Tafney Nag Kristus ko Gubin fapi Leam Rodad

Fanathin ko tang rok ni yon’ nibe og nag e magar, ni ga’ar facha’ ni kanoeg i Psalm ngak:

“SOMOL, ga be guy lanin’ug, ma ga manangeg.

“Ga manang urngin e tin ni gu ma rin’, ra mpar u urel ma ba tamilangan’um u urngin e tin ni gu be leamnag.

“Ra gu be maruwel ara gu be toffan, ma ga be guyeg ga manang urngin e ngongol rog.”¹

Thin nibay ko biney e fananthin, i Psalm e be og nag e sorok’ ngak Somoel ko urngin banan ni manang ya gubin banan ko yafos rodad ma manag.² Tiney ni yi manang e rib ga’fan ngodad ko biney e yafos, fare Tathapeg e ke pining dad ni ngan gay ko urngin fapi leam min lek wo’en u polo’ i gum’richa’dad.³ Biney e ke micheg ngodad nrayag ni ngad leked rama’en fare tamilang Rok ma tin nibe powi’iy era tal’ag fapi lumor nibay u lane yafos rodad.⁴

Tafney nag Kristus ko gubin fapi leam rodad min lek u polo’ i gum’ircha’endad e btu’uf ni ngad ta’areb niged e tafney rodad Ngak.⁵ Thin nib thothup e weliy rogon e biney ni yibe “bmuduw[gil] ko ngongol romed u fithik’ Somol.”⁶ Biney e wo’en e btu’uf ni ngad ul’ul’ gad i yarmiy e yafos rodad nib ta’ab rogon ko fare gospel rok Kristus⁷min par ni yibe rrin’ e tin nib mangil ni gubin ngiyal’. Ma kemus rogon mrayag ni ngad thapegned “gapas rok Got ni dabi chuchugur ni nge nang e girdi’” ni irraram ere n’en nra “ra yororiy gum’ircha’[med] nge tafinay romed ngi i par rok Kristus Jesus.”⁸ Fare Tathapeg e yog rogon ngak fapi elders ko Galasia ko February 1831: “Mu cha’ariyed e pin’ey u gum’ircha’enmed, mag med tay ni kemus ni fare yafos ni manemus e bay u wun’med.”⁹

Demuturug gelngin ni gadadra gay rogon ni nge par Somol ko tafney rodad, bay e leam nde mangil nra yib ko tafney rodad. Napan ni gadadra pag e tiney e tafney ni nge yib ko leam rodad, mrayag ni nge thilyeg gum’ircha’endad me fek dad ko rogon ni gadad ra par u lane biney e yafos nra fekey ko bin migid e yafos ni manemus.¹⁰ Elder Neal A. Maxwell e weliy e biney e yalen ni rib fel’ rogon, “Tin ni yibe athapeg … e ma dugliy e n’en nra buch, nib mu’un fan ‘nran pining bukun ni nge yib, machane kemus nri’in nra yib.’”¹¹

Pi profet rodad ni kakrom nge tin profet e chiney e gubin ngiyal’ ma yad be pug oran ngodad ni ngan fulweg taban e lumel ni ngayag ni dabda paged fare thothup rodad ni nge balyangan’, fa aliliy, fare yibe balyang ngak.

Fanethin ni yibe weliy, pagay ko lumel e woed fare magnet nibay ba wasay u charen. Gelngin fare magnet ndabiyag ni ngan guy e be ligin fare wasay ni nge kol nike chichi’iy ir riy. Fare magnet era achig gelngin ni fa’an nran tay nib palog ko fare wasay. Ni woed, fare magnet e dabyag ni nge yib gelngin ni fa’anra bay nib palog ko fare wasay, ni woed ni gadad be fulweg taban e lumel, nibe palog ma be m’ay gelngin ko tin nibay ko tafney rodad nge lan gum’ircha’endad, nibe buch, ko pi ngongol rodad.

Biney e yib uran ngog ban’en ni buch rok gubin gidii’en e Galasia nibay e mich rok boech e duw kafram. Bay reb e chongin e galasia ni yoeg ngog ni reb o rran riy ni od ni kakadbul, yib reb e leam ngak nib kireb ndariy bi’id nike yib e mit ney e leam ko tafney rok. Aram rogon ni gin ko biney e leam, me gur nag ir nge thilyeg fana pa’, nibe non ngak ko re tafney nem, “Danga’!” me yon’ reb e leam ngalon nib mangil ni ngayag ni nge pagtilin fare leam ndani fel’. Ke yoeg ngog ni napan ni murwel ko fare motwon nib mat’aw nibay, binem e leam nib kireb e mil nga biyang ni rib papay.

Napan ni pining Moroni fapi gidii’ ni nge michuwan’rad ngak Kristus mi yad kalngan’, ke pining rad ni ngar bad ngak fare Tathapeg u polo’ i gum’ircha’enrad, ni ngar chuwegey ko gubin e pin’en nib alit. Muguyed, Moroni e pinginrad ni ngar fithed ngak Got, magmed athamgil nge madaʼ ko tomur ma dariy liyiben min chuwegmed.¹² Ni fek e pi yalen ney ngalan e yafos rodad e btu’uf ni gathi kemus ni ngan nang ni kemus ni ngan thilyeg e tafney nge gum’ircha’ey ko pi yalen ney nib thohthup. Biney e bt’uf ni ngan gay rogon ni gubin ngiyal’, ma gadad be taga’ ngak fare Tathapeg, ya dabiyag rodad ni yigo gadad. Cham ngak fare lumel e btu’uf ni ngan rrin’ ni gubin yang u lane yafos rom ni gabe ul’ul’ ngam rrin’ gelngin nrayag rom mag par nibay e mich rom. Machane mu nang ni bay Somoel nra ayuweg dad ko tin ni gadad be gay rogon make micheg ngodad nibay e tawa’ath ni fa’an gadadra ul’ul’ nge mada’ ko tomur.

Napan nibe gafgow Joseph Smith nge pi gidii’en u lan fare Kalbus u Liberty ma dariy ban’en nrayag ni ngar rrin’ed ma kemus ni ngar leam gad, ere Somoel e machib me micheg nag ba tawa’ath ngorad ni kabay fan ngodad.

“Mu suguy ngorngorem ko murnguy ngak gubin e pumo’on [nge pi’in ni ppin], ni nge par nibay fare mich riy, mag pag e tin nib mangil ni nge suguy e leam rom; ma aram ni ran gel nigem u lan gil’il’ungun Got; …

“Me par fare Kan ni Thothup rom ni gubin ngiyal’ ma bay rom, mag pag gelngin ni nge par nib mat’aw mab riyul’.”¹³

Napan ni garam rrin’, ma leam nib thothup era yib ngalan e tafney rodad nge tin ni gadad be athapeg nib polo’ era fek dad i rrin’ e tin nib mat’aw.

Moroni e pug oren ngak fapi gidii’ ni dabra adbeyed e ngongol ko darngal.¹⁴ Fare bugithin ni darngal e be yupfan ban’en ni yibe adag ni dani mat’aw.¹⁵ Biney e mu’un e leam ngay ni dani mat’aw fa ba tagan nima ligin e gidii’ ni ngar si’in gad fa ra adaged e tin ni fayleng banan ko tin ba’aray banan nib mangil, ni woed ni ngan gol ko gidii’, min fol ko fapi motochiyel rok Got. Ma baga’ ni mabi m’ug ko tafney ni togan nib dirngal. Apostle Paul e weliy boech e pi n’ey, ni woed e tin yibe ar’ar’ nag ni ngongol ni darngal, ngongol ni golong, cham, togopluw, chogow, nge ku boech ni woed e tiney.¹⁷ Urngin fapi ngongol ko darngal, facha’ nima togopluw e ma fanay e pin’ey ni nge lur nagdad ko ngongol ni dani mangil.

Pi walageg, gume micheg ni napan ni gadadra taga’ ko fare malang ni’ir fare athap rodad, ni’ir fare Tathapeg ko dogur rodad, min rrin’ ni woed rogon nike michib nag i Moroni, ra yib gelngin dad ni ngad ayuwegned e leam rodad. Rayag ni ngu micheg nag ngom ni ran ga’ nag e tin nib thothup rodad me mon’og, nra thil gum’ircha’ey, mara ayuweg dad ni ngad boded Yesus Kristus. Ma re ul’ul’, fare Kan ni Thothup nge par rodad ni gubin ngiyal’ u lane yafos rodad. Ma fare gelngin e lumel, e buch’uw ni buch’uw, nra achig gelngin nibe yib ngodad, ma gadadra falfalaen’ me polo’ e tin nibay u lane yafos rodad.

Ngak e gidii’, ni demuturug fan, nike pag ir ko fapi lumel nibe rrin’ e tin ni dani mat’aw, gube micheg nag ngom ni bay kanawo’en ni ngam sul, ya bay e athap rok Kristus. In e duw kafram, ku mada’ nag bee’ ni chongin fare Galasia rok Yesus Kristus ni ri gafgow e yafos rok nib gel ni bachan ba kireb ni rrin’ nib ga’. Somm’on riy nug guy ere mo’on ney, kug guy u owchen nib kirbaen’, nibay e athap nibe m’ug u owchen. Be m’ug u owchen nge ngongol rok nike sobutaen’ nag ir ma ke thil ban’en u gum’ircha’en. Ir e bee’ ni gidii’en Kristus make tawa’ath nag Somoel ni bukun yay. Machane, ke pag fapi leam ni darngal ke yib ngalan e tafney rok, ni wawliy ko boech ban’en. Ke pag e pi n’ey ke yib ko tafney rog, ere ke garar u lan gum’ircha’en nge man’ay rok. Wawliy nge rrin’ e pin’ey ni yib ko tafney rok ni dani mangil, ni chuweg urngin fapi n’en nib tu’uf u lane yafos rok. Ke yoeg ngog, ni fa’an dani pag e binem e leam nge yib ngak, ma dariy bi’id mara rrin’ e tiney e lumel ni’ir e kireb—ba lumel ni karang e kirbaen’ ko yafos rok.

Ma aram, ni woed fare fanethin ni mornga’agen fare pagel ni fak bee’ ni yan ngabang nibay ulan e gospel ko Luke, fani tomilangan’ ko n’en nike rrin’.¹⁸ Me sul ngak Somoel nge pagan’ biyay ngak me adag ni nge sul biyay nga tan pa’ Somoel. Rofen nem ma gamow l’agruw ni kug thamiyew fare tu’ufeg rok fare Tathapeg. Ma tomuren ni kug mu’ gow ko non, me suguy mow e thothup nib gel, kemus ko daba’, ku gumanang ya’an owchen ni sug ko falfalaen’ u napan ni digey fare office rog.

Pi tafagar rog, napan ni gadad ra palog nag dad ko lumel nib achichig, nima yib ngalan e yafos rodad nib thilthil ngiyal’, ma aram ni gadad be palog nag dad ko denen nib ga’. Woed rogon ni yoeg i President Spencer W. Kimball: “Yu dabi pos min rrin’ e denen nib ga’ ya somm’on e ma tabab ko tin nib achig, ni tin nib achig era bing wo’en ko tin nib ga’ … ‘Bangi milay’ nib be’ech e [dar pos] me [sug] e pan riy.’”¹⁹

Napan ni aram ni ke chugur ko ngiyal’ ni nge mu’ nag fapi murwel rok u roy u fayleng, fare Tathapeg Yesus Kristus e yog ni rib ga’fan ni ngan palog nigey ko gubin banan nra palog nag dad ko fal’ngindad. Tomuren ni’i sul facha’ nib to’ogor ni yibi langbiy ko denen, nibe gay rogon ni nge kireb nag fare murwel Rok, me chuweg fare Tathapeg nibe ga’ar ngak: “Mman ngam chuw, Mo’oniyaen. … Ma aram me pag fare mo’onyan, me yib, e pi engel ngarbad ra pigpiggad ngak.”²⁰

Mu tafney nag ko mang era buch ni fa’an gadadra gelnag dad ni woed fare Tathapeg min ga’ar “Danga’” ma “Mman ngam chuw” ngak fapi leam ni dani fel’ ko napan nra yib ngalan e tafney rodad? Mang era buch ko tin ni gadad be athapeg ulan gum’ircha’endad? Uw rogon e tin ni kad rrin’ed nra chugur nagdad ngak fare Tathapeg me ul’ul’ fare Kan ni Thothup rok ni nge par u lane yafos rodad? Ku manang ni fa’an nran lek wo’en Yesus, ma gadadra palog ko tin kireb ban’en nge ngongol ni dani mangil nra fek e kirban’ nge tuwthin ngalan e tabinaew rodad, thamtham ni dani mangil, cham u lane tabinaew, tin nike macham ko dogur nge man’ay ni dani fel’, nge ku boech ban’en nib kireb ko fare motochiyel rok Somoel.

Mulwol rok ko biney e duw ko April, President Nelson e micheg nag ngak e gidii’ nra “motoyil Ngak” me fol ko fapi motochiyel rok e “ran tawa’ath nag ni ran pii’ gelngin nib gel ni nge subthiy e lumel, mo’owar, nge tin nib momaw’ ngodad” ma gadadra thamiy fare falfalaen’ nib bo’or, ko ngiyal’ nib bo’or e gafgow.²¹

Gube micheg ni fare micheg ni pii’ fare profet rodad ngodad e kab ta’ab rogon ko fare micheg ni pii’ fare Tathapeg. Gube pining gubin e gidii’ ni ngan “motoyil Ngak” ko gubin e tafney nge tin nibe yib ngalan gum’ircha’endad ni nge yib gelngin dad ni ngan nog e “Danga’” ma “Mman ngam chuw” ko gubin banan nra fekdad ko oloboch ngalan e yafos rodad. Fa’an gadadra rrin’, gube micheg ni Somoel ere pii’ fare Kan ni Thothup nge yib ni nge gelnag dad, ma gadadra mang pi gidii’en Somoel.²²

Gube micheg ni Yesus Kristus e bay nib fos ma kemus ni u daken, ma rayag ni ngad gel gad ngak fare to’ogor ma aram nrayag ni ngad pired Rok magdad sul ngak e en ni Chitamangiy nibay u Tharmiy. Gube micheg e pin’ey nib riyul u fithik e tu’ufeg rog ngak fare Tathapeg ni gubin ban’en rok mab fel’, ni irraram e cha’en ni gube ta’ fan, ma gube og, nag e sorok’ ngak. Gube yoeg e pin’ey u daken fithingan Yesus Kristus, amen.