Katuka Am Onimaki iroun te Uea

Ngai ma Titita Ballard ti a tibwa oki man katabeara ni kawaran nimaua aaba i Europe. Ikekei ao e reke ara tai ni kaitibo ma angiia ara mitinare, tao natimi mwaane ao aine. Man te tai are Beretitenti Monson e katanoata kauarerekean te ririki ibukiia kairake ni mwaane ao aine bwa a na mwakuri, e reke au tai ni kaitiboaki ma mitinare ae raka iaon 3,000. Ootan Kristo e kona n nooraki iaon moaia, ao a ingainga ni waakina te mwakuri—ni kakae ao n anga reirei, ni bwabetito ao ni kammwakura, ao ni kakorakora ao ni katea abanuean te Atua. Ni katiboou ma ngaiia, temanna e na waekoa n ataia, e ngae n anne, bwa a aki kona ni karaoa te mwakuri aio n tii ngaiia. N te bong aio I tangiria n taetae nakoia kaain te Ekaretia ni kabane, ibukina iai te kainnano ae kataweaki ibukiia ngaira n tatabemaniira nako inanon te Ekaretia bwa ti kabaeaki n n tibwauaan te euangkerio.

Te Burabeti Iotebwa Timiti e katanoata bwa “imwiin bwaai ni kabane ake a tia n taekinaki, te tabe ae te kabanea ni kakannato ao ni kakawaki bon taetaekinan te Euangkerio” (Aia Reirei Beretitenti n te Ekaretia: Iotebwa Timiti [2007], 330).

N 1974 e taekina aio Beretitenti Spencer W. Kimball “Tao te kabanea n tamaroa ibukin te mwakuri ni mitinare bon anganakin te aonaaba ana tai n ongoraea ao ni butimwaea te euangkerio. Booki aika tabu a onrake n tuua ao berita ao wewete ao kaniwanga ibukin te anga reirei iaon te euangkerio. I kamanena te taeka ae tua n nanonna ibukina bwa e taraa n ae te kaetieti ae matoatoa are ngaira, ni kaka temanna ao ni bwanin, ti aki kona ni birinako mai iai” (“When the World Will Be Converted,” Ensign, Okitobwa. 1974, 4).

N Turai n te ririki naba anne, Ngai ma Titita Ballard ti uaia n airi ma natira bwa ti na tararua te Canada Toronto Mition. I uringa raoi ana taeka Beretitenti Kimball, ai moarara riki ngke e taku, “Tariu, I kan ataia ngkana ti karaoa ara kabanea ni kona. Ti rauaki ao ni kakaea te tamaroa n ara kawai n anga reirei nakon te aonaaba ni kabane? Ti a tia ni kawariia aomatai ngkai 144 te ririki. Ti a tauraoi ni karaka ara rangata? Ni katamaroa ara kekeiaki man buokakiia aomata aika bati riki?” (Ensign, Okitobwa. 1974, 5).

E bubutira naba bwa ti na kawaekoai ara mwakuri, ni kaai ni mwakuri ni katea te Ekaretia ao abanuean te Atua.

N Tuun ae nako Beretitenti Thomas  S. Monson e kaokioka te wewete nakoia membwa n te Ekaretia: “Aio bon te tai ibukiia membwa ao mitinare bwa a na uaia ni bootaki … [ao] ni mwakuri inanon ana nne ni kurebe te Uea ao ni kairiia aomata nakoina. E a tia ni katauraoa te kawai ibukira n tibwaua te euangkerio ni kawai aika bati, ao E na buokiira n ara mwakuri ngkana ti na mwakuri n te onimaki ni kakoroa bukin Ana mwakuri” (“Faith in the Work of Salvation” [[te maroro ae kanakoaki n te kanakobwana ae onoti, Tuun 23, 2013]; lds.org/broadcasts).

E bon tamaroa, tariu mwaaneu, ni iangoa aia reirei burabeti man ana tai Iotebwa Timiti ni karokoa te bong aio. A tia ni kaungaia ao ni weteia taan kairiiri ao membwa n te Ekaretia n ingainga ni kabaeaki ni uotakin rongorongon Kaokan te euangkerio nakoia natin Tamara are i Karawa ni kabane n te aonaaba.

Au rongorongo n te bakantaai aio bwa te Uea e e kawaekoa Ana mwakuri. N ara bong aio e tii kona ni karaoaki ngkana membwa ni kabane a anga baia ma te tangira n tibwaua koauan ana euangkerio Iesu Kristo are e a tia ni kaokaki. Ti kainnanoia ni bootaki ni mwakuri inanon te ikatoatoa ma ara mitinare ngkai ae e kaania 80,000 mwaitiia ake a beku. Rongorongon te mwakuri ae korakora aio, ibukin riki mwiokoaia taan kairiiri n te titeiki ao te uoote, e bon kamataataki ni kaotaki iaon te LDS.org webutiate n atunaki “Hastening the Work of Salvation.”

Ti ataia man ara kakae bwa angiia membwa aika kakaonimaki n te Ekaretia a tangira te kakabwaia man te euangkerio bwa e na riki bwa mwakoron maiuia tabeman ake a tangiriia, ao naake a tuai ni kaitibo ma ngaia. Ti ataia naba bwa membwa aika bati a tabwara ni karaoa te mwakuri ni mitinare ao n tibwaua te euangkerio ni bukina aika uoua.

• Te moan bon te maaku. A bati membwa aika a aki tataro ibukin angaraoin te tai n tibwaua te euangkerio, ni maaku bwa a na kona ni karekea te wirikiriki mai karawa ni karaoa te bwai teuana are a taku bwa a aki kona ni karaoia.

• Bukina te kauoua bon te aki oota bwa tera te mwakuri ni mitinare.

Ti ataia bwa ngkana temanna e teirake bwa e na anga ana taeka n tain te toa ao n taku, “N te bong aio N na taetae ibukin te mwakuri ni mitinare,” ke tao e ngae ngkana Unimwaane Ballard e teirake n te maungatabu ni kabuta ao n taekina te bwai ae titebo, tabeman mai buakomi aika kakauongo a na kona n iangoia, “Tiaki ngaia riki; ti a tia n ongo aio mai imwaaina.”

Ngkai, ti ataia bwa akea ae tangira te namakin ni bure. Tao ko na namakinna bwa ko na kona n titirakinaki ni karaoi bwaai aika a aki koaua ma raoraom ke kaain rarikim. Ma ana ibuobuoki te Uea, kariaia bwa N na kanakoa te maaku mairoum ke temanna mairouia ara mitinare ae bwanin ana tai are e tibwaua te euangkerio ma tabeman.

Karaoa te babaire ni karaoa are e a tia Iesu n tuangiira bwa ti na karaoia. E taku te Tia Kamaiu:

“Kam na bubuti, ao ane kam na anganaki, kam na ukeuke; ao ane e na reke, kam na karebwerebwe, ao ane e na kaukaki nakoimi:

“Bwa ane e bubuti ao e anganaki; ao ane e ukeuke ao e reke irouna; ao ane e karebwerebwe ao e kaukaki nakoina.

“Ai antai te aomata i roumi, ae e angan natina te atibu, ngkana tao e butia te berena?

“Ao ngkana tao e butia te ika, ao e anganna te naeta?

“Ao ngkai … kam ata te anganiia natimi baika raraoi, ngkami akana kam buakaka, ao tiaki e mwaiti riki iroun Tamami are i karawa te kan anga baika raraoi nakoia akana a butiia?” (Mataio 7:7–11).

Tariu ma mwaaneu, te maaku e kona n oneaki mwiina nakon te onimaki ao te aki nanououa ngkana membwa ao mitinare aika bwanin aia tai a katorobubua n tataro ao ni bubuti ma nanoia ae koaua nakon te Uea bwa e na kakabwaiaia n aia tai mitinare aika angaraoi. Imwiina, ti riai ni kaota ara onimaki ao n tarai taai aika angaraoi ni uota ana euangkerio Iesu Kristo nakoia natin Tamara are i Karawa, ao ni kakoaua bwa e na kaoti te kakabwaia. Angaraoi aikai a na aki kainnanoa te kaeka are ti aki nanonna raoi ke ni kakoaua. A na rangaa bwa mwiin ara tangira raoi ibukiia tarira ma mwanera. Tii karaoa ae raoiroi, ao te koraki ake ko taetae ma ngaia a na namakina am tangira anne. A na a aki mwaninga te namakin anne e ngae ngkana e aki tamaroa te tai anne ibukiia ni butimwaea te euangkerio. Anne naba e kona ni bitaki n taai aika a na roko ngkana a bitaki aroia.

E aki kona n ae e na aki koro bukina ngkana ko karaoa am kabanea n tamaroa ngkana ko karaoa ana mwakuri te Uea. Ngkai te bwai ae e na otinako bon mwiin kammwakuran te rinerine n inaomata, te tibwatibwa bon tabera.

Onimakina te Uea. Bon te Tia Kawakin Tibu ae Tamaroa. E ataia Ana Tibu, ao Ana tibu a ata bwanaana; ao n te bong aei, bwanaan te Tia Kawakin Tibu ae Tamaroa bon bwanaam ao bwanaau. Ao ngkana ti aki iira te mwakuri, angina ake a kan ongora rongorongon Kaokan te euangkerio a na riaoaki. N taekinana ae bebete, bon tii te onimaki ao te mwakuri ae e na riki bwa tabera. Taian reirei a boni bane ni bebete—tataro, n ti ngkoe ao n am utu, ibukiia mitinare n aia taai aika angaraoi. Te Uea e a tia n taku i nanon Doctrine ao Covenants bwa a bati aomata ae a tia n tukaki man te koaua tii ibukina bwa a aki ataia bwa a na kunea iaara (taraD&C 123:12).

Ko aki ria n riki bwa te aomata ngkoe ae bobo ma aomata ke te tia taetae ke te tia reirei ae e bwaati n anainano. Ngkana iai iroum te tangira ao te kantaninga i nanom ae teimatoa, te Uea e a tia ni berita bwa ngkana ko “tabeka bwanaam nakoia aomata aikai; ao n taekina te iango are [E] na karinna inanom, … ko na aki kamangaoaki imataia aomata;

“[Ao] e na anganiira te bwai ae ti na taekinna … i nanon te aua are, ti kainnanoia iai” (tara D&C 100:5–6).

Tataekina Au Euangkerio e kauringiira ni kabane bwa “akea te bwai ae na riki nakon te mwakuri ni mitinare ni karokoa [ti] kunea temanna n anga reirei nakoina. Taetae ma aomata aika bati aika ko kona ni karekeia ni katoa bong. Bon rikira bwa ti na maaku n taetae nakoia aomata, ma ko kona n tataro ibukin te onimaki ao te korakora bwa ko na ninikoria riki ni kaukan wiim n tataekina te euangkerio ae e a tia ni kaokaki” ([2004], 156–57). Ngkami mitinare aika bwanin ami tai ngkana kam tangiria n anga reirei riai kam riai n taetae nakoia aomata aika bati riki ni katoabong. Aio are e a tia n taainako te Uea ni kanakoia mitinare bwa a na karaoia.

Te Uea e ataira. E ataia ae iai kabwakara. I ataia bwa tabeman mai iroumi a na namakina te uota ae rawawata, ma I tataro bwa a na akea mai iroumi ae a na namakinna bwa te reitaki e na riki bwa te kawai ae tataneiai te aba iai ao ni kakukurei n tibwaua te euangkerio e na riki bwa te karawawata. Irarikina, bon te kakabwaia! Akea riki te kimwareirei ae korakora n te maiu nakon are te ingainga ni kan katabeaki n ana mwakuri te Uea.

Te kabanea ni mwaneka ae rangi ni kakawaki bwa ko na kairaki iroun te Atua, bwa ko na butiia ibukin kawaim, ao imwiina n nako ao ni karaoa are e tuangko te Tamnei. Ngkana membwa a taraa te mwakuri ni kamaiu bwa tabeia n tii ngaiia, e kona ni kakamaaku. Ngkana a taraia bwa te kakao n iira te Uea ni kairiia aomata Nakoina bwa a na reireinaki irouia mitinare aika bwanin aia tai, e bon kaunga, e karina te ang, ao e tabekiko rake.

Ti aki tuangiia aomata ni kabane bwa a na karaoi bwaai ni kabane. Ti tii bubuti bwa ni kabane membwa a na tataro n ataia bwa ngkana membwa ni kabane, kairake ao kaara, a na kakawari nakon tii “temanna” imarenan ngkai ao te Kiritimati, mirion aomata a na namakina ana tangira te Uea Iesu Kristo. Ai kamimira te bwaintituaraoi nakon te Tia Kamaiu.

Uoua te wiiki n nako I karekea au reta mairouia utu ni mitinare ae e rangi n nakoraoi, te utu ae te Munns mai Florida. A koreia:

“Nakon Unimwaane Ballard, 30 te miniti imwiin te kanakobwana ae tabangaki iaon kawaekoan te mwakuri ni kamaiu, ti karaoa ara maroro n utu ni mitinare. Ti boni kukurei ni kunea bwa tibura ae tebwi tabun te ririki e tangiria ni karinaki n te maroro. Ti kukurei n ribootinna bwa man te tai are e boo iai ara bootaki, ti a tia ni karababa ara bootaki n utu n reirei man 200 te baetienti.

“A tia tibura ataei ni kairiia raoraoia nakon te taromauri, a tia ni kukurei ni bootakin te toa ma tabeman raoraora ake a aki kakaonimaki, ao a tia tabeman rao aika boou ni baireia bwa a na iira aia maroro mitinare. Temanna mai irouia aine are e aki bati ni kakaonimaki e a tia n tii oki nakon te taromauri ma e a tia ni kairiia taan kakae aika boou.

“Akea ae e a tia n aki butimwaea te kakao nakon aia maroro mitinare. Aio bon te tai ae kakukurei n riki bwa te membwa n te Ekaretia aio” (ana reta te aomata, Aokati. 15, 2013).

Kakauongo nakon ana wirikiriki te Tamnei. Bubutia te Uea n te tataro ma korakoran nanom. Kabaeko ni karaoan are ko kona n tibwauan te rongorongo ae kakannato ni Kaokakin ana euangkerio Iesu Kristo.

I taekina ana taeka temanna te mitinare ae nakoraoi ae Clayton Christensen: “Ni katoa te tai are ko buoka temanna ao ni kairia teuanne ke neienne nakon Iesu Kristo, ko na namakinna bwa nanora ana tangira te Tia Kamaiu nakoim ao n tangira te aomata are ko buokia” (The Power of Everyday Missionaries: The What and How of Sharing the Gospel [2013], 1).

E na kakabwaiai ngkami te Atua, tariu ma mwaaneu, ni kunea te kimwareirei ae korakora are e roko man rinanon kakai rinanon am onimaki. N aron are ti reireiaki ni Moronaai mwakoro 7:

“E a tia n taku Kristo: Ngkana iai onimakinau iroumi ao e na reke iroumi te mwaaka ni karaoa te bwai are kam tangiria irou. …

“…Bwa bon man te onimaki are a karaoaki iai kakai; ao man te onimaki are a kaoti iai anera ma ni mwakuri nakoia aomata; ngaia are, ngkana arona bwa a toki bwaai aikai ao te maraia nakoia natia aomata, bwa e riki ibukin aia kakewekewe, ao a matebuaka bwaai ni kabane” (Moronaai 7:33, 37).

Man oin au taneiai are I rinanona I kakoaua nakoimi bwa te Uea e ongo ami tataro ao e na reke iroumi taai aika angaraoi aika bati ngkai ao n ririki aika a na roko ni uota ana euangkerio Iesu Kristo nakoia natin Tamara are i Karawa aika kakawaki. Beretitenti Monson, ti kakauongo raoi. Ti na ukeuke ni kakaea temanna are e a tia ni bua. I tataro bwa ngaira ni kabane ti na namakina te kimwareirei ae korakora are e roko man aia mwakuri mitinare, n aran Iesu Kristo, amen.