Ni Ngan Mang Saf
Gube athapeg ni pi cha’ ni gabe machib nagrad e yadra guy ni gur e tafagar rorad ma yadra nang ni, gur, e rayag ni ngam motoyil ngorad.
Ta’ e due faram, bay bitir ni gu mada’nag u Chile ni fal’falan’ug ngay. “Mogethin,” ni ga’ar, “I gag David. Garam weliy mornga’ageg ku general conference?”
Ug tafney nag rogon ni yibi non David ngog. Gadad gubin ma gadad ba’adag ni ngan guydad. Gadad ba’adag ni ngad tu’uf gad, min lemnagdad, magdad thamiy e tu’ufeg.
Pi walageg ni pi’in nip pin nge pumo’on. Demtrug ko kan weliy mornga’agem ko general conference fa danga’, fare Tathapeg e manangem ma gab tu’uf rok. Fa’an gabe lemnag ko biney ab ruyul’, kemus nib tu’uf ni ngam tafneynag Ni’ir e “yoloey fithingmed nga lan pa’ag.” 1
Ngan nang ni fare Tathapeg ab tu’uf rodad, rayag ni gadad be lemnang ko uw rogon nrayag ni ngad daged e tu’ufeg rodad Ngak.
Ko John 21, me ga’ar Yesus ngak Peter, “Gub t’uf rom...?
Me fulweg Peter, “Er rogon, Somoel; ga manang ni gab t’uf rog. Me ga’ar Yesus ngak, Mu gafaliy e saf rog.”
Nap’an nin fith ngak e biney e duwer ni gaman l’agruw yay nge dalip, “Gab t’uf rom?” Me taganan’ Peter ni bochan e ke oriyay ni ke yog fare t’ufeg rok: “Somol; ga manang urngin ban’en ni gab t’uf rog. Me ga’ar yesus ngak, mu Gafaliy e saf rog.”2
Gathi ke dag Peter ngak Kristus ni’ir e gachalpen? Yan somm’on nra mada’ gow u dap’ e l’ay, “kachingiyal’” nem me digey e nug rok nge un ngak fare Tathapeg.3 Me mang reb e mo’on nima kol e nig. Me un ngak fare Tathapeg ko urngin fapi machib nit ay me ayuweg nge fil fare gospel rok Yesus Kristus.
Ma manang ni fare Somoel ni kan fosag ko yam’ e dabki un ngak Peter, ni nge dag ngak ko rogon fa ngan e nge pigpig riy. Nap’an ni de moy far Tathapeg, ba tu’uf rok Peter ni nge fol ko fare Thothup, min thapeg e yi’iy, ma ram min pii’ ngak e mich nge gonop ni nge rin’ rogon. Gafaliy fapi saf, fare Tathapeg e ba’dag ni nge rin’ Peter rogon ni fa’an woed ni bay rok u rom. Fith ngak Peter ni nge mang saf rok.
Tomren e biney e Aprill, President Russell M. Nelson e yog nib chuchugur ko biney ni ngad gafaliyed e saf Rok’ ni ngan rin’ ni woed e machib.4
Ni ngan fanay e biney e mulwol, thingar da woeded fare gum’ircha’en e saf magdad nangfan e tin nib tu’uf ko fapi saf rok Somoel. Uw rogon ngrayag ni ngad manged fapi gafaliy e saf rok Somoel ni ba’adag?
Woed urngin fapi duwer rodad, rayag ni ngad sap gad ngak fare Tathapeg rog, Yesus Kristus—fare Saf nib Mangil. Fare saf rok e Tathapeg e ran nangrad ma ran thi’egrad; ma ran gafaliyrad; ma ran kunuy rad ko fare ulung rok Got.
Nang min Namba Nag
Nap’an ni gadad ra gay rogon ni ngad laked wo’en fare Tathapeg, ba t’uf ni ngad the’egned fare Saf Rok. Kan dugliy ngodad be’ fa tabinaew ni ngad nanged salpenrad ni gubin fapi saf rok Somoel e kan the’eg ma dawrin pagtilin. Numba, e gathi kemus, ni mornga’agen e the’eg; ya mornga’agen nra be’ ma thamiy fare tu’uf rok fare Tathapeg rok be’ nike pigpig Ngak. Ni biney e rayag ni ngan guy ni gadad ba tu’uf rok fare Chitamangadad nibay u Tharmiy.
Bay ban nib ppin nib fel’ yangran ni fanug mada’nag ni ma machib ngak reb e ppin ni woed nib bil’al ngak ni laal yay. U ta’abang, kar peri’egnew ni yow ba’adag e musik. Nap’an nreb ere ppin ney ni nge fingichiy, ma yow ma yon’ e tang u ta’abang. Ma yow be tawa’athnag row nge yafos rorow.
Gube athapeg ni pi cha’ ni gabe machib nagrad e yadra guy ni gur e tafagar rorad ma yadra nang ni, gur, e rayag ni ngam motoyil ngorad—ni be’ ni manang ko mang e be buchbuch rorad nge rogon nrayag ni ngan ayuwegrad.
Dawri n’uw nap’an ni kan nog ngog ni ngu pigpig ngak banib ppin ni dan gu nang nge ka’an e cha’en ni gamow ma mang salpen. Nap’an ni gamow be puruy’ Jess, ni’ir e cha’ ni gamow ma machin nib 16, me ga’ar, “Ba tu’uf ni ngad nangew salpen.”
Gu lem nigew ni ngan fek ya’ay min send nag e text ab mangil. Ere gu kol fare fon, me dili’iy Jess fare baton ninge fek fare sasing. Bin somm’on e machib ni kug tew e gamow l’agruw ni kug rin’ew e biney.
Ko bin somm’on e machib romow, magmow fith ngak fare ppin ko fa’an nra bay ban’en nrayag ni nguy unigew ko meybil ni fan ngak. Me yog mornga’agen ngomow me yog nra fanay e meybil romow. Yul’yul’ rok e ayuweg mad ngu thamiy fare tu’ufeg.
Ba tawa’ath ni mangil nikan pii’ ngodad ni ngad lemniged marunga’agen ulan fapi meybil rog ni gubin e rran. Nap’an ni garam meybil, garam thamiy fare tu’ufeg rok Yesus Kristus ngak e pi cha’ ni gama machib ngorad. Dag e pi tu’ufeg ney ngorad. Mang kanawo’en nib mangil ni ngam gafaliy fare saf rok mag ayuwegrad ni ngar thamiyed fare tu’ufeg Rok—u dakanem?
Mu Matan Giy
Bin l’agruw i wo’en ni ngad fal’egned gum’ircha’en fare sag e ngan gafaliy fapi saf Rok’. Ni woed e chongin ku Fare Galasia rok Yesus Kristus ni fan Gidii’em Got ko tin Tomur e Rran; rayag ni ngad mithmith gad, fal’egin rogon, min toy demtrug ban’en. Bpapay ni rayag ni ngad pi’ed e ayuw ko tin nib tu’ug ni woed e plate ko okas. Machane kubay boech?
Manang fapi saf rodad ni gadad be gafaliyrad ko fare tu’ufeg ma gadad ra murwel ni ngad pi’ed e ayuw?
Ko Matthew 25 kad be’egned:
“Mired, ngan pi’ e gin nsuwon Got ngomed ni kan ngongliy rogon ni kan tay ni fan ngom…:
“Gum’ ko bilig, mi gimed pi’ ganag: ma gum’ ko belel mi gimed pi’ e garbod ngog: gu be’ nda mu nanged owcheg mi gimed fekeg nga tabinaew:…
“Ma pi’in yad bmat’aw e bay ra fulweged ngak ni lungurad, Somol, wu’in e gguyed gur ni kam mum’ ko bilig ma gamad pi’ ganam, ara ka mum’ ko belel ma gamad pi’ ban’en ngom ngam garbod ngay?
“Ma wu’in e gguyed gur nda gu nanged owchem ma gamad piningem nga tabinaew romad?5
Fare bugi thin ni ngan sapngay e guy. Fapi gidii’ nibay e mat’aw rok e kar guyed e gidii’ nib tu’uf e ayuw rok. Gadad e rayag ni ngad guyed rogon nrayag ni ngad pi’ed e ayuw. Nap’an ni gadad ra rin’ ni aray rogon, ma ran tawa’ath nagdad ni woed nibay ko Mathew: “Yu ngiyal’ ni um rin’ed e pin’ey ni fan ngak bagayad e pi cha’ney nth’abi sobut’ u fithik e picha’ ni pi wlageg ney e kam rin’ed ngog!”6
Bay fagar—ngad pininged fithngan ni John—e yog e n’en nray buch nap’an ni gadad ra guy e gidii’ ma dabda pi’ed e ayuw. “Bay ban’ib ppin ko fare ward rog ni lii’ ir. L’agruw e pul nga tomren, kug peri’eg ni dariy be’ ko fare quorum nike non ngak figirngin ko n’en ni ke buch. Ma ka’an nge gag ndariy ban’en ni kug rin’ ngay. Ere, gu fith ngak fare mo’on ni ngu warow ko abich ko missi’. Ban’ib mo’on nib statamara’. Ma nap’an ni gu fith, ‘ppin rom e ke lii’ ir. Ke uw rogon e biney? Gaba’adag ni ngam weliy morng’agen?’ Me pag laman ngalang nge yor. Mag mow weliy mornga’agen e n’en ni buch fe fel’ e tin romow ni da n’uw nap’an.”
Ul’ul John, “Gube lemnag ni kemus ni ngan fek min pi’ e okas ko bin ba’aray ni ngan gay rogon ni ngad dag e tu’ufeg nge yul’yul’.”7
Pi saf rodad e bay ni yad be math’ath, malboch, fa ke yan nga palog; nigeg fare gafaliy e saf, rayag ni ngad guyed e tin nib tu’uf rorad. Rayag ni ngad motoyil ngorad ma dab bin og thibnginrad min pii’ e athap nge ayuw ngorad ko fare Kan ni Thothup.
Pi walageg ni mo’on nge pi’in nib ppin, fare fayleng ab sug ko fal’falan’ ni bachan fapi n’en ni gabe rin’ nib mangil. Nap’an ni garam gay kanawo’en Somoel mag gay rogon ngam guy fare tu’ufeg Rok’ nge pin’en nib tu’uf rok e pi gidii’ ni gama machibnag, maran bing owchem. Muruwel rom ni ngam machib e ra pi’ mat’wo ngom ni ngam thapeg e yi’iy. Rayag ni ngam gay e biney e yi’iy nibay.
Mukun nga Ta’abang ko Ulung rok Got
Bin dalip, gadad ba’dag ni nge mukun fap saf rodad ko ulung rok Got. Ni fa’an ngan rin’ e biney, thingar dagayed ko ngan e yad bay riy ko fare kanawo’ magdad ba’adag ni ngad ayuweged rad ko fare mich ko malekag rorad. Muruwel rodad e ngad powi’iyrad magdad nang gum’ircha’enrad magdad fekrad ngak fare Tathapeg rorad.
Sister Josivini u Fiji e momaw’ ngak ni nge guy ban’en nga m’on—nriyul’. Fagar rok e guy ni be gafgow ni nge guy fare thin nib thothup rok ni nge be’eg. Ere pi’ ngak Josivini ba tilgiy nge ba pensol nike achay fithngan Yesus Kristus ulan fare Babyor ku Mormon. Biney e tabab ni bachan ni ba’dag ni nge machibnag me ayuweg ni ngayag ni nge be’eg fare thin nib thothup ni’ir e ayuweg Josivini nge un nga tempel ni 28 yay u tomren ni kan tawfe nag.
Demtrug ko ba gel fa mo’owar e saf rodad, fal’falan’ fa ba kiriban’, rayag ni ngad ted u wun’dad ni dariy be’ ni nge yan rok ni yigo’ir. Rayag ni ngad tu’ufegrad ni demtrug ko gin nibay riy magdad pi’ed e ayuw ngorad ko bin migid e yan nga m’on. Nap’an ni gadad ra meybil ni ngad nanged gum’ircha’enrad, gube micheg ni Chitmangdad nibay u Tharmiy era powi’iydad nge fare Thothup Rok’ ni nge un ngodad. Ma rayag ni gadad e ngad “manged e angel u charanrad” u m’on ninge yan nga powch’anrad.8
Fare Somoel eke piningdad ni ngad durwi’iyed fapi saf Rok’. Ngad gafaliyed fapi gamanman rok. Ma pinningdad ni ngad manged e gafaliy e saf ngak gubin e naam, nge arrogon Elder Uchtdorf gadad ba’adag e German Shepherds. Ma ba’adag ni nge un e gidii’ ko biney nib fel’ yangren.
Fapi fel’yanren rodad e rayag ni nge pii’ e ayuw. Ni yad, ni woed President Russell M. Nelson ni yoeg, “Ni yad e th’abin nib cheg nike pii’ Somoel ke yib nge fayleng.” Ni yad e “thothup nib gonop,” yad “e gidii’’ rodad nib cheg ko gosgos,” ni yad be lek fare Tathapeg. 9 Rayag ni ngam tafney nag facha’ nima gafaliy e gamanman ni bachan fapi saf Rok’?
Machibgad u charanrad, magadad ra guy e ma’ang’ang.
Pi’in nib ppin nib fel’ yangren nge pagal, gamed ba tu’uf romad. Fa’an nra bay e muruwel rom ko machib, mu non ngak e Relief Society fa president ko elder quorum. Yad ra fal’falan’ ni gamed ba’adag ni nga the’egned fapi saf rog, magmed matangiy, magmed ulunguy rad ko ulung rok Got.
Nra taw ko re rran nem ni gadad ra garbug nga but’ u powchan fare Tathapeg, ni kad mu’gad i rin’ e pi muruwel rodad, gube meybil nrayag ni ngad fulwegned ni woed Peter: “Er rogon, Somoel; ga manang ni gab t’uf rog. Tiney, pi Saf rom, ab tu’uf rog, ma fel’ e par rorad, ma yad bay u tabinaew. U dakan fithngan Yesus Kristus, amen.