamnei,… a na [ataein ara reirei]a na tuangiira tera te reirei ae a kainanoia n ongo!”

E reitia nako Unimwane Holland, “Te koaua n te bwai bwa [taan reirei] a bon teimatoa ni kabanea aia tai n anga reirei aika mwengaraoi, reirei aika okioki, nakon katuuan tabeakinaia [ataein aia reirei] n tatabemaniia.”⁸

Imwin are ko a tia ni katauraoiko ao am reirei nakon ara kabanea n tamaroa man am konabwai, ko riai n tauraoi ni kariaia te tamnei bwa e na kairiira n tera ae ti na anga reirei iai Ngkana a roko wirikiriki aika aariki mairoun te Tamnei ae Raoiroi, ko riai ni iai iroum te unganano ni katikui kairan am reirei ao am koroboki ao n nako ike kairiko nako iai ana wirikiriki te Tamnei. Ngkana ti karaoa aio, te reirei are ko anga ai tiaki am reirei, ma e a riki bwa ana reirei te Tia Kamaiu.

Ngkai ko kabanea nanom nakon maiuakinan te euangkerio ma te mwakuri ae korakora nakon are mai mwaina ao ni ukeuke inanon boki aika tabu, ni kawakin inanom, te Tamnei are Raoiroi, are kaoti taeka aikai nakoia abotoro ao burabeti ngkoa, a na kaoti nakoimi koauaia. N ataakina, te Tamnei are Raoiroi e na kaoti aika boou nakoimi. Ngkana e riki aio nakoimi te taeka are ko warekia ai tiaki ana taeka Nibwaai ke Bauro ke Aramwa, ma a riki bwa ai ami taeka. Imwina, ngkana ko reirei, E na kona ni buokiko te Tamnei are Raoiroi n reireiniko bwai ni kabane ao ni uoti bwai ni kauringko. Te koaua raoi, “e na anganiira te bwai are ti na taekinna n te tai are ti kainanoia iai.”⁹ Ngkana e riki aio, ko na kuneko n taekina te bwai are ko aki iangoia bwa ko na taekinna, Ngkanne, ngkana ko kakauongo, ko na reiakina te bwai teuana man te bwai are ko taekinna ngkana ko reirei. E taku Beretitenti Marion G Romney. “I aki toki n ataia ngkana I tabe n taetae iaan ana kairi te Tamnei are Raoiroi ibukina bwa I aki toki n reiakina te bwai teuana man te bwai are I a tia n taekinna.”¹⁰ Uringnga, te tia reirei bon ataein naba te reirei.

Te Kabane, ko na riai n tei bwa te tia kakoaua ae inaomata ni bwai ni kabane ko reirei ao tiaki te taeka ae okirikaaki n te boki n reirei ke aia iango tabeman. Ngkai ko kakukureiko n ana taeka Kristo ao ni maiuakina te euangkerio ma te kantaninga ae korakora nakon are mai imwaina e na kaoti nakoim te Tamnei are Raoiroi bwai aika ko reirei bwa a koaua. Aio tamnein te kaotioti ao te tamnei naba aei are e na uota am rongorongo nakoia ake a korakora nanoia ni kan karekea.

Ti nang toki ike ti waaki mai iai—n te Buakonikai ae Tabu. Bukina bwa te tabo anne n te ingabong ae tamaroa n te tiburing n aki rang ni maan n nako, ko a kariaiakaki n reirei ma te mwaaka ao Ana kariaia te Atua. Man aei I kaota au koaua ae inaomata n aran Iesu Kristo, amen.