Ni Karokoa Ti a Manga Kaitiboaki

Tariu ao mwaaneu, e kaonaki nanou ngkai ti a kaina ana maungatabu ni kabuta ae kakateke aei te Ekaretia. Ti a tia ni kamwarakeaki n te tamnei ngkai ti kakauongo nakon aia reirei ao aia koaua naake a iri waaki ni katoa tetere.

Ti kakabwaiaki ni kaitibo ikai inanon te Tienta ni Maungatabu ae kamimii inanon te rau ao te kamanoaki. Ti karekea te ribooti ae onoti ibukin te maungatabu, n roko rinanon kaontenanti ao marawa nakoia aomata n taabo nako. E ngae ngke ti maeka n taabo aika raroanako mairoumi, ti namakina tamneimi

Nakoia Taari ake a tia ni kainaomataaki n te maungatabu aei, I bia kaota ana kakaitau te Ekaretia ae bwanin ibukin ami anganano ni mwakuri inanon ririki. Angiina aomata a tia ni kakabwaiaki man ami anganano nakon ana mwakuri te Uea.

I kaota au kakaitau nakon te Taebanaeko Kuaea ao nakoia kaain te kuaea ake tabeman are a iri n te maungatabu aei. E rangin nakoraoi te katangtang ao e reitia korakoran te Tamnei are ti namakinna ni katoa tetere.

I kaitau ngkami ibukin ami tataro n tei ibuku ao ibukia Mataniwi ni Kabuta ao aobitia ni kabuta n te Ekaretia. Ti kakorakoraki ma irouia.

E na raoningkami ana kakabwaia karawa. A na kaonaki mweengami ma te tangira ao te anganano ao ma Tamnein te Uea. Kam bia kateimatoa kamwarakean ami koaua n te euangkerio, bwa a na riki bwa kamanomano nakoimi ni kaitarai ana mwakuri teuare e buakaka.

E a toki ngkai te maungatabu. Ngkai ti nang okirii mweengara, ti bia kamanoaki. E na namakinaki te Tamnei ikai ao n raoniira ngkai ti karaoi bwaai aika ti katabeaki iai ni katoa bong. Ti bia karikirakea kakaotan te akoi nakoira i bon imarenara, ao ti bia nooraki ni karaoa ana mwakuri te Uea n tainako.

Tariu ma mwaaneu, e bia kakabwaiai ngkami te Atua. E berita bwa e na mena ana rau iaomi ngkai ao n aki toki. I kaboo nakoimi ni karokoa ae ti a manga kaitiboaki inanon onoua namwakaina ma ngkai. N aran ara Tia Kamaiu, te Uea Iesu Kristo, amen.