Fan Ngak’

Ko re nep ney nib ga’fan,ma gube pining e magar ngomed ni gubin, pi walagag nib ppin. Demtrug e duw rodad, gin ni gabay riy, fa tin nibe buch rom, kad gakgad nga ta’abang, u fithik gelngiy, nga faan, nge mich nge tu’ufeg nibe wawliy e Chitamangdad nibay u Tharmiy; fare Tathapeg rodad, Yesus Kristus; nge profet nib tu’uf rodad, President Russell M. Nelson.

Nap’an ni kabfel’ yangrenmow, min pining bisof mow e pumo’on rog ni nggu machib gow ngak ba tabinaew ni ke pag e galasia boech e duw kafram. Gamow thapeg fare murwel mag mow yan ko fare tabinaew in i rran nga tomren. Magagiyel ni dabun rad ni nge yib e malekag ko Galasia nge tafen rad.

Ere yan magid e wub romow, magmow fek i plate i pi kookie, nib mich u wan’mow nira munguy nag e gum’ircha’row. Dani buch. Fagli mabgol e ur nonow ngomow u thilin e maab, nibe m’ug ni dabun rad ni gamow be nag salap rad. Nap’an nug sulew nga tabinaew, mab ko leam romow ni fa’an gamow ra pii’ e Okas ni Woed e Komey ma sana ran a’dag dakanmow.

Tin ni gamow be tafneynag nib mangil e dani m’ag be chachalbanmow ngay. Ya woed ni ran nog ngak be’ e danga’ e bagal e awat riy. Ere gu fithewmow, “Mangfanni gadow be rin’ e biney? Mang fal’ngin?”

Elder Carl B. Cook e yaaliy e biney: “Pigpig ulan e Galasia … e rayag nira gel e momaw’ riy ni fa’an ran fith dad ni ngad rin’ed ban’en ni gadad be rus ngay, fa’an gadad ra malmal ko pigpig, fa gadad be rin’ ban’en ndariy u wun’dad.”¹ I buch romow ni woed rogon e thin rok Elder Cook nib tu’uf ningug sap gow ngak e an Gaa’ ma gathi tiromow ban’en.

Ere, tomren e meybil nib alamrin, magmow thapeg fare duwer ko mongfan fare pigpig romow. Me thil rogon ni gamow be nangfan, me thil gumircha’en mow, min thogthognag ngomow.² Nap’an ni gamow be sapnag e duwer romow ulan fare thin nib thothup, fare Somoel e ke fil ngomow rogon ni ngan pigpig ngak bee’ nibay faan. Ba’aray fare guruy nug be’egnew ni thilyeg gum’ircha’enmow: “Thingar mu tu’ufeg fare Somoel ni’ir Got u polo’ i gumi’ircha’em, ko gubin rom, lanin’um, nge gelngim; nge u dakan fithngan Yesus Kristus ningam pigpig ngak.”³ Demtrug ni ri yi manang e biney e thin, ma boed ni be non ngodaed ko wo’ nib ga’fan mab bi’ech rogon.

Kug nangew ni gamow be gay rogon ni nggu pigpig gow ngak fare tabinaew ni bachan fare bisof romow, ere gu fithewmow ko fa’an gamow be pigpig ni bachan fare tu’ufeg ngak fare Somoel. Pilung i Benjamin e weliy nib tomilang, “Musap gaed, gube yoeg ngomed ni bachan e kugog ngomed ni kug paer u lan e pi rran rog ni gube pigpig ngomed, ni gathi gube uf’uf, ya pigpigni kug tay e kemus ni kug pigpig ngak’ Got.”⁴

Ere mini’ e be pigpig fare Pilung i Benjamin ngak? Chitamangdad nibay u Tharmiy nge fare Tathapeg. Nang ko mini’ nge mangfan ko ngiyal’ ni yibe pigpig ngak bee’ e rayog ni nge ayuwegdad ngad nangfaned fare tu’ufeg rok Got.

Nap’an ni thil rogon ni ‘ugsap gow ngay, maki thil rogon e meybil romow. Ma aram me tab fare malekag romow i guy ere tabinaew ney ni bachan ngak fare Somoel.⁵Gamow be rin’ nifaan Ngak’. Nike moem nag e gafgow riy. Tomren bukun e puul ni ug gayew rogon, fin aram me pag mow fare tabinaew nga nu’un. Fin aram, magmad meybil min fil fare gospel u ta’abang. Me fel’ e thin romad. Ma gadad be liyoer ma ba tu’uf rodaed napan ni gadaed be tu’ufeg pi Faak.

Rayog ni ngam tafneynag boran ni kam ayuweg bee’ u polo’ i gum’ircha’em nikam thamiy nib tu’uf e ayuw rok me dag ngom ni woed ni dani tu’uf fare ayuw rom? Ko chingiyal’ nem, kam fith ko mangfan nibe pigpig? Fa’anra arogon, ma fare thin ku Benjamin nib Pilung e yon’ luwan fare marwar nge tin ni kam thamiy: “Arame ri gimed be pigpig ngak’ e Got romed.”⁶

Ko bin ba’aray ni ngam fananikan bee’, rayag ni ngad toyed, u fithik e pigpig, fare tha’ rodad ngak e Chitamangdad nibay u Tharmiy. Fare tu’ufeg rodad Ngak’ e ra chuweg fare n’en ni gadad ba’adag ni nge guy bee’ ni kad rin’ed nib mangil.

Boech e ngiyal’ gadad be pigpig nibachan ma murwel ni kan pii’ ngodad, machane pi pigpig ney e rayag ni nge wawliydad nga ban’en nib ga’, nibe wawliydad ko bin th’abi fel’ e kanawo’”⁷—Ni woed rogon ni yaog President Nelson “reb nib be’ech, kanawo’en ni ngan machib ngak bee’.”⁸

Nap’an ni gadad ra sap ko gubin ban’en nike rin’ Got nifan ngodad, ma fapi pigpig rodad e ra fal’falan’ nagdad. Nap’an ni gadad ra sasaga’al i lemnang e pi n’en ni kad rinn’ed nifan ngak bee’, ma aram gadad ra guy ni pi pigpig rodad e bachan niybe tay Got nga m’on.⁹

President M. Russell Ballard e fil, “Kemus ni ngiyal’ ni gadad ra tu’ufeg Got nge Kristus nib polo’ i gum’ircha’dad, yafos, nge tafney rodad fin aram ni rayag ni ngad diged e tu’ufeg rodad ngak fapi gubuliyoror rodad.”¹⁰

Fare bin somm’on ko fare Ragag i Motochiyel e dag rogon e biney: “I gag fare Somol. … Dariy yugu reb e kan ni nge mang got romed ya kemus ni gag.”¹¹ Fan e biney e motochiyel e ra ayuweg dad ngad nang faned ni fa’anra gadad ra tay Ir ni m’on ko gubin rodad, gubin ban’en ma ra buch ni woed rogon—ni kuwoed fapi pigpig rodad ngak bee’. Nap’an ni ra fek fare n’en th’abi ga’fan ulan e yafos rodad, ma rayag ni nge tawa’ath nagdad ko pi ngongol ney nge tin ni gadad be rin’ nib mangil ngak bee’.

Fare Somoel e machibnag, “Musap ngog ko gubin ban’en.”¹² Gubin e wik ma gadad ma micheg nag ni arragon—“ni gubin ngiyal’ ni ngad laemniged.”¹³ Rayag ni ngad sapgad ko biney ko urngin ban’en ni gadad be rin’? Rayag ni pi murwel ni gadad be rin’ e nge dag fare tu’ufeg rodad Ngak’? Mich u wun’ug nrayag ma ra buch.

Rayag ni pi n’en ni gadad ma rin’ ni gubin e rran e nge mang kanawo’en ni ngad tedfan. Rayag ni ngad guyed e pi murwel ney ni nge mang kanawo’en ni ngad pigpiggad Ngak’, demtrug ko ke taw ko yaer riy, pi murwerl, fa yibe thilyeg e pamper.

Ni woed ni yoeg Ammon, “Arragon, gag e gumnang ni dariy rogog; ni fa’anra gelingiy e nge noeg ma gag e gub mo’owaer; ere gag  e dabgu ‘uf ngog, machane gura ‘uf ko Got rog, ya dakean gelingin e rayog ni ngug rin’ gubin ban’en riy.”¹⁴

Nap’an pigpig ngak Got e ra mang e fan ulan e yafos rodad, ma gadad ra pag talindad, ma fin aram e gadad ra peri’egdad.¹⁵

Fare Tathapeg e ke machibnag e biney: “Ere mu paged e magael romed nge mat nga dakean pi gidii’ ney, ni nge yog ni ngar guyed e muruwel romed nib mangil mi yaed ta’fan e Chitamangmed ni bay u tharmiy.”¹⁶

Ngug weliy ngom boech e thin ko lowan’ nibay ko farngi rungug u Calcutta nifan e pi bitir ndariy e galabthir rorad, u India: “Fa’anra gur bee’ nigab mangil, gidii’ e ba’ nrayag ni yadra yoeg ni gur bee’ ni gab si’in, nib mith salpem. Mpar ni gur bee’ nigab mangil. Tin ni ku’um toey ni bukum e duw, rayog ni nge tagannag bee’ ulan ta’aboran. Dariy fan mu rin’ e tin nib manngil ban’en. Mpii’ ngak fare fayleng urngin nibay rom, ma kurayag ni dabi gamon. Ere mu pii’ ngak e fayleng urngin nibay rom. Ya amguy, ra tomuren, ma kemus ni gur nge Got rom … ma kemus.”¹⁷

Pi walag ni pi’in nib bpin, guib ngiyal’ make mus ni morgna’agem nge fare Somoel rom. Woed President James E. Faust ni yoeg: “Mang e th’abi tu’uf u fayleng?’ … ‘Gathi n’en th’abi gaa’ e tu’uf riy u fayleng e facha’ nibay be’ rok’, nibe ul’ul’, ko tha’ rok ngak fare Tathapeg?’ Biney e tha’ e rayog ni nge mon’ognagdad, ma dariy ban’en nrayag ni nge thilyeg e yafos rodad ma kemus ni fare tha’ rom ngak Got.”¹⁸

Woed e biney, ni weliy Alma ngak fapi pagal nifak, “Arrogon, mu rin’ e pi ngongol rom ni gubin ni fan ngak’ Somoel, ma demutrug e re gin’en ni ngam sor ngay ma ngam pag nge gagyeg nigem Somoel; arrogon, mu yun’uy e pi tafney rom ni gubin ngak’ Somoel; arragon, mpag e murnguy u gum’ircha’em nge paer ngak’ Somoel ni gubinfen.”¹⁹

Ni kuwed ni fil President Rusell M. Nelson ngodad, “Nap’an ni gadad ra sap ko fare Bayul ni tay ni fan ngodad, ma pi gafgow rodad e ra gelnag e magar ningad pigpig gaed Ngak’.”²⁰

Walag ni pi’in nib ppin, gube micheg nap’an Yesus Kristus, u dakaen fare Bayul Rok’, murwel rok u daken dad nge gubin rodad, ma arame tabab ko murwel rok u dakeanv daed nibe tawa’ath nag boech e gidii’. Pigpig ngorad, ni gadad be rin’ u fithik e tu’ufeg ma yibe pigpig Ngak’. Ma gadad ra mang ni woed fare thin nib thothup: “Ni gubin e pi mo’on [nge ppin] nibe gay rogon ni nge ayuweg e cha’an nib chugur ngak, ma be rin’ gubin ban’en u pow’chan gil’ilungun Got.”²¹

Sana iraray e n’en ni manang fare bisof romow nib tu’uf ni ngu filew e pumo’on rog, ni ku dani mangil i mangil, ni ngan machib ngak pi fak Got ni mo’on nge ppin. Gube micheg e tin ni gumnang ko pi fal’ngin nibe tu’ufeg dad ngay nge pi pigpig ni gadad be tay nifan Ngak’. U dakaen fithngan Yesus Kristus nib thothup, amen.