Mbohapy hermana
Ñande ha’e responsable ñande discipulado rehe, ha upéva ndoguerekói nada que ver mba’éichapa ñandetrata ñande rapichakuérare.
Hermana ha angirũnguéra ahayhuetéva, ñañepyrũvo conferencia General, hermanakuéra sesión mundial reheve ha’e signifikatívo ha maravilloso. Peñeimaginami: hermanakuéra opaichagua edad, nacionalida ha ñe’ẽ ojoajúva jerovia ha mborayhúpeÑandejárare.
Ore’atývo nda’aréi ñande profeta jahayhuetéva, Presidente Thomas S. Monson, ndive, ha’e he’i oréve mba’eichaitépa ohayhu Ñandejárape; ha che aikuaa Presidente Monson oì agradecidoiterei pene mborayhu, pene ñembo’e ha devoción Ñandejára rehe.
Ojapo heta ary, peteĩ tetã mombyryguápe oikova’ekue mbohapy hermana.
Pe peteĩha ningoha’e peteĩ ndovy’áiva Ndaipóri mba’eveogustáva chupe ijehe: ni itĩ, ni hañykã, ni ipire ni ipy kuã punta. Sapy’ánte oñe’ẽrõ oñe’ẽ vaipa, ha hentekuéra opuka hese. Oñeñe’ẽ’apirõ hese, térã “hesarái” hikuái oinvitaha haĝua chupe, ha’e hovapytãmbánte, oñemomombyry ha oheka peteĩ tenda okañy haĝua ha osuspira’asy oñeporandúvo mba’érepa hekove hasyete ha henyhẽ vy’aỹgui.
Mokõiha, ha’ékuri peteĩ kuña ipochyvaíva Ha’e oimo’ã ikatupyryha, ha katu tapiaite oĩ inota porãvéva chugui mbo’ehaópe. Ha’e oimo’ã ijuky, oñemondeporã ha iporãitereiha. Ha katu tapiaite ojogua oĩha ijukyvéva, oñemondeporãvéva térã iporãvéva chugui.
Ha’e araka’eve ndohupytýi primer lugar mba’evépe, ha upéva no’aguantái. ¡Ko tekove ningo ndaupéichaiva’erãkuri!.
Sapy’ánte ijargel hapichakuéra ndive ha okapu potaitévaicha oimeraẽ mba’ére.
Jaikuaaháicha, upéva nomoporãvéi ni nombojukyvéi chupe. Sapy’ánte ombopu pe hãi, ojopy’atã ipo, ha opensa: “Ko tekove iñinhustoite!”.
Ha upéi oĩ pe mbohapyha hermana. Ndaha’éi iñermanakuéraicha, ovy’aỹva ha ipochýva, kóva katu ovy’akuaa. Ha ndaha’éi ikatupyryve térã iporãve haguére iñermanakuéragui, nahániri. Sapy’ánte hapichakuéra ojehekýi ha nopenái avei hese, térã opuka oñemondelaja térã oñe’ẽlaja rehe. Sapy’ánte oñeñe’ẽ vai chupe. Ha katu ha’e nomboguapyieterei ijehe umíva.
Ko hermana opuraheiseterei. Ha’e ndaipuporãi ha hapichakuéra opuka hese, ha katu upéva nombopytái chupe. He’i jepi ijupe: “¿Ahejáta piko ambuéva ha iñopinionkuéra ojapo ndapuraheive?
Ha’e opurahéi meme haguére ojapo pe peteĩha hermana ovy’aỹve ha pe mokõiha ipochyve.
Ohasa arykuéra, ha upéicha peteĩ teĩ umi hermana oĝuahẽ hekove pahápe.
Pe hermana peteĩha, ohechakuaava’ekue jey jey napokãiha umi jehasa’asy ko tekovépe, omano ovy’aỹvo.
Pe mokõiha, otopáva ára ha ára mba’e pyahu ndogustáiva chupe, omano ipochývo.
Ha pe hermana mbohapyha, ohasava’ekue hekove opurahéivo opa imbarete reheve ha pukavy hováre, omano ovy’ávo.
Jaikuaa ningo ko tekove araka’eve naisimpleitereiha ha hentekuéra ndoguerekói peteĩ lado añónte, umi hermanakuéraicha ko ñemombe’úpe. Ha katu ko’ãichagua techapyrã extremo jepe ikatu ñanembo’e peteĩ mba’e ñandejehegui. Peẽ ha’érõ hetave ñandéicha, ikatu pejehechakuaa peteĩ , mokõi térã jepe umi mbohapy hermanakuérape. Jahesa’ỹijo peteĩ teĩ chupekuéra.
Pe Víctima
Pe hermana peteĩha ojehecha ijupe victima ramo, peteĩ ojeguerahaukáva ambuévare1. Ojogua opa mba’e ojehuva chupe ha’ékuri omoñembyasy haĝua chupe. Omañávo ko tekove upéicha ome’ẽ hína ambuévape control hemiandu ha ikonducta ári. Jajaporõ upéva jajeguerahauka oimeraẽ opinión rei rehe, ha ko épokape umi redes sociales oĩháme oparupirei umi opinión oipeju mbarete yvytu’atãvaícha.
Hermanakuéra pohayhuetéva ¿mba’ére piko peme’ẽta pende vy’apavẽ control peteĩ persona térã grupo-pe ndojepy’apýiva penderehe ni pende vy’apavẽ rehe?
Pehechakuaarõ pendepy’apyha mba’épa oje’e penderehe, ame’ẽta peẽme peteĩ antídoto: Penemandu’áke peẽ ha’eha Tupã rreino róga rreal-pegua, Túva Yvagagua, orreináva opa universo ári rajykuéra.
Peẽ peguereko Tupã ADN espiritual. Peguereko donkuéra yjoja’ỹva heñoiva’ekue pejejapo ypyramoguare espiritualmente ha okakuaava’ekue pe tekove preterrenal tuichakue jave. Peẽ ha’e ñande Ru Yvagagua iporiahuverekokuaáva ha opave’ỹva, pe Señor de los Ejercitos, ojapova’ekue ko Universo, ha omoĩ mbyjakuéra pe yvaga tuichakuejavére ha omoĩ umi planeta ijórbitape, rajykuéra.
Peẽ peime Ipópe.
Po iporãmbáva
Po oporohayhúva
Po oporomokunu’ũkuaáva
Ha mba’eve he’íva maãvéva ikatu omoambue upéva araka’eve. Ambuekuéra ñe’ẽ oñembohesa’yju Tupã he’iva’ekue penderehe ykére.
Peẽ ningo Itajyrakuéra pejehayhuetéva
Ha’e penderayhu.
Peñepysangarõ térã peñemomombyryrõ jepe Chugui, Ha’e penderayhu. Peñandurõ pekañyha hína, térã pejehejarei hague térã pene’añoha, ani pekyhyje. Pe Buen Pastor pendejuhúta, penemoĩta Ijati’y ári ha pendegueraháta ógape.2
Che hermanakuéra pohayhuetéva, peheja ko’ã añetegua marangatu toike pypyku pene korasõme ha pehecháta oĩha heta mba’érepa ndapeñeme’ẽiva’erã vy’aỹme, peguerekógui peteĩ destino eterno pekumpli haĝua.
Pe Yvóra Salvador ñanderayhuetéva ome’ẽ Hekove peẽ ikatu haĝua pejapo upe destinogui peteĩ añetegua. Peẽ pejagarra pende ári Héra; peẽ ningo Idiscipulakuéra; ha Hese rupi peñemondekuaa gloria eterna reheve.
Pe ohayhu’ỹva
Pe hermana mokõiha ipochy mundo ndive. Iñermána ovy’a’ỹvaicha, ha’e oimo’ã opa ko tekove problemakuéra ha’e ambuéva kulpa. Okulpa ifamilia, iñangirũnguéra, ihéfe ha ikompañerokuéra omba’apohapegua, policiakuéra, ivecino, Tupaogua liderkuérape, moda aĝaguápe, kuarahy mimbípe ha jétape jepe. Ha orreacciona pochy reheve opa mba’épe.
Ha’e noimo’ãi ijargelha. Ha katu opensa oñedefendehánte hína. Oimo’ã opavavépe omokyre’ỹ pe egoísmo, rakate’ỹ ha jehayhu’ỹ. Ha chupe katu omokyre’ỹ py’aporã: pe hustisia, integridad ha mborayhu.
Ñembyasyrã, pe hermana ipochýva opensalaja oĩ hetaiterei, ojehechaukáva’ekue peteĩ estudio ojejaporamóvape ohesa’ỹijóva umi aty oñemoĩva ojuehe ñorairõ. Upe jehesa’ỹijo ramo, investigadorkuéra oñe’ẽ palestinos ha Israelíes ndive Oriente Medio-pe ha Republicanos ha Demócratas Estados Unidos-pe, ha ohechakuaa hikuái “cada aty oimo’ã ijatýpe omokyre’ỹha pe mborayhu, jehayhu’ỹ rangue, ha katu oñeporandurõ chupekuéra mba’érepa pe ambue aty oñemoĩvare hikuái oĩ pe ñorairõme, he’i hikuái jehayhu’ỹ ha’eha pe omokyre’ỹva pe ambue atýpe.”3
Ambue ñe’ẽme, ojehecha ijupe hikuái “iguénova”, ihustova, ipy’aporãva ha añetéva ramo. Ha katu ohecha irrival-pe “iñañáva”, ndoikuaáiva mba’eve, ijapúva ha jepe hekoñañavaicha.
Chereñoirõ guare yvóra oĩkuri peteĩ guerra guasúpe ogueruva’ekue tuicha ñembyasy ha py’arasy oipy’ajukáva yvórape. Upe guerra omoñepyrũkuri che retã, yvypórakuéra aty rupi oimo’ãva ambue aty iñaña, ha omokyre’ỹ jehayhu’ỹ hesekuérare.
Ombokirirĩ umi ndogustáiva chupekuérape. Omotĩ ha ombovaipa chupekuéra. O’apo’i chupekuéra, jepe ndaha’eirõguáicha yvypóra. Oñembo’apo’i rire peteĩ yvypóra atýpe, oñeñeha’ã ojehustifikávo umi mba’e vai oje’e ha ojejapóva hesekuéra.
Chemopirĩmbaapensávo oikova’ekuére pe Alemania siglo XX guápe umichagua actitud rupi. Ñembyasyrã, ikatu ñanembegue,térã ndaikatúi jahecha umichagua tendencia ñande jehe ko’ã árape.
Máva oñemoĩrõ ñande rehe térã ojoavy ñanendive, ñañeha’ã ñapensa peambuéva ojavyha hína. Ha upégui ñame’ẽ haĝua iñe’ẽme ha ojapóvape motivokuéra ivaivéva oĩ peteĩ paso michĩvante.
Añetehápe ñadefendeva’erã oĩporãva ha sapy’ánte ñamohendukava’erã ñane ñe’ẽ upe causa rehe. Upevére, jajaporõ upéva pochy térã jehayhu’ỹ reheve ñane korasõme – ja’ataka ramo ñe’ẽme yvyporakuérape jajapovai haĝua, ñamotĩ térã ñamokirirĩ haĝua – ikatu ndajajapói hína umi mba’e tekojojápe.
¿Mba’e ombo’ékuri pe Salvador?
“Ha katu che ha’e peẽme: Pehayhu penderayhu’ỹvape, pehovasa umi pendemaldecívape, pejapo iporãva umi ndocha’éiva pende rehe, ha peñembo’e umi ojapovaiva penderehe ha penemuñáva;
“Ha’e haĝua pende Ru oĩva yvágape ta’ýra ha tajyrakuéra.”4
Upéva ha’e pe Salvador oipotaháicha ha pe paso peteĩha jaity haĝua umi muralla pochy, jehayhu’ỹ, ñemboja’o ha violencia rehegua oĩva ko mundo-pe.
“Heẽ”, ikatu peje, “ahayhúne jehayhu’ỹvape…ha’ekuéra ojapotarõ upéicha avei añónte”.
Ha katu upéva noimportái ¿ajépa?. Ñande ha’e responsable ñande discipulado rehe, ha upéva ndoguerekoi nada que ver mba’éichapa ñandetrata ñande rapichakuéra reheve. Añetehápe ñaha’arõ ha’ekuéra avei taha’e komprensivo ha karitativo ñanendive, ha katu ñane mborayhuhesekuéra ha’e independiente ha’ekuéra oñandúvaguiñanderehe.
Ikatu ñañeha’ãvo jahayhu ñanderayhu’ỹvape omohu’ũ ikorasõ térã oinflui porã chupekuéra, térã nahániri. Ha katu upéva nomoambue ñande kompromiso jasegui haĝua Jesucristo-pe
Upéicha, Jesucristo Tupaogua miembroicha, jahayhúta ñande rayhu’ỹhakuérape.
Jagueropu’akáta pochy ha jehayhu’ỹ.
Ñamyanyhẽta ñane korasõ mborayhu reheve opa Tupã ra’y ha rajykuéra rehe.
Jaipysóta ñande po jahovasa ha ñaministra haĝua ñande rapichakuérape, jepe umi ojapovaiva ñanderehe ha ñanemuñáva.”5
Pe discípula añetéva
Pe hermana mbohapyha orrepresenta pe Jesucristo discípula añetéva. Ha’e ojapo peteĩ mba’e ikatúva hasyeterei: ojerovia Tupãre oñembohoryrõjepe hese hikuái. Oimeraẽicha ojoko ijerovia ha esperanza umi ñembohory ha vyrorei oĩva ijerére ári. Oiko vy’ápe, ndaha’éi icircunstacia ha’eguikuri vy’arã, ha katu ha’e ovy’akuaágui.
Avavete ndohasái ko tekovére oposición’ỹre. Hetaite mba’e mbarete oñeha’ãva ñandegueraha, ¿mba’éichapa jaguerekóta ñande resa centrado pe vy’apavẽ hechapyrãva oñeprometéva umi hekojojávape?
Apensa pe ñembohovái oĨha peteĩ sueño oguerekova’ekue peteĩ profeta ojapo miles de años. Héra ha’e Lehi ha upe sueño oĩ registrado pe Libro de Mormón hechapyrãvape.
Lehi ohecha isueñope peteĩ ñu tuicha oĩháme peteĩ yvyramáta hechapyrãva iporãngue ndaikatuíva oñemombe’u. Ohecha avei heta hente aty ohóva hína pe yvyramáta gotyo ho’u haĝua hi’yva glorioso oimo’ãgui ome’ẽtaha chupekuéra tuicha vy’a ha py’aguapy oduráva, ha ojerovia upeichataha.
Oĩ kuri peteĩ tape po’i ogueraháva pe yvyramátape, ha ijykére oĩ peteĩ barra de hierro ohejáva osegui pe tapére. Ha katu avei oĩ peteĩ tatatĩ ypytũ omoypytũva pe tape ha pe yvyramáta jehecha. Ikatu pe ipeligrosovéva ha’ékuri pe puka ha ñembohory pu oúva peteĩ óga tuicha ha ipyrysúva iñaĝuiva. Sorprendentemente, umi ñembohory oguapy alguno umi oĝuahẽva’ekuére pe yvyramátape ha ho’u pe yva hechapyrãvagui ha upévare hi’otĩ ha okañy hikuái.6
Ikatu oñepyrũ oduda pe yvyramátapa añetehápe iporãite opensahaguéicha hikuái. Ikatu oñepyrũ oñeporandu pe oñanduva’ekuépa ciertogua.
Ikatu jepe opensa tekove hasy’ỹvéta oñemomombyrýrõ pe yvyramátagui. Ikatu umi ñembohory ha jepuka opa.
Ipahápe, umi opukáva hesekuéra ovy’ávaicha ha ojoguávaicha ohasa porãitereiha. Ikatu ohejárõ pe yvyramáta pe aty oĩva pe óga tuicha ha ipyrusúva omoĝuahẽporãitéta ha ofelicitáta chupekuéra iñakãporã, ikatupyry ha ichuchihaguére.
Pepyta pe tapépe
Che hermanakuéra ha angirũnguéra pohayhuetéva, hasyrõ peẽme pejejoko pe barra de hierro-re ha peguata mbarete salvación gotyo; umi oĩvaicha seguro jepuka ha ñembohory penemboguevisérõ; pendepy’apyrõ umi porandu peguerekóva doctrina napentendeivagueteri rehegua; ourõ peẽme vy’aỹ umi mba’e nosẽporãirõ, pomokyre’ỹ’asy penemandu’a haĝua Lehi sueño rehe.
¡Pepyta pe tapépe!
¡Ani araka’eve pepoi pe barra de hierro: Tupã ñe’ẽ!
Ha oĩrõ oñembohoryséva penderehe peparticipahaguére Tupã mborayhúgui, Ani pepena hesekuéra.
Ani penderesarái araka’eve peẽ ha’eha Tupã rajy; tuicha jehovasa pendera’arõ; ¡pejapokuaárõ Ivoluntad, peikojeýta Hendive!7
Umi promesa ñemomorã ha aceptación yvóra ome’ẽva ijapu ha ndovaléi. Umi Tupã promesa katu añetegua, ha ñanembovy’a ko árape ha tapiaite.
Po’invita pekonsidera haĝua religión ha fe peteĩ perspectiva yvateve guive. Mba’eve oikuave’ẽva pe Óga tuicha ha ipyrusúva oñembojojakuaa pe Jesucristo evangelio jevivi yvakuéra rehe.
Añetehápe, ““cosas que ojo no vio, ni oído oyó, ni han subido al corazón del hombre, son las que Dios ha preparado para aquellos que le aman” 8
Añemo’arandu chejeheguiete pe Jesucristo evangelio discipulado rape ñandeguerahaha vy’apavẽpe. Ha’e pe tape py’aguapy ha seguridad gotyo. Ha’e pe tape añeteguápe.
Atestifika pe Espiritu Santo don ha pu’aka rupive ikatuha peñemo’arandu kóvape pendejeheguiete.
Upéva aja, pe tape hasyverõ, aha’arõ pejuhu ñemo’ã ha mbarete umi tupaogua organización hechapyrãvape: Primaria, Mujeres Jovenes ha Sociedad de Socorro. Umíva ha’e punto de referenciaicha pe tapépe, ikatuhápe pembopyahu pende confianza ha fe pe tape outavape ĝuarã. Ha’e peteĩ óga isegurova ikatuhape peguereko pe sentido de pertenencia ha pehupytykuaa ñemokyre’ỹ pende hermana ha condiscípulakuéragui.
Umi mba’e peñemo’arandúvape Primaria-pe penembosako’i umi añetegua adicional peñemo’arandútavape mujeres jóvenes-pe. Pe discipulado rape peguatavare Mujeres Jovenes clasekuérape pendegueraha fraternidad ha hermandad oĩva Sociedad de Socorro-pe. Peteĩ teĩ umi guata peme’ẽva ome’ẽ peẽme oportunidad adicional pehechauka haĝua pende mborayhu pende rapichakuérare fe, kompasión, karida, virtud ha servicio rembiapo rupive.
Jaiporavóvo upe discipulado rape ñandegueraháta peteĩ vy’apavẽpe ha pende naturaleza divina realización ijoja’ỹvape.
Hasy’imita. Oikotevẽta iporãnguete peguerekóvagui: opa pende arandu, katupyry, jerovia, mbarete, py’aguasu ha mborayhu. Ha katu peteĩ árape pemañáta tapykue gotyo pende ñeha’ãre ha tuicha pende aguyjéta pepyta haguére ñemova’ỹme, peguerovia haguére ha napesẽihaguere pe tape porãgui.
Tapeho tenonde gotyo
Ikatu oĩ heta mba’e osẽva pende control-gui, ha katu ipahápe peguereko pu’aka peiporavo haĝua pende destino ha heta umi experiencia oĩva tapére. Ojapóva pe diferencia ko tekovépe ndaha’éi voi pende katupyry, ha katu umi decisión pejapóva.9
Ani peheja umi No circunstancia penembovy’aỹ
Ani peheja umiva penembopochy
Ikatu pevy’a ha’ehaguére Tupã rajykuéra. Ikatu pejuhu vy’apavẽ ha vy’a Tupã grasia ha Jesucristo mborayhúpe.
Ykatu pevy’a
Pomokyre’ỹ pemyanyhẽ haĝua pene korasõ gratitud-gui, pe Tupã py’aporã opave’ỹva rehe. Che hermankuéra pohayhuetéva ¡peẽ ikatu pejapo upéva! Ajerure’asy opa che anga mbarete reheve tapeiporavo peguata pe Yvyramáta Tekove rehegua gotyo. Ajerure’asy tapeiporavo pemopu’ã pende ñe’ẽ ha pejapo pende rekovégui peteĩ sinfonía gloriosa tupaitũrã, pevy’ávo Tupã mborayhúpe ha umi techapyrã Itupao ha Jesucristo evangelio ikatúva ogueraha ko mundo-pe
Oĩ alguno pe discipulado añete purahéi ojoguávape idesafinadoha térã ijyvatetereiha. Ha’ékuri péicha mundo oñepyrũ guive.
Ha katu ñande Ru Yvagaguápe ĝuarã, ha umi ohayhúva ha omomorãva chupe, ha’e peteĩ purahéi iporãitereíva, pe mborayhu rredentor purahéi sublime ha marangatúva ha Tupã ha tapicha servicio rehegua.10
Aheja peẽme che jehovasa Ñandejára apóstol háicha pejuhutaha mbarete ha py’aguasu pendepoty haĝua Tupã rajykuéraicha, peguata aja vy’ápe ára ha ára pe discipulado rape marangatúre. Jesucristo rera marangatúpe. Amén.