Ppin Nibe Un i Kunuy yu Israel

Ri gub falfalen’ ni gubay romed, pi walageg. Sana bin ni kaffinni buch e ra dag ngom rogon ni gube thamtham rog ngom nge tin ni gimed ba tawa’ath riy.

Reb e rran napan ni gube non ko gidii’ u South America, ma rug falfalen’ ko mornga’agen e n’en ni nggu weliy, ma ngiyal’ nib ga’fan, mu ga’ar, “Bachan ni gag chitinngin 10 e bitir, ma rayog n i nggog ngom ni …” Ma aramug mu’ nag e mulwol rog.

Danug nang ni kugoeg e thin ni chitinngin. Cha’an nibe pilyeg e thin rog, e leam nag ni ku oloboch, me thilyeg fare thin ni chitinngin ko chitamngin, ere fapi gidii’ e darnanged ni kugog ni gubneg ni gub nina’. Machane ppin rog ni Wendy e rung’ag, me falfalen’ nike thay u langag.

Chingiyal’ nem, ma rugu ba adag u gumircha’eg ni nggu thilyeg ban’en u fayleng—ni kemus ni nina’ e rayog rok—me thay u langag ni aram rogon. Napan e yafas rog, ma gubin ngiyal’ ni rani fitheg ko mongfan ni kug mel’eg ni ngug mang e togta, ma fulweg rog e gubin ngiyal’ ma ba ta’aborogon: “Ya dabyog ni nggu mel’eg ni nggu mang e nina’.”

Wenig mu nang ni gubin ngiyal’ ni gura yoeg e thin ni nina’, ma gathi kemus ni gube weliy mornga’agen e ppin nike diyen fa ke poef e bitir u lane re yafas ney. Gube weliy mornga’agen gubin e ppin ni fak e Galabthir u Tharmiy. Gubin e ppin mab nina’ ni bachane rogon nib thothup.

Ere re balayal’ ney, ni gub chitamangin 10 e bitir—mereb e ppin nge ta’reb e pagal—me gag ni President ko Galasia, ma gube meybil ni gara thamiy gelngin ni gimed ba tu’uf rog—mornga’agen ko gur mini’ nge gubin e mangil ni gimed ma rrin’. Dariy bee’ ni rayog ni nge rrin’ e n’en nima rrin’ e ppin nib mat’aw. Dariy bee’ ni rayog ni nge ta’aborogn ko rogon e nina’.

Pumo’on e rayog ma baga’ ninge weliy e tu’ufeg rok e Chitamangiy nu Tharmiy nge Tathapeg ngak boech e gidii’. Machane ppin e bay e tawa’ath roroaed nib mangil ni fan—tawa’ath nib thothup. Rayog ni ngam thamiy ko mang e ba tu’uf rok bee’—nge napan nib tu’uf roraed. Rayog ni ngam pi’ e ayuw, gapas, sensey, ma gabe gel nag bee’ ko ngiyal’ nib tu’uf roraed.

Ppin e ma guy e pin’en ninb thil ko rogon nima guy e pumo’on, ma oh, rib tu’uf e sap romed romaed! Rogom e ma gagyeg nigem ni ngam leam nag boech e gidii’ ko somm’on, ni ngam leam nag e bitbit ni ra buch ko boech e gidii’.

Ni woed rogon ni ke yoeg President Eyring, Chitinngin gadaed i Eve—ni kari nang fan e sap e tunom rok e Chitamangiy nu Tharmiy, ni tabab nag e n’en ni kad yoegned e “fare Mul” ngay. N’en nike rrin’ nib mangil nge n’en nike mel’eg Adam e ayuweg e wo’en e falfalen’ rok Got ni nge buch. Kar n’angginew keyag ngodaed ni ngad baed nga fayleng, ni ngad thapeged e dowef, ma gadaed dag ni gadaed ra mel’eged ni ngad ayuwegned Yesus Kristus e chiney, rogon ni kad rrin’ed ko bin somm’on e yafas.

Pi walageg nib tu’uf rog, bay e tawa’ath rom nib thothup nge tin ni gimed ba cheag riy. Re balayal’ ney, ma gube wenig ngom, u fithik e athap u gumircha’eg, ni ngam meybil gaed ngam nanged e tirom e tawa’ath nib thothup—ngam ayuweg, murwel ngay, mag ga’ nag, ko rogon ni dawori buch rom. Gara thilyeg e fayleng napan ni gara rrin’.

Bachane ni gimed bap pin, ma gama ayuweg e gidii’. Nggog boch’uw mornga’agen e thin nikan noeg ko bin tomur e general conference rodaed. Gur, o pi walageg nip pin, e gimed baga’ fan ngay.

Bin somm’on, machib. N’en nib ga’fan ko machib e Tathapeg rodaed, ni Yesus Kristus. Ma, ppin e, gubin ngiyal’, ma yaed ba chugur ko binem nib thil ko pumo’on. Napan ni ri gimed ra machib, mi gimed fol ko thamtham romed ni ngan ayuweg bee’ nge nang e tu’ufeg rok fare Tathapeg. Thamtham ni ngan machib e bay rok e ppin nib mat’aw. Gu manang ni ppin nima meybil ni gubin e rran, “Mini’ e gaba adag ni nggu ayuweg e daba’?”

U m’on ko fare thin ko April 2018 ni mornga’agen e kanawo’ nib tolang nib thothup boech ni ngan ayuweg boech e gidii’, nge rogon ni boech e pumo’on e ma check nag e home teaching roraed nika “m’ay” man yan ko bin migid e murwel.

Machane napan ni garam nang ni re ppin ni gabe guy e ba tu’uf e ayuw rok, mag mithmith nib paper nge ga’ngin yang ko fare pul. Ere, ir rogon ni gabe guy e be ayuweg e machib.

Bin l’agruw, u lane bin tomur e general conference, ma kukun fal’eg rogon e pi ulung ko Melchizedek Priesthood. Napan ni gadaed ra meybil ko rogon ni ngad ayuwegned e pumo’on ko Galasia ningar cheag gaed boech ko murwel roraed, ma gadaed leam nag e wo’en e Relief Society.

Lane Relief Society, ma ppin ni demtrug e yangren nge gin nike taw ngay u lane yafas e ma gak nga ta’abang. Ra reb e duw ko yafas ma ma pi’ e sikeng nib thil, machane, gaba’ riy, wik nga reb e wik, yibe mada’, ma yibe fil e gospel u ta’abang, ma yibe rrin’ ban’en nib ga’fan u lane fayleng.

Chiney, fol ko wo’ rom, ma pi’in nibay e Melchizedek Priesthood e chonggin e ulung ko elders. Pi pumo’on ney e yangar ni tabab ko 18 nge mada’ ko 98 (ngalang), ni ta’aborogon e priesthood rodaed nge pin’en nike buch roraed u Galasia. Pi pumo’on ney e rayog roraed e chiney ni ngar chugur gaed, mar filed ban’en u ta’bang, mar yibliyed boech e gidii’ nib fal’ rogon.

Ka gam nang ni June nike thimur, me Sister Nelson nge gag e gu nonow ko fal’ yangren ko Galasia. Ku gognew ngoraed ni ngar uned ko ulung ko fal’ yangren rok Somoel ngan ayuw i kunuy yu Israel ko biney e yafas nge baley e biney e yafas. Re mukun ney e “bin tha’abi momaw’ e sikeng, bin tha’abi falel’, e murwel u dakean e fayleng e chiney”!¹

Binem e rib tu’uf e ayuw rok e ppin riy, ya ppin e ma ayuweg e tin nga m’on ban’en. Ere re balayal’ ney, ma gube non ngomed ni profeet, ppin ko Galasia, ni ngam fal’eged e tin nga m’on ban’en ni ngam ayuw i kunuy yu Israel.

Ngan e rayog ni ngam tabab riy?

Gube pi’ aningeg e tin ni ngam rrin’ed:

Bin somm’on, gube piningem ni ngam un ko ragag e rran ni dam man ko social media fa ko boech e media nima yib nag e tafney ni kireb nga tafiney rom. Meybil ni ngam nang ko binngan e ngam chuweg. N’en ni ra buch ko re ragag i rran nem e gara gin ngay. Mang e gabe guy ko tomuren nikam palog ko tin fayleng ban’en niki kireb nag e ya’el rom? Bay ban’en nike thill rom e chiney ni ga ba adag ni ngam muruwliy? Ke thil boech e tin ni gabe rrin’ nib ga’fan—boed ni boch’uw? Gube yoeg ngom ni ngam yoloey nga but mag rrin’.

Bin l’agruw, gube piningem ni nam bi’eg fare Babyor ku Mormon ko chiney nge mada’ ko tomur ko re duw ney. Boed nib momaw’ ya gabe rrin’ bukun ban’en u lane yafas rom, ma fa’anra gara rrin’ e ran’ey u fithik i polo’ i gumircha’em, ma ra ayuwegnem Somoel ngam pir’eg e kanawo’ ni ngam rrin’. Ma, napan ni gara meybil ni gabe fil, ma gube micheg ni ra maab e tharmiy ngom. Ra tawa’ath nigem Somoel ko yi’iy nge gonop.

Napan ni gara bi’eg, ma gube wenig ngom ni ngam yoloey e r avers nibe weliy, fa be yup’ fan, fare Tathapeg. Ma arame, mag leam nag ni ngam weliy mornga’agen Kristus, falfalen’ u dakean Kristus, mag machib ni mornga’agen Kristus ko tabinaew rom nge tafagar rom.² Gur nge yaed e ra chugur ngak fare Tathapeg u dakean e biney e kanawo’. Ma thil, mu’un e ma’ang’ang ngay, e ra tabab i buch.

Biney e kadbul e ni weliy mornga’agen e tabinaew nib ga’fan, mornga’agen e pin’en nibay u lane schedule ko Madnom kko tabinaew nge Galasia. Gur, i pi walageg, e rib ga’fan ko biney nib bi’ech ninge buch, ni murwel ko gospel ni ngan fil. Wenig mu fil ngak e pi’in nib tu’uf rom e n’en ni gabe fil u lane pi chep nib thothup. Fil ngoraed rogon ni ngan pagan’ ngak fare Tathapeg ko gol Rok nge gelngin ninge bi’ech nigey napan ni yaed ra denen. Mag fil ngoraed rogon ni ngan murwel ko gelngin ni gubin e rran u lane yafas roraed.

Bin dalip, ni un ko temple ni bo’or yay. Biney e rayog nib miligach nib ga’ u lane yafas rom. Temple ni yibe yaen ngay ni bukun yay e rayog ni nge pag Somoel nge fil ngom ko rogon ni ngam murwel ko gelngin e priesthood Rok nikan pi’ ngom u lane temple Rok. Pi’in ni darma paer nib chugur ko temple, gube piningem ni ngam fil u fithik e meybil mornga’agen e temple u lane pi chep nib thothup nge lane thin rok e pi profet. Gay ni ngam nang boech, ni ngam nang fan boech, ni ngam thamiy boech mornga’gen e temple ni dawori buch rom bi’id.

Lane mo’olung ko fal’ yangren u dakean ga’ngin e fayleng ko fare June nike thimur, mug weliy mornga’agen ma mo’on ni fal’ yangren ni thil e yafas rok napan ni thilyeg e galabthir rok e smartphone rok ko flip phone. Chitinngin e re pumo’on ney e dariy e murus rok nib gel e mich rok. Ke guy faak nibe sar ko boech ban’en ni rayog ni nge n’anggin ni dabi yan ko mission rok. Me yan nga temple ko meybil ninge nang rogon nib fal’ rogon ni nge ayuweg faak. Ma arame fol ko n’en nibe thamiy.

Ke ga’ar: “Ku thamiy fare Kan Nthothup nibe gagyeg nigeg ni ngguy e fon rok fakag nib muturug e ngiyal’ riy ni ngguy boech ban’en. Danug nang rogon ni nggu farowliy e pi smartphone ney, machane fare Kan Nthothup e gagyeg nigeg u fithik gubin e social media ni daguma yan ngay! Gu manang ni fare Kan Nthothup e ma ayuweg e galabthir nima gay e ayuw ni nge ayuweg e bitir roraed. [Somm’on] ma be domomow faakag ngog. … Machane karimus ni yan dalip e rran, me pining e magaer ngog! Ke thamiy ni bay e n’en nike thil riy.”

Pangin fare pagal ni faak e ke thil nib tumgin. Ke ta ayuw u tabinaew, ke tingi’ nib gel, ke un nga Galasia. Ba adag i pi’ e ayuw u lane gin ni yima tawfe riy u temple man fal’eg rogon ko mission rok.

Bin aningeg ni nggog, e fan ngomed e pi’in ni kam ilal gaed, ni ngam uned ko Relief Society. Gube wenig ngom ni ngam fil mornga’agen fan e bin bi’ech e Relief Society. Ra ayuw. Ra gagyeg nigem ngam fal’eg rogom ni fan ko yafas rom. Ma kugube wenig ngom ni ngam falfalen’ ko tin riyul’ u lane thin ko Relief Society nikan yoloey nike chugur nge gaman 20 e duw.³ Copy nikan frame nag ko ran’ey e bay nikan the’ ngalang ko rungrung u lane ofis ko Bin Somm’on e Presidency. Guma falfalen’ ni gubin ngiyal’ ni guma bi’eg. Ma weliy ko gur mini’ ma ba tu’uf e ayuw rom ngak Somoel ko ngiyal’ ney nib ga’fan napan ni gara rrin’ e birom murwel ni ngam kunuy e Israel.

Pi walageg nib tu’uf rog, ba tu’uf e ayuw rom romaed! Ba “tu’uf gelngim, rogom nikam thil, mich rom, nge rogon ni ngam gagyeg, gonop rom, nge lumam.”⁴ Dabyog ni nggu lunuyed e Israel ni damoyed.

Gimed ba tu’uf rog ma gube pining e magaer ngomed, ma gube yibliy med e chiney ni ngeyag ngam pag e tin fayleng ban’en napan ni gimed ra ayuw ko re murwel ney nib ga’fan mab gurgur. U ta’bang ma rayog ni ngad rrin’ed gubin e n’en ni ba adag e Chitamangdaed nu Tharmiy ni ngad rrin’ed ngad fal’eged rogon e fayleng ko yan L’agruw Yay e Wub rok Faak.

Yesus e ir Kristus. Iraray e Galasia Rok. Biney e gube micheg u dakean fithngan Yesus Kristus, amen.