Gubin pi Gidii’en e Nam, pi Tabinaew, pi Thin
Nap’an ngad motoyilgaed ngak e ya’el ko thogthog rok Somoel, rayog ningad, uned e mugu’uliy e thogthog Rok nge micheg—ngad uned e gospel nibe taw’athnog e fayleng.
Pi walageg, Kug fini ngongonliy e m’ag paa’ ulan temple, mug fol fapi chilyen ko COVIV-19. Kar uned fare ppin nge mo’on, i yow e pi missionary kan sulew nib michaen’, bay e pi labthir nge pi walagrow. Gathi ni moem. Fare ppin ir bin mereb e bitir ko ragag. Mereb e walagen kar pared nga chiya’, u rogon e yangraed bin ilal’ nga bin chigchig, kar palogaed.
Re tabineaw ney kar geyed rogon nignar manged e yoror nib fel’ ko nam. Machane, reb e nam e ke fek ya thin ngoraed—bachane, ke yoeg e nina’ ko ppin, chongin e tabineaw roraed i yaed chongin Fare Galasia ku Yesus Kristus ni fan e Gidii’en Got ko Tin Tomur e Rran.
Re tabinaew ney kar ngongoliyed ningar gayed e fagar u school, kar pigpigniged, machane dariy’. Re tabineaw ney kar meybilgaed mar fith ninge sumunguy e gum’racha’raed i gidii’.
Reb e nep, tabinaew ney kar thamiyed ni ke fulweg e meybil roraed, machane u rogon ni dar nanged fan. Ke yik e na’un roraed man urufeg nib polo’. Machane me buch reb ban’en. E nifiy ke gay sumunguy e gum’racha’raed i yoror.
Pi yoror nge school aram kar piry’eg e maad, pi zori, nge reb e chugum nib t’uf mar pii’ed nga tabinaew, ni kar n’ag urngin. Gol ke bing e wo’en ko nang fan. Dabkar lemniged fare tabinaew ninge fulweg e meybil roraed amrogon. Machane, kar pinninged e magaer ni fan fatin kar filed udakaen e tin moem’ nge fulweg ko meybil nib michaen’.
Riyul’, ngak e gidii’ ni bay gum’racha’ nib michaen’ nge oewchen ningan guy, fapi murnguy nib sumunguy rok Somoel ningan dag ufithik e tin moem’ ko yafas. Sikeng ningan fulweg u fithik e mich nge maligach ra pinning pi taw’ath ko tharmiy. Nap’an e yafas ney, gadadra n’ag fa soen ni fan boech e ban’en ko n’ew nap’an, machane u tungun ngad piry’eged fa tin ni thabi gaa’fan.1 Iraram e micheg Rok.2
Fare 2020 bicentennial milwol irma tabab ko fare micheg nib puf mata’woy ni “Got ba’adag urngin e bitir rok ulan urngin e nam ko fayleng.”3 Ni fandaed ko urngi ne nam, tabinaew, thin, nge gidii’,4 Got ma micheg, e michmicheg, ma pinningdaed ningad thapeged e faflaen’ Rok nge tin fla’ab.
T’ufeg Got ni fan urngin e gidii’ ni kan weliy’ ulane babyor nib thothup.5 Re t’ufeg nem ba un fare michmicheg ko Abraham, mukung e bitir Rok kan garar,6 nge kanawo’ Rok ko falflaen’daed.
Ulane fare tabinew ko mich ni dariy’ e bee u wuru e binaw, ko reb e nam,7 dariy’ e fla’ab fa gafgow,8 dariy’ bee’ wuru’ ni “reb.” Gadadba “gidii’ ko gidii’en Got, “9 kan pinningdaed ningad thilyeged e fayleng ni fel’ rogon, tabab ulangin, ta’areb e bee’, ta’areb e tabineaw, ta’areb e nam u chingyal’.
Ngan mugu’uliy pin’ey nap’an ngad folgaed nge machibnogdad e gospel. U somm’on e mfen ney, fare Profet Joseph ke thapeg e thogthog nib ma’ang’ang ni Chitamangdaed nu Tharmiy ba’adag urngin e gidii’ ulan urngin e nam ningar piry’eged e t’ufeg Got mar nanged fan e geling Rok ningar ilal’gaed mar thilyeged.
Re thogthog ney kan thapeg uru’, ulane fare na’un ko tabinaew ni smith kan toey ko farengi lud ulane Palmyra, New York.10
Kan toey u 1998, tabinaew ko Smith kan toeyed bayay nga dakaen e bin somm’on e dayif rok. Biney e bin la’agruw e faraf ko na’un ni’ir ta’ab e singil ni 18 x 30 x 10 foot (5.5x 9 x 3m) ni ke mu’g Moroni ni’ir e tamilwol nib ma’ang’ang ku Got ni ke yib ngak Joseph ni fel’ yangren reb e nep ko September 21, 1823.11
Ragam pugurran fa tin fare Profet Joseph ke yoeg:
“[Moroni] me yoeg … Bay e muruwel Got ba’adag ningu rrin’; ma fithingag ninge fel’ nge kireb ngak urngin e nam, tabinaew, nge thin. …
“Ke yoeg bay e babyor kan upnguy, … ni bay polo’ e Gospel nib manemus ni kan yoloey ulangin.”12
Ngad soengaed. Gadadba liyoergaed ngak Got ni Chitmangiy ni Machalbog, nge Fak ni Jesus Kristus, gathi fare Profet Joseph fa reb e mo’on fa ppin.
Machane mu lemnog urrogon pi thogthog rok Got ke pii’ ngak fapi Tapigpig Rok ngan mugu’uliy.13 Bocech e ngan mugu’uliyed nib papay, ma bin u tabuch, machane urngin ngan mugu’uliyed boron.14 Nap’an ngad motoyilgaed ngak e ya’el ko thogthog rok Somoel, rayog ningad, uned e mugu’uliy e thogthog Rok nge micheg—ngad uned e gospel nibe taw’athnog e fayleng.
Joseph ni’ir e pagal ni sobutaen’ bay 17-duw-rok ulan binaw ni dariy’ fan ulan nam ni ke fini yarmiy. Fa’an riyul’, urrogon ninge lemnog i’ir e talin ni ke muruweliy Got ninge piliyeg udakeaen e ta’awth nge gelngin Got fapi babyor nib thothup u ni ra yaen ngak urngin e nam?
Machane, bachan ni’ir riyul’, gur nge Gag ngad guyed e mugu’uliy ko thogthog ney nap’an gadadba ayuweg ninge mugu’uliy.
Pi walageg, ulongob e fayleng, gadad gubin ba uned ko re October 2020 general mo’olung ney i gadad e chongin pi nam, pi tabinaew, pi thin.
Daba’, pi chongin Fare Galasia ku Yesus Kristus ni fan e Gidii’en Got ko Tin Tomur e Rran ba paered u 196 nam nge farengi nam, ni bay 3,446 stake ko galasia ulan 90.15 Gadaba un e nam nib gaa’ nge nam nib gelingin.
U 1823, mini’ ma nang ni ulane 2020 bay delip e nam ni bay yo’or i biyu’ e chongin e Galasia roraed—fapi United States, Mexico, nge Brazil?
Fa ulan 23 e nam bay 100,000 e chongin ko Galasia—dalip ulane North America, ragag nge aningeg u Central nge South America, ta’areb u Europe, aningeg u Asia, nge ta’areb u Africa?16
President Russell M. Nelson ke pinning fare Babyor u Mormon “e ma’ang’ang nib fel’.”17 Fapi m’ag rok, “Ngorad urngin e nam, tabinaew, thin, nge gidii’.”18 Daba’, re general mo’olung ney ngan motoyil ko 100 pi thin. President Nelson ke pii’ e m’ag marunga’agen Yesus Kristus nge gospel Rok kan fulweg u 133 e nam nge reb.
Tabab ko 5,000 e babyor kan printnog u 1830 ko bin somm’on e edition ko fare Babyor ku Mormon, kan pii’ 192 million e babyor ko urngin fa guruy ko fare Babyor ku Mormon kan publishnag ko 112 e thin ko nam. Babyor ko Mormon thapeg ko digital. Chiney fapi pilyeg ko fare Babyor ku Mormon ni’ir 23 e thin ko fayleng nibe yoeg 50 million gidii’ fa reb, uta’abang fare thin ko 4.1 billion e gidii’.19
Udakaen e ban’en nib moem nib achig—ni ke pinningdaed ningad uned—ra yib e ban’en nib gaa’.
Woed rogon, ulane stake mo’olung u Monroe, Utah, gidii’ ni bay 2,200, Kug fith ngoraed mini ke pigpignoged ko mission roraed. chuchugur ko urngin e paa’ kar tayed ngalang. Ke fini buch u boech e duw, ko stake ney, 564 e missionary kar pigpigniged ulan gubin e 50 U.S. State nge 53 pi nam—ko urngin e contient machane Antartica.
Marunga’agen Antartica, ulan Ushuaia, ko fare bin loeluch e yang ko Argentina, Kug guy e mugu’ul ko thogthog nap’an e missionary rodad kar machibnoged fare gosepl kan fulweg ku Yesus Kristus ulane e binaw ni kanoeg “tungun e fayleng.”20
Fapi sasing kan sunmiy ko aningeg e babyor ko Gidii’en Got 21 ba dag e ya’an ko pi wompngin e gospel ni bay yib udakaen e Gidii’en Got nib michaen’ u lane nam. Chepin e Galasia rodad kan m’ag ngak e m’ag nib fas nge milekag ko Gospel ko urngin e Chongin, arragon Mary Whitmer, reb e walagen nib michaen’ ni ke dag Moroni fapi plate ko fare Babyor ku Mormon ngak.22
Bay yib u January 2021, bay delip e babyor ko fayleng ko Galasia—fare Fagar, Ni Fan e Gelingin ko Gidii’ ni Fel Yangren, nge fare Liahonapinninged urngin ningar uned mar pii’ e m’ag roraed ngak e gidii’ ko mich u fayleng.23
Pi Walageg, nap’an ngad gelnoged e michaen’daed ngak Chitamangdaed nu Tharmiy nge Yesus Kristus, thapeged e taw’ath kan piry’eg udadkaen e fol ko fare gospel nib fulweg nge michmicheg nib thothup, ngad biy’eged, lemniged, ngad pii’ed fare Sulyarmen nibe buch, rayog ningad mugu’uliyed e thogthog.
Gadadba thilyegdaed nge fayleng udadaen e yalen ko gospel nibe taw’athnog e yafas ulongob e fayleng.
E Walagen nu Africa ke yoeg, “Pigpig ko priesthood ko pou’moon rok ba gay e gum’aen nge gol ngak. Ma Gube mang e le’engin nge nina’ nib fel’.”
Reb e bee’ ko muruwel ko urngin e nam u Central America ke yoeg ni ou’moon ke piry’eg fare gospel kan fulweg rok Got, dariy’ e kanawo’ ko yafos rok. Chiney tabinaew rok kar piry’eged e nang fan, muruwel, nge gelingin.
Reb e pagal u South America ba kunuy alabal nge pii’ e egg roraed ni nge chuwiy’ e windaw ko na’un e tabinaew rok ba toey. Irma pii’ e tithing rok bin somm’on. Irra guy e bing ko pi windaw ko tharmiy ngak.
U Four Corners, ara ko ngek ni yimuch ko Merica, reb e tabineaw nib Native American ba ngongoliy milay’ ko rose nib fel’ usun u wuru’ e binaw, i’ir e pow ko gospel ko mich nge gel bugwaen.
Reb e salthaw ko e mael nib civil, chongin u Southeast Asia ke muluwaen’ ni dariy’ e fan ko yafas. Ke piry’eg athap ko likay’ ni ke pii’ reb e classmate rok e sacrament tray ngak make weliy’ fatin gaa’fan ko gam’ing nib thapeg nge fare Bayuliy Yesus Kristus.
Got ni Chitamangdaed nu Tharmiy ba pinningdaed ningad thamiyeg e t’ufeg Rok, ngad filed ngad ilalgaed udakaen e fil, muruwel nib fel’, pigpig, nge yalen ko tin fel’ nge falflaen’ ningan piry’eged ulane Galasia Rok kan fulweg.
Nap’an ngad pagaen’daed ngak Got, boech e ningyal’ e wenig rodad ulane lumor, yigo’ dad, ningyal’ nib chelchel, gadadra fil Irma nang marunga’daed ma Irba’adag daed nib gaa’ ko rayog rodaed.
Aramfan gadad ba t’uf e ayuw rok Got ningad sunmiyed e pufthin, ta’abrogon, fel’ yalen, nge gapas ulane tabinaew nge nam rodad. Tin riyul’ rodad, nib to’orngin, cheping riyul’ rodad, mfen, nge tha’ rodad ngad thamiyed ko e muruweliy Got ko bayuliy t’ufeg, pinninged e murnguy nge m’ang’ang udakaen e Bayul Rok Fak, ngad ngongoliyed e tha’ ko gam;ing nib micheg.
Tin fel’ ko tiliew nge lowaen’ ni ba yib daba’ ko e waerwaer, gaa’ lingan, alit e fayleng. Urrogon ningad thapeged e machaelboech, yi’iy, ngad gelnoged e ya’el ko gidii?24
Tay e gak’iy u Haiti i’ir ta’areb e rogon ni yo’or e gidii’ kar mukungaed uta’abang ningar ngongoliyed e tin fel’. Ulane binaw ney, arragon 1,800 chongin e Galasia rodad, kar pii’ed fapi gak’iy, mar mukungaed uta’abang ningar upnguy chuchugur ko 25,000 gak’iy.25 Biney e muruwel ko bo’or e duw kar upnguyed 121,000 e gak’iy. Nira yib yo’or i biyu’.
Re muruwel ney ke pii’ e tafen ko tofan, ayuw e but, nga kireb nag e yoko’. Ira pii’ fel usun e nam, ayuweg e tabinaew, fas ko gaan, nge ayuew e ya’el. Fa’an gara fith ngak fapi gidii’ nu Haiti nibe muruweliy ko wompngin e gak’iy, yaedra fulweg, “En niba balig nag.”
Chuchugur ko Eighty percent ko gidii’ nu fayleng i yaed ba un e tiliw.26 Mo’olung ko tiliw ma fulweg ko yoko’ ko magothghoth, ngar fulweged e tin t’uf ko gaan, na’un, fil, biy’eg, nge fil ko muruwel ngay. Ulongob e fayleng, pi chongin rodad, pi fagar rodad, nge Galasia ba ayuweg e nam ningar thapeg e gidii’ u wuru’ e binaw mar pii’ed e raen, be’echnag, ayuw ko lam, ayuw ko oewchen—ta’areb e bee’, fa binaw, fa gak’iy u ta’ab e yay.27 U gubin nam, ngad gayed rogon ningad manged e labthir nib fel’ nge citizen ko binaw, ningad ayuweged e binaw nge gidii’ rodad, arragon udakaen e Gidii’en Got ko Tin Tomur e Rran Charities.28
Got ke pii’ e puf mat’awondaed—nge rayog rodad ko tin mat’aw. Be yoeg Somoel, “I gag, en Somoel ni Got, ba fi’legmed ningam puf mat’awonmed, armafan i [gur] e puf mat’awonmed arragon.”29 Ningu tolulgaed e “puf mat’awoy nga gidii’ u kalbus,”30 en Somoel ba micheg e Bayul Rok nge kanawo’ ko gospel ra kirebnag e dibchay ko tin fayleng nge tin ya’el.31 Ufithik e murnguy, re puf mat’awoy ney ra yaen ngak e gidii’ kar m’aed.
Boech e duw u faram, reb e priest u Central America ke yoeg ngog ni ke fil marunga’agen e Gidii’en Got ko Tin Tomur e Rran ni fan e ”tawfe ko gidii’ kar m’aed.” “Gube lemnag,” ke yoeg fare priest, “ni Got ba’adag urngin e gidii’ ra thapeg e tawfe, dariy’ fan e binaw fa mfen roraed, machane gathi e bitir nib achig nima ‘fasrad u Kristus.‘32 Fare Apostle Paul,” ke yoeg, “ba non marunga’gen e gidii’ nib yam’ nibe soengaed ko tawfe mar fas gad ko yam’.”33 Gam’ing ulane temple ba micheg “urngin e nam, tabineaw, nge thin” dani t’uf ningar “athamgiliyed ni yaed sib ko yam’ fa inferno, fa ulan kahol ko yam’.”34
Nap’an ngad piry’eged Got, boech e ningyal’ ra yib e fulweg ko duwer rodad nira fek dad ko kanawo’, m’ag paa’ e gidii’ ko nam, chuweg e lumor ko ya’el rodad, nga powiy’daed ningad thapeged e matangiy ko ya’el nge tha’ ko tin fel’ ulane michmicheg Rok nga thapeged e t’ufeg ni dabi mus.
Ban’en nib gaa’ ma yib udakaen e ban’en nib moem’aw, woed rogon e ma’ang’ang ku Got ba yib urngin e rran. Kug falflaen’ ni fan e taw’ath ko fare Kan Thothup, fare Bayul ku Yesus Kristus, nge machib kan yi’iy, pi gam’ing, nge pi michmieig kan fulweg udakaen e Galasia kan Sulyarmen, ngan pinning Fithingan riy’.
Ninge yoeg ningad thapeged e pinning Got ningad thapeged ngad mugul’iyed fapi taw’ath ko thogthog Ke micheg ulan urgnin e binaw, tabinaew, thin, Gube meyil, ulan fare fithingan nib thohtup ku Yesus Kristus, amen.