Sahil k’ulunik eere sa’ li ch’utub’aj-ib’

Ex was wiitz’in, jwal sa sa’ inch’ool chixk’eeb’al jun sahil k’ulunik eere sa’ li jolomil ch’utub’aj-ib’ a’in. Ch’utchuuko sa’ jar paay chi na’ajej chiru chixjunil li ruchich’och re rab’inkil xyaab’ xkujeb’ li winq ut li ixq li ak xqaxakab’ jo’ Jolomil aj B’eresinel ut jolomil aj k’anjel re li Iglees. Xe’xsik’ lix tenq’ankil li choxa chirix li raatin li te’xwotz anajwan, ut xe’reek’a li musiq’anb’il na’leb’ chirix li taayeemanq.

Rik’in li ch’utub’aj-ib’ a’in, 90 chihab’ chaq anajwan naq li jolomil ch’utub’aj-ib’ ki’ok chi puktesiik sa’ li radio. Sa’ li ch’utub’aj-ib’ re Octubre, 1924, eb’ li ch’utam ke’puktesiik sa’ li radio xb’een sut rik’in li KSL, jun estacion re li Iglees. Rik’in ajwi’ li ch’utub’aj-ib’ a’in, 65 chihab’ chaq anajwan naq li jolomil ch’utub’aj-ib’ ki’ok chi puktesiik sa’ li television. Sa’ li ch’utub’aj-ib’ re Octubre, 1949, eb’ li ch’utam ke’puktesiik sa’ li television xb’een sut sa’ Lago Salado rik’in li KSL.

Naqak’e reetal naq osob’tesinb’ilo xb’aan naq taruuq taa’ilmanq malaj taa’ab’imanq li jolomil ch’utub’aj-ib’ xb’aaneb’ k’iila million lix komon li Iglees anajwan. Eb’ li ch’utam chiru li wiib’ chi kutan a’in puktesinb’ileb’ sa’ li television, radio, cable, satelite, ut li internet, jo’ ajwi’ sa’ li celular.

Chiru li waqib’ po xnume’ chalen chaq xqach’utub’ qib’, jun ak’ santil ochoch xk’ojo’baak ut jun chik li xk’ojob’aak wi’chik chi xkab’ suutil. Sa’ li Mayo, li Awa’b’ej Dieter F. Uchtdorf kixk’ojob’ li Santil Ochoch re Fort Lauterdale, Florida. Jun chaq’al ru ninq’e k’eeb’il xb’aaneb’ li ch’ajom xk’ulman jun kutan rub’elaj lix k’ojob’ankil li santil ochoch. Sa’ li kutan jun chik, li Domingo, li kaahib’ xb’e li po Mayo, xk’ojob’aman li santil ochoch sa’ oxib’eb’ li ch’utam.

Yal wiib’ xamaan chaq anajwan, laa’in xinru chixk’ojob’ankil wi’chik chi xkab’ suutil li Santil Ochoch re Ogden, Utah, li k’ojob’anb’il xb’een sut sa’ 1972 xb’aan li Awa’b’ej Joseph Fielding Smith. Jun nimla ninq’e xk’ulman wiib’ kutan rub’elaj lix k’ojob’ankil li santil ochoch, ut k’iila mil chi ch’ajom xe’okenk sa’ wiib’ k’anjel, jalan jalanq li neke’okenk sa’ li junjunq. Sa’ chixjunil, 16.000 chi ch’ajom xe’okenk. Sa’ li kutan jun chik xk’ojob’aman li santil ochoch, ut xe’okenk naab’aleb’ aj jolominel k’anjel rochb’eeneb’ li k’anjenel aj ch’uut ut li awa’b’ej re li santil ochoch a’in, lix tenq’ aj k’ehol na’leb’, ut li rixaqileb’.

Toj yoo chi xik chi ub’ej li qak’anjel re xkab’lankileb’ li santil ochoch. Sa’ po chal re, li ak’ Santil Ochoch re Phoenix, Arizona taak’ojob’aaq, ut sa’ li chihab’ chal re, sa’ 2015, naqoyb’eni naq taak’ojobaaq oob’ chi santil ochoch, ut maare wiib’ chik chirix a’an, wi taachoymanq xkab’lankileb’.

Jo’ xinye sa’ Abril, naq te’choymanq xkab’ankileb’ ut te’k’ojobaaq chixjunileb’ li ak’ santil ochoch li ak yeeb’ileb’ resil, te’wanq 170 chi santil ochoch li yookeb’ chi k’anjelak chiru chixjunil li ruchich’och’. Xb’aan naq yooko chixyalb’al qaq’e chixkab’lankil li santil ochoch a’in, maji’ taqayaab’asi resil xkomon chik li ak’ santil ochoch. A’b’anan, sa’ kutan toj te’chalq, naq yooqo chixk’eeb’al reetal b’ar na’ajman jun santil ochoch ut b’ar tooruuq chi kab’lak, taqayaab’asi resileb’ li ak’ santil ochoch.

Toj yoo chi nimank li Iglees. Numenaq 15 million chi komon ut toj yooko chi tamk. Li qak’anjel re xjultikankil li evangelio naxik chi ub’ej chi maak’a’ xramb’al. Wanqeb’ numenaq 88.000 chi misioneer li yookeb’ chi k’anjelak chiru chixjunil li ruchich’och’. Naqaye wi’chik chi ch’olch’o naq li k’anjel re xjultikankil li evangelio, a’an jun k’anjel re li tijonelil, ut naqawaklesiheb’ xch’ool chixjunileb’ li ch’ajom winq naq te’ok jo’ misioneer. Naqab’antioxi reheb’ chixjunil li saaj ixq li neke’ok jo’ misioneer. Nim xwankil li neke’xb’aanu, us ta maak’a’eb’ xteneb’ankil malaj xtaqlankil chi xik jo’ naq wan reheb’ li ch’ajom winq.

Anajwan, nink’e eeb’oqb’al naq teerab’i li raatineb’ li winq ut li ixq li te’aatinaq anajwan ut wulaj sa’eb’ lix ch’utamil li ch’utub’aj-ib’. Chixjunileb’ li xe’patz’e chi aatinak neke’reek’a xnimal ru xteneb’ankil chixb’aanunkil. Naq yooko chirab’inkileb’, chitoche’q taxaq li qach’ool ut chinimaaq taxaq li qapaab’aal, chi tuulan nintz’aama sa’ xk’ab’a’ li Jesukristo, amen.