Ulunguy e Dayif ko fare Muruwel ni Th’abi Mangil

Gadad e galabthir nu Zion, bay e muruwel rodad nib thothup ni ngad ayuwegned e bitir rodad ningar adaged ni ngar pired ni yad ba fal’falan’, ma bay ra’an fare magal rorad, nge riyul’ ko fare gospel rok Yesus Kristus. Nap’an ni gadad be chugliy e bitir rodad, ma aram ni gadad be ngongliy e yalen ulan e tabinaew rodad nibe ayuweg fare tha’ u tabinaew rodad ninge mon’og. Nap’an nran rin’ e tiney, ma fapi yalen ni gadad be rin’ era geliyan, nra ayuweg pingin fapi bitir rodad ni ngar mon’oggad ndariyfan ni fa’an nib momaw’ e yafos rorad.

Bo’or e duw nima mukun gathon e tabinaew rog nga ta’abang ko yalen romad ni ngu campgad ko burey ni kanog e Uintah Mountain nibay u leel’oech u Utah. Gamad ma yan ni 20 myl (32 km) u dakan bangi burey ni yugo’butt’ nga bangi n’en ni woed e loway, ni rib tolang ngalang, nibay bangi luul’ riy nib gerbeb, mab be’ech. Gubin e duw, ma gamow ma athapeg ni ngu pug oran nigew fapi yalen e gospel ko pi bitir romow nge pifak pifaak mow. Gag nge Susan e gamow ma fith fare nel’ i fak mow ni mo’on nge tabinaew rorad ni ngar fal’egned reb e mulwol ni yad be thamiy ni rib ga’fan nibe ayuweg fare Dayifko tabinaew rorad ni Kristus. Ran mu’ magmad gak’ nga ta’abang, ma re be’ me dag e birok’ e mulwol.

siasing/Llecheklel

Pi mulwol nikan yoloey u dakean bo’olungi malang

Biney e duw, pifak pifakmow e ra yoloyed e mulwol rorad nga dakan e malang, miyed tharay u fithik e butt’ nib chugur reb ngareb, nibe dag e Dayif ko fare fal’falan’ nibay rorad. Kubang ko ran’ey, gubin fapi nel’ i mulwol rorad e be dag, ni Yesus Kristus e ir fare Dayif ko galasia rok nib ruyul’ ni manemus.

Ko thin rok Isaiah, “Ba’aray e n’en ni be yog Somol, Ngu tay ba deg ngalan yu Zion, ni ba Dayifni bay i par nib muduwgil ma ba gel.”¹ Yesus Kristus e iraram fare malang u fithik fare Dayifnu Zion. Ni’ir e cha’ ni dag ngak Profet Joseph Smith: “Arragon, ni dab mu malmal ko pi muruwel rom, ya gabe toy fare deg ko fare bin th’abi gaa’ e muruwel nibay. Ya tin nib achig ban’en era yib fal’ngin nib mangil.”²

Pi machib nike mang yalen rodad ni yibe fil ulan e tabinaew rodad, e dariyfan nib achig, ya ir ab ga’fan u dakan e fayleng e dabay. Mang e pi n’en nib achig, ni fa’an gadad ra rin’ e chiney, ma rayag ni nge ayuweg pifaak dad ko pi muruwel ulan e yafos rorad?

President Russell M. Nelson e fan gi weliy mornga’agen ko fare gathon e galasia u to’ben yu Toronto, Canada, nibe pug oran ngak e galabthir fare muruwel rorad ni ngar machib gad ngak e pifak rad. Urngin fapi muruwel nib tu’uf ni ngad rinn’ed e galabthir, President Nelson e ri tay chilen ngak e galabthir ni ngar filed ngak pifaak rad fan ni gadad ma kay fare flowa ko sacrament, nge fan ni kan gargel nag rad nga dakan fare m’ag, nge fan ni yima fal’ag rogoy ni ngan thapeg fare tawa’ath ko patriarchal, maki pii’ e athamgil ngak e galabthir ni ngar be’eged fare thin nib thothup ulan e tabinaew rorad u ta’abang.³ Ko pin’ey ni yibe gay rogon, fare profet rodad e ke yog ni ngad fal’agned e tabinaew rodad ni nge par ni “gin tofen e mich.”⁴

Ulan fare Babyor ku Mormon, Enos e yoloy fare fal’falan’ rok nga butt’ ni thamiy ni bachan fare ngongol rok e chitamngin ni “ire fil ngog e thin [rok’], nge ku mornga’agen e machathowol nge fabow rok’ fare Somoel.” Ni ga’ar Enos riy, “Ma gube oge magaer ngak’ e Got rog riy.”⁵

Guma cha’riy fapi yalen nib achig ulan e tabinaew rog ni ke gaman 35 e duw nikug mabgol. Oreb e yalen romad e ba achig, machane bagelfan. Woed e:

• Blayal’ ni gub palog u tabinaew, ma gumnang ni bin ilal i fakag nib mo’on e ma rin’ e pin’ey, ndar ma son ngafin fith, ni ma tababnag fare meybil min be’eg e thin nib thothup ulan fare tabinaew.⁶

• Reb e yalen dariy bee’ nima chuw u tabinaew, fa tal ko numon u telefon, ni darma ga’ar, “Gab tu’uf rog.”

• Kan tawa’athnag e yafos romow ni bachan e pi interview ni guma tay ni ngu nang salpen gubin fapi pagal ni fakag. Nap’an reb e interview mug fith ngak reb e pagal ni fakag ko mang e tafney nag ko mission rok. Tomren ni kug nonow, mag mowpar ni dakri bagmow ni be non ngak bagmow, me ga’ar nga m’on me ga’ar, “Papa’, kaga manang nap’an ni kugub achig mag tabab i fith bo’olungi duwer ngog?” Mug ga’ar, “Arragon.” “Me ga’ar,” “Mug micheg ngom ko rofen nem ni gura yan ko missin rog, mag micheg nag ngog ni gur nge Nina’ e gamew ra yan ko mission romew nap’an ni gamew ra palibthir.” Makag mow tal. “Bay ban’en ni be taleg mew ni ngam pigpig gow ko mission romew—sana rayag ni ngu pii’ e ayuw?” Ngog e tin riyul’, dan kug nang ko mang e nggog.

Yalen e tabinaew nib polo’ e mu’un e meybil, be’eg e thin nib thothup, mo’olung ulan e tabinaew, un ko mo’olung ko Galasia, ni pin’ey nib aching, e ra sunmiy e yalen ko tu’ufeg, tayfan, uta’abang, nge gapas. Fare thothup nibe yib ni bachan e pin’ey ni yibe rin’, e ra ayuweg fapi bitir rorad ko fapi lumel nge tin nu fayleng ban’en ko pi rran rodad ney.

Kan pug oran ngodad e biney e mulwol rok Helaman ngak pifak nib mo’on: “Mu tayew u wun’mew ni fare war ni Tabiyul rodaed, ni’ir Kristus, ni facha’ ni Fak Got, e thingar mu ufungew e dayif romew nga dakean; ya nap’an ni fare mo’oniyan’ e nge pii’ e nifeng rok’ nib gel, arragon, nifngin e yoko’ rok nib gel nge aw ngomew, ma dariy gelingin ni nge miliy mew iyaen nga but’ ko fare dodow ko gafgow ni dariy n’umngin i nap’an, ni bachan fare malang ni kam dummow gow ngak dakean, ni’ir ba dayif nib miyuluy, nib dayif ni fa’an da toey e gidii’ e na’un nga daken ma dabi puth nga but’.”⁷

Boech e duw kafram, nap’an ni gub bisof, bay mo’on ni fith ni ngu mada’gow. Me weliy mornga’agen ni digey e Galasia nge fapi yalen nib mat’aw nike fil e galabthir rok ngak nap’an ni kabfel’ yangren. Me weliy gelngin fare a’mith ni thamiy ko yafos rok ko ngiyal’ nibe gay e fal’falan’ ngabiyang, fal’falan’ nu fayleng. Chiney, nike pil’al boech, ke weliy mornga’agen fare thamtham nib munguy rok fare Thothup rok Got ni nge sap nga tomur ko fapi machib, nge fapi thamtham ni’i thamiy nap’an ni kab bitir. Me ognag e magar ngak e galabthir rok, ni woed rogon ni yoeg Enos: “Ma gube oge magaer ngak’ e Got rog riy.”

Ko tin ni gub manang, re mo’on ney e sul ko galasia ni bo’or e gidii’ ni bitir rok Got ni ke rin’ e biney nibay i chuw bangiyal’, ma bay ra suled ko fapi machib ni kar filed nap’an ni kiyad bitir. Ko ngiyal’ ney, gadad be micheg fapi yol nibay nifan ngak e galabthir, “Mu fil ngak e bitir rogon nthingar ra pired, mi i par u wan’rad u n’umgin nap’an e yafos rorad.”⁸

Gubin e galabthir ma bay e tiro’ e chachalban nge tin nibe thamiy nap’an nibe chugliy pifak. Machane, nap’an nra fil e galabthir ngak pifak ni gubin ngiayl’, nib yul’yul, nibe gay rogon ni nge ayuweg rad ngar mon’oggad, ma yadra thapeg fare mich ni fapi n’en niyad be fil ngak pifakrad e ra par u laniyan’rad nge gumircha’en rad.

Moses e manangfan fare Dayifko machib ni gubin ngiyal’. Ke machibnag, “Mu filed ngak pifaked; um weliyed murngu’agen ngorad ko ngiyal’ ni gimed bay u tabniaew nge ngiyal’ ni gimed be milekag, nge ngiyal’ ni gimed toffan nge ngiyal’ ni gimed be maruwel.”⁹

Ngad garbuggad nga charen fakdad ko ngiyal’ ni yibe meybil, gadad be dag ngorad ni yad ba tu’uf rodad nap’an ni gadad be be’eg e thin nib thothup, ma yibe sonagrad, ma yibe tu’ufegrad u ta’abang ko ngiyal’ e mo’olung ko tabinaew, ni yad bay ko tafney rodad nap’an ni gadad be meybil. Ni gadad ba’adag ni nge fol fapi bitir rodad ko fapi machib ni gadad be fil ngorad.

Mich u wun’ug ni dab sapgad ko bin ba’aray ko be “nangfan” e bitir rodad fapi machib rodad, woed ni yibe gay rogon ni ngan be’eg fare thin nib thothup fa woed ni ngan mo’olung u tabianew fa woed yibe fel’eg fare Babyor ko Duty to Got fa Young Women Recognition. Dab sapgad ngay ni fa’an ra darnangfaned gubin e pi n’ey, ya gadad e galabthir e gadad be gay rogon fare mich ni ngan leak wo’en Somoel, min fil, min rin’, min yan nga m’on nibe yib rok fare gospel rok Yesus Kristus. Iraray e muruwel rodad nibe yib nibach e mich rodad—ma yadra thapeg fare mich ni fapi n’en niyad be fil ngak pifakrad e ra par u laniyan’rad nge gumircha’en rad.

Pi n’en ni gadad ma weliy mornga’agen, pi n’en ni gadad ma machibnag ma yibe fil e ir era dugliy ko mang e nge buch rodad. Nap’an ni gadad ra fal’agin e yalen nib polo’ nifen e tabinaew nibe fil mornga’agen Kristus, fare Kan ni Thothup ere michag fapi n’en nib riyul’ ko pi mulwol romad ma ra ayuweg fapi bitir rodad fapi n’en ni kar filed. Gube micheg u daken fithngan Yesus Kristus, amen.