Rogoy nikan Thil nib Gel ngak e Chitamangdaed nu Tharmiy nge Somoel ni Yesus Kristus

Pi mo’olung ko Galasia ko Madnom e 60 e ment ko sacrament u lan reb e Madnom, nibe tiyan’ ngak fare Tathapeg, fare gam’ing ko sacrament, nge pi mulwol ni fan ko ya’el. Tomuren e binem man yaen ko class, chonggin e Galasia e ma un ko class ni 50 e ment ni class nib ta thil ni gurin e Madnom:

• Skuul ko Madnom e ran tay ko bin somm’on nge bin dalip e Madnom ko puul.

• Pi mo’olung ko ulung ko priesthood, Relief Society, nge Ppin ni Rugod e ran tay ko bin l’agruw nge bin aningeg e Madnom.

• Pi mo’olung ko bin laal e Madnom e bishop e ir e ke mil fan ngak.

Primary e ra buch u lan reb e wik ni ta’ab ngiyal’ ni 50 e ment nib mu’un e tang nge class ngay,

siasing/Llecheklel

Tanom ko Madnam

Schedule ko mo’olung ko Madnom, ma pi toygang’ nib tolang ko Galasia e manang urngin e duw ni boech e pi gidii’ ko galasia, ma dalip e awa nikan schedule nag ko Madnom u Galasia e rayog nib momaw’ ngoraed. Biney e ba riyul’ ko pi’in nibay e bitir roraed ni modway, bitir nib achig, chonggin e e;der, pi’in ni kaffin tawfe nag raed, nge kuboch e gidii’.²

Machane bay e n’en nib ga’fan ko pi schedule ko mo’olung ko Madnom. Ke yoeg President Nelson u fithike falfalen’ bukun ban’en nikan rrin’ ni pow ko yul’yul’ rom boech nga tomur. Ir, nge gubin e toygang’ ko Galasia, e yi ba adag ni ngan pi’ e falfalen’ ko gospel—ngak e galabthir, modway, bitir, pi’in ni dariy bee’ ni yaed be yaen, pil’al, pi’in ni kaffini mang ko galasia, nge pi’in nibe yib e tamachib ngoraed ni yibe machib nag raed—u tabinaew, nge Galasia. Fan nge pi tawa’ath nib mu’un ko biney nge kuboech e ban’en nib thil nib mu’un e:

• Ngarim thil ngak e Chitamangiy nu Tharmiy nge Somoel ni Yesus Kristus ma gel nag e mich Ngak.

• Gel nag e gidii’ nge tabinaew u lane tabinaew, Galasia nima ayuwegney ngan falfalen’ i fol ko gospel.

• Tay fan fare rran nni Madnom, ni ngam tiyan’um ko fare gam’ing ko farew sacrament.

• Ayuweg gubin pifaak e Chitamangiy nu Tharmiy u roy nge pi’in nike yim’ u dakean e murwel ko tamachib man thapeg e pi gam’ing nge m’ag nge tawa’ath ko temple.

Galasia. Fan nge pi tawa’ath

siasing/Llecheklel

Moy, Lekag—Nifan bee’ nge Tabinaw

Tabinaew nge gidii’ ni yibe fil fare gospel u tabinaew e ra gel nigey u dakean e bin bi’ech e n’en nikan noeg e Moy, Lakeg fitngan Nifan ko Gidii’ nge Tabinaew nikan fal’eg rogon nikan fil u lane Skuul ko Madnom nge Primary.³ Lane January, ma Skuul ko Madnom ko bitir nge ilal nge pi class ko Primary e ran fil fare Bin Kakrom e M’ag. Bin bi’ech ningan fil u tabinaew e Moy, Lakeg , fithngan Nifan ko Gidii’ nge Tabinaew—ni yibe fil e Bin Bi’ech e M’ag—e kan fal’eg ni nge ayuweg chonggin e galasia ngan fil mornga’agen e gospel u lane tabinaew. Be weliy ni ga’ar: “Biney e fan gubin e gidii’ nge tabinaew u lane Galasia. Kan fal’eg ni nge ayuweg [daed boech] ngan fil fare gospel—demtrug ko i go’ [gadaed] fa gadaed ra tabinaew [rodaed]. … Mornga’agen e biney nib [bi’ech] e kan fal’eg nibe yan u rogon e … schedule ni gubin e wik.”⁴

Bin bi’ech e n’en ningan fil ko Moy, Lakeg ko Primary u lane galasia e ra buch u lan ta’ab wik. Pi class ko Skuul ko Madnom ko pilal nge fal’ yangren ko bin somm’on nge bin dalip e Madnom e ran fal’eg ya ngeyag ni ngar ayuwegned fare bin bi’ech e thin ni Moy, Lakeg. Bin l’agruw nge aningeg e Madnom, ma pilal u lane Priesthood nge Relief Society e ra ulul ngan fil e tin nike fil e pi toygang’ ko Galasia, nibay e pi mulwol ko pi profet e chiney riy.⁵ Rugod nge pumo’on ni fal’ yangren nibay e Aaronic Priesthood roraed e ra fil mornga’agen e gospel ko pi Madnom nem.

Bin bi’ech e tabinaew e be pi’ e “Gonop ni fan e Fil e Chep ni Thothup u Tabinaew nge Balayal’ ni fan ko Tabinaew.”⁶ Ra reb e wik ma bay e thin riy ni nge ayuweg e gonop nge gosgos ni fan ko gidii’ nge tabinaew. Fare Moy, Lakeg [fitngan] Nifan ko Gidii’ nge Tabinaew e kubay bukun ya’an ni ra ayuweg e gidii’ nge tabinaew ngan fil rogon, baga’ ni bitir.⁷ Biney nib bi’ech e ra pi’ ko tabinaew ko December ko biney e duw.

President Nelson, ko numon rok ngak e chonggin e Galasia ko January, ma ke yoeg ngodaed ni ngad fal’eged rogdaed ko Bin L’agruw e Wub rok Yesus Kristus ni ngan yaen ko kanawo’ ko m’ag.⁸

Rogon e fayleng e ba tu’uf ngak bee’ ni ngari thil me gel nag emich rok ngak e Chitamangiy nu Tharmiy nge Yesus Kristus nge Bayul Rok. Ke fal’eg rogdaed Somoel, boch’uw nge boch’uw, ni fan e ngiyal’ nnib momaw’ ni gadaed bay riy e chiney. Fapi duw ni kakrom, ma ke gagyeg nag daed somoel yaen u fithik ni boed e:

• Rran ko Madnom ni yibe tay fan nge gam’ing nib thothup ko sacrament ni kan noeg nike pag dalip e duw.

• Tan pa’ fare bishop, pi ulung ko elder nge Relief Society e ba tiyan’ ko fan e Galasia⁹ man ayuweg chonggin e galasia ngan fal’eg man cha’ariy e pi m’ag nib thothup.

• Machib ko “wo’ nib gel mab thothup” e kan nang rogon.

• Sul e leam rodaed ko somm’on, pi m’ag ko temple nge pigpig ko cheppin e tabinaew e ra mang bang ko fare kanawo’ ko m’ag nib ga’fan.

Sul e leam rodaed ko somm’on, pi m’ag ko temple nge pigpig ko cheppin e tabinaew e ra mang bang ko fare kanawo’ ko m’ag nib ga’fan.

Galasia e ke weliy monga’agen e n’en nibe buch ko Galasia ko Madnom. Gadaed manang ni napan ra fal’ boch rogon i fil me fal’ rogoy boech i fal’eg rogon chonngin e class, me fal’ rogon boech e n’en nibe buch rodaed ko Galasia ko Madnom. Gadaed be tawa’ath ni baga’ ni fare Kan Nthothup e be ga’ ma be gel nigey ngan thil u lane Galasia.

Lane bin bi’ech nib tu’uf ko tabinaew nge Galasia ni ngan gel nag e tabinaew ko rogon e sap nge pangiy nge rogon ni yibe sap ko taliw nge pangiy. Gadaed manang e thil nib gel ni rayog ni nge buch u lane tabinaew. Duw nike n’uw napan, kan fal’eg ni ngan fil ban’en ni fan ko pumo’on ni fal’ yangren nge rugod ko fare Kan ni Thothup e baga’ nima ayuweg bee’ nibe fil fare chep nib thothup nge meybil u lane tabinaew. Fadaed e ngad ted e n’en nibe buch ko Galasia nge tabinaew ko rogon ni rayog ni nge gel nag e mich nge ya’el, nge thil ngak e Chitamangiy nu Tharmiy nge Somoel ni Yesus Kristus.

Lane tabinaew, nge Galasia ko biney, ma bay kanawo’en ni fan ko gidii’ nge tabinaew ni ngan meybil nag rogon nge napan ningan tay. Boed, ni biney e ra fal’eg wa’athan gubin e tabinaew, be yan ko rogon e tin nib tu’uf, ba mangil ko, pi’in ni fal’ yangren, galabthir ni daki mabgolm tabinaew nib mu’un ko galasia, pi’in nib bi’ech nga lane galasia,¹⁰ nge kuboech e gidii’ ni darma un ko liyoer ko Madnom ni ngan falfalen’ i weliy e gospel man gel nigey ni yibe fil u ta’abang u tabinaew, nge Galasia. Biney e ra buch ko pi’in ni ba adag.

Lan bukun yang u fayleng, ma gidii’ e kar mel’eged ni ngar pired u lane galasia napan nikan mu’ ko bin schedule ko Madnom ni ngan non ko fagar. Dariy ban’en u lane biney ni ra kireb nag e biney.

Lan bukun yang u fayleng, ma gidii’ e kar mel’eged ni ngar pired u lane galasia napan nikan mu’ ko bin schedule ko Madnom ni ngan non ko fagar. Dariy ban’en u lane biney ni ra kireb nag e biney.

Ngiyal e mo’olung ko sacrament nge class e baga’ fan ningan meybil ni ngeyog ni pin’en nib thothup e kan noeg mornga’agen. Boed, ni pi thin e rayog ni ngan rrin’ u lane lukngun e wik fa program nikan print nag. Mo’olung ko sacrament nibay e meybil riy ko tabolngin nge tomur, bin l’agruw ngay e ba tu’uf ni ngan ning ko meybil.¹¹

Rogon nikan noeg faram, bin bi’ech e schedule ko Madnom e dabi tabab nge taw ko January 2019. Kubay bukun fan e biney. L’agruw nib ga’fan e, bin somm’on, e ngiyal’ ningan pi’ e Moy, Lakeg Nifan ko Gidii’ nge Tabinaew ma, bin l’agruw, ngan pag e pi stake president nge bishop ni ngar yarmiyed e pi schedule ko mo’olung nibay e gol riy ninge mada’ e ward nib yo’or ni kadbul.

Pi toygang’ e kar gayed e yi’iy, kanawo’ ni kan thapeg nike bukun e duw ni nge gel nag gelngin e mo’olung ko sacrament, tay fan e rran ko Madnom, pi’ e athamgil man ayuweg e galabthir nge gidii’ ngar ted e tabinaew roraed ni fan ko tin thothup ban’en nge mich nike gel—gin ni fane falfalen’.

Mang e be yoeg e pin’ey ko chonggin Fare Galasia rok Yesus Kristus ni fan ko Gidii’en Got ko Tin Tomur e Rran? Pagan’ mad ni gidii’ yad ra tawa’ath ko kanawo’ nib falel’ rogon. Madnom e rayog nib rran ko gospel ni yibe fil mornga’agen ma yibe fil ngak e gidii’ u galasia nge lane tabinaew. Gidii’ nga tabinaew e kan un ko mo’oling, cheppin e tabinaew, machib, pigpig, liyoer, nge ngiyal’ ni yibe falfalen’ ni tabinaew, fare rran ko Madnom e riyul’ ni ra falel’.

siasing/Llecheklel

Tabinaw rok Carvalho

Reb e tabinaew u Brazil e chonggin ba stake ko gin nika sikeng nag fare Moy, mu Lakeg. Ba papa’, i Fernando, ba tamachib nike sul ko mission rok, nibay ko ppin rok, i nancy, nni yow e galabthir ko aningeg e bitir nib achig, e ri ga’ar: “Fare program nikan noeg e Moy, mu Lakeg e noeg nga lane stake romaed, ma karug falfalen’, mugu leam nag ‘e kanawo’ ni nggu filed fapi chep nib thothup u tabinaew e nge thil rogon.’ Ke buch u lane tabinaew rog, me gag ni gub toygang’ ko Galasia e kuguy ni ke buch u lan boech e tabinaew. … Ke ayuweg mad karug weliyed mornga’agen fapi chep nib thothup u lane tabinaew romaed. Ppin rog nge gaag e kugu nangew fan e n’en ni yibe weliy nib fal’ rogon boech. … Ke ayuweg mow … ke nang fan e gospel, me gel nag e mich romaed. … Gube micheg … ni gu manang nike yib rok Somoel ninge yag ni ngan nang fil rogon e machib u lane pi chep nib thothup nibe gel nag e, mich, nge tamilang ko tabinaew … u lane fayleng nike gel e kireb riy.”¹²

Lane pi stake nikan sikeng nag e biney riy u dakean e fayleng, e bay e fulweg thin ko bin bi’ech e thin ni Moy, Mu Lakeg nga tabinaew. Bukun e gidii’ e yoeg nike fal’ rogon nibe bi’eg e pi chep nib thothup. Kan thamiy e mich nibe gel ma be mangil i yan e ward.¹³

Gol ko pinn’ey e ngan thil nib gel ko pi’in nib ilal nge bitir. Bin somm’on e page ko gidii’ nge tabinaew e be ga’aar: “N’en ni yibe sap ngay ni ngan rrin’ ko gospel ni yibe fil ma yibe fil ni nge gel nigey ngan thil me ayuweg daed ni ngan boed boech Yesus Kristus. … Biney e be yoeg ni ngan pagan’ ngak Kristus ni nge thilyeg gumircha’en daed.”¹⁴ Biney e ra ayuw ngan “thap nga lan gumircha’en bee’ nge tabinaew. Ba tu’uf ni ngan paer ma yibe rrin’, athamgil ni ngan nang fan e gospel man fol riy. Rogoy nikan thil nib riyul’ e ba tu’uf e ayuw ko fare Kan ni Thothup ngay.”¹⁵

Bin tha’abi ga’fan e gol nge tawa’ath ko rogoy ni ngan thil e ngan thapeg fapi m’ag nge gam’ing u fithik e yul’yul’ ko kanawo’ ko m’ag.¹⁶

Pagan’ mad ngom ni ngam non gaed u ta’bang man gay e yi’iy ni ngan rrin’ e pinn’ey—ni dabin sap ko gin nga m’on fa yibe gay rogon ni ngan ulunguy e gidii’ fa tabinaew. Mornga’agen e rani noeg ko thin nga m’on, nib mu’un e letter rok e Bin Somm’on e Presidency nge tin nikan uneg ngay.

Gube micheg ngom ni lane pi Mo’olung ko fare Bin Somm’on e Presidency nge Ulung ko fare Ragag nge L’agruwi Apostle u lane temple, ko tomuren nike non e profet ngak Somoel nibe ning e yi’iy ni ngan rrin’ e pinn’ey, me thapeg e micheg nib gel ni fan gubin e gidii’. Russell M. Nelson e President nge profet rodaed. Kan noeg e daba’ u fithik e pi tawa’ath ni fan ko pi’in ni ba adag ma be gay e kanawo’ rok fare Kan ni Thothup. Gadaed ra chugur ngak e Chitamangdaed nu Tharmiy nge Somoel nge Tathapeg rodaed, ni Yesus Kristus, ni cha’an ni gube micheg. U dakean fithngan Yesus Kristus, amen.