Chubiy Loelgem Ngalang mag Falfalen’

Lane 1981, chitamangig, l’agruwi fagar rog, nge gag e kug wared nga Alaska. Bani nggu tal gaed u lan ba lupath ma gamaed farteg boech e burey nib falel’ ya’an u rom. Ra nggu boch’uw niged e chugum ni gamaed be feek, ma nggu inged e chugum romad u lane kahol, ma gamaed upnguy ko fom, man taay ya’an ban’en ngay, man noen’ u langaan e winda ko fare sukuki nga waen ko gin ni kug taw gaed ngay.

Tomuren ni kug taw gaed, ma gamaed gay, machane fithik e balyangan’, ma danug pir’egned reb fapi kahol. Machane gu pir’egned ta’areb. Bay e stov riy nib achig, tarp, boech e okas, nge boech e Hamburger Helper—machane dariy’ bay e hamburger. Dariy e mam’en e gin ni ngan non ngak e gidii’ ma cha’an ninge feek mad e ra yib u lan e bin migid e wik.

Ku fil l’agruw ban’en ko biney nike buch: Bin somm’on, dam moen’ e gaan rom nga langan e winda nga waen. Bin l’agruw, boech ngiyal’ ma gadaed ra yan u fithik e magawon.

Baga’ ni, bin somm’on e n’en ni gadaed ma rrin’ ko tin momaw’ e “Mongfan ni gag?” Machane, fith ko mongfan, e darma chuweg e tin nib momaw’. Ba adag Somoel ni ngad thimur niged e magawon, ma ke yoeg ni gubin e pinn’ey e gadaed ra fil ban’en riy, ma fan ngodaed.¹

Boech ngiyal’ ba fith Somoel ngodaed ni ngad rrin’ed e n’en nib momaw’, ma boech ngiyal’ ma tin momaw’ ban’en e bachane tirodaed ban’en fa tin nike rrin’ bea’. Ke buch rok Nephi ni l’agruw e re gali n’ey. Napan ni yoeg Lehi ngak pifaak ni ngad suleg ngad feked fapi plet rok Laban, ke ga’ar, “Amuguy, walagem e yow be nonnon, ni yow be yoeg ni ka yigi gel e moʼomawʼ ko rennʼey ni kugog ngorow ni ngar rinʼew, machane gathi gag e thin rog ni kugog ngorow ni ngar rinʼew, ya ba motochiyel rokʼ Somoel.”² Ma kureb nike buch, e napan ni murwel fare gal walagen ko agency rorow kar kireb nigew ir: “Me yibi buch ni rabow ri koelew gag, ya amusap, kari gel e damomuw rorow, mar mʼagew gag ko gaf, ya yow be tafnaey nag ni ngar fekew e pogofan rog.”³

I yan Joseph Smith u fithik e gafgow nib alamrin u lane Liberty Jail. Dariy e gapas ma ke kirbaen’ me non Joseph ni ga’ar, O Got, gaba’ u ur?”⁴ Gumanang ni boech i gadaed e ke thamiy ni boed rogon Joseph.

Gubin gidii’ ma yan u fithik e tin momaw’ ban’en: bea’ nib tu’uf nike yim’, mabgol nike dar, bitir dabi fol e motochiyl, m’ar, sikeng ko mich, murwel ni dariy, nge kuboech reb e tin momaw’ ban’en.

Ku thil napan ni gu runga’ag e pi thin ney rok Elder Neal A. Maxwell ko fare Ulung ko fare Ragag nge L’agruw, napan nibe magawon ko m’ar ni leaukemia. Ke ga’ar, “Gube be leam nib gel ma pi 13 i thin ney e yib ko tafney rog: ‘Ku pi’ e leukemia ngom ni ngam fil ban’en ngak e gidii’ rog.” Ma napan ni weliy nike fal’ wa’athan ko ren’ey nikeb e “sap ngak ni mornga’agen e tin riyul’ nib manemus. … Biney nib manemus nike nang fan e rayog ni nge ayuweg daed ngad ulul gaed nga m’on, ni sana ra momaw’.⁵

Ra ngan ayuweg daed ngad dared ma gadaed gel ko ngiyal’ nib momaw’ ko tin nib manemus, ma nggog l’agruw ban’en. Ngarin dared u fithik e tin momaw’ ban’en, bin somm’on, ngan n’ag fan e kireb rok boch e gidii’, bin l’agruw, e ngad pi’ed gadaed ngak e Chitamangiy nu Tharmiy.

Pi’in nike momaw’ nag ban’en ngodaed ni ngad n’aged fan roraed ma gadaed pi’ “daed ko tin nib m’agaen’ Got ngay”⁶ e rayog nib momaw’. Rayog nib amith nib ga’ napan ni n’en nib momaw’ e bea’ ko tabinaew e ke n’anggin, tafagar, fa gadaed rodaed.

Napan ni gub bishop, mug fil mornga’agen e n’ag fan napan ni weliy e stake president rog, i Bruce M. Cook, ba yaat. I weliy ni ga’ar:

“Napan e 1970, boech e gidii’ ni ngu murwel gaed nge gag e gu tabab niged e murwel. Mus ni dariy ban’en ni kug rrin’ed nib kireb, boech e tin nikan mel’eg, nib mu’un e tin momaw’ ngay ko ngiyal’ nem, e dani yag romaed.

“Boech e gidii’ kar pii’ed e salipy ngog e non ko laywer ni ngar feked e tin nike yan ngaabang roraed. Attorney roraed e ba counselor u lane bishopric ko tabinaew rog. Ba momaw’ ni ngan ayuweg bee’ nibe gay rogon ninge kireb nigeg. Ku domomow ngak mug tay nib to’ogor rog. Napan laal e duw, man chuweg e tin ni fan mad romaed, nib mu’un e tabinaew romad ngay.

“Lane 2002, ppin rog nge gaag e gu filew ni fare stake presidency ni kugu pigpig riy ni gub counselor e kan yarmiy biyay. Napan ni gomow be chuur um’on nikan pigeg, me fitheg ko mini’ e ragu mel’eg ni nge mang e counselor rog fa’anra kan pinngeg ni nggu mang e stake president. Dabug ni nggu weliy, machane ri ba adag ni nge nang. Machane, me yib reb e ngochol nga loelgeg. Me arame yoeg fithngan fare attorney ni ir e n’anggin nge momaw’ ban’en ngog nike pag 20 e duw. Napan ni non, me micheg fare Kan Nthothup ni thingari mang reb e counselor. Rayog ni nggu n’ag fan e kireb ko re pumo’on ney?

“Napan ni yoeg Elder David E. Sorensen ngog ni nggu mang e stake president, me pi’ ta’areb e awa ngog nggu mel’eg e pi counselor rog. Fithik e lu’, mug nang ni ke mu’ Somoel i pi’ e yi’iy. Napan ni nggog fithngan fare pumo’on ni guma tay nib to’ogor rog, ma domomow, kireb, nge fananikan ni imoy rog e m’ay nga biyang. Ngiyal’ nem, mug fil mornga’agen e gapas nima yib nikan n’ag fan u dakean fare Bayul rok Kristus.”

Reb e thin riy, stake presidency rok e “n’ag fan”, ni boed Nephi ni kakrom.⁷ Gu manang ni President Cook nge counselor rok ni yow l’agruwi priesthood ni yow mangil nib tu’uf bagyow rorow. Gu ba adag ni nggu boed row.

Bochi duw um’on, ko tin momaw’ u Alaska, mug fil ni gadaed ra yoen’ e kireb nga dakean bee’ ko tin momaw’ rodaed—ma fare pilot e be n’ag e gaan nga waen ni dariy bo’or e magal—gathi e fulweg. Machane, napan ni gadaed ra nang e magaf riy, ni dariy e gaan, m’ar, nge mol u dakean e buut napan e yiko’ ni dariy i go’ tarp e yibe paer u tanggin, ma ku fil ni “dariy ban’en ni dabyog rok Got.”⁸

Pi’in ni fal’ yangren, ma adag Got e tin momaw’ ngomed. Reb e rugod ni 14 e duw rok e un ko basketball. Ri ba adag ni nge un ko basketball u high school ni boed e walagen nib ppin ni ilal ngak. Ma arame nang ni kan pining e galabthir rok ni nge yan ko mission u Guatemala.

Napan ni taw, me nang ni bochi e class rok e thin nu Spanish, thin ni dawori nang. Dariy ta’areb e gosgos ko ppin u lane skuul rok. Ma paer ko bin 14 thal ko ba na’un nibay bee’ nibe matanggiy. Nge reb e, dabyog ni nge yan nga waen ni go’ir.

Galabthir rok e ma motoyil ngak nima yoer nge mol ni gubin e neap ni bukun e pul. Biney e ri kirbaen’ gow ngay. Mar mel’egew ni ngar fulwegew nga tabinaew nge paer ko titaw rok nge un ko high school.

Napan ni yib e ppin rog nga lane senggil ko bitir romow me yoeg ngak e n’en ni kug weliyew, me guy e bitir romow nibe garbog nga buut nibe meybil nibay fare Babyor ku Mmormon nib maab u dakean e beet rok. Me non fare Kan Nthothup ngak e ppin rog, “Ra fal’ rogon,” me arame chuw e ppin rog u lan fare senggil.

Dakugomow ma rung’ag nima yoer. Fithik e athamgil nge ayuw rok Somoel, me yan riy u lan dalip e duw nib fal’ rogon.

Tomuren e mission romow, mug fith e bitir rog fa’anra yan ko full-time mission. Me ga’ar “Danga, o Papa’, ku mu’ ko pigpig.”

Mab fal’ rogog ko binem! Machane nel’ e duw nga m’on, me pugeg fare Kan Nthothup nib neap ko re tafney ney: “Ku pining e bitir rom ni nge yan ko mission.”

Rogon e tafney roy e “Chitamangiy nu Tharmiy, ke pi’ urngin rok.” Me fal’eg fare Kan Nthothup e tafney rog mug nang fan ni ir nib tamachib ni nge pigpig e ba adag Somoel.

Mug feek e bitir rog ko abich. Barba’ fare tebel, mu ga’ar, “Ganzie, gamanang ko mongfan ni godow bay u roy?”

Ke ga’ar, “Ea, o Papa’. Gamanang ni nggu waen ko mission. Dabug ni nggu waen, machane nggu waen.”

Bachan nike pi’ ir ngak e Chitamangiy nu Tharmiy, ma ke pigpig Ngak u fithik i polo’ i gumircha’en, gelngin, lanyan’, nge gelngin. Ke fil ko chitamangin rogon ni ngan rrin’ e n’en nib momaw’.

Lan fare mo’olung rok President Russell M. Nelson nifan ko fal’ yangren, me yoeg boech ban’en nib momaw’ ngoraed. Ke ga’ar President Nelson: “Bin lal ni nggoeg ngom e ngam thil gaed, thil gaed ko fayleng. … Ba adag Somoel ni ngam boed ya’an, boed luman, mithmith ni boed, ma ga chuw ko maad ni boed gachalpen Yesus Kristus.”⁹ Binem e rayog ni ban’en nib momaw’, machane gu manang ni rayog romed—u fithik e falfalen’.

Tafneyem ni “gidiiʼ e bay, ni nge yog e falfalaenʼ ngoraed.”¹⁰ Gubin e n’en nike yan Lehi u fithik, ma luma pir’eg e falfalen’. Kaga manang napan ni “ke muchuch nga butʼ ko kirbaenʼ”¹¹ ni bachane e gidii’ rok Ammonihah? Ba angel e ga’ar ngak, “Gur e bafelʼ waʼatham, o Alma; ere, mu pug oewchem ngalang ngam falfalaenʼ, … ya gur e kam yulʼyulʼ i koel falan fapi motochiyel ku Got.”¹² Ke fil Alma ban’en nib riyul’ nib falel’: rayog ni gubin ngiyal’ ma gadaed falfalen’ napan ni gadaed be fol ko fapi motochiyel.. Kagamanang ni napan e mael nge magawon ko ngiyal’ rok Captain Moroni, “dariy bingyalʼ i banʼen ni aram fini gel e falfalaenʼ riy u fithikʼ fapi gidiiʼ ku Nephi.”¹³ Rayog ma thingardi pir’eg ned e falfalen’ napan ni gadaed nibe momaw’ ban’en.

Ke yan fare Tathapeg u fithik e tin momaw’ ban’en: “Ma fapi gidiiʼ nu fayleng … e yaedra pufthin nag u banʼen ni dariy fan; ere yaedra toey, ma be athamgil; ma yaedra liiʼ, ma be athamgil. Arragon, mi yaedra thuw nga dakean, ma be athamgil, ni bachan e murnguy rokʼ nib sumunguy nge gumʼaenʼ rokʼ ngakʼ e gidiiʼ.”¹⁴

Bachane e murnguy rok’ nem nib sumunguy, ma ke gafgow Yesus Kristus ko fare Bayul. Tomuren riy, me ga’ar ngodaed ni gubin, “Bayi gafgow nagmed e fayleng: machane dab mu rusgad; ya kug gel ko fayleng.”¹⁵ Bachan Kristus, ma ku rayog ni ngad gel gaed ko fayleng.

Napan ni gadaed ra yan u fithik e tin momaw’ ban’en ko kanawo’ rok Somoel, ma aygin chubiyed loelgen daed ngalang ma gadaed falfalen’. Ngiyal’ ney nike yag ni nggu micheg ko fayleng, ma gube yoeg ni ba fas e Tathapeg rodaed ma gagyeg nag e Galasia Rok. U dakean fithngan Yesus Kristus, amen.