Falfalen’ ko Tin ni Bay nga M’on u fithik e Mich
Tin nge m’on e rra falel’ ko pi’in nike fal’eg rogon ma kube fal’eg rogon ni nge mang talne murwel u lan pa’ Somoel.
Dabiyog ni nggu pagtalin e rran ney. Sisters, gub falfalen’ ni gubay romed. Fare in I pul nike thimur ma gimed bay ko tafney rog. Pag meruk e milyon gelngin ni gimed ba gel. Gathi kemus ni gimed ba yo’or machane gelngiy ni ya’el e bay rom ni ngan thilyeg e fayleng. Kugu yaliy rogon med ko ngiyal’ ney nike yo’or e m’ar.
Boech i gimed e kafin be sap nag ban’en nib tu’uf rok ara reb e murwel nib bi’ech. Bo’or e ke skul nag e bitir ma be guy e gidii’ u lane binaew. Boech e ke be yoeg ko missionary ninge yib nga tabinaew ni dabi n’uw e neap, ma boech e ke tay e tabinaew rok nike mang e missionary training center. Kam murwel gaed ko technology ni ngan non ko tabinaew nge fagar, ni ngan pigpig ngak e pi’in ni go’ raed roared, man bi’eg fare babyor ni Moy, Lakeg ni gimed boech e gidii’. Kam pir’eg ned boech e kanawo’ ni ngan tay e Madnom nib rran ib mangil. Kam ngongliyed e mask—ni bukun e milyon urngin!
U fithik e tu’ufeg u gumircha’eg, ma be yaen gumircha’eg ngak e bpin u dakean e fayleng nike yim’ bee’ roraed. Gamaed be un ngomed ko yoer. Ma gamed be meybil ni fan ngomed. Gamaed be meybil in fan ngak e pi’in nibe murwel ni dariy e toffan ni yibe ayuweg e gidii’ ni dabi m’ar.
Gimed e pi’in rugod e ri ka gimed ba falel’. Bo’or e togpluw u lane social media, ma oren i gimed e ke pir’eg e kanawo’ ninge ayuweg e gidii’ man dag e tamilang rok e Tathapeg.
Sisters, ri gimed gubin ni ri gimed ba cheag! Gube gin nga gelngim nge mich rom. Kam dag ni fithik e tin momaw’ ban’en, ma gimed be yan nga m’on u fithik e athamgil. Gimed ba tu’uf rog, ma nggog ngomed ni gimed ba tu’uf rok Somoel ma be guy e murwel ni gimed be rrin’. Kamagar gaed! Biyay, kam dag ni gimed e athap ko Isreal!
Kam rrin’ e n’en nike athapeg President Gordon B. Hinckley ngomed napan ni yoeg fare thin nikan noeg ngay e “Fare Tabinaew: Thin ni fan ko Fayleng“ nike gaman 25 e duw napan e September 1995 ko mo’olung ko general Relief Society. 1 Rib ga’fan nike mel’eg ni nge yoeg e biney e thin ngak e bpin u lane Galasia. Napan ni rrin’, me dag President Hincley nib tu’uf e bpin u lane tanam rok Somoel.
Chiney, e gu ba adag ni nggu nang ko mang e kam filed ko biney e duw. Kam chugur ngak Somoel, fa kam thamiy ni kam palog Rok? Ma pin’en nibe buch e bu’uw rogon nikam tafney nag e tin nga m’on ban’en?
Riyul’, nike weliy Somoel mornga’agen e rran rodaed nib sug ko kirbaen’. Ke yoeg ni lane rran rodaed ma “gumircha’en e gidii’ e [ra mo’waer]“ 2 ma pi’in nikan mel’eg e rayog ni ngan baen nag raed. 3 Ke ga’ar ngak fare profet Joseph Smith ni “gapas e [ran] chuweg u dakean e fayleng“ 4 ma gafgow e ra aw nga dakean gubin e gidii’. 5
Machane kiki pi’ Somoel rogon ni kura falel’ e ngiyal’ ney. Ke yoeg ngak fare Profet Joseph Smith ni “fare murwel … ko tiney e rran ni tomur, e reb ni rib ga’. … Rir riy e dabyog ni ngan weliy, ma fal’ngin e rib ga’fan ko gubin banʼen.“ 6
Chiney, ya’an e gathi re thin ni ngan noeg ko tiney e pul nike thimur! Urogon ni ngad dared u fithik e tin kirbaen’ ban’en nge tin falel’ e n’en ni kanoeg ni mornga’agen e rran rodaed? Ke yoeg Somoel ngodaed rogon, nib tamilang, ma dariy e tuntun riy: “Fa’anra kam fal’eg rogom ma dam rus.“ 7
Ban’en nikan dugliy ni rib falel’! Ba thin ni rayog ni nge thilyeg rogon ni gadaed be sap nga m’on. Kaffin gu rung’ag ba bpin nib gel e mich rok nike yoeg ni fare m’ar nike garer, nge peth ko thuru’ nike buch u Salt Lake City, e ke ayuweg nge nang ni dawori fal’eg rogon ko rogon nibe leam nag. Napan ni gu fith ko be weliy mornga’agen e gaan fa mich rok, me tingi’ me ga’ar, “Eah!“
Fa’anra fal’eg rogoy e baga’ fan ngodaed ni ngad fal’eged rogdaed ko ngiyal’ ney nge tin nga m’on u fithik e mich, ma urogon nib fal’ rogon ni ngad fal’eg rogon daed?
Bukun e duw, ni i yoeg e pi profet rok Somoel ngodae dni ngad cha’ariyed e gaan, ma gadaed cha’ariy e salpiy ni fan ko ngiyal’ nib tu’uf. N’en nibe buch e chiney e be pluw ko binem e thin nikan noeg. Gube yoeg ngomed ni ngam fal’eged rogmed. Machane kugu be leam nag e tafney rom nge ya’el rom.
Binem, ma bukun ban’en ni rayog ni ngad filed rok Capten Moroni. Ir nib tolang ko salthaw ko Nephite, ma ke guy e pi’in nib gel, nib yo’or, nib kireb e tafney roared. Ere, dalip e kanawo’ nike fal’eg Moroni rogon e gidii’ rok.
Bin somm’on, Ke ayuweg raed ni ngad fal’eg bang ni ngar pired riy ni dariy ban’en ni ra buch roraed—“gin ni fane upung” e ke pining ngay. 8 Bin l’agruw, e ke fal’eg rogon e “tafney ko gidii’ ni ngan yul’yul’ ngak Somoel.” 9 Ma bin dalip, e dani tal i fal’eg rogon e gidii rok—ni gidii’ nge ya’el roraed. 10 Ngad laeam niged dalip e pinn’ey.
Bin Somm’on: Fal’eg e Gin ni ra Upnguyem.
Lan gubin e yang u Nephite ma ke toey Moroni e buut, nge na’un, nge yoror nib liyeg. 11 Napan ni yib fapi Lamanite ngoraed, mar “ri balyangaenʼraed ni rib gel, ni bachan e gonop ko fapi Nephites ni kar falʼeged tagilʼ e gin ni ngar miith gaed ngay.” 12
Boed ni, pi wagagay nibe liyeg daed ma ba tu’uf ni ngad fal’eg ned bang ni gadaed ba fal’ rogon, ni gidii’ nge ya’el rodaed. Napan ni gara mang ko reb e taliw—gin nima paer fare Kan Nthothup riy—ma tabinaew rom e re mang e gin nibe ayuweg nem.
Boed, ni fapi stake ko Zion e “gin ni be ayuweg ney ko yiko’“ 13 ya pi’in nibe powi’iy raed e bay fapi kiy ko priesthood roared ma yaed be murwel ko mat’won e priesthood. Napan ni gara ulul ni ngam fol ko thin rok e pi’in nike pi’ Somoel mat’won raed ni nge powi’iyem, ma gara thamiy nib fal’ rogom.
Fare temple—e na’un rok Somoel—e gin’en ni gara thamiy ni dariy ban’en ni ra buch rom riy nib thil ko yu yang. Urom, gimed e bpin e kan endow nag med ko gelngin e priesthood u dakean e pi’ m’ag ko priesthood nib thothup ni kam ngongliy. 14 Urom, man m’ag e tabinaew ninge manemus. Mus ko biney e duw, nib mut’rug rogon nge ngiyal’ ni ngan yaen nga temple, ma endowment rom e e ke pi’ gelngin Got ngom napan ni kam tay fan e pi m’ag rom Ngak.
Moem rogon ni ngan noeg, ni gin ni ra ayuweg nem e demtrug e gin’en ni rayog ni ngam thamiy fare Kan ni Thothup me gagyeg nigem. 15 Napan ni ra paer fare Kan ni Thothup rom, ma rayog ni ngam fil e tin nib riyul’, mus ni be yo’or lunguy riy. Ma rayog ni ngam leam nag e pi duwer ni mornga’agen e gospel u bang ni ngam thapeg e yi’iy riy.
Gube piningem, o pi sisters rog, ni ngam fal’eg ned e tabinaew ni gin ni rayog ni nge ayuweg ney. Mugu be yoeg ngom biyay ni ngam gel nag e gonop rom ni mornga’agen gelngin e priesthood nge pi m’ag nge tawa’ath u temple. Gin ni ngi upnguyem ni rayog ni ngam mang ngay e rayog nge ayuweg nem ngam falfalen’ ko tin ni bay nga m’on u fithik e mich.
Bin La’agruw: Fal’eg Rogon e Tafney Rom ni Ngam Yul’yul’ Ngak Got.
Kug rrin’ed reb e murwel ni ngan ayuweg ayuweg e Salt Lake Temple.
Boech e ma marwaer ko mongfan ni ngarin rrin’ e binem. Machane, Salt Lake Valley e ke yib e duru’ ngay ni 5 nge mada’ ko 7 yay u lane biney e duw, ke rurug e temle nib gel ke mul fare trumpet ko fare ya’an Moroni nib angel! 16
Gelngin e ya’el rodaed ngari gel, e woed fare def ko Salt Lake Temple e ngari paer nib gel ko yoko’. Ma arame, napan ni ra rurug daed e yiko’ u lane yafos rodaed, ma rayog ni ngad pired ni dabin “mithmith gaed“ ni bachane e mich rodaed. 17
Ke fil Somoel ngodaed rogon ni ngad gel niged e mich rodaed ni ngad “filed, nge bi’eg nge ufithik e mich.” 18 Gadaed be gel nag e mich rodaed ngak Yesus Kristus napan ni gadaed be athamgil ni ngad fol gaed ko pi motochiyel Rok man “tafneyed gadaed rok.“ 19 Ere, mich rodaed e ma gel ni gubin ngiyal’ ni gadaed be gel nag e mich rodaed Ngak. Iraray e mich ni yibe fil rogon.
Boed ni, gubin ngiyal’ ni bay e mich rodaed ni ngad fol gaed ko motochiyel rok Got—demtrug napan ni bay e thin nibe kireb nag daed—fa ngiyal’ ni gadaed be siyeg ban’en ni dani mangil fa kachido ni ra kireb nag fare m’ag, ma gadaed be gel nag e mich rodaed, ma ra gel nag e mich rodaed.
Ere, boech ban’en ni ra gel nag e mich e ngarin cheal ko fare Babyor ku Mormon. Dariy reb e babyor nibe micheg mornga’agen Yesus Kristus ni gel rogon nib tamilang. Profet riy, nike powi’iy raed Somoel, e kar guyed e rran rodaed ma kar mel’eged e pi machib nge tin riyul’ ni ra ayuweg daed. Fare Babyor ku Mormon e kanawo’ ni fan e tin tomur e rran rodaed.
Arrogon, n’en ni rra ayuweg daed e napan ni gadaed ra pi’ daed ngak e Chitamangdaed nu Tharmiy nge Yesus Kristus! Yafos ni demoy Got riy e ba sug ko murus. Yafos ni bay Got riy e ba sug ko gapas. Biney e bachane pi tawa’ath nima yib ko pi’in nib yul’yul’. Yi’iy ni gabe thapeg ni fan ngom e tawa’ath nima yib ngak e pi’in nib yul’yul’.
Ke micheg Somoel ni fa’anra gadaed ra fith, ma yira pi’ ngodaed e “yi’iy nga dakean reb e yi’iy.“ 20 Gube micheg ni napan ni gara gel nigem ni ngam thapeg e yi’iy, ma ra tawa’ath nigem Somoel ko kanawo’ ni fan ko yafos rom nib sug ko tawa’ath ko fare Kan Nthothup.
Bin Dalip: Dam Tal i Fal’eg Rogom.
Mus nibe fal’ gubin ban’en ma ke ulul Capten Moroni nibe fal’eg rogon e gidii’ rok. Dariy bi’id nike tal. Ir e ri dabi paer nib fal’ ngak.
Dabi tal fare mo’oniyan’ ko kireb rok. Ere, rayog ni ri dabin tal gaed i fal’eg rogoy! Gadaed ra cheag nag—ni gidii’, nge lanin’uy, nge ya’el—ma gelngin ni gadaed ra gel ko kireb rok Satan.
Sisters, gimed ba cheag nag i fal’eg e gin’en ni nge upnguyem nge pi’in nib tu’uf rom. Ere, bay e endowment rom nib thothup ni rayog ni ngam gel nag e mich rok boech e gidii’ ko kanawo’ nib mangil rogon. 21 Ma gur e ri dam tal. Kam dag e binem biyay ko biney e duw.
Wenig, dam tal! Gelngin ni gama ayuweg e tabinaew rom nge mich ni gabe tay u lan gumircha’en e pi’in nib tu’uf rom e ra fal’eg wa’athan e pi’in ni ra yib boech nga m’on.
Sisters, rib yo’or e n’en ni ngad sap gaed ngay nga m’on! Ke tem Somoel ngaray e chiney ni bachane manang ni rayog rom ni ngam ayuw ko tiney e rran ni tomur. Manang ni gara un ko murwel Rok ma ga ba adag ni ngam ayuw ngan rrin’.
Dagur yoeg nib moem e rran ni bayib nga m’on, machane gube micheg nag ngom ni tin nge m’on e rra falel’ ko pi’in nike fal’eg rogon ma kube fal’eg rogon ni nge mang talne murwel u lan pa’ Somoel.
Pi walageg, gathi kemus ni ngad athamgil gaed ko ngiyal’ ney. Ngad falfalen’ gaed ko tin ni bay nga m’on u fithik e falfalen’! Ngiyal’ nib momaw’ e kanawo’ ni fan ngodaed ni ngad athamgil gaed ni ya’el. Iraram e ngiyal’ ni rib ga’fan daed ko ngiyal’ ni dani gel e wagagy ngay.
Gbe micheg ni napan ni gadaed ra fal’egin e gin’en ninge upnguy daed, ma tafney rodaed e ra yul’yul’ ngak Got, ma ri dabin tak i fal’eg rogoy, ma ra fal’eg Got wa’athan daed. Ra “chuweg [daed] u paʼ e pi toʼogor ro[daed]; arragon, ni arame ri piiʼ e gapas nga laniyaenʼ[daed], me piiʼ e mich ngo[daed] nib gel, me … guy rogon ni nge pagaenʼ[daed] ko ayuw rokʼ ngo[daed].“ 22
Napan ni gara fal’eg rogom ni ngam falfalen’ ko tin ni bay nga m’on u fithik e mich, ma pi n’ey nikan micheg e gara fana’! Ere gube micheg, u fithik e tu’ufeg rog ni fan ngom nge pagan’ rog ngom, u dakean fithngan Yesus Kristus, amen.