Ngan Mang Gidii’en Got ko tin Tomur e Rran nib Mangil
Nggu digeymed ko fapi tawa’ath ni gube pi’ ngomed, ni mu duru’iyed gimed ko thin rok’ Somoel mag gamed fek fapi machib rok ngalan e yafos romed.
Biney e mo’olung ab bigel e thothog riy ma ra boran ndabin pagtilin. Gadad be sap nga m’on ko tin nib mangil ban’en. Kan pi’ gelngindad ni ngad rin’ed e tin nib mangil magdad mon’og. Fapi mulwol nike pi’ fapi General Authorities nge General Officers nge fare musik ab mangil! Gube piningem ni ngam fil e pi mulwol ney, ngam tabab e biney e week.1 Nibe weliy e tafney nge wo’en rok Somoel ngak fapi gidii’ Rok’, e daba’.
Fare lukngun e tabinaew, Galasia e ke fal’eg reb rogon ni ngan rin’ nifan gelngin e tabinaew, nap’an nra rin’ e chonggin e tabinaew e pin’ey ni woed rogon ni kanog ma ra thilyeg fare tabinaew rorad nge par nib tabinaew ko mich. Gube micheg ni fa’an garam ngongliy e tabinaew rom nge par ni fare gospel e bay u lukngun, ma ra boech ngaram ma fare Madnom rom e ra i mom i yan. Pi bitir rom e yad ra a’dag ni ngar filed miyed par ni woed rogon fapi machib rok fare Tathapeg, ma fare moniyan’ e ra palog ulan e yafos rom nge ulan tabinaew rom. Ma ra thil e tabinaew rom nib papay.
Nap’an e biney e conference ma kug peri’egned rogon nrayag ni ngan tay fan fare Somoel Yesus Kristus ko gubin ngiyal’ ni kad weliy mornga’agen fare Galasia Rok’. Gube micheg ni nap’an ni gadad ra yoeg fare bin nib mat’aw rogon iyog fithngan fare Galasia rok fare Tathapeg ma fapi chonngin e galasia e ra mon’og nag e mich rorad me re gel fare thothup ko fapi gidii’en e Galasia Rok’.
Chiney ngad sapgad ko mornga’agen e tempel. Gadad manang ni tym rodad u tempel ab tu’uf ko fare thapeg rodad ni weod gidii’en e tabinaew rodad.
Tomren nikad thapegned e pi gam’ing rodad u tempel nge fapi m’ag rodad ngak Got, gadad gubin mab tu’uf ni ngad ul’ul’gad ngad rin’ed e biney ya krimus ni’ir aray e gin nrayag ni ngan rin’ e tiney riy ko fare nu’un rok fare Somoel. Ma fapi ganong rodad ab tu’uf ni ngad rin’ed e biney ni fan ngorad.
Tafneynag fare murunguy rok Got ni’ir, e m’on ko def ko fayleng, nike pi’ kanawo’en ngak’ e tawa’ath ko tempel ko gidii’ nike yim’ ni daniyag ni ngar thapegned fare gospel. Tiney e m’ag u tempel e kab kakurom ban’en. I gag e tin nib kakurom ban’en e gub’dag ma reb e pow riy ni tiney ab riyul’.2
Pi walageg ni pumo’on nge pi’in nib ppin, fare lumel ku moniyan’ e be ga’ i yan, nib alamrin mab thilthil rogon.3 Iraray e ngiyal’ ni kari tu’uf ni ngad darod nga tempel ni gubin ngiyal’. Gube wenig nag ngom ngam sap ko rogon ni gama yus nag e tym rom. Mu rin’ e tin nib ga’fan ngom ko gubul nge langlad nga fan e tabinaew rom. Ma fa’an nra bay wo’em nga tempel, gube yog ngom ni ngam man nib pethpeth ni ngam guy Somoel—ngam par ulan fare nu’un rok nib thothup—mag tay riy ni aram rogon mag fal’falan’ ngay. Gube micheg ni fare Somoel e ra pi’ ngom fapi ma’ang’ang nib tu’uf rom nap’an ni gabe yan nga tempel ngam tayfan.
Chiney ma bay 159 e tempel nikan yibliy.Gadad ba’adag e pi temple ney ma muruwel’ nib fel rogon. Ufithik’ e ningyal’ nibe yaen, pi temple t’uf ni ngar thapeg e ayuw ni ngar bi’ech nag. Ere, bay e tanom chiney ni nggu bi’ech nag fare Salt Lake City Temple nge bochi reb e pi temple kar toy’ed fapi pioneer. Reb e ganop ko tiney ra yib ngomed napan ra buch.
Daba’ ma gamad be announc nag ni kubay ni toy 12 pi tempel. Tiney e tempel e bayni toy ko gin ba’aray: Mendoza, Argentina; Salvador, Brazil; Yuba City, California; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Philippines; San Juan, Puerto Rico; and Washington County, Utah.
Toey min fal’agin e tempel e sana dabi thilyeg e yafos rom, machane garam man nga tempel ma ra thilyeg e yafos rom. Pi cha’en ni ke n’uw nap’an rad ni daw riki raned nga tempel, gube pi’ e athamgil ngomed ni ngam suled nib papay. Ma gube piningmed ni ngam meybil gad ulan fare tempel ni ngayag ni ngam thamiyed fare tu’ufeg rok fare Tathapeg nib manechubog, ni ngayog ngomed ni gubin fare mich ni’ir e be pi muruwel ney.4
Pi walageg ni pumo’on nge ppin, gube pining e magar ngomed ko pi muruwel romed. Ngu digeymed ko fapi tawa’ath ni gube pi’ ngomed, ni mu duru’iyed gimed ko thin rok’ Somoel mag gamed fek fapi machib rok ngalan e yafos romed. Gube micheg ngomed ni fare thapeg e be ul’ul’ ulan fare Galasia ma kube ul’ul’ nge mada’ ko ngiyal’ “ni fare muruwel rok Got e ke m’ay, ma fare Johova e re yog ni ke m’ay fare muruwel.”5
Gube yibliymed nra ga’ e mich romed Ngak nge ulan fare muruwel Rok’ nib thothup, ko mich nge gaman’ ni ngam athamgil ko pi n’en nibe buchbuch ulan e yafos rom. Gube yibliymed ni ngam pired ni Gidii’en Got ni Tomur e Rran. Ma rug be yibliymed ma gube micheg e mich rog nibay Got nib fos! Yesus e ir Kristus! Iraray e Galasia Rok’. Ma gadad gidii’en, u dakan fithngan Yesus Kristus, amen.