Mu thap ni Gab Thil

Pi walageg, rigub falfalen’ ni gubay romed!

Mu tafney nag ni gabe yaen nga kantin ni ngam chuw’iy ban’en. Fa’an ni be pii’ bo’or e salpiy nifan ko ban’en, bee’ ra pi ngak bochi salipy.

Benjamin ni Pilung e fil ngak e gidii’ rok u Mariken ni kab kakrom mornga’agen e tawa’ath ni gadaed be thapeg rok e Tathapeg rodaed, ni Yesus Kristus. Ke sunmiy e tharmiy, fare fayleng, nge gubin ban’en ni gadaed be falfalen’ ngay. ¹ Dakean e Bayul Rok, ma ke fal’eg rogon e kanawo’ ngodaed ni ngad cheweg e denen nge yam’. ² Napan ni gadaed ra dag Ngak ni gadaed ba falfalen’ ni yibe fol ko pi motochiyel Rok, me fal’eg wa’athan daed nib tumgin, ma gadaed paer ni dabyog ni ngad fulweged taban Ngak.

Bo’or e n’en nibe pi’ ngodaed, rib yo’or ni dabyog ni ngad fulweged Ngak. Ere, mang e rayog ni ngad pi’ed Ngak, nike feek e denen rodaed nga dakean? Rayog ni ngad pi’ed Ngak e rogoy ni ngan thil. Rayog ni ngad pi’ed e n’en nike awrodaed Ngak. Rayog ni tafney ninge thil, pangiy ninge thil, fa nge thil e gin ni gadaed be sar ngay. Bachaen ni ke chew’iy ngodad, Somoel be fith ngodad ni ngad thilyeged e gum’ircha’dad. Thilyeg ney ni ba’adag dabi ayuwegen ma ayuwedad. Machane ba thil ko cha’an nibe chuway’ ni rayog ni nge feek e tin nike aw ko salpiy rok, Somoel e kemus nike yoeg ngodaed ni ngad cha’ariyed e n’en nike aw.

Tomuren ni kar runga’ag e thin nike yoeg Benjamin ni Pilung, me tolul e gidii’ rok, ni yaed be yoeg nike thil gumircha’en raed, “bachan fare Kan ni Thothup rokʼ Somoel ni Gubin ma ra yog rokʼ, niʼir e ke gagyeg nagmaed kug thil gaed, … ni ke chuweg romaed e athap ko ngongol ni kireb, ma ke adag laniyaenʼ maed ni nggu ululiyed i rinʼ e tin nib felʼ banʼen.” ³ Fapi chep nib thothup e dar yog ni rib tumgin ni kar ma’ang’ang gaed; machane, ke thil rogon e tafney roared ke yag ni ngar mithmith gaed. Gumircha’en raed nike thil e ke chuweg e tafney ni kireb roared ma kar athamgil gaed ni ngar boeded Yesus Kristus.

President Henry B. Eyring e ke fil ni ga’ar: ’Rogoy ni ngari thil ni yibe gay e mich, e fithik e athamgil nge boech e amith. Ma arame Somoel e ir e rayog ni nge pi’ e … ma’ang’ang ninge bi’ech nigey me thilyeg nigey.” ⁴ Murwel rodaed nge peth ko tirok e Tathapeg e rayog ni nge thilyeg daed, ma gadaed mang e gidii’ nib thil.

Napan ni gub bitir, ma tafney nag ya’ag ni gube yaen nga lang, ni gube sar ko n’en ni gube athapeg ni yafos nib manemus. Ra ngiyal’ ni ku rrin’ ban’en fa ku goeg ban’en nib kireb, mug thamiy rog ni gube sirgig nga but ko fare kanawo’, mugu sul biyay ko gin ni ku tabab riy. Boed fare gosgos ko bitir nikan noeg e Chutes nge Ladders ngay ni ku aw ko fachi kahol nima sirgig nigem nga but u lang ngam taw ko somm’on ko fare gosgos! Ribe mulan’uy riy! Machane napan ni gu tabab i nang fan fare machib rok Kristus ⁵ ngay nge rogon ni nggu rrin’ u lane yafos rog, mug pir’eg e athap.

Ke pi’ Yesus Kristus ngodaed e kanawo’ ni ngan thil. Ke pining daed ni ngad athamgiliy e mich rodaed Ngak, nibe ayuweg daed ni ngad kalngan’ gaed—“nib mich nge kalngaenʼ ni be thilyeg gumirchaʼaraed.“ ⁶ Napan ni ngad kalngan’dad nge chel gum’ircha’dad ngak Ir, ngad thapeged e ba’adag dad nib gel ni ngad mel’ig nge koled pi gam’ing nib thothup. Ngad athamgil madako’ tomuren napan ngad fasgad ko machib ney ufithik e yafos rodad nge pinning fare Somoel ni nge thil dad. Athamgil nge mada’ ko tomur e be yoeg ni ngan thil nge mada’ ko tomur. Chiney e ku nang fan ni gathi gube tabab ko somm’on ni ku mul, machane gubin ngiyal’ ni gube gay rogon, ma gube yul’yul’eg rogog ni gube thil.

Bay e thin ko babyor rok e Bpin ni Rugod nibe ga’ar, “Gub falfalen’ ko tawa’ath ko kalangan’uy ma gube gay rogon ni nggu mangil nigeg ni gubin e rran.” ⁷ Gube meybil ni gadaed ra falfalen’ ko biney e tawa’ath ni rib ma’ang’ang ma ri gadaed be gay rogon ni ngad thil gaed. Boech e ngiyal’ ma tin nib thil nib tu’uf ni ngad thilyeg ned e ba l’ag ko denen ni rib gel e tomal riy. Machane baga’, ni gadaed be athamgil ni ngad boeded Yesus Kristus. Pin’en ni gadaed be rrin’ ni gubin e rran e ra ayuweg daed fa ra kireb nag rogon daed. Ba achig machane ba gel, thil ni dabi kireb e ra ayuweg daed ni ngad mon’og gaed. Dabi mul an’um. Ra ngan thil ma ban’en ni rib n’uw napan. Gub falfalen’ fithik e momaw’ ni gadaed be gay rogon ni ngad thil gaed, ma dar tay Somoel e gurgur ngodaed.

U dakean Yesus Kristus, ma kan pi’ gelngin daed ni ngad thil gaed. Napan ni gadaed ra sap ngak u fithik e sobutan’, ma ra gel nag gelngin daed ni ngad thil gaed.

Fare gelngin e Bayul rok fare Tathapeg nima thilyeg ney e kab mu’un, fare Kan ni Thothup ngay ni ra ayuw me powi’iy daed napan ni gadaed be athamgil. Ku rayog ni nge ayuweg daed ni ngad nanged ko mang e ngad thilyeg ned. Ku rayog ni ngad pir’egned e ayuw nge athamgil u dakean e priesthood ni yibe yibliyey, meybil, fast, nge temple ni yibe yan ngay.

Boed ni, chonggin e tabinaew nib pagan’uy ngoraed, nge pi toygang’, nge pi tafagar e rayog ni ngar ayuw gaed napan ni gadaed be thil. Napan nib meruk e duw rog, ma walageg i Lee, nib ilal, e gomow ma un ngak e fagar romow ko fafal u l’ugun e gak’iy. Gamaed ba adag ni gomow ma un ko fagar romow ko fafal u fithik e re ke gak’iy nem. Reb e rran, me mul Lee u l’ugun fare gak’iy nge ta’er pa’. Ke momaw’ rok ni nge gararaw ko fare gak’iy nike m’ing pa’ ni go’ir. Machane dani ta’aborogon u l’ugun fare ke gak’iy ni demoy. Ere, boech gamaed e be thuruy u but ma bay e pi’in nibe gerngiy nglang ko bani pa’ nib mangil, ku dani gel e momaw’ riy, me sul biyay Lee ma l’ugun fare ke gak’iy. Kab kireb pa’, machane bay roamed ni gamaed be fafal napan nibe fal’ rogon iyan.

Baga’ ni guma leam nag e n’en nike buch rog u l’ugun e gak’iy ni woed rogon e mithmith rodaed u lan fare gospel rok Yesus Kristus. Fithik papangin e gospel, ma gadaed falfalen’ ko pi tawa’ath nima yib ko pi m’ag rodaed. Boech e ra mul ko m’ag roared ma ba tu’uf e ayuw roared ni ngar suled biyay ko gin nib mangil rogon ko fare gospel. Rayog nib momaw’ ngoraed ni ngar suled ni go’yaed roraed. Rayog ni ngad teled boech’uw u riy nge aram ngan ayuweg nge gol napan ni ki yaed ba falfalen’ ni gadaed ba fagar?

Fa’anra kam mad’ad ko ba mul, wenig mu pag bee’ nge ayuweg nem ngam sul ko m’ag rom nge tawa’ath nibay riy. Fare Somoel ra ayuwegnem ni ngam gol nag nge thil, nib liyeg nem e pi’in ni gab tu’uf roraed.

Boech e ngiyal’ guma mad’eg e fagar ni daworug guy raed, nike yan bukun e duw. Boech e ngiyal’ ma yaed ma ga’ar, “Daworum thil boech!“ Gubin ngiyal’ ni guma rung’ag e binem, me peth e ulum nga dakeanag, ya gube athapeg ni lan fare duw ma ku thil. Gube athapeg ni ku thil ko fowap! Gube athapeg ni ku gol boech, dagur pufthin nib gel, ma ke gel e tu’ufeg rog. Gube athapeg ni ku peay i ayuweg e pi’in nib tu’uf e ayuw rok, ma gube athapeg ni dani gurgur e tafney rog.

Gu ba adag i yaen u fithik ba burey u to’ben e tabinaew rog. Baga’, ni ma yib e malang nga lane sus rog napan ni gube yan ko kanawo’ riy. Baga’, ni guma tal nggu dengdeng e sus rog nge mul. Machane rib n’uw napan ni gube digey nge amith nag eg um’on ni ku tal ni nggu chuweg.

Napan ni gadaed be milekag ko kanawo’ ko m’ag, ma boech ngiyal’ me aw e malang nga lane sus rodaed ni woed e pangiy ni dani mangil, nge denen, fa tafney ni dani mangil. Pangin ni gadaed ra dengdeng nge chuw u lane yafos rodaed, e gelngin ni gadaed ra falfalen’ ko kanawo’ rodaed.

Ba murwel ni ngan paer ni dabi thil. Dabyog ni nggu tafney nigeg ni kemus ni nggu tal ni bachane nggu fulweg e sus rog nga eg ni bachan fachi wayang ni ku luf. Dabug ni nge buch biyay e binem ni woed ni dabun e salboy nge lan taffen.

Gube micheg ni bachan e Yesus Kristus, ma rayog ni ngad thil gaed. Rayog ni ngad fal’eged rogon pangin daed, nge tafney rodaed, ma gadaed fal’eg rogdaed ni ngad boeded Ir. Ma ayuw Rok ni bay, ma rayog ni nge paer fare thil. U dakean fithngan Yesus Kristus, amen.