Flaflaen’ ko Pigpig ni Dariy e Si’in Riy
Kug micheged ngak Chitamangdaed nu Tharmiy ningad pigpigniged Ngak ma reb e gidii’ ufithik e t’ufeg mag rrin’ed e tin Laniyaen’ u gubin yal’.
Tomuren fa binem e general conference, boech e gidii’ kar baed ngog mar fithed ta’ab e duwer: “Fapi chiya’ ngem e ba fel’?” Fulweg kug pii’ e ba: “Fapi chiya’ ngem ma rib fel’ fa’an dabi t’uf ninga pii’ e welthin.” Ba riyul’, fa? Chiya’ rog dabki fel’ biney e mo’olung, machane Kug falflaen’ ni fan e taw’ath nge liyoer ningu pii’ e welthin ngomed u blayal’ ney.
Boech e ningyal’ nap’an e pigipg rodad, rayog ningad paered nga boech e chiya’. Boech e ba fel’ nge boech ni gathi fel’, machane kug micheged ngak e Chitamangdaed nu Tharmiy ningad pigpigniged Ngak ma reb e gidii’ ufithik e t’ufeg nga tin Laniyaen’ rok.
Boech e duw u faram, e gidii’ ni fel yangren ko Galasia kar filed ni “nap’an ngam taba’ab e pigpig ku Got [Doctrine and Covenants 4:2], gaba un fa bin thabi gaa’ e milekag. Gaba ayuweg Got ninge papaynag e muruwel Rok, ni’ir e tin fel, falflaen’, nge ma’ang’ang e bin’en.” 1 I’ir e milekag ni fan dad—urngin e yangren—i’ir e milekag nibe yaen ko kanawo’ e profet rodad ni kunuy nge pii’ fithingan “kanawo’ ko michmicheg.”2
Arrgon, machane, gadadba paer u lane fayleng nib si’in ni bay e gidii’ ma fithed, “Mang ngu fanag?” dar fithed, “Urrogon Ningu ayuwegem e daba’?” fa “Urrogon Ningu pigpig ngak Somoel nib fel’ rogon ko calling rog?” fa “Gube pi’ e tin rayog rog ngak Somoel?”
E fanow nib fel’ ko yafas rog ko pigpig ni dabi si’in e ke yib ku Sister Victor Antoniette Victoria i’ir e sensey ko Primary ko branch romad nap’an ni ku ug paer u Argentina. Gubin e Tuesday ko misiw’, nap’an kug mukun’gaed ko Primary, ke fek e cake nib chocolate. Urngin e gidii’ ba’adag fare cake nem—arragon, machane gag. Dabug fare cake nib chocolate! Make gay rogon ninge pii’ yangi cake ngog, machane Kug oge danga’.
Reb e rran tomuren ni ke pii’ e cake nib chocolate ngak urngin e bitir, Kug fith ngak, “Mang fan damu fi’leg reb e lamen—woed e gurgur fa vanilla?”
Tomuren ke minmin boech, ke fith ngog, “Mang fan damu kai e yangi chigchig? Biney e cake e kan fal’eg ko e ban’en nib fel’, ma Gube micheg ni fa’anra gara kay boech, ma gara adag!”
Gu sapsap, mug balyangaen’, urngin e gidii’ ma ba’adag fare cake. Kug gog gura kay boech. Ragam lemnag mang ke buch u tomur? Gu ba adag! Iraram e somm’on rog ni ku adag e cake nib chocolate.
Tomuren bo’or e duw Kug fil e ban’en ko recipe ulan fare cake nib chocolate rok Sister Atonietti. Pi bitir nge gag kug ranoed nga nina’ rog urngin e week. Nap’an reb e visit, Nina’ rog nge Gag kug ka’ew boech e cake, Mug weliy’ urrogon guba a’dag e cake nib chocolate ko bin somm’on e yay. Make weliy’ e chepin ngog.
Am sap o, Cris,” e yoeg nina’ rog, “Victoria nge tabinaew rok kar gafgow ko salpiy, ma urngin e wik ke me’leg ninge chuway’ e ticket ko bus ni fan nge aningeg e bitir rok nga primary fa chuway’ e ban’en ninge fal’eg e cake nib chocolate ko Primary class rok. Urngin yay ke me’leg fare cake nib chocolate, ma kar ranoed nga but ko la’aruw e mile [3km], la’agruw e wo’en, dariy’ fan e yifang.
Re rran nem e rugu adag fare cake nib chocolate rok. N’en nib gaa’fan, e gu fil fare n’en nib gaa’ ko Cake rok Victoria i’ir e t’ufeg ni fan e gidii’ ni ke pigpig ngak nge maligach nib fel’ ni fandad.
Nap’an gube lemnag maurng’agen fare cake rok Victoria irma ayuweg nigeg ningu pugurran e maligach ni ke fil Somoel ngak fapi gachalpen Rok nap’an Ke yean ngak fare tafen e salpiy u lan fare temple. Gamanang fare chepin. Elder James E. Talmage ke fil ni bay 13 e kahol ngaram, “ma ulangin fapi kahol e gidii’ kar tayed e maligach nib bo’or e miit ni fan e fan nib [thil] ni kan yoloey [nga dakaen] fapi kahol.” Yesus ke sap nga fapi gidii’ nibe pii’ e maligach, ni bay bo’or e miit e gidii’. Boech kar pii’ed e maligach roraed u fithik e “laniyaen’ nib yul’yul’” ma reb kar yin’ed bo’or e “gold nge silber,” ni yibe athapeg noi ngan guyey, ngan nangey, ma yibe tay fan raed ni bachane salpiy roraed.
“Aram bay e ppin ni ke yim’ le’engin, make … tay nga kahol la’agruwi yangi salpiy nib bronze ni kanoeg e mite; e maligach rok dabki gaa’ puluwon woed balay ta’areb e cent ko salpiy nu Merikan. En Somoel ke pinning fapi gachalpen Rok ngar baed Ngak, ma ke pinning tiyaen’raed ngak fare ppin nge ngongol rok, me yoeg: “Nre pin ney nib gafgow ya ke yim’ figirngin e ir e bo’or e salpiy ni ke yin’ ko tin ke yin’ urngin e girdi’ ni yad be yin’ e salpiy ngalan fare tafen e salpiy. Ya yad e kar pi’ed e salpiy’ ni kar feked ko salpiy ni bay roraed ni pire’, mi ir e aram feni gafgow ma ke pii’ urngin e chi salpiy ni bay rok, ni ir e nge abich riy’. [Mark 12:43–44].”3
Fare ppin ni ke yim’ figirngin dabki suwey nib fla’ab ko gidii’ u mfen rok. Machane ke ngongoliy e ban’en nib gaa’: e laniyaen’ rog e ba machalbog, make pii’ urngin ban’en u rayog rok. Sana ke pii’ chigchig ko reb e gidii’, urogon nib sobutaen’ ko reb e gidii’, nib thil ko reb e gidii’. U laniyaen’raed boech e gidii’, fatin ni ke pii’ e dariy’ fan, machane u laniyaen’ Tathapeg, en “ta pufthin ko urngin e laem nge thamtham ko gum’racha’,”4 ke pii’ urngin u rayog rok.
Sisters, nap’an ngad pii’ed urngin u rayog rok ngak e Somoel ko maligach? Gamad ba maligach nag e ningyal’ nge tin salap rodad ngak e gidii’ nib fel’ yangraed ningar filed e t’ufeg ngak Somoel mar folgaed fapi motochiyel Rok? Gamad ba pigpig nag ngak e gidii’ ufithikdaed nge gidii’ kan pinning daed ngak ufithik e gol nga yul’yul’—ngad maligach nag e ningyal’ nge rayog rodad u bo’or e rogon? Gamadba fol gali gaa’ e motochiyel—ningad t’ufeged Got nge bitir Rok?5 Bo’or e ningyal’ e t’ufeg be yib udakaen e pigpig.
President Dallin H. Oaks ke fil: “Tathapegdaed ke pii’ Rok udakaen e pigpig dabi si’in. Ke fil ningad folgaed Ngak ningad pii’ keru’ daed ko tiyaen’daed nib si’in ningad pigpignog reb e gidii’.”
Be ul’ul’ e weliy:
“E fanow nib fel’ marunga’agen nigad pii’daed ni fan e pigpig ko reb e gidii’ … i’ir e maligach ni ke ngongoliy e glabthir ni fan e bitir rorow. Pi Nina’ ma gafgow ko mith nge n’ag ko tiroraed ninge gargelen mar ayuweg e bitir roraed. Pi Papa’ ma thilyeg e yafas nge tiroraed ninge ayuweg e tabinaew roared. …
“… Rayog ningad falflaen’gaed ni fan e gidii’ nima ayuweg e chongin tabinaew nib gafgow ko dowen nge glabthir nib gaa’ yangren. E pigpig ney darma fith, mang ni fanag? Urngin pin’ney ba t’uf ninge maligach e tiroraed ko pigpig dani si’in. …
“[Nge] urngin e ban’en bad ag e tin riyul’ ko manemus ningad manged falflaen’ ngad thamiyed e tin fel’ nap’an ngad ngongoliyed mag pigpignoged e tirodaed, gathi ni fan e ban’en ningad thapeged.
“Tathapegdaed ba fil ngodaded ninad folgaed Ngak udakaen e maligach nib t’uf ningad pii’ dad ko pigpig dani si’in ngak reb e gidii’.”6
President Thomas S. Monson ke fil ni “sana nap’an ngad guyed owchen e Tasunmiy rodad, dabke fith ngodad, “Ina suwey kum suwey?’ machane ira fith, “ina gidii’ nikam ayuweg?’ Nib riyul’, dabiyog ningam t’ufeg ngak Somoel mada’ ko ngam pigpig Ngak udakaen e pigpig ngak e gidii’ Rok.”7
U reb e rogon, pi walageg nib ppin, dariy’ fan fa’an kad paered nga chiya’ nib fel’ fa kad gafgowgaed u chiya’ nib wasey u tomur e mo’olung. Dariy’ fan fa’an, nib t’uf, ningad chuweg nga foyer ningad ayuweg e titi nib yor. Ban’en nib gaa’fan ni kug gay laniyaen’daed ningad pigpignoged, ni kug guyed e gidii’ ningad ayuweg ngak nge pinningraed ufithik e falflaen’, ma kug oge ke urrogom boehc ngak e gidii’ nima fi’leg e chiya’—gadaed be pi’ e ayuw ni demtrug ni dan noeg ngodaed ni ngad machib gaed ngoraed. Nib gaa’fan ningad rrin’ed urngin e ban’en u raog rodad ningad pii’ed fare ban’en nib gaa’fan ufithik e t’ufeg nge maligach.
Kug fileg dani t’uf ningad fi’leg e cake nib chocolate ningad manged e sensei ko Primary nib fel’, bachan dariy’ fan fare cake. I’ir e t’ufeg ko ngongol nem.
Gube micheg ni t’ufeg ra mang thothup udakaen e maligach—e maligach ko sensei nge fa bin thabi gaa’ e maligach nib manemus ko en Faak Got. Gube micheg nib fas! Gube t’ufeg Ngak ma gube adag ninggu pii’ keru’ ngak e laniyaen’ nib si’in ko e t’ufeg nge machibnog woed rogon Irma rrin’. Udakaen fithngan ku Yesus Kristus, amen.