Pi Galibthir nge Bitir
Tanom ko Chitamangdad nibay u Tharmiy ab fal’falan’ ngay ni nge yog ngom ko gur mini’ nge fam ko biney e yafos.
Pi walageg ni pi’in nib ppin, rib mangil ni yibe tay e biney e mo’olung nifen e pi’in nib ppin ko Galasia ni 8 e duw roraed ngalang. Kad motoyilgad ko fapi thin rok President Henry B. Eyring nib mangil. President Eyring nge gag e gamow ba’adag ni gamad be muruwel u tan pa’ i President Russell M. Nelson, ma dabki yag ninggu soen gaed ni nggu motoyilgad ngak.
I.
Bitir e bin th’abi gaa’ e tawa’ath rok Got—pifak pifakdad nibe ga’i yaan. Ma dariy fan ni aray rogom, bo’or e ppin ni dabun ninge fakay fa chugliy e bitir. Bo’or e gidii’ ni fal’yangren nima soen ko mabgol nge mada’ ko ngiyal’ nike mu’ i rin’ e tin ba’adag ban’en. Mabgol ko gidii’ nib LDS e ke mon’og ngalang ulan l’agruw e duw, ma namba ko gidii’en e Galasia ninge fakay e bitir e ke achigchig. Ulan u Mariken nge ku boech e naam e be sap ngay ni dabi gaman e bitir ni nge il’al ninge ayuweg e namba ko gidii’ ni bayi tal ko muruwel.1 Ma 40 pasent ko bitir ni yibe gergelnag ulan u Mariken ke buch u wuru’ e mabgol. Tiney e bitir e bagel e m’angfan’ rorad. Ni urngin e pin’ey nibe togan nag fare wo’en e thap rok’ e Chitamangdad.
II.
Gidii’en Kristus ni pi’in nib ppin e yaed manang ni ngan mang matin e ir fare muruwel rorad ni th’abi tolang ko urngin ban’en, ni’ir fare tawa’ath rorad. President Gordon B. Hinckley e ga’ar: “Pi’in nib ppin e baga’ nima guy e tin nike ngongliy nib th’abi fel’, ulan fare tabinaew rok’ nge gelngin e fal’falan’ nibay u langgin fare tabinaew rok. Got e yung ban’en ngalan rongren fapi ppin nib thil, mab munguy, mab fel’, mab machib, mab yul’yul’, mabay e tu’ufeg rok. Ma urngin e pin’ey nib felel’ e bay rok e chitiningin e tabinaew.”
Maki ul’ul’, “Fare bin th’abi mangil e muruwel ni demtrung ko bin e ppin nra rinn’ e nge chugliy me fil me pii’ e athamgil ngak pifak ninge rin’ e tin nib yul’yul’ ban’en. Dariy ban’en nib gaa’ ko biney, ni demtrug ko mang e be rin’.”2
Chitiningin e tabinaew, pi walageg ni ppin, gamed ba tu’uf romed nge tin ni gamed ma rin’ ni fan ngomad ni gubin.
Ko numon rok ko 2015 ni kanog “Gube Wenig Nag ngak Pi Walageg ni Ppin,” President Russell M. Nelson e ga’ar:
“Fare gil’ilungun ku Got e dabiyag ni nge paer nib polo’ ni fa’an ndariy e pi’in nib ppin riy ni yadma tay chiylen fapi motochiyel ni kar feked nga dakaenrad, ni pi’in ni ppin nrayag ni ngar nonad u fithik gelngin ku Got!
“Dabay, … ba tu’uf rodad e ppin nrayag ni nge muruwliy e tin nib ga’fan nge buch nib banchan fare mich rorad nge tin ni yad manangfan nifen e tabinaew. Ba tu’uf rodad e ppin nrayag ni nge gafaliy pifak Got ko fare pi’i kanawo’ ko motochiyel nibe yan ko fare exaltation; ppin ni manang rogon ni nge thapag e thogthog rok Got, nib manangfan gelengin nge gapas ko fare endowment u tempel; ppin nib manang rogon ni nge ning me fek gelngin nibay u tharmiy ni nge ayuweg pifak nge tabinaew rok; ppin nrayag ni nge machib ndariy e murus rok.”3
Tiney e machib e be yib ko fare “The Family: A Proclamation to the World,” ni’ir aray nibay ko biney e Galasia ni kan sulweg nga fayleng nibay e pi machib ney riy nike Sunmiy u m’on ni ke ngongliy e fayleng.
III.
Chiney e ngu non ngak e tin nib bitir e gidii’ u fithikmed. Pi walageg ni tin ni bitir e ppin, ni bachan e llowan’ romed ko fare gospel rok Yesus Kristus nikan fulweg biyay, gamed ba thil. Llowan’ rom e rayag ni nge ayuwegenem ko tin nib momaw’ ban’en nap’an ni gabe il’al i yan. Nap’an e gab bitir, ma kam un nga boech ban’en ni ke gaa’nag e lowan’ rom, fal’ngim, yol rom, thin rom, nge ngongol rom, ma kam fil ni dabum ban, fan iring, fan chingaw’ fan yus nag e drag.
Rogom nib thil e ke guy ba University u North Carolina nike yoloy mornga’agen e fal’yangren u Mariken nge rogon e taliw. Ni kanog fithngan e Charlotte Observer ngay nike tunguy fithngan e biney ni “Mormon Teens Cope Best: Study Finds They Top Peers at Handling Adolescence.” Biney e babyor e be dag ni “Mormon e ma palognag ir ko ngongol nib togan, ma yadma tiyan’rad ko skuul ma ba fel’ e tafney rorad ko tin nga m’on ban’en.” Ta’areb e sensey e non ngak bochi fal’yangren, e ga’ar, “Gubin fapi guruy ni kugsap gad ngay, ma be m’ug ni: Mormon e yad e somm’on.”4
Mangfan ni ba mom ngom ni ngam rin’ e tin ni momaw’ ban’en nap’an ni gabe il’al i yan? Ppin nib fal’yangren, ni bachan e kam nangfan fare tonom rok e Chitamangdad nibay u Tharmiy. Biney e be yog ngom ko gur mini’ nge fan e yafos romed. Fal’yangren ni manang e biney e yad e gidii’ ni somm’on ko fal’ag rogon ban’en ma yad e somm’on ko mel’eg e tin nib mat’aw. Gamnang ni ra ayuwegnem Somoel ko tin nibe magagawon nigem.
Reb i fan ni gamed ba cheg ni bachan gamed manangfan ni gamed e bitir rok e Chitamandad nibay u Tharmiy ni gamed ba tu’uf rok. Gumnang ni gamed manang fare tang “Pi Bitir Rog, Got e ba Chuchugur Ngom.” Ba’aray e bin somm’on e guruy riy nib mich u wan’dad ngay:
Pi bitir rog, Got e ba chuchugur ngom,
Nibe motangiyem ni rran nge nap’,
Mab fal’falan’ ngay ninge pinngem ni gur fak,
Ni fa’an garam rin’ e tin nib mat’aw.5
Bay l’agruw ban’en nrayag ni ngan fil ko gali verse ney: Bin somm’on, Chitamangdad nibay u Tharmiy e ba chuchugur ngodad ma motangiydad nrran nge naap’. Lemnang! Gadad ba tu’uf ku Got, ma ba chuchugur ngodad, ma be motangiydad. Bin l’agruw,ba’adag ni nge tawa’ath nagdad ni fa’an gadad “ra rin’ e tin nib mataw’.” Nii demtrug ko mang e be buchbuch rodad!
Arragon, ppin nib fal’yangren, gab tawa’ath ma gur be’ nib mangil, ma gamed gubin ma woed e Chitamangdad nibay u Tharmiy nib tu’uf ni ngam ul’ul’ “ko tin nib mat’aw ban’en.”
Rayag ni ngu fanow nigem ko boech ban’en ni bo’or, machane kug mel’eg ni kemus ni ngu fanow nigem ko l’agruw i ban’en.
Bin somm’on e fanow rog e mornga’agen e cell fon. Bay babyor nike yan u dakaen e fayleng nibe yog ni barba’ ko fal’yangren u dakaen e naam nu Mariken e bo’or e tym ni yad ma muruwliyed e cell fon rorad. Ma oraniyad ni 40 pasent e yog ni yad be thamiy miit e m’ar nap’an nran palognag e cell fon rorad.6 Ni baga’ nibgel u dakaen e ppin ngak e pagal. Pi walageg ni bitir—nge tin nib il’al’—ran tawa’ath nigem ni fa’an garam gonop nag i yus nag e cell fon rom.
Bin magid e fanow rog e kari gaa’fan boech. Munguy nigem ngak e gidii’. Munguy e ban’an ni oran i gamed e be rin’. Boech e fal’yangren ulan reb e binaew e kar daged rogon e biney ngodad. Ma kan pii’ e athamgil ngodad ko fapi tu’ufeg nge murnguy rok e gidii’ nib tu’uf e ayuw rorad. Bo’or yay ni kam ppi’ed e ayuw nge tu’ufeg ngak boech e gidii’. Gamad be athapeg ni gubin e gidii’ ma ra laek kanawo’enmed.
Ko ngiyal’ ney, ma kabay fare moniyan’ ni bay i ligindad ni dabda munguygad, bo’or rogon e biney, nibay rok e bitir nge fal’yangren. Bo’or fithngan e biney, ni kanog e makarang, mo’olung ni ngan makarang nag bee’, fan ulung nga ta’abang ni ngan si’in ngak bee’. Tiney e ma gelnag e gafgow ko pi’in fagar nge gidii’ u skuul. Pi walageg nib bitir, dani a’dag Somoel ni fa’an gadad be si’in ngak boech e gidii’.
Ba’aray reb kanawo’en. Gumnang reb e pagal, be’ nib refugee uroy u Utah, ni kan kakrang ni bachan e be non ko naam rok me mo’olung boech e bitir nib fel’yangren ngan kakrang nge mada’ ko ngiyal’ ni dakiyag rok me rin’ e tagan min non’ nga kalbus ni 70 e rran ma yibe sap ngak ni ngan fulweg ko naam rok. Dagnang ko mang e be tafney nag e tiney e fal’yangren, oren i yad e Gidii’en Got ni woed gur, ma gube guy fani dariy e runguy rorad, ni kar rin’ed e biney ngak reb e bitir rok Got. Ban’en ni dariy e murnguy riy e rayag ni nge gaa’ ni woed e biney.
Nap’an nug rung’ag e biney, mug ta’arebnag ko profet rodad, President Nelson, nike yoeg ko fare youth devotional u dakaen e fayleng. Yibe fith med nge ku boech e fal’yangren ningan ayuweg u Isreal, me ga’ar: “Mu sak’iy ngalang; mag thilyegnem ko fayleng. Gur nge gag e gadow manang ni gadow e magal ko fayleng. Arragon, fare Somoel e ba tu’uf ni ngam woed ya’an, ma woed laman, me yan riy, me chuw nga mad ni woed gachalpen Yesus Kristus.”7
Fapi salthaw ko fal’yangren President Nelson e ke piningem ni dabkin toto’ogor ngak bee’. Yadra leak wo’en fare machib rok fare Tathepag miyad ayuweg boech e gidii’, ni woed ni bay pii’ i barba’ i owchen ngak’ facha’ ni fa’an nike rin’ e togon ngom.
Nap’an e general conference ko ngiyal’ ni oran i gimed e kan gargelnag, President Gordan B. Hinckley ke ‘ognag e magar ngak e “pi’in nib ppin nib fel’yanranrad niyad be gay rogon ngar pired niyad be fol ko fare gospel.” Ta’areb rogon ni nguweliymed:
“Ni yad ba gol ngorad. Ma yad be gay rogon ni ngar pii’ed gelnginrad. Ma yad ma tayfan e galibthir rorad nge gin ni kar bad riy. Ma yad be il’al i yan ma bay ra feked e tin ni yad manang nib mangil ngar rin’ed ni arram rogon ni be pii’ e athamgil ngorad.”8
Woed e pigpig rok fare Somoel, gube yog ngomed e pi’in nib ppin, fare fayleng e ba tu’uf rok fare tu’ufeg rom. Mag runguy e gidii’. Yesus e ke fil ngodad ni ngad tu’ufegned e gidii’ min ayuwegrad ni woed rogon ni gadad ba’adag ni ngan ayuwegdad. Nap’an ni gadad ra gay rogon ni ngad runguyed i gadad, ma gadad ra chuchugur Ngak’.
Pi walageg ni pi’in nib ppin, fa’an nra gabe un ko si’in fa to’ogor—ndarifan ni kemus ni yogo’gur fa reb e ulung—mu thilyeg nge chiney ngam ayuweg boech e gidii’ ninge thilgad. Iraray e machib rog, ni gube pii’ ngom ni woed be’ nibe pigpig ngak Somoel Yesus Kristus ni bachan fare Ya’el Rok’ e ke thogthognag ngog ni ngu weliy mornga’agen e biney, ni’ir e fil ngodad rogon ni ngad tu’ufegned e gidii’ ni woed rogon nibe tu’ufeg dad. U dakaen fithngan Yesus Kristus, amen.