Ma Bay e Ggan

Bachan nike thil woʼen e wub ko sukuki ni bachan e biney e mʼar nike yib, gube milekag i yib nga tabinaew, min thilyeg e yar ko milekag rog, ere gu par e rofen nem ko Madnom. U thilin pi flight mrayog ni kug un ko misa, mug rayog nggu non ngorad. Tomuren fare moʼolung, me yib reb e deacon ngog me fitheg ko gu manang President Nelson ma ki fith ko bay biʼid ni kug rurug paʼ. Mug fulweg nug gaʼar gu manang e chaʼnir, ma ku rurug paʼ, ma bachan e gag chongin e Presiding Bisofric guma madaʼnag nge fapi counselors rok ni in yay ulan reb e wik.

Me par fare deacon nga dakean e chia, me yonʼ paʼ ngalang, me tolul, “Irraray e rran ni thʼabi felʼ u lane yafos rog!” Brothers nge sisters, dagur tining paʼag ngalang ni gube tolul, machane ri gub falfalaenʼ ngay nibay e profet rodaed nge tin ni yibe powiʼiydaed riy nibe yib rok fapi profet, yiʼiy, nge thogthog, nib gaʼ ko ngiyalʼ ney nibe gel e gafgow.

Ko sommʼon riy, ma pii’ Somoel pi gidiiʼen lowaen’ ni ngan ayuweg e gidii’ Rok fal’eg e yafos nge ya’el rorad ko pi mogoth’goth’ ni ma nang ra yib nib bang ko yafos nga dakaen e fayleng. Pi ubchiyaʼ ney mrayog tirom banʼen fa woed e tin nima buch u fayleng, machane Somoel ran powiʼiydaed min matangiydad woed rogon nra motoyil Ngak. Kanawoʼen e biney e bay ulan fare ke babyor ko Genesis, ni morngaʼagen Josef nu Egypt ni pilyeg fan e likʼay rok Faroa.

“Me ga’ar Josef ngak Farao, … ke dag Got ngom e n’en ni bay rin’. …

“Medlip e duw ni bayi par e nam nu Egypt ni polo’ nib pire’ e ggan riy:

“Me yib medlip e duw ni uyongol e bay riy: ma urngin fapi duw ni bfel’ ni immoy e bay ni pag talin u Egypt.” ¹

Motoyil Farao ngak Joseph, me rrinʼ fa pin’en ni dag Got ngak lan fare likʼay, ma tabab i falʼeg rogon ko tin ni yibi buch. Bay u lane thin nib thothup nikan yoloey:

“Ma fa medlip i duw ni ba’aram ni bo’or gan yu Egypt e pire’ e ggan ni i yib ko woldug.

“Me kunuy Josef urngin e ggan nge cha’riy u lan e pi binaw i yan. …

“Bo’or e grain ni cha’riy nga naun ni yan i par ni gowa yan’ u maday, … me tal ndaki tay urngin nga babyor; ya dabkiyag.” ²

Tomuren ke mu’ fare medlip i duw, ma arram nra “tabab fa medlip i duw ngay ni aram e ke yib e uyongol, ni bod rogon ni fa’ani yog Josef ni bay taw ngay: miki yib e uyongol ko tin kabay e nam; machane ga’ngin yu Egypt ni bay e ggan riy.” ³

Dabaʼ, kan tawaʼath ko pi profet ni yaed manang nib tʼuf ni ngad falʼeg rogdad ko tin ubchiyaʼ ban’en “ni bay i yib” ⁴ nge ma guy e tin nrayag rodaed nge tin ndabiyag ni ngad fol gad ko pi fonow rorad.

Bachan e COVID-19, nge yikoʼ nibe buchʼbuchʼ, biney e dariy falʼngin ko gidiiʼ, ni gubin mit e gidiiʼ, chagil nga taʼabiyang, nge taliw nib thilʼthil u dakan e nam. Murwel nike lich nag nge pulwon e murwel nike yaen nga butʼ bachan ni kan talʼeg e murwel nge matawon ni ngan muruwel e kan thiliyeg ko am nge pi docta.

Ngak gubin e gidiiʼ nike buch e biney rok, gamaed manangfan e tin nibe buchʼbuchʼ rom, ma gamaed manang ni bay boech e rran nga mʼon nib mangil. Kan tawaʼath nigem ko fapi bisof nge branch president ni be gay rogon pi chongin e galasia ni ran ayuwegnem ko tin nu fayleng nib t’uf ma ni ba’ rad pi talin e llowan’ ni ran ayuwegem ni ngam toey e yafos rom bayay nge tay em ko kanawo’ e rayog rom fini mu ngongoliy e ren’ey.

Chiney, ma bay e m’ar nib ga ni kan kireb nag e salipiy ko bo’or e nam nge ke ma’agirag bo’or e yafos e gidii’, ya rogon Somoel e gathi ni ngan dariy fan nag pi magowan ney nib riyul’ min fith rad ni ngar cha’ariy bo’or e ggan nge salipy ni fan e rran nga m’on. Machane, re daniy fan ni ngan pag talin kenggin e falʼag rogoy—ya kemus be yup fan ni ngan ngongoliy ren’ey ufithik e “gonop nge yaram,” ⁵ ni ngayag e thin rodad, woed ni yoeg Josef nu Egypt, “ma bay e ggan.” ⁶

Somoel e dabi yoeg ni ngaed rrinʼed e tin ndabiyag rogdad, machane be tagaʼ ngodaed ni ngaed rrinʼed e tin nrayag rodaed, ko ngiyalʼ nrayag. Pug oren ngodaed President Nelson ko fa bin baʼaray e general conference nike thumur, “Somoel e baʼadag e athamgil.” ⁷

Tiyugang’ ko Galasia e bagaʼ ni yaed ma piiʼ e athamgil ngak Gidiiʼen Got Rok ko tin Tomur e Rran “ni ngan falʼag rogoney ni bay e ggan nge raen nge ku boech e salpiy nikan chaʼariy.” ⁸ Ma ki yibe gay rogon, ni ngan par “ni yibe gonop” ma “dabin rrinʼ nib alamrin nge pag rogon” ⁹ ko tin ni yibe gay rogon ni ngan kunuy u lane tabinaew nge salpiy ni ngan chaʼariy. Rebo babyor kan noeg Personal Finances for Self-Reliance, kan yoloey u 2017 e bay ko fare website ko fare Galasia u 36 e thin riy’, ma tabab ko mulwol rok Bin Som’on e Presidency, ni ga’ar:

“Somoel ke ga’ar nag, ‘Fan rog e ngan fal’eg rogoy pi gidii’ rog’ [Doctrine and Covenants 104:15]. Biney e yiʼiy e ba micheg Somoel nra piiʼ e ayuw ko fapi tawaʼath ko tin nib tuʼuf me bing fare mab ko woʼen e rayog rom. …

“… Ngan nang min fol ko pi kengin riy’ ra pag ni ngam athapeg pi tawath nu fayleng kan micheg Somoel ngom.

”Gamad be pinningmed ni ngam fil rogon min ngongoliy pi kengin ney min fil nagrad ngak pi chongin e tabinaw romed. Napan ngam rrinʼ, ma tawath nag e yafos rom … [ni bachane] i gur e bitir ni fak e Chitamangindaed nibay u Tharmiy. Gab tʼuf Rok ma dariy biʼid ni ra pagtilinem. Ma nangem ma bay nike falʼag rogon ni nge kiʼyeg fapi tawaʼath ngom ko tin nib thothup nge tin nib tʼuf nra ayuwegem.” ¹⁰

Biney e babyoren e ayuw ab muʼun e guruy ngay ko rogon min ayuweg e salpiy, matangiy tabinaw rom ko gafgow, mang ngam rin fini dariy e salipy, cha’ariy e salipy ni fan ko tin nga m’on ma ba’ ko website e Galasia nifan ngak urngin e gidiiʼ fa udakan pi tiyugangʼ rom ko Galasia.

Napan nran tafney nag rogon fapi yalen ko falʼeg rogoy, mrayag ni ngaed sap gaed ngak Josef nu Egypt ko tin ni ngan thogʼthogʼ nag ngodaed. Tin ni yaed manang nra buch e dabi gaman ni nge ayuwegraed ko ngayalʼ ko re medlipi duw nem ko “uyongol” ni faʼanra dabra athamgilgaed ngar kunuyed e ggan roraed. Ya sun ni ngar ked urngin e ggan nrayog i togbey gidii’en Faraoh, kan thi’eg e ggan, ni fan ko chirofen nem, nge fan chirofen nga m’on. Dani gaman ni fa’anra gadaed manang ko mang e bayi buch nga m’on. Btu’uf ni ngar ngongoliy, ma bachan muruwel rorad , “ma bay e ggan.” ¹¹

Biney e be de’eriy ba duwer nib ga’fan: “Arame chiney e, mang?” Bin somm’on nib tu’uf ni ngan nang fan e gubin banʼen mab thothup ngak Somoel, “ma gathi gubin ngiyal’” ya ki pii’ ngodaed e “motochiyel nifan ko tin nu fayleng banan.” ¹² Ere, gubin banan ma yip ngak Yesus Kristus, ni irraram fare dayif ni ngaed domow gaed ngak dakean, ni be un ngay tin nu fayleng pin’en rodad.

Fal’ag rogoy ko tin nu fayleng ni rayog rom e be yup fan ngam “michuwun’uy ko fare murnguy, fa fare gelngin, Yesus Kristus nge gelngindaed, ma rayog ni ngaed thapegned fapi n’en nib thothup nge tin nu fayleng nib t’uf ko yafos rodaed nge tabinaew rodaed.” ¹³

Yu bang e dayif nib thothup ko tin nu fayleng ma un ngay ngongoliy e “gonop nge yaram,” ¹⁴ ni ngan cha’ariy e ggan nge salpiy buchuw ngo buchuw, nge l’agruw athapeg e“tin baʼachig mab moem” banʼen, ¹⁵ ni’ir e pow ko mich u waen’dad ni Somoel e ra ga’ nag e muruwel nib chig mab yul’yul’ rodad.

Napan nran fal’ag tigil’ fare dayif nib thothup, ma aram e ngiyal’ nrayag ni ngaed rrin’ed l’agruw i banan nrayag ni nge ayuwegney nge fal’ag rogoney e chiney, yarmiy e salpiy nge ggan ni ngan cha’ariy u tabinaew.

Bang nib ga’ fan ko yarimy e salipy ma un ko ni ngan pii’ t’ab guruy u ragag guruy nge fast offering, churiy nge palog nag urngin e malfith, fal’eg min fol nag e budget, nge thapeg e salpiy ko pi rran nga m’on.

Yalen nib ga’fan ni ngan fal’eg rogoy e na’un romew e ngan thapeg e ggan, thapeg e raen, nge yug pin’en nib t’uf ko tabinaw romew, bachan ”bin th’abi fel e kahol” ¹⁶ e fare na’un rom, ni’ir ”rib chugur rom ko chirofen e gafgow.” ¹⁷

Fini ngad athapeged kengin thothup min gay e thog’thog’ rok Somoel, ran powi’iydad ni ngad nang e leam Rok rodad, ni yigo dad nge tabinaw, nge u rogon ni ngan ngongoliy pi kengin e rayog rom. Ma bin th’abi ga’fan ni ngan rrin’ e ngan tababnag.

Elder Bednar ke fil e ren’ey napan ni ga’ar, “Fini mu ngongoliy e ban’en mu ngongoliy e mich.”16 Mich nib riyul’ e kan tay nga dakaen nge ulangin Somoel ni Yesus Kristus ma gubin ma ra fekey ni ngan ngongoliy ban’en.” ¹⁷

Pi walageg, lan e fayleng nibe thil i yaen, thingarda fal’eg rogoy ko tin ni yibi buch ndan nang. Riyul pi rran nib fel’ ra yib uran, machane ra athamgil pi burey nge lowaey ko yafos. Fini gadad ma gay rogon ni ngad fal’eg rogoy e yafos rodad, ra gel nagdad pi sik’eng e yafos nib gel bugwan riy’, ni ba’ gapas lan gum’irchadad, ma woed Josef nu Egypt, mrayog ngodad, dem turug e gin ni bay rodad, “Ma Bay e Ggan.” ¹⁸ U dakean fithngan Yesus Kristus, amen.