Pir’eg e Falfalaen’ ngak Kristus

En Somoel dani fith e Aaronic Priesthood gidii’ ni fel’ yangren ningar rrin’ed urngin e ban’en, machane Dani fith.

In e duw kafram, me buch ban’en ko tabinaew romaed ni ban’en ni be yib rok’ bo’or e tabinaew u lan re fayleng ney. Bin ni bitir i fakmow, Tanner Christian Lund, e yib m’ar ko cancer ngak. Ke baʼ yaʼel nrib felʼ, ni woed rogon bukun e ppin nge pagal ni mureb. Ke falfalanʼ nib balyang machane thothup ko yaʼel. Moʼoniyanʼ nge angel, balyang nge bugol. Napan ni kab bitir kug ginʼgow ni kab balyang, ya kug lemnigew ni fini ilal ma sana ra mang fare profet fa marowʼrowʼ. Arragon, thingar ninge tayfan e fayleng.

Me yibi m’ar ni rib alamrin. Lan fapi dalip e duw nga mʼon, pi docta kar muruwliyed nib madangʼdang ngay, nibe un ko lʼagruw e transplant ko yil, ma napan riyʼ ke mʼar ko pneumonia, me paer u ospital nib tʼuf e machin ni ngan pogofay nag ko 10 weeks. Ke sul ngomad ko ngiyalʼ nib ngoch, nib tawath riy; me sul bayay e cancer rok.

Deʼ nʼuw napan uʼmon ke yimʼ, mʼar rok Tanner ke yaen nga yil rok, me magay e amith rok ni dem turug e falay. Kemus ko og u dakean e bet rok nga but’ ma daryag rok. Ko re Madnom ni kakadbul ney, nina’ rok, Kalleen, e yib ngalan fare singgil rokʼ ni nge guy u m’on ni nge yaen nga galasia. Ke gin ngay ni ke chuw a maed ko missa rok’ ma ke par nga tabab mirichlen e bet rok ni be gay rogon ni nge labinag e kenggin rok. Me yibi par Kalleen nga charen. “Tanner,” me ga’ar, “gabe riyul’ nrayag rom e yaen nga galasia? Sana dam maen min tofʼan dabaʼ.”

Ke par nibe sap nga but’. I’ir reb e deacon. Bay e ulung rok. Ma bay e murwel rok.

“Susun ni gura pii’ fare sacrament e daba’.”

”Rayog yug beeʼ ni nge rinʼ ni fan rom.”

Me gaʼar Tanner, ”Arragon, machane … gube sap ko rogon ni guy e gidiiʼ ngog fini gu piiʼ fare sacrament. Gube lemnag sana kube ayuwegraed.”

Kalleen ayuweg ni nge labinag fare kenggin rok min m’ag fare tay rok, mi yow yaen nga galasia. Nʼen nib gaʼ fan e ra buch.

Ku chuw ko re kakad’bul nem ni bachan e mo’olung rog ma ginʼ owcheg ngay nike par Tanner ko gin nima par e deacon riy. Me kadʼkadʼ Kalleen ngog fan nibay u rom nge n’en nike yoeg: “be ayuwegrad”e gidii’.

Ere, kug sap fini fapi deacon kar raoed nga tebel ko sacrament. Ke koel poen ni reb e deacon napan pi priest kar piiʼed pi tray ngorad. Tanner ke yaen nga tafen kan duwgliy ir me koel e chia ni nge sakʼiy nib gel fini ke piiʼ fare sacrament.

Ma woed ni gubin e gidii’ e be sap ngak, ni yaed manang gelngin e amith nibe tay fini muruwel nag. Tanner ke non ni dariy thin riyʼ napan nib sobutaenʼ rogon ke yaen nga chiya ngo chiya—lologen nib map ko raen—nibe muruwliy ni fan ko SOmoel nrogon nibe muruwliy fapi deacon ngay. Dowef rok ni faram e gel e chiney ke mʼing me waer, me ke pag ni nge thamiy re amith riyʼ ni nge pigʼpigʼ nag e flowa nge raen ko Bayul rok Somoel ngomad.

Nggu guyed nrogon ni ke lemnag e muruwel rok ko deacon ke thiliyeg rogon ni kug lemniged—marungaʼagen fare sacrament, marungaʼagen Tathapegdad, nge marungaʼagen pi deacon, teacher, nge priest.

Gu lemnag ko rogon e maʼangʼangʼ ni ke pag ni nge motoyil ko fare chi lam ni ke pinnin gir ni nge pigʼpigʼ, nge marungaʼagen fare gelingin nge rayog ko pi chaʼan nib yangren fini kar motoyil ngak fare pinning ko profet ni ngan un ko pi batalion nge muruwliy e tin nu tharimy.

Gubin ngiyal’ nra fek e deacon fare tray ko sacrament, ma yib uran ngodaed mornga’agen fare bin Tomur e Abich, Gethsemane, Calvary, nge gin nin keyʼag riy. Napan ni ga’ar fare Tathapeg ngak fapi Gachalpen, “Um rin’ed e ren’ey ngi i pugurag ngomed,” ¹ Ma woed ni kube non ni kafan ngodaed e chiney. Ke weliy fan fare maʼangʼang nra piiʼ Ir ni pi deacon, teacher, nge priest nga mʼon e ra piiʼ e flowa nge raen Rok me pinning e bitir Rok ni ngar athapeg re bayul Rok.

Gubin gam’ingin ko sacrament e fan re taw’ath ney. Gadaed be ta’er fare flowa ni ta’ar—nge fapi flowa nibe teta’ar fapi priest u powchendaed, arame, chiney ni yibe teta’ar. Ma kagdaed ma tayfan fapi rran nikan yibliy, ni ku woed somm’on nge chiney, napan nra yibliy fapi priest ere sacrament ney nibe yaen ni mada’ nga tharmiy, nibe be’ech nag fapi m’ag rodaed nibe puthuydaed ko fare gelngin e thapeg rok Kristus. Aram mrayog ni ngad lemniged ko mang e be yip fan napani piiʼ e deacon fare flowa nge rraen nodad, nib sakʼiy u tafen nra sakʼiy Yesus fʼanre baʼ, nibe chibiy ngalang e amith nge tomal rodad.

Machane, gathi gubin ngiyal’ nra yib e m’ar ngak e pumo’on fa ppin e arram e ngiyal’ nra pir’eg e falfalaen’ nga fan nibe pig’pig’ ngak fare Tathapeg.

Elder David A. Bednar ke fonow ni ngad manged boed, e missionary, ngariy ngongoliy fa pinʼen nibe ngongoliy nagrad, ma ere, “bayilʼ nga dakean bayilʼ, nib yalen nga dakean yalen, … [gadad] ra manged fapi missionary … ni ba’adag Somoel ngodad.” ²

Faʼan gadad baʼadag ni ngad “manged boed Yesus,” ³ thingarda ngongoliy fa pinʼen nibe ngongliy Yesus, nge nrogon buchuw e thin, Somoel ma weliy fan fa pinʼen nibe rinʼ: Me gaʼar, “Ya musap, ireray e murwel nge flaʼab rog—ngu fekey e yafos ni manemus nge flaʼab nu tharimy ngak e gidiiʼ.” ⁴

Ko somm’on riy ma murwel rok fare Tathapeg e be pig’pig’ nifan Ngak e Chitamangin ninge ayuweg pi Fak.

Bin felʼ rogon ngan piriʼeg e falfalanʼ ngak Kristus e ngan un Ir ni ngan ayuweg e gidiiʼ.

Tin riyulʼ ney nib moem e fa nʼen ni key sunmiy pi program ko Bitir nge Felʼ Yangren.

Gubin e gosgos ko Bitir nge Fal’ Yangren nge machib ko Bitir nge Falʼ Yangren e ngan pii’ ayuw ngak e gidii’ ni ngar boded Yesus ni yaed be un Ngak ko fare muruwel ko thapeg nag nge madnom nag.

Bitir nge Felʼ Yangren e talin nra ayuweg urngin e bitir ko Primary ni nge gaʼ nag e mich rok Rayog ni ngar sap nga mʼon nge adag dakaen pi pow nge sengil u toʼoben fare kanawoʼ e mʼag, ni ra un ngay ko pi quorumn nge Young Women class, ni ra thamiy fare falfalanʼ nibe un ngay ko pigʼpigʼ e muruwel ko Kristus. Yaedra ngongliy fapi goal, tin nib baga’ nge tin nib achig, nrayag ni nge ayuwegraed nge thabʼthabel nag e tin ni yaed be rrin’ u lane yafos roraed ni ngayag ni ngar boded fare Tathapeg. Babyoren nge conference ko Strength of Youth, fare Friend, nge Gospel Living app ra ayuwegrad ni ngar piriʼeg e falfalanʼ ngak Kristus Yad ra athap ko pi tawath nibe un ko limited-use temple recommend nge thamiy fare yaʼel ko Elijah udakaen fare Kan Thothup napani muruwel ko temple nge chepin tabinaw. Ra powiʼiyrad pi patriarchal blessing rorad. Ma borran, ma yaedra yaen nga temple ningar endow nagrad ko gelingin, ni ngan pir’eg e falfalaen’ urom, mi yaed ta’arebgaed ngak e tabinaew roraed.

Dariy mus fare yoko ko e mʼar nib gaʼ chiney, fare tawaʼath nib program ko Bitir nge Felʼ Yangren e be monʼog rogon—ma be gaʼ fan riyʼ. Pi fal’ yangraed e dab ki yog ni ngar son gaed ni nge fal’ fare fayleng u m’on ni ngar bad ni ngar nanged fare Tathapeg roraed. Boech i melʼeg chiney tin ni dani melʼeg faʼanre kar nanged ni yad miniiʼ nib riyulʼ—nge miniiʼ Ir.

Ma ere, fare pinning rok fapi salthaw rok Got u training e ”Moy gimed gubin!”

Matam nge mitin, pi pagal ni fakmew e kari t’uf ni ngam ayuwegrad chiney woed ni kam piiʼed faram nib gelbugwan riyʼ napani marunga’agen e tin ni dakir tiyaen’ ngay. Matam nge mitin, fapi tiyugang’ ko priesthood nge Young Women, fa’anra be mo’owar e fal’yangren rom, Bitir nge Fal’yangren e rayag ni ngar fekey ngak fare Tathapeg, ma fare Tathapeg era pii’ e gapas ngoraed. ⁵

Fapi presidency ko klas nge ulung, mu sak’iydaed ngam rrin’ed e murwel romed nike pii’ Somoel.

Pi bishop, mu ayuweged fapi ulung ko president, nge fare ulung rom—nge fapi ward rom—ya yaedra thil ni manemus.

Ngomed e tin nibay ni mat’wonmed, gube micheg, ni gimed gubin e pagael nge ppin ni fak Got, ma bay e murwel rom nike pii’.

Napan mu athapeg e muruwel e galasia rom, nib mʼag u wunʼuy, u gumʼirchaʼey, mab gelbugwan riyʼ, mrayog ni ngam tʼufeged Got ne koel chilan pi mʼag nge micheg romed nge paʼaganʼ gad ngak priesthood Rok fini mu tawath nag e gidiiʼ, nibe tabab riyʼ nga lan pi tabinaw rom.

Gube meybil ni garam gay rogon, nra yib gelngim nib gel, ni gab be’ech ko ngiyal’ ney, ni ngam pig’pig’, mag ga’ nag e mich rom, mag kalngaen’um, mag gay rogon ni ngam mon’og ni gubin e rran, ni ngam gay rogon ni ngam thapeg fapi tawa’ath ko temple nge fare falfalaen’ ni manemus nima yib ko fare gospel rok Yesus Kristus. Gube meybil ni ngam fal’eg rogon ni ngam mang fare ta pig’pig’ nib yul’yul’, ni gur bee’ ni gab yul’yul’ ni gur e figirngin fa le’ngin, matam fa mitin, ya kan micheg ngom nrayag ni ngam mang reb gachalpen Yesus Kristus nib yul’yul’.

Mu ayuweged ngan fal’eg rogmed fare fayleng nifan ngak fare Tathapeg ni bayi sul ni gamaed be pining gubin e gidii’ ni ngar bad ngak Kristus ngar thapegned fare tawa’ath ko Bayul Rok. U dakean fithngan Yesus Kristus, amen.