Ba Camp ko Nifiy ko Mich Rodad

Pi walageg, gathi ba fal’el ni ngan paer ni yib e thapeg e yi’iy u tharmiy u dakean President Russell M. Nelson nge pi toygang’ ko Galasia rodaed nima pining daed ni ngad pired ko pi kanawo’ nib thothup, ¹ u lane tabinaew nge lane galasia, u fithik gumircha’ey, lanin’uy, nge gelngiy ni polo’?

Keyag e wo’ ngom ni ngam rrin’ ban’en ni danum thamiy nikam fal’eg rogon ni fan fa ba marwaer lanin’um riy machane ni kam taw’ath ni gabe gay rogon?

Kug rin’. Ba’aray ta’areb e susun.

Boech e duw nga tomur, me Elder Richard G. Scott, chonggin ko fare Ulung ko fare Ragag nge L’agruwi Apostle, e piningeg u fithik e t’ufeg ni ga’ar, “Gerrit, ga ba adag ni ngam un ngog ko machaw?”

I yoeg Elder Scott ni machaw e ke ayuweg nge yaliy me fal’eg. Ke yoloey ni ga’ar: “Nap’an ni gube gay rogon ni nggu fal’eg ban’en, demtrug ni fa’anra dani mangil. … Fal’eg ban’en e rayog ni nge ayuwegey ngan falfalen’ ko yafas nge n’en nike fal’eg Somoel wa’atham ngay. … Fa’anra gara mel’eg nib mangil rogon, ma dariy fan ni ngari fekem nib n’uw nap’an.” ²

Ke weliy President Henry B. Eyring mornga’agen lanyan’ nima leam nag e ”thamtham ko t’ufeg,” nib mu’un “fare t’ufeg rok e Tasunmeg ngay ni ba adag Pifaak ni ngar boeded Ir—ni ngan fal’eg man sunmeg ban’en.” ³ Tirok President Eyring nike fal’eg e bay “ban’en riy nib thil, ni rogon e sap nib thothup ni mornga’agen e mich.” ⁴

Machaw rok President Boyd K. Packer e be dag ya’an e mulwol ko gospel: “Got e Tasunmeg ko tharmiy nge fayleng nge gubin ban’en nibay riy, gubin ban’en nib liyeg daed e be micheg nikan sunmeg, ma bay e gapas u thilin e tin nib liyeg daed, science, nge fare gospel rok Yesus Kristus.” ⁵

I micheg Alma ni, “Gubin banʼen ma be micheg ni bay e Got.” ⁶ Bitir ko Primary Rodad e yaed ma yoen’ ni, “Gubin ngiyal’ ni gura rung’ag e tang ko archea’ fa gu sap ko lanelang nib ra’en e mak’ef, … mug falfalen’ ni gube paer u lane biney fayleng nib falel’ ya’an nike sunmeg e Chitamangiy nu Tharmiy ni fan ngog.” ⁷ Author Victor Hugo e falfalen’ ko “tha’ nib ma’ang’ang u thilin e gidii’ nge yafas nge pin’en u lane re fayleng ney ni ga’angin, ni tabab ko yal’ nge mada’ ko nochi chachngag. … Gubin e archea’ nima changag e bay bang rok Got roraed. … Nebula e taffen e aporgog.” ⁸

Ma binem e be fulweg daed ko thin rok Elder Scott.

Elder Scott,” Gu fulweg, “Gu ba adag ni nge fal’ e sap rog mug ta fal’eg ban’en. Guma falfalen’ nap’an ni gube leam nag e Chitamangiy nu Tharmiy nibe machaw ko maguleng nge ram’en lanelang nge raen. Machane.” —Mug marwaer—“Elder Scott,” ni gube non, “Dariy ban’en ni gu manang ko machaw. Gube magar ni gara chalban i fil ngog.”

Me tingi’ Elder Scott me yoeg e ngiyal’ ni nggu mada’ gow. Nap’an ra rran, ma ke fal’eg rogon e babyor, machaw, nge baras. Ke yoloey me ayuw nge munur boch’uw nag fare babyor ni fan ngog.

Gomow be murwel ko machaw rok nikan noeg e Nifiy ko Camp ni Litheyaal’ ngay. Nap’an ni gomow be machaw, ma gomow be weliy mornga’agen e mich—rogon ni nap’an ni gadaed ra sap ko tamilang ma ba fal’ gelngin e gowal ko nifiy ko camp, ma gadaed pag e tin lumar nge marwaer nga tomur—rogon, ni boech ngiyal’, nib n’uw e neap ni go’gur, ma nifiy ko mich rodaed e rayog ni nge pi’ e athap nge gelngiy. Me yib e madabiy. Fare nifiy ko mich rodaed—tin ni ke bay u lanyan’ daed, tin nike buch rodaed, nge mich ko mangil nge runguy rok Got u lane yafas rodaed—e ke pi’ gelingdaed u fithik fare neap.

Mich rog e—pi’in nibe gay, ma be pag nge buch, nge be murwel ninge thapeg—tabolngin e mich rodaed nge gapas u fithik e magawon rodaed, e boech ngiyal’, ma ra yib fa rayog ni nge sul. Ra yib e ra tamilang nem, nap’an ni gadaed ra adag ma gadaed be gay, nap’an ni gadaed be soen ma gadaed be fol ko pi motochiyel rok Got, nap’an ni gadaed ra pag e runguy rok Got, gol rok, nge pi m’ag rok.

Nap’an ni gu tabab gow ko machaw, me ga’ar Elder Scott, “Gerrit, mus ko ta’areb ma gara achey ban’en ni ga ba adag ni ngam cha’ariy ngu um leam nag.” Ke nang Elder Scott. Ku cha’ariy e n’en nike ayuwegneg Elder Scott ku achey ko mich rodad. Gag ni nggu machaw e ku daworgu cheg riy, machane n’en ni kugu manang ko camp ko nifiy rodad ko mich e rayog ni nge ayuweg daed u lan laal e pin’en.

Bin somm’on, camp ko nifiy ko mich e rayog ni nge pi’ e athamgil ngodaed ngad pir’eged e falfalen’ ni yibe fal’eg.

Bay e falfalen’ ni yibe tafney nag ban’en, ni yibe fil, ma yibe rrin’ ban’en nib bi’ech. Baga’ nib riyul’ nap’an ni gadaed ra gel nag e mich nge pagan’ rodaed ngak e Chitamangdaed nu Tharmiy nge Faak, ni Yesus Kristus. Dabiyog ni gadaed rodaed e ngad t’ufeged gadaed ni nge thapeg daed. Machane ri gadaed ba t’uf rok e Chitamangdaed nu Tharmiy ma manang daed nib fal’ rogon ko rogon ni gadaed manang daed. Rayog ni ngad pagan’ gaed ngak Somoel ma dabin pagan’ gaed ko tirodaed e gonop. ⁹

Bay biyay ni go’gur ni dan pinngem ngam un ko birthday party rok bea’?

Bay biyay ni kan fekem ni tomur, fa dan fekem, nap’an ni yibe me mel’eg e raba’ e gosgos?

Bay biyay ni kam fal’eg rogom ko sikeng ko skul, interview ko murwel, ban’en ni ri ga ba adag—mag thamiy ni dani yag rom?

Bay biyay nikam meybil nag e tha’, ni bay fan, ni dani fal’?

Bay biyay nike yib mit e m’ar ngom, ma ke n’igem la’angim, ma ke gafgow nigem e tabinaew?

Tathapegdad manag e magawon rodad. Nap’an ni gadaed ra murwel ko agency nike pi’ Got man murwel ko gubin gelngiy u fithik e sobutan’ nge mich, me Tathapeg rodaed, ni Yesus Kristus, e rayog ni nge ayuweg daed ngad dared u fithik e magawon nge falfalen’. Bay e ba’adag nge mel’eg rom ko mich ni ngam michuwunuy. Mich e ma yib ni yibe fol ko pi motochiyel rok Got, nikan pi’ ninge fal’eg wa’athan daed, nap’an ni gadaed ra yan ko kanawo’ ko m’ag Rok.

Nap’an ni ngad thamiy kafram, fa ke thamiy e chiney, nib marwaer, ni go’ir, nike chalban, ke domomow, ke milan’, kirbaen’, fa ke chuw rok Got nge Galasia Rok nikan fulweg, ra t’uf e murwel nib gel nge mich ni ngan sul biyay ko kanawo’ Rok ko m’ag. Machane rib mangil ko tomur! Wenig moey, fa moey biyay, ngak Somoel ni Yesus Kristus! T’ufeg rok Got e ba gel ko gaafen e yam’—ni gidii’ fa ya’el.¹⁰ Bayul rok e Tathapeg rodaed e ba riyul’ nib manemus. Ra bagdaed ma mul. Boech ngiyal’, ma gadaed ra chuw. Me non Got ngodaed u fithik e t’ufeg, ni demtrug e gin ni gadaed bay riy fa n’en ni kad rrin’ed, ma gubin ngiyal’ ma rayog ngad suled. Be soen ni ba adag ni nge t’ufeg daed.¹¹

Bin l’agruw, camp ko nifiy ko mich rodaed e rayog ni nge ayuweg daed ngad machib ko pi kanawo’ nib bi’ech, nike yib ko kan thothup, nib thothup.

Binem ko machib e ma fek iyib e ma’ang’ang nge pi tawa’ath ko m’ag rok—ni gin ni gadaed ra thamiy e t’ufeg rok Got man gay rogon ni ngan machib ngak e gidii’ ko re kan thothup nem.

De n’uw nap’an, Sister Gong nge gag e kaffin gu non gow ngak ba papa’ nge tabinaew nikan fal’eg wa’athan raed ko ba pumo’on nib priesthood nib yul’yul’ ni yib ko bishop roraed me fith fa’anra rayog ni nge un ngak e papa’ rok ko home teaching. Papa’ rok e dakir ma un nga galasia ma dabun e home teaching. Machane, nap’an ni thil gumircha’eg fare papa’, me ir nge fare pumo’on e ri tabab gow i guy e pi’in nikan pi’ ngorow. Bay reb, ni ppin rok—ni darma un e roffen nem ko galasia—e fith e pumo’on rok ko urogon nibe yaen boech ban’en nga biyang. Me ga’ar fare papa’, “Sana ku thamiy ban’en” —ke yaen nga ta’ang nggu feek e biya.¹²

Machane me buch ban’en: tin nibe buch u fithik e t’ufeg, machib, gumircha’ey nibe thil, class ko temple ni yibe fal’eg rogoy ni fen, yib nga galasia, chiyliyey ni tabinaew u lane temple nib thothup. Tafney nag gelngin nib falfalen’ e bitir nge pifaak raed ngak e papa’ nge nina’ roraed, nge fare pumo’on nibe machib ni yib nib fagar nge un ko papa’ roraed ngan machib man t’ufeg ngak boech e gidii’.

Bin dalip e nifiy ko camp ko mich ni athamgil: falfalen’ nge tawa’ath ko gospel e ma yib nap’an ni gadaed ra gay rogon ni nge t’uf Somoel nge gidii’ u lan gumircha’daed nge gelingdaed.

Fapi chep nib thothp e be pining daed ni ngad ted daed ni gubin ko alter ko t’ufeg nge pigpig. Lane Bin Kakrom e M’ag, Deuteronomy e yoeg ngodaed ni nge t’uf Somoel ni Got rom u fithik gumircha’en dad, ya’el rodaed, nge gelngdaed.¹³ Joshua e ga’ar, “Nge t’uf Somol ni Got romed, … fol ko pi motochiyel rok, … gimed par ni gimed ba yul’yul’ ngak, mi … gimed pigpig ngak u polo’ i gumircha’med ngu polo’ i lanin’med.”¹⁴

Lane Bin Bi’ech e M’ag, me yoeg e Tathapeg rodaed la’agruw e motochiyel nib ga’fan: “Thangri t’uf rom Somol ni ir e Got rom u polo’ i gumircha’em, ngu polo’ i lanin’um, ngu polo’ i leam rom, ngu polo’ i gelngim; … nge en ni ir e migid ngom ni gowa gur.”¹⁵

Lane Babyor ku Mormon: Kureb e M’ag nib Bi’ech rok Yesus Kristus, Benjamin ni Pilung e murwel u “poloʼ i gelingin dugren nge gelingin e tafnaey rokʼ” me pi’ gapas u dakean fare naam.¹⁶ Lane Doctrine and Covenants, ni gubin tamachib ma manang, make fith Somoel ngodaed ni ngad pigpig gaed Ngak u fithik gumircha’en daed, gelengdaed, lanyan’ daed nge gelngin daed.¹⁷ Nap’an ni taw fapi Gidii’en Got nga Jackson County, me yoeg Somoel ngoraed ni ngar ted fare Madnom nib thothup, ni nge t’uf Somoel ni Got rodaed u lan gumircha’en raed nge gelngin raed, lanyan’ raed, man pigpig Ngak u dakean Yesus Kristus.¹⁸

Gadaed ba falfalen’ ko fare pong ni ngad pi’ed gubin rodaed ngad gayed e pi kanawo’ nib gel e thothup ngay nib tolang ni nge t’uf Got rodaed me t’uf e gidii’ rodaed, ma gadaed gel nag e mich rodaed ngak e Chitamangdaed nu Tharmiy nge Yesus Kristus u lan gumircha’en daed nge tabinaew rodaed nge galasia.

Bin aningeg, camp ko nifiy ko mich rodad e ma ayuweg daed ni ngad fal’eged e kanawo’ ko paer nib mat’aw ni ma gel nag mich nge ya’el.

Pin’ey ni yibe rrin’ nib thothup, pangiy nib mat’aw, fa meybil, chep nib thothup ni yibe fil, baley nag e abich, tafney nag e Tathapeg rodaed nge pi’ m’ag u dakean fare gam’ing ko fare sacrament, pi’ e pi tawa’ath ko gospel u dakean e tamachib, temple, cheppin e tabinaew, nge kuboech e pigpig, ni yibe cha’ariy e babyor ni yibe yol ngay, nge boech ni bu bo’or.

Nap’an ni ra peth e kanawo’ ko mat’aw nge ya’el, ngiyal’ nge manemus e ra yib nga ta’abang. Tamilang ni thothup nge yafas e ma yib nap’an nibe feek daed e tin nib mat’aw ngad chugur gaed ngak e Chitamangdaed nu Tharmiy nge Tathapeg rodaed, ni Yesus Kristus. Nap’an ni gadaed ra adag fare kan thothup nge gam’ing, ma pin’en ko manemus e rayog ni nge yib rok Got ko ya’el rodaed ni boed e n’uw u tharmiy.¹⁹ Gubin ngiyal’ ni yibe fol ma yibe bi’ech nigey, ma gadaed ra pir’eg e fulweg ko meybil rodaed, mich, nge gelngiy ni ngad dared u fithik e pi magawo ni gubin ngiyal’ nge kanawo’ ni bay e gapas, sap, nge falfalen’ ko gospel riy.

Bin laal, nap’an ni gadaed ra tay e tin nib mangil nap’an ni gadaed be gay boech e kanawo’ nib bi’ech nib thothup boech ni nge t’uf Got rodaed nge ayuwegdad ni ngad ta’ermadliy ni ngad mada’ ngak Ir, fare camp ko mich rodad e rayog ni nge ayuweg daed nge pogran ni ma’ang’ang e bay rok Kristus, gathi gadaed fa tin nu donop ban’en.

Pong rok Got e ba sug ko tu’ufeg nge thap ni bachan Yesus Kristus e ba “kanawo’, riyul’, nge yafas.”²⁰ Pi’in nibe thamiy ni yaed ba tomal, be pong, “Mired ngog,” nge pi’in nike yib Ngak, e ke micheg ni ga;ar, “Gura pi’ e gapas ngom.”²¹ “Mired ngakʼ Kristus, ngam machalbog gaed rokʼ, … magmed tʼufeg Got u poloʼ fanmed pasig, nge laniyaenʼmed, nge gelingmed, ma arame gimed ba gaman ko murnguy rokʼ, ni nge yog nu dakean e murnguy rokʼ e ngam machalbog gaed riy rokʼ Kristus.”²²

Re thin ney ni “dakean e murnguy rokʼ e ngam machalbog gaed riy rokʼ Kristus” e kab, gapas, nge micheg ni rayog ngad dared nga m’on u fithik e mich nge pagan’ ngak Somoel, demtrug nap’an ni dabi buch e tin ni gadaed be athapeg, ni yibe leam nag, fa fal’ ngodaed, ni gathi kireb rodaed, mus ni napan ni kad rrin’ed gelngin ni rayog rodaed.

Boech ngiyal’, ma gadaed be thamiy nibe mil lanyan’ daed, nibe gadaed be marwaer, ni sana dan yul’yul’. Machane, fithik e athamgil ni nge t’uf Got rodaed man machib ngak e cha’an nib chugur ngodaed, ma gadaed ra thamiy e t’ufeg rok Got nge kanawo’ ni fan ko yafas roraed nge gadaed ko pi kanawo’ nib thothup.

Fithik e t’ufeg, Tathapegded me pi’ e athamgil ngodaed me micheg ni rayog ni “mu piiʼed iyaen nga mʼon u fithikʼ e yulʼyulʼ romed ngakʼ Kristus, nib machalbog laniyaenʼmed ko athap, nge tʼufeg rokʼ Got ngakʼ gubin e gidiiʼ.”²³ Fare machib rok Kristus, fare Bayul rok Kristus, nge yul’yul’ rodaed ko fare kanawo’ Rok ko m’ag e rayog ni nge ayuweg daed ngad nanged e Tirok e riyul’ me thapeg daed.²⁴

Gube micheg nag mornga’agen fare gospel Rok ni ga’ngin nge wo’en e falfalen’ Rok nikan fulweg ma kan fil u lan Fare Galasia rok Yesus Kristus ni fan ko Gidii’en Got ko Tin Tomur e Rran, u lane pi chep nib thothup, nge pi profet ni tabab ku Profet Joseph Smith nge taw ku President M. Nelson e daba’. Gube micheg ni fare kanawo’ Rok ko m’ag e ma gagyeg nigey ko fare bin tha’abi mangil e tawa’ath rok e Chitamangdaed nu Tharmiy ni ga’ar: “Rayog e yafos ni gubinfen ngomed.”²⁵

Aygi yag e pi tawa’ath nge falfalen’ Rok ngodaed, nap’an ni gadaed ra gel nag gumircha’en daed nge athap rodaed nge m’ag rodaed ko camp ko nifiy ko mich rodaed, gube meybil nag u dakean fithngan Yesus Kristus nib thothup, amen.