Ko Kani Kamaiuaki?

N tain te amwarake ni kukurei i Ierutarem, E kitaniia aomata te Tia Kamaiu ni ukoriia aika tangira buokaia. E kuneia i Beteteta, te nei ae nimaua kamanna irarikin te tabo ae a kaboaki iai tiibu aika kakannato ibukiia aika aoraki.

E tuangira ana Euangkerio Ioane bwa irarikin te nei “a wene ni kaman akekei aoraki aika bati ma mataki ma mwauku ma bwatakataka, n tataninga koburaken te ran.

“Bwa e na ruo te anera n te tai teuana nako nanon te nei, ao ni kakoburakea te ran: ao are moan ruo nako nanon te ran imwin koburakena e na kamaiuaki man aorakina are reke irouna” (Ioane 5:3–4).

Mwanangan te Tia Kamaiu are e kaotaki n te korobanna ae katamaroaki raoi iroun Carl Bloch ae atuunaki Kristo ngke e Kamaiua te Aoraki i Beteteta. E koreaki tamnein Iesu iroun Bloch ngke e karaurau, ni ieta rabunan te “aomata ae aoraki” (Ioane 5:7) are wene irarikin te nei, n tataninga. Ikai, te taeka ae aoraki e kaineti nakon te aomata ae akea korakorana ao e kantaninga te akoi ao ana nanoanga te Tia Kamaiu, are roko ma te amarau nakoia ake a aki kona ni buokiia i bon irouia.

Inanon te tamnei, te mwaane ae aoraki ae kawakawa iaontano n te tabo ae nuu, e kua ao ni mamara imwin toabuakana ni katoa bong, ni katoa wiki, ni katoa namwakaina inanon 38 te ririki.

Ngke E ieta mataniwin te rabuna te Tia Kamaiu ni baina are teaina, E buokia ni baina are teaina ao e titirakinna te titiraki ae kaineti: “Ko Kani Kamaiuaki?”

E kaeka te aomata, “Teuaei, akea raou ae na kakiai i nanon te nei, ngkana e kakoburakeaki te ran, ma ngkana I kume n nako iai, ao e ruo temanna n ri moau” (Ioane 5:6–7).

Ni kaeka ana kanganga te mwaane anne, E anga te kaeka Iesu ae matoatoa ao n aki kantaningaki:

“Teirake, tabeka kiem, ao nakonako.

“Ao e kamaiuaki naba te aoraki arei, ao e tabeka kiena, ao e nakonako” (Ioane 5:8–9).

Inanon te katoto n tangira teuana, E tuangira Ruka bwa te Tia Kamaiu, ngke tabe ni mwananga nako Ierutarem, e kaitibo ma 10 rebera. Ibukin aorakiia, “ao a tei i kiraroa” (Ruka 17:12). Bon aomata aika ianena―aki itiaki, aki tangiraki.

“Iesu, Te Tia Reirei, ko na nanoangaira,” a takarua (Ruka 17:13)— n taekana teuana, ni bubuti tabeua, “Akea ikanne te bwai ae Ko kona ni karaoia ibukira?”

Te Tia Katoki Aoraki, e onrake n te nanoanga ao te tangira, e ataia bwa te onimaki e na rimoan te kakai ma ngaia are e tuangiia, “Kam na nako ni kaotingkami nakoia ibonga” (Ruka 17:14).

Ngke a nako ma te onimaki, e a riki te kakai. Kam kona ni iangoa te kukurei ae roko ma kawai n tatabeua ngke a kakoaua n te taina raoi bwa rabwataia a tia ni kaitiakaki, ao ni kamaiuaki, ao ni kaokaki n aroia i boni imataia?

“Temanna n uakekei, ngke e noria bwa e kamaiuaki, ao e rairaki n oki, ao e karaoiroa te Atua n te bwana ae korakora,

“Ao e bwaka ni bobaraki i rarikini waen [te Tia Reirei], ni katituaraoia. …

“Ao [Iesu] E taku nako ina, Tei rake, naako: e kamaiuko am onimaki” (Ruka 17:15–16, 19).

N au kataneiai mai imwaina n aron ae te taokita ni bwainaoraki ao te tia korokoro, I kabanea nanou iaon ituan ao kaetakin bwain te rabwata. Iesu Kristo e kamarurunga te rabwata, te iango, ao te tamnei, ao Ana kamaiu e moanaki ma te onimaki.

Ko Uringnga ngke am onimaki ma kimwareireim a taonako nako mataniwina? Uringnga te tai are ko kunea am koaua ke ngke e kamatoa te Atua nakoim bwa ngkoe natina te mwaane ke natina te aine ao E bon rangin tangiriko―ao ko namakina te kamaiuaki. Ngkana e tara ni bua te tai anne, e kona ni manga kuneaki riki.

Te Tia Kamaiu E reireinira bwa ti na kanga ni kamaiuaki―n tabwanin raoi ke ni kamarurungaki:

“Bane mai nako Iu, ngkami akana kam kua ao kam rawawata ao N na motiki rawami.

“Amoa amou iaomi, ao reirei i Rou; bwa I nimamannei ao I nanorinano: ao e na reke iroumi iai motikan rawaia tamneimi.

“Bwa e aoraoi amou, ao e bebete uotau.” (Mataio 11:28–30).

“Nakomai, ao irirai” (Ruka 18:22) katuka te maiu ni kawai ao tangiran bwain te aonaba, n riki bwa te aomata ae e a tibwa karairaki naba ngkai ike “bwaai ni kawai a mauna [ao] bwaai ni kabane a riki ni boou” (2  I-Korinto 5:17), ma te nano naba ae boou, ao ae kakaonimaki. Ao ti a manga moan kamaiuaki riki.

E taekinna bwa ti na kaniira nako Ina ao E na kaniira, ti riai ni ukoukoria ma te botumwaaka ao ti na Kunea, ti na bubuti ao ti na karekea; ti na karebwerebwe ao e na kaukaki nakoira (tara D&C 88:63).

Ngkana ti Kaniia, ti ataia bwa te maiu aei e bon kanganga ao iai “kaitaraan bwaai ni kabane” (2 Nibwaai 2:11) a aki kororaoi n babaire ni kamaiu. Te kaitara, bon kawain te mamate ae riai ao kakorakoran motin nanora ao ni kaitiaki ara rinerine. Taian anga aika bitaki n te maiu e buokira ni karika reitakira ae akea tokina ma Tamara are i Karawa—ni korea bannana iaon moara ngkai ti Anganna nanora (see Alma 5:19).

“Kam na karaoa aei bwa kanuringau” (Ruka 22:19) te bwai ae bubutira te Tia Kamaiu ngke E tibwatibwa te bwai ae ti aranna bwa te toa. Te otenanti aei ma te kariki ao te ran e kaboui berita aika tabu ake ti karaoi ma te Atua ao ni kaoa mwaakan te Mwakuri ni Kamaiu nako nanon maiura. Ti kamarurungaki man katokan aroaro ao aekakin nako katei ni maiu ake a kamatoatoai nano man kamoamoa. Ngkana ti kawenei “ara bwai ni buaka ake [ti] kakaitara iai (Aramwa 23:7) ao n riki bwa taan tei ngaira [i bon]ibukira (tara D&C 58:28) n aki manga kamatakiaki n ana aaro n rarabakau Tatan ao man aki ongo man kakamakun karongoan ana mwakuri te aonaba.

Ngkana ti rairi nanora ao n rairaki nakon te Uea, ti a kamaiuaki ao ni kororaoi, ao ara kairua a kaitiakaki. Ti na bon mimi, n aron are karaoia Enoti, “E kanga ni karaoaki?” E kaeka te Uea: “Ibukin korakoran am onimaki iroun Kristo. … Ma ngaia ae touanako kawaim, e kamaiuko am onimaki” (Enoti 1:7, 8).

Corrie ten Boom bon te Kiritian n aine mai Dutch, e kunea te kamaiu anne ni kakea bonganan ae kabureaki inanon te tabo are a na kabuokaki aomata n te II Ni Buaka n te Aonaba. E bon rotaki n te kainnano ae korakora, ma tiaki n aron tarina ae Betsie, are e mate n teuana te tabo ni kaembwa, e maiu Corrie.

Imwin te buaka e aki toki n taetae nakoia aomata ibukin kamaiuakina ao kabwaran ana bure. N tetaina te tia tararua ngkoa n te Nazi are e a tia teuatana ni karika tabeakinana ngkoa ni kainakin Corrie i Ravensbruck i Tiaman, e kawaria, ao e kukurei n ana rongorongo ibukin Ana kabwarabure Kristo ao ana tangira.

“‘Ai kukureira Ngai ibukin am rongorongo, Fraulein,’ e taku. ‘N iangoan anne, ngkai ko taekinna, E a tia ni kabwarai au bure!’

“E kaotinakoa baina ni iobai ma ngai,” E ururing Corrie. “Ao Ngai are I aki toki ni kabwarabwara … kainnanoan te kabwarabure, I kaaki baiu irariku.

“N aron te aomata ae un, a roko irou iango n irantaanga, I noori aia bure. … te Uea Iesu, I tataro, kabwara au bure ao buokai ni kabwarai ana bure teuanne.

“I kataia ni wi ngare, [ao] I korakai n tabeka baiu. I aki kona. Akea te bwai ae I namakinna, tiaki korakoran te kabuebue ke te tangira. Ngaia are I a tataro n aki karongoa. Iesu, I aki kona ni kabwara ana bure teuanne. Anganai Am kabwara bure.

“Ngke I ana baina iai te bwai ae e riki ae moan te kamimi. Mai tabon angau ni karokoa baiu ao rinanon baiu e tara n ae kanga e kia te iti mai irou nakoina, n te tai anne are e a teberake mai nanou tangiran te aomata ae e iruwa aio are e kuri ni konaai.

“Ao ngaia are I a kunea bwa e aki manga reke riki iaan ara kabwarabure nakon raoiroira n ana kamaiu te aonaba, ma e mena Irouna. Ngke E tuangira bwa ti na tangiria ara kairiribai, E anga, n raonaki ma te taeka, te tangira i bon irouna.”¹

E kamaiuaki Corrie ten Boom.

E taku Beretitenti Thomas S. Monson, “Iai te maiu teuana ae na kamatoaia naake a reke n te kanganga ke ni karawawataki ma te nanokawaki ao te tang—n aron naba te Uea Iesu Kristo.”²

Ngkana ko namakina te aki itiaki, te aki tangiraki, nanokawaki, aki tau, ke te aki tabwanin “e aki eti aron te maiu ma e kona ni karaoaki rinanon Ana kamaiu Iesu Kristo.”³ Onimaki ao taotaonakinnano n ana tai te Uea ma ana kantaninga ibukim. “Tai maku, ko na ti onimaki naba. (Mareko 5:36)

Kakoaua te Tia Kamaiu bwa e na kamaoi tamneira ao ni kamarurungi nanora. E tei irarikin te mataroa ao e karebwerebwe. Ti na kaeka mani manga moanakin riki ara tataro, raira n nano, kabwara bure, ao ni mwanuokinna. Ti na tangira te Atua ao ni beku ibukiia raora ao n tei n taabo aika tabu ma te maiu ae itiaki. Te aomata ae aoraki n te nei ae Beteteta, te rebera inanon mwananga nako Ierutarem, ma Corrie ten Boom a kamaiuaki. “Ko kan kamaiuaki?” Teirake ao nakonako. E “tau Ana akoi” (2  I-Korinto 12:9), ao ko na aki nakonako n tii ngkoe.

I ataia bwa e maiu te Atua. I ataia bwa ngaira ni kabane bon natina ao E tangiriira ngkai antai ngaira ao antai ae ti kona n riki n aekakina. I ataia bwa E kanakoa Ana Rikitemanna nakon te aonaaba n riki bwa te karea ni kamaiu ibukiia aomata ni kabane ao naake iai nanoia ni butimwaea Ana euangkerio ao n Iriria a na kamaiuaki ao n tabwanin—“n oin ana tai, ao n oin ana kawai, ao ni kaineti nakon ana kantaninga” (D&C 88:68), man Ana akoi ae rau. Aio au koaua nakoimi n aran Iesu Kristo, amen.