Owchey ni ngan Guy

Gu ba adag fare yaat u lane fare Bin Kakrom e M’ag ni mornga’agen fare mo’on nike pigpig ngak Elisha ni profet. Reb e kadbul ni od fare mo’on, me yan nga waen, me pir’eg ba donguch nib sug ko salthaw ni kan nib ngan li’ raed. Me mil ngak Elisha: ““Masta, kad gafgowgad, mang e ngad rin’ed?”

Me fulweg Elisha ni ga’ar, “Dab mu rus, ya kab pire’ e pi’in ni bay u ba’ rodad ko pi’in ni bay u ba’ rorad.”

Manang Elisha nib tu’uf e gathi rib tu’uf ni nge gapas nag e tafney rok fare mo’on; ba tu’uf ni nge mangil e changar rok. Ma arame “Me meybil Elisa, … Somol, … mu bing owchen e tapigpig rog nge guy.” Me pingeg Somol e changar rok fare tapigpig; me guy: nge, musap, fare burey nib sug ko os nge chariot nnifiy nib liyeg e gin’en ni bay Elisa riy.” ¹

Bay e yungiyal’, boed e tapigpig, ni gara pir’eg nem nibe momaw’ ngom ni ngam guy rogon nibe murwel Got u lane yafos rom —ngiyal’ nikam mo’owaer —napan ni ra fekem e tin fayleng ban’en ngam aw nga bugum. Mu soen me pagan’um ngak Got nge ngiyal’ ninge fulweg thin, ya rayog ni nge pagan’um nga gumircha’en u lan gumircha’em nib polo’. Machane bay e bin l’agruw e n’en ni ngan fil u roy. Pi walageg, ku aram rogon gur ni rayog ni ngam meybil ngak Somoel ni nge bing owchem ni ngam guy e pin’en ni dabyog ni ngam guy.

Sana n’en ni tha’abi ga’fan ngodaed ni ngad guyed nib tomilang e mini’ Got nge gadaed mini’—pifaak e galabthir nu tharmiy, niba’ e “thothup rodaed nge wo’ rodaed nib manemus.” ² Mu fithi ngak Got ni nge dag e pin’ey nib riyul’ ngom, nge rogon e thamtham Rok ngom. Urngin ni gabe nang fan ni mornga’agenmed nge fan romed, rogon e ya’el rom, e gelngin ni rayog ni nge ayuweg gubin ban’en u lane yafos rom.

Nang fan rogon nibe guy daed Got e ma fal’eg rogdaed ni nggu ayuweg daed ngad guyed boech e gidii’ ni woed nibe guy. Ta yoloy David Brooks e ga’ar: “Oren e magawon ko gidii’ e ma yib ko gidii’ ni be thamiy ni woed ni darin guy raed ma dan nang raed. … [Bay e dayif] riy … n’en ni ngad fal’ gaed riy … nge rogon[, ni ngan] guy boech e gidii’ ma kurun guyey.“ ³

Yesus Kristus e rib fal’ rogon ni ma guy e gidii’. Ma guy e gidii’, nge tin nib tu’uf roared, nge mini’ e rayog ni ngar manged. Gidii’ e be guy e pi’in nibe fita’, pi ta denen, gidii’ nima kunuy e salpiy rok e gidii’, me Yesus e be guy e gachalpen; gidii’ e be guy ba mo’on nike gabliy e mo’oniyan’, me Yesus dani sap u wuru’, machane yaen ngak, me gol nag. ⁴

Lane yafos rodaed ni gadaed ba barbartal, ma rayog ni ngad fol gaed ku Yesus ma gadaed guy e gidii’—tin nib tu’uf roared, mich roared, tin ni yaed be magawon riy, nge mini’ e rayog ni ngar manged. ⁵

Napan gube meybil ngak Somoel ni nge bing owcheg ni ngguy e tin ni dabyog ni ngguy, ma baga’ ni guma fith l’agruw e duwer ngog mug taiyan’ug ko fulweg riy: “Mang e pin’en gube rin’ ni thingari gu tal’eg?” nge “Mang e pi’nen dabgu rin’ ni thingari go tabab ni nggu rin’?” ⁶

In e pul nga tomur, napan e sacrament, mug fith e ra gali duwer ney ngog mug gin ko fulweg riy. “Mu taleg I yaliy e phone rom napan ni gabe soen ko layn.“ Phone rog ni guma sap ngay napan ni gube soen e ke macham, ma guma guy ni ngiyal’ nib mangil ni nggu rin bochi ban’en, ni nggu guy e email, yaliy ko mang e be buch boech, fa kemus ni yibe yaliy e social media.

Bin migid e kadbul, ma gubay ko ba layn nib n’uw ni yibe soen ni ngan yan nga kantin. Gu gerngiy e phone rog nga but me yib nga n’ug fare thin nike yib ngog. Gu fulweg e phone rog mug sapsap. Muguy ba mo’on nike labthir ni bay u m’on rog. Kemus ni bay in gaan e gatuw u lane cart rok. Ke kirkireb rogog, machane gu non ni badake arrogon, “Bay e gatuw rom.“ Me yoeg ni be yib e yiko’, ma dabun ni nge paer e gatuw rok ni dariy e gaan rok. Gu non nonow boech, me chel nge sap gog me ga’ar, “Gamanang, danug goeg ngak bee’, machane daba’ e tanchiyobi rog.“ Me lul’ gumircha’eg. Gu non ngak mu gog boech meybil u lanin’ug ni gube pining e magaer ni fa’anra gube sap ko phone rog ma daniyog ni nggu non ngak bee’ nib tu’uf rok.

U lan gumircha’eg ni polo’ ma debug ni nggu mang boed ba padrey fa ba Levite u dakean e kanawo’ u Jericho—ni cha’an ni sap me pi’ kiru’ nge yan. ⁷ Machane baga’ ni guma tafney nag ni sana guma daram.

Kafin gu fil ban’en rok ba bpin nikan noeg Rozlyn ngak ni mornga’agen e sap nib tamilang.

Ba fagar rog e weliy ngog nike kirbaen’ napan nike chuw e pumo’on rok nika mabgol row nike gaman raliw’ e duw. Bitir e be yan u thilthilin e galabthir, ma galasia ni ngan yan ngay e ke momaw’. Ke ga’ar:

“Lane galasia ma tabinaew e ban’en ni rib ga’fan, gag ni gube paer rog ni ngo’ gag e rib amith. Bin somm’on e Madnom e gu waen ni gube meybil ni dabi non bee’ ngog. Ke momaw’ gubin ban’en rog, ma bani nge sik e lu’ u owcheg nga but. Gu paer ko gin ni baga’ ni guma paer riy, ni gube athapeg ni dariy bee’ ni ra tiyan’ ngay ni dariy bee’ riy.

“Ba bpin u lane ward roamed e cheal nge sap ngog. Mug susun nag ni gube tingi’. Miki tingi’ ngog. Rayog ni ngguy e kirbaen’ u lan owchen. Gu wenig nag u lanin’ug ni dabi yib nge non ngog—dariy ban’en nib mangil ni nggog ma gu manang ni gura yoer. Gu sap nga dakean eg ni dabi pluw e sap romow bee’.

“U fithik bin migid e awa, mug tiyan’ug ngak nibe sap ngog. Napan ni m’ay fare mo’olung, me yib ngog. ’Mogethin, Rozlyn,’ kug kathkath. Me m’ag e bachbach ngog me ga’ar, “Sister Smith, gu manang ni daba’ ir e rran nib momaw’ ngom. Si sirow’. Gab tu’uf rog.’ Woed ku leam nag, me sik e lu’ owcheg napan ni m’ag biyay e bachbach ngog. Machane napan ni gu waen, mug leam, ’Sana rayog rog e ran’ey.’

siasing/Llecheklel

Rozlyn nge Sister Smith

“Chi bpin nem nib ragag nge nel’ e duw rok, nib bitir ngog, e ma yib I non ngog ni gubin e Madnom ko re duw nem ni nge m’ag e bachbach ngog me fitheg. ’Ke urogom boech?’ Ke ayuweg neg ko yib nga galasia. N’en nib riyul’ e ke pagaen’ug ko pi bachbach nem. Ke guyeg bee’. Manang bee’ ni gubay u rom. Gub tu’uf rok bee’.“