Ta’ab Girdi’gad Kristus
Pi gidii’eg u dakaen fare murwel rok fare Somoel, mich u wun’ug ngay nrayag ma ba t’uf ni ngad tafagargad ngak e gidii’ nib be’ech nike un ko fare Galasia.
Fel’ fana missiw’, pi walageg ni mo’on nge bpin. Woed ko thin rog nu Brazilian Portuguese, “Boa tarde!” Kan tawa’ath nigeg ni gubay romed e dabay ko re general conference ko Fare Galasia ku Yesus Kristus ni fan Gidii’en Got ko Tin Tomur e Rran u dakaen fare wo’en fare profet rodad nib tu’uf, President Russell M. Nelson. Gub fal’falan’ ngay ni gadad gubin ma rayag ni ngad motoyilgad nga lungin fare Somoel u dakan fapi tapigpig Rok’ u dakan e fayleng u tomran e pii ran ney ni gadad be par riy.
Ko naam rog u Brazil fal’ rogomad ko tin ba’aray ban’en nike sumrok’. Ta’ e pin’ey e kanoeg fare Luul’ nu Amazon ngay, reb ni tha’abi ga’ mab n’uw e luul’ u dakan e fayleng. Ni sum u l’agruwi paa’ i luul’, fare Solimões nge Negro. Gali luul’ ney e ma yan u ta’abang nib n’uw yang fa’anra mathuk gow nga ta’abang, nib bachan e gin ni yib riy, payngin, guwalngin, fa n’en ni bay u fthik. Bukun e mile, fin aram fani mathuk fagli luul’ nga ta’abang, fin aram me thil fagli luul’ ko gin ba’aram nra sum riy ni somm’on. Nap’an nra mathuk fagli luul’ nga ta’abang, fare Luul’ ni kanoeg u Amazon ngay e me yib gelngin nib alamrin nap’an nran ni taw ko fare Atlantic Ocean, me pii’ fare daay nga orel ni ngayag ni nge m’ug fare raan riy ni demtrug urngin e myl nga madaay.
Woed nib chuchgur rogon ko fare Luul’ ni Solimões nge Negro ni yib nga ta’abang nge sunmiy fare Luul’ nu Amazon, pifak Got era yib nga ta’abang ulan fare Galasia ku Yesus Kristus ni kan fulweg bayay ni demtrug salaprad, yalenrad, fa rogon e naam rorad, ran gak’ nga ta’abang ni ngan sunmiy ba ulung ko Gidii’en Kristus. Nap’an ni gadad ra athamgil, min ayuwegney, min tu’ufegney, ma gadad ra mathik ni ngan ngongliy e tin nib manngil u dakan e fayleng ban’en. Pi gachalpen Yesus Kristus, ta’arebgad ni woed ere luul’ ney, ma rayag ni ngad pii’ed e “rran nib be’ech” ko fare gospel ngak e fayleng.
Fare Somoel e ke thogthog ngak fapi Profet Rok’ ni nge fil ngodad rogon ni ngad ayuweged min tu’ufeg i gadad ni ngayag ni ngad ta’arebgad ko mich rodad min laek Yesus Kristus. Paul, ni’r fare Apostle ulan fare M’ag nib Be’ech, e fil ni picha’en “ni kar tawfe gad ngak Kristus e kar feked nga dakanrad Kristus … : ya gamed gubin ta’areb Rok’ Kristus Yesus.”1
Nap’an ni gadad ra micheg ko fare tawfe ni ngad laked fare Tathapeg, ma kad michegned u mit e Chitmangin ni gadad ra fek nga dakandad fithngin Kristus.2 Nap’an ni gadad fek ngalan e yafos rodad, ma kad thilgad ko somm’om, u dakan fare Bayul rok Kristus fare Somoel, ma tu’ufeg rodad ngak e gidii’ era mon’og.3 Ma gadad ra guy e gidii’ ni woed walagdad ni mo’on nge pbin, ni woed pifak Got ni sum rok. Mab m’agaen’med ngay ni ngam ayuwegned gimed mag ba’ud gaed.4
Iraray e n’en ni weliy Paul nibe weliy rogon e tu’ufeg.5 Mormon, ba profet ulan fare Babyor ku Mormon, ni weliy e biney ni “fare adag rok’ Kristus nib machalbog,”6 ni karimus, mab tha’abi gaa’, mab tha’abi gel ko gubin mit e t’ufeg. Profet rodad e chiney, President Russell M. Nelson, e fanngi weliy rogon e mit ney e tu’ufeg ni kanoeg e machibngay, ni’ir gaa’ngin rogon ni rayag ni ngaddaged rogon e tu’ufeg ngak bee’ ni woed rogon ni dag fare Tathapeg.7
Tafney niged rogon e biney e fanow ko t’ufeg nga adag, ni woed fare Tathapeg, ni yibe pii’ e athamgil, nge ayuw, min ayuweg e gidii’ ni fani un ko galasia nge pi cha’en ni be dag ni yad ba’adag ni ngar uned ko Galasia rodad.
Nap’an nra yib e pifagar ney ni kar digeyed mam’ngin e fayleng miyed sap ko fare gospel rok Yesus Kristus, ngar uned ko fare Galasia rok, miyad mang gachalpen, ni gargeleg raed bayay.8 Mayad pag e tin nu fayleng ban’en ngar laked Yesus Kristus, ni gubin polo’ i gum’ircha’enrad, mayad un ko fare “luul” ni woed fare Luul’ nu Amazon ngay—ba luul’ nib sug ko tin nib fal’ ban’en nibe yani yan nib sor ngak Got. Fare Apostle Peter e weliy e ran’ey ni’ir fare “nam nikan mel’eg, pi pirst rok e en ni pilung, nam nib thothup, nge girdi’en Got.”9 Nap’an nra un e pifagar ney ko fare luul’ ni yibi peth, ma rayag ni yad ra balayangan’rad ni bachan e darn ninged e giney. Pifagar ney nib be’ech e yad be un ko fare luul’ ko gin ni sum riy, guwalngin, nge rogon—ma luul’ nibay e tirok’ e yalen, fanow, rogon e naam rok, fa thin rok. Ma biney e yafos rok Kristus e rayag ni ra momaw’ ngorad. Mu tafney nag u wan’um rogon ni yad ra rung’ag e pi thin ney ni iraray e somm’on rorad “FHE,” “BYC,” balaynag e abich ko Madnom,” tawfe nifen e yam,” “dalip nikan ulnguy nga ta’abang,” nge ku boech.
Moem rogon ni ngay guy fan ni dar thamiyed ni iraray e gin nra fal’ rogn e par rorad riy. Rayag, ni yad ra fithedrad, “bay bang u roy nrayag ni ngu gif ngay? Bay tagl’ig ulan fare Galasia ku Yesus Kristus ni fan ko gidii’en Got ko Tin Tomur e Rran? Bay tagl’ig uroy? Gub tu’uf ko fare Galasia? Gura peri’eg boech e fagar nrayag ni nge ayuwegneg?
Pi tafagar rog, ko biney e ngiyal’, gadad e pi cha’en ni demtrug ko gin ni gadad bay riy ulan e yafos rodad thingar da pii’ed e ayuw ngak fapi tafagar rodad nib be’ech, mu adag e gin ni yadbay riy, mag ayuweg, tu’ufeg, magfekrad ngalan e yafos rom. Gubin e pi tafagarney ma yad gubin ni bitir rok Got.10 Dabiyag pilwon rodad ni ngan pag bee’ nge malaboch, ni yad e woed fare Luul’ nu Amazon nibe taga’ ngak boech e luul’ nib achig nibe yibi peth ngay, ni ngad gel gad magdad rin’ e tin nib manngil u dakan e fayleng.
Pi fagar rodad nib be’ech nibay e tawa’ath rorad ni ke yib rok Got, nge chag ko fal’falan’ rorad, miyad fek nga Galasia. Fal’falan’ rorad ko fare galasia e ba gal, ma rayag ni nge ayuwegdad nge gel nag e mich rodad. Ma ku rayag ni ngar guyed miyad nangfan boech ban’en ulan fare gospel nib thil ko rogon ni gadad ma sap ngay.
Kab kafram i yib ma kad filed rogon nrayag ni ngad ayuwegned e pi fagar rodad nib be’ech ni nge thamiy ni yad ba t’uf rodad ulan fare Galasia rok Yesus Kristus nikan sulweg bayay. Ba t’uf dalip ban’en ni ngayag ni ngar pired niyad be gel mab mich u wan’rad ulan e yafos rorad:
Bin somm’on, ba t’uf fapi walag nib mo’on nge bpin ulan fare Galasia ni nge dag ni yad ba t’uf rok, reb e fagar nrayag ni nge ayuweg ni demtrug i ngiyal’, nra unu charenrad, ma ra fulweg e duwer rorad. Gadad gidii’en e galasia, dabda son gad nge mada’ ko ngiyal’ ni be’ e nge yog ir, thingar da pired ma gadad be sapnag e gidii’ nib thil owchrad ulan fare mo’olung ko Galasia, demtrug ko mang e ba t’uf ni ngad rin’ed, fa murwel, fa tin ni gadad be magagawon riy. Rayag ni ngad rin’ed boech ban’en nib achig ni ngayag ni nge thamiy fapi fagar rodad nib be’ech fare t’ufeg rok fare Tathapeg ulan fare Galasia, ni woed ni ngan noeg e thin ngak bee’, fan paru charen nap’an ni gadad be yon’ e tang u ta’abang nge ku buch. Nap’an ni gadad ra bing gum’ircha’endad ko fapi fagar nib be’ech, ma gadad be rin’ ni woed rogon fare ta machib. Nap’an ni gadad ra machib ngorad ni woed rogon ni rin’ fare Tathapeg, ma dabra thamiyed ni “yad ba thil ngodad.” Yadra thamiy ni rayag boch e fagar ngorad, ma yad ra thamiy fare t’ufeg rok fare Tathapeg.
Bin magid, pi fagar nib be’ech e ba t’uf ni ngan pii’ e muruwel ngorad—ni ngar pigpiggad ngak e gidii’. Pigpig e reb fal’ngin Fare Galasia ku Yesus Kristus ni fan ko Gidii’en Got ko Tin Tomur e Rran. Iraray kanawo’en ngrayag ni nge mon’og e mich rodad. Gubin e fagar nib be’ech nib t’uf ninge rin’ e biney. Ni murwel ko bisof nge ward counsil ni ba pi e muruwel tumoren e taufe, dariy ban’en nibe talagdad, e chongin, ni ngan pining e pi fagar nib be’ech ni nge un ngodad ko pi pigpig.
Bin dalip, pi fagar nib be’ech thingar ra “duruwo’rad ko fare thin nib mangil rok’ Got.”11 Rayag ni ngad ayuwegnedrad ni ngar nanged fare t’ufeg nge fapi thin nib thothup u nap’an ni gadad ra be’eg min fil e pi mulwon ney ngorad, min weliy e thin nib gang’gang’ ni ngar nangfaned. Ma rayag ni ngad filed ngorad rogon ni ngar thamiyed e thogthog u nap’an ni yad be fil fapi thin nib thothup. Ma ku rayag ni ngad nanged salpen rad u tabinaew rorad fa ulan e tabinaew rodad ma gathi kemus ni mo’olung ko Galasia, ni yibe pii’ e ayuw ngorad ngad ta’arebgad ko fare luul’ ko ta’areb e ulung ko fare Gidii’en Kristus.
Ran guy min tin’uy ko pi magagwon ulan e yafos ko pi tafagar rodad niyad ba gayrogon ni ngar manged gidii’en e tabinaew rok Got, gadad e pi mo’on nge bpin ko galasia, rayag ni ngad weliy ngorad rogon ni ke buch e tiney ulan e yafos rodad. Biney e rayag ni nge ayuwegrad ngar nanged ni Got e ra tawa’ath nagrad ko ngiyal’ ni yad be yul’yul’ ngak.12
Nap’an nra mathuk fare luul’ nu Salimoes nge Negro nga ta’abang, ma fare Luul’ u Amazon e mang nib gel’ ab alamrin. Ku woed rogon, ni fa’an gadad ra mathuk ngak fapi fagar nib be’ech, fare Galasia rok Yesus Kristus nikan sulweg bayay era geliyan. Figirngig, Rosana, gamow be ognag e magar ngak gubin e gidii’ nike ayuwegmow kabkafram ngun’ew ko re luul’ ney, nap’an nigu fekew fare gospel rok Yesus Kristus ngalan e tabinaew ko naam romow nu Brazil. Pi duwney, pi gidii’ ney e kar machibgad ngomow ma kar ul’ul’gad yibe ayuwegmow ko kanawo’ nib mat’aw. Gamad ba pinning magar ngorad.
Fapi profet ulan e Ngael e naam e yad manang rogon ni ngar cha’ariyed e pi fagar nib be’ech ni ngar uned ko fare luul’ ko tin nib fel’ ban’en nibe fekrad ko yafos ni manemus. Musap gad, gube non ngomed ni gowa susun e gimed bay e chiney,13 Moroni e ke uneg boech e pi kanawo’en ney ulan fapi thin ni yoloy ulan fare Babyor ku Mormon:
“Ma tomuren ni kar thapeged e tawfe, make pigaen’raed ma kar be’ech gaed u dakaen gelingin fare Kan ni Thothup, min uneg raed ko matha’eg nga fithik’ fapi chon e galasia rok’ Kristus; min fek fithingraed, ni nga un lemnagraed ma yibe duruw’iy raed ko fare thib nib mangil rok’ Got, ni ngan tay raed u kanawo’ nib mat’aw, ni kemus ni fal’ngin Kristus e kar taga’gaed ngay, ni’ir e tabolngin nge tungun e mich roraed.
“Ma pi chon e galsia e ur mo’olung gaed, nib gar baley niged e abich roraed ma yaed be meybil, ma yaed be fith salpraed ni mornga’agen rogon e paer roraed.”14
Pi gidii’en e galasia nibe murwel ko fare Somoel, mich u wun’ug ngay ni rayag ni ngad nanged salpen e gidii’ nib be’ech ulan fare Galasia. Gube piningmed ni ngam tafniyed rogon nrayag ni ngam adaged, min fek, min ayuwegrad, tabab ko bin ba’aray e Madnom. Dam pag fare murwel rom ko galasia nge talagnem i rin’ e biney. Ya gubin e ya’al mab t’uf u pow’chen Got mab ga’fa’rad ko n’en ni gadad ma rin’ u galasia. Fa’an gadad ra machib ngak e pi fagar ney nib be’ech u polo’ i gum’ircha’endad ni woed rogon ni rin’ fare Tathapeg, gube michegnag ngom, u dakan fithngan, nra ayuwegdad ni demtrug rogon. Nap’an ni gadad ra rin’ ni woed rogon ni gadad ba yul’yul’, ni woed rogon ni rin fare Tathapeg, ma yad ra un ngodad ngad manged gidii’en Got nib gel min wereg fare tawa’ath ko fare gospel rok Yesus Kristus u dakan e fayleng ni rib t’uf riy. Ma pi bitir rok Got ney e dabra thamiyed ni “yad e gidii’ nu palog, machane gidii’ed Kristus.”15 Gube micheg ni yad ra guy wo’en Somoel rodad, Yesus Kristus, ulan fare Galasia Rok’. Yad ra ul’ul’ ngodad ngad uned ko fare luul’ ni gubin e fel’ ma bayriy nge mada’ ko ngiyal’ ni kar thapgad ngapaa’ fare Somoel rodad i Yesus Kristus, i ga’ar facha’ ni Chitmag, “Rayag e yafos ni gubinfen ngomed.”16
Gube pining ngem ni ngam gay fare ayuw rok fare Somoel ni ngam tu’ufeg boech e gidii’ ni woed rogon nibe t’ufegnem. Ngad fol gad pi thin ni ke fil Mormon, “Ere, pi walag nib tu’uf rog, meybil gaed ngak’ e en Chitamangiy u polo’ i gelingin gum’ircha’med, ni nge yog ni ngam sug gaed ko re adag ney, ni ke pii’ nga dakaen gubin e pi’in nib riyul’ ni ma lek Fak, ni Yesus Kristus.”17 Ko pin’ey nib riyul’, gube micheg u dakan fithngan Yesus Kristus, amen.