Gelngin ni Yesus Kristus ni ma golnag

Tabolngin e re duw ney, ma bukun ban’en ni kad dared u fithik. Gidii’ nibe yim’ nge murwel nike tal ni bachan e m’ar u feylang be gafgownag gubin e gidii’ ulangab e feylang.

Duru’, nifiy, nge raen ara daey nike tharey e buut ni yugbe buch u dakean e fayleng, nge kuboech e yiko’, nike magawon e gidii’ riy, nike mul laniyan’ raed riy, ma kar kirbaen’ gaed, ni dar nanged ko kura sul biyay rogon e paer roraed nge boed ko somm’on fa dang a’.

Soen nggu weliy mornga’agen e yaat’ nib kirbaen’.

Napan ni kab bitir pifaak mow, kar ba’adag ni ngar filed rogon i chubeg e piano. Rudy, ni figirngig, nge gaag e gomow ba’adag ni nggu n’angginew ngeyog e biney, machane dariy e piano. Dabyog ni nggu chuw’iyew e piano nib bi’ech, ere gay Rudy reb ni ki’i fana’ bee’.

Binem e dew ko Christmas, ni key pii’ ngorad e piano, nge ufithik boech e dew, pifaakmow kar fil’ed ni ngar chubeg e piano.

Napan ni pil’al pifaak mow ma kar chuw gaed u tabinaew, ma ke sug e ab ko fare piano, ere gu pi’ew ni chuway’. Bukun e duw ni yaen, ma ku cha’ariyew boech e salpiy. Me boran me ga’ar Rudy, “Sana ke taw ko ngiyal’ ni ngad chuwi’iyew fare piano.”

Mug fith, “Mongfan ni ngad fekew e piano nib bi’ech ni dariy bagdow nima chubeg?”

Me ga’ar, “Oh, machane rayog ni ngad fekew e piano nima chub rok! Gara murwel ko iPad, rayog ni ngam farowliy e piano ninge chubeg e musik nib pag 4,000 urngin, nib mu’un e hymn ngay, tang ko Tabernacle Choir, nge gubin e tang ko Primary, nge kuboech nib yo’or.”

Rudy e bee’ nibe cheag ko sell, ara chuw’iy ban’en.

Ku chuw’iyew reb e piano nib fal’el’ ya’an, in e rran nga m’on, ma l’agruw, e pumo’on nib ga’fan e ribow ri pi’ew nga tabinaew romow.

Gu dag ngorow e gin ni gu ba’adag ni ngan ta’ ngay mug chuw u pulwon row.

Rib tomal, ma ra ngan feek u langan e maab, ma kar lufuew tunguni ay me yag rorow ngar thikiyew fare piano nga barba’u dakean talin ko fek ni kar fekew.

Na’un romow e bay ko gin’en ni yira farteg, ere re rran nem ma ke aw e snow, ke munur nag gubin ban’en. Rayog ni ngam guy ko mang e ra buch?

Napan fapi pumo’on ni yibe feek dare piano nga talang, me sirgig, mug rung’ag lingan ban’en nike chub nib baga’ lingan. Fare piano e ke mul u talin ko fek ke chub nga but’ nib alamrin ke kireb nag bang ko ka’aring romow.

Mug ga’ar, “Ah, it’s’ tuw. Kab fal’ rogon mew?”

Kub fal’ rogon row.

Ke ga’ owchen row napan ni ri sap gow ngorow, mi yow sap ngog mar ga’ar gow, “Sirow’ ngom. Bay gu fulweg new nga kantin ma gomow yoeg ngak e manager romow ninge kol nigem.”

Ta’aboch riy ma be non fare ma manager ngak Rudy ni ngan pi’ reb e piano nib bi’ech. Rudy e ba gol ma ke n’ag fan roraed e n’en nike buch me yoeg ngak fare manager ni rayog ni ngan fal’eg rogon e gin nike kireb ko fare piano, machane me yoeg fare manager ni nge pi’ reb ni kab bi’ech.

Me fulweg Rudy ni ga’ar, “Ri dani gel e kireb ngay. Rangam fal’eg rogon mag fek iyib.”

Me ga’ar fare manager, “Ke kireb e palang riy, ma napan ni ra kireb e palang riy, ma daki ta’aborogon lingan. Ngan pi’ reb e piano ngom nib bi’ech.

Pi walageg, gathi gadaed gubin ni ta’abrogon ko re piano ney, ke kireb buch’uw, ke pil, nike kireb, ni kad thamiyed ni dabkin siloed nga rogon ko somm’on? Machane, napan ni nga yib nga Yesus Kristus ufithik e mich Ngak, kal’ingan’dad, nge fal’ig nge kolgad e pi michmicheg, tin ke kireb rodad—demtrug ko rogon—ra ngan golnagraed. Rogon ney, ni ma pinning gelingin Tathapegdad ulan e yafos rodad,nge dabi kemus golnagdad ni woed kafram machane ra fel’ig nagdad nib thabi fel’ ko kafram. Gu manang ni udakean Tathapeg, ni Yesus Kristus, gadaed gubin ma rayog ni ngad gol gaed, nge fal’ rogdaed, ma gadaed mangil boech, ni boed e piano ni kab bi’ech.

President Russell M. Nelson ke fil: “Napan ni ra yib e sikeng nib alamrin ngodaed, ma ke taw ko ngiyal’ ni ngad gel niged e mich rodaed ngak Got, man murwel nib gel, man pig pig ngak e gidii’. Ma arame ra gol nag gumircha’en daed. Ra pi’ e gapas ngodaed. Tiney e tawa’ath nib fal’el e dabi chuw, mud ko yam’ ma dabi mused.” ¹

Yesus e ga’ar:

“Mired ngog, ni gimed gubin e pi’in ke aw parowmed i fek e n’en nib tomal ni gimed be fek, mu gu’ pi’ e toffan ngomed.

“Mfeked e mat’ rog ngam teg nga pomed, mi gimed folwok rog, ya gub munguy ma gub sobut’aen’; mi gimed pir’eg e toffan.

“Ya re mat’ ni gura pi’ ngomed e bmom, ma tomalngin e ren’en ni gu ra tay nga pomed e bba’ud” (Matthew 11:28–30).

Ra ngan gol nigey ni yibe yib Ngak, ma ba tu’uf ni ngeyag e mich ngak Yesus Kristus. “Mich ngak Yesus Kristus e ngarin pagan’ Ngak—pagan’uy ko gelngin … nge tu’ufeg. Mu’un ni ngan mich u wun’uy ko machib Rok. Be yoeg ni demtrug ni darin nang fan gubin ban’en ma nge mich u wun’uy, Ir e manang. Bachan ni manang gubin e mith, nge gafgow, nge mo’owaer rodaed, ma manang rogon ni nge ayuweg daed ngad gel gaed ko tin momaw’ ban’en.” ²

Napan ni gadaed ra yib Ngak, “rayog ni ngad sug gaed ko falfalen’, gapas, ayuw. Gubin ban’en nib [momaw’ man sikeng] ko yafos e rayog ni ngan fal’eg u dakean fare Bayul rok Yesus Kristus.” ³ Ke ga’ar ngodaed, “Musap ngog ni gubin ngiyal; dabi marwaer u wun’uy, dab mu rus” (Doctrine and Covenants 6:36).

Lan fare Babyor ku Mormon napan Kari gel e kirbaen’ Alma nge gidii’ rok ko gafgow nike aw nga pulwon raed, me wenig e gidii’ e gapas. Dani chuweg Somoel e gafgow roraed, machane ke micheg ngoraed ni ga’ar:

“Ma kubay gu ba’udeg e pi muruwel ni yibe tay nga dakean poemed, nri dab kum thamiyed u dakean keru’med, ni ku mus ko ngiyal’ ni gimed bay u kalbus; ma biney e nggu rin’ ni nge yog ni ngam manged mich rog u tomuren e ngiyal’ ney, ma nge yog ni ngam nanged nib dugil ni Gag, fare Somoel ni Got, e guma ayuweg e gidii’ rog u fithik’ e pi gafgow roraed.

”Ere chiney e yibi buch ni fapi muruwel ni kan piiʼ ngakʼ Alma nge pi walagen e ni baʼudeg ngoraed; arragon, fare Somoel e piiʼ gelingraed ni nge moem e pi muruwel roraed ngoraed, mar fol gaed u fithikʼ e falfalaenʼ nge gumʼaenʼ ko gubin e pinʼen ni baʼadag fare Somoel” (Mosiah 24:14–15).

Mornga’agen fare Tathapeg nima gol nigey me ba’ud nga e tomal, e ga’ar Elder Tad R. Callister:

“Reb e tawa’ath ko fare Bayul e rayog ni ngad thapeged a aywu rok e Tathapeg. Isaiah nike non yo’or mornga’agen e gol rok Somoel, nge gapas. Ke micheg ni Tathapeg e ‘gelngin e pi’in nike kirbaen’, ayuw ko yiko’, nge toglul’ ko gowal’ (Isaiah 25:4). Pi’in nike kirbaen’, ke yoeg Isaiah ni ba’ gelngin fare Tathapeg ni nge “gapaseg e pi’in nike kirbaen’ (Isaiah 61:2), me ‘chuweg e lu’ u owchey’ (Isaiah 25:8; kumguy ko Revelation 7:17); ‘gel nag e ya’el e cha’an nib sobutaen’’ (Isaiah 57:15); me ‘gol nag e pi’in nike kirbaen’’ (Isaiah 61:1; kumguy ko Luke 4:18; Psalm 147:3). Rib gel gelngin ni rayog ni nge thilyeg e fal’ ya’an ko owaat, falfalen’ ko kirbaen’, mad ni falfalen’ ko tomal’ (Isaiah 61:3).

“Oh, bay e athap ko tiney e n’en nikan micheg! … Ya’el rok e ma gol nigey; ma ngongliy rogon; ma pi’ e gapas; ma pi’ e athap nga gumircha’ey. Bay gelngin ni nge thilyeg gubin ban’en ni rib kireb ni dariy rogon u lane yafos nge mang ban’en nib fal’el’. Bay gelngin ninge thilyeg e awaat nge fal’ ya’an nib manemus.” ⁴

Gube micheg nag ni Yesus Kristus e Tathapeg rodaed, Tabiyul rodaed, nge Masta nima Gol, ba fagar nib yul’yul’. Fa’anra gadaed ra cheal Ngak, ma ra gol nag daed nge ayuweg daed. Gube micheg ni iraray e Galasia Rok ma be fal’eg rogon Ir ni nge sul biyay ko re fayleng ney ni nge mang pilung nib gel. U dakean fithngan Yesus Kristus, amen.