Um Pired Ni Kam Fal’eged Rogomed, Ma Gimed Be Meybil Gubin Ngiyal

Pi walageg, nap’an e bin tomur e wiik ko machib Rok u fayleng, Yesus ke fil ngak pi gachalpen Rok ningar “um pired ni kam fal’eged rogomed, ma gimed be meybil gubin ngiyal ninge yoeg ningam mat’awgaed ningam chuweg ko fatin ni bay yib, ningam sak’iy u poewchen en Fak e Mo’on.”¹

Ko boech e ban’en “ni bay yib” nap’an e Bin La’agruw e Wub Rok ni’ir “mael nge sabethin ko mael[,] … balig, nge m’ar, nge deru’, u tafen nib palog.”²

Ulan fare Doctrine nge Covenants, en Tathapeg ke yoeg, “Urngin e ban’en ney ra gay e thilthil; … ma yoeg e rus ngak urngin e gidii’.”³

Arragon, gadadba paer nap’an e ningyal’ ni bay bo’or e cham. Bo’or e gidii’ ba rus ko gabul, ma bo’or kar chelgaed e gum’racha’raed ko mich roroaed ngak Got ma Fak Rok, Yesus Kristus

Pi News ba sug ko chepin e mael. Kirebnag e mat’aw ngan publishnag online. Tafen e yam’, galasia, mosques, synogoges, nge tafen e liyoer kan kirebnag.

Bay e m’ar ko fayleng ke yaen ngak urngin e mfen ko fayleng: yo’or i biyu’ e gidii’ kar m’argaed; ta’areb e million kar m’aed. Pi graduation ko skool, liyor u galasia, mabgol, muruwel ko missionary, nge reb e ban’en nib gaa’fan kan ta’leged. Arragon, bo’or e gidii’ kar malogaed.

Bay gaa’ chelchel e salpiy ke yoeg e magowen ngak bo’or e gidii’, arragon ngak e gidii’ nib gafgow ko bitir rok Chitamangdaed nu Tharmiy.

Kug guyed ulungi gidii’ nibe ngongoliy e mat’aw roraed ko protest, ma reb e ulungi gidii’ nib puwaen’ kar chamgaed.

Ta’abrogon, gadadba guy e cham ulongob e fayleng.

Gube lemnag marunga’med i gimed ba gafgow, tamra’, rus, fa malog. Gube pinning fel’ laniyaen’med ni Somoel ma nang marunga’med, Irma nang marunga’agen e gafgow romed, Irba t’uf ngomed—nib gel mab gel, to’orngin ko manemus.

Urngin e nep Gube meybil, Gube fith ngak Somoel ninge taw’athnogmed i gimed bay e kirebaen’med, mith romed, yigo’ med, fa kirebaen’med. Guma nang reb e tiyugang’ ko Galasia ba yoeg ta’abrogon e meybil. Pi gum’racha’maed, uta’abang, ba murnguy med, pi meybil romad ba yaen ngak Got ni fanmed.

Kug milekag ko boech e rran re duw ney ke thimur u lane northeastern binaw ko United State kug waen nga boech e tafen ko chepin American nge Galasia, un e mo’olung ko missionary nge chongin, mug mada’nag e tiyugang’ ko government nge business.

U Sunday, October 20, Kug non ngak mo’olung e gidii’ u Boston, Massachusetts. Nap’an kug non, Kug lemang ningu gog, “Gube wenig ngomed … ningam meybilgaed ni fan e nam ney, pi tiyugang’ rodad, ni fan e gidii’ rodad, ni fan e tabinaew nibe paer u lan e nam ni ke yarmiy Got.”⁴

Kug yoeg marunga’agen America nge reb e nam ko fayleng, nap’an e ningyal’ ke thimur, ni bay e ningyal’ ney nib t’uf ko meybil romed.⁵

Dabkug taermedliy e wenig ko welthin rog. Fapi thin ney kar baed ngog nap’an Kug thamiy e Ya’el nike pinningeg ningu pinnng e gidii’ aram ningar meybilgaed ni fan e nam ma tiyugang’ roraed.

Daba’ gube yoeg bayay e pinning rog ninge yoeg e meybil urngin e gidii’ ko urngin e nam ulongob e fayleng. Dariy’ fan e yalen ko meybil fa bee’ ningam meybil ngak, mu ngongoliy e mich rom—ko urngin e tiliw—mu meybil ni fan e nam nge tiyugang’ ko nam rom. Woed kug gog fabinem e October u Massachusetts, gadadba sak’iy u kanawo’ ko chepin nib gaa’fan, fapi nam ko fayleng ba t‘uf e yi’iy nge powiy’ ko tharmiy. Dariy’ fan e politics fa policy. Bay yib fan e gapas nge gol nibe yib ko ya’el e gidii’ nge ya’el e nam—pi city, pi town, pi binaw—udaken e Pilunge ko Gapas ni bay pii’ urngin e golnag, en Somoel Yesus Kristus.

Nap’an boech e pul ni ke thimur Kug thapegeg e yi’iy ni fa bin fel’ e rogon ningu ayuweg e rogon e fayleng chiney ni nge yoeg urngin e gidii’ ningar tiyaen’daed ngak Got mar thilyeged e Gum’racha’raed Ngak udakaen e meybil nib yul’yul’. Ngad sobutaen’daed mag gayed e yi’iy ko tharmiy ngad athamgiliyed ngad gelnoged e sikeng rodad ni’ir e rogon nib pos ningad gelnoged pi ningyal’ nib moawer chiney.

Fapi babyor nib thohtup ba weliy’ marunag’egn fapi meybil ni ke pii’ Yesus ma fil Rok marunga’agen e meybil nap’an e muruwel Rok u fayleng. Ragam puguran fare Meybil Rok Somoel:

“Chitamangimad ni ga bay u tharmiy, Ngan tay fan fithingam nib thothup.

“Ma ga par ni gur e ga be gagiyeg nagmad, Ngan rinʼ e tin nib mʼagaenʼum ngay u fayleng ni boed ni yibe rinʼ u tharmiy.

“Mpi’ ngomad e daba’ e ggan ni nge yag ngomad.

Mag nʼaegfan e denen romaed, u napʼan ni gamaed be nʼaegfan e denen rokʼ e pi toʼogor romaed.

Ya gur e gilʼilungun rom, nge gelingin rom, nge rir rom, ni gubinfen. Amen. Amen.”⁶

Re meybil, nib puluw, kanoeg urngin e Christianity, ba fil ngodaed nib fel’ ningad meybilgaed ngak “Chitamangdaed nu Tharmiy” ni fan e fulweg ko magawoen rodad. Aram fan, ngad meybilgaed ni fan e ayuw ko tharmiy.

Gu be piningmed ni ngam meybilgaed gubin e ningyal’.⁷ Meybil ni fan e tabinaew romed. Meybil ni fan e tiyugang’ ko nam romed. Meybil ni fan e gidii’ nib gel bugwaenraed ni bay uned e mael ko social, environmental, political, fa m’ar nibe gechignoged e gidii’ ulongob e fayleng: gidii’ nib fla’ab nge gafgow, fel’ yangren nge labthir.

Somoel ke fil nogdad dad tal’leged e wenig ko meybil rodad. Ke yoeg “Mu t’ufeged e pi to’ogor romed, ma ngam fal’eged wa’athan e pi’in ni yaed be ger nagmed, ma ngam rin’ed e tin nib mangil ngak’ e pi’in nibe fananikaymed, ma ngam meybil ni fan ngak’ e pi’in nibe muruwel ngomed u fithik’ e sasaliyeb nge pi’in nibe gafgow nagmed.”⁸

Nga dakaen fare kruuth ko Calvary, nap’an Yesus ke yim’ ko pi denen rodad, Ke ngongoliy e machib Rok nap’an ke Meybil, “Chitamag, mu n’agfanraed: dar nanged fatin ningar rrin’ed.”⁹

Meybil nib yul’yul’ ngak e gidii’ nib to’ogor rodad ba dag e michaen’daed ni Got ra thilyeg e gum’racha’daed nge gum’racha’ e gidii’. Pi meybil nem ra gelnog e laniyaen’daed ningad ngongoliyed e thilyeg ko tin nib t’uf ko yafas rodad, tabinaew rodad, nge nam rodad.

Dariy’ fan e binaw rom, dariy’ fan e thin rom, fa sikeng rom, Got ba motoyil nira fulwegem u rogon Rok ma ningyal’ Rok. Bachan gadad gubin e bitir Rok, rayog ningad dared ngak mag ninged e ayuw Ngak, gapas, nge laniyaen’daed ningad fi’leged e tin fel’ u fayleng ney.

Meybil ko pufthin, gapas, gidii’ nib gafgow ko salipy, nge m’ar dani tungun. Tomuren ngad ragbuged ko meybil, thingar ningad sak’iygaed nga lang ngad ayuweged—ayuwegdaed ma reb e gidii’.¹⁰

Pi babyor nib thothup bay bo’or e chepin e gidii’ ko mich kar uned e meybil ko ngongol mar yoeged e thilyeg ko yafas roraed ma yafas e gidii’. Ulan fare Babyor ku Mormon, ko sasun, gadadba biy’eg marunga’agen Enos. Kan weliy’ed ni “chuchgur ko la’agruw-ko delip e yang ko babyor rok nib ngocgngoch ba weliy’ marunga’agen e meybil fa boech e meybil, nibe weliy’ e ngongol rok bachan e fulweg ke thapeg riy’.”¹¹

Bay bo’or e sasun marunga’gen e tin fel’ ko meybil ninge yoeg e thilyeg ko chepin e Galasia rodad, u somm’on fare bin somm’on e meybil rok Joseph Smith ke pii’ ufithik e paan chuchugur ko na’un e glabthir rok u spring ko 1820. Ke piry’eg e n’ag fan nge powiy’ ko ya’el, re meybil rok Joseph nem ke bing fapi tharmiy. Daba’ gadadba fel’ rogdaed ko Joseph en Profet nge reb e Gidii’en Got ko Tin Tomur e Rran nib mo’on nge ppin ni kar meybilgaed mar yarmiyed Fare Galasia ku Yesus Kristus ni fan e Gidii’en Got ko Tin Tomur e Rran.

Gube lemnag marung’agen fapi meybil woed rogon ni Mary Fielding Smith napan ke, udakaen e ayuw ku Got, powiy’ e tabinaew rok ko pi to’ogor u Illinois ngar tawgaed nga binaw ney, e tabinaew rok kar fla’abgaed ko tin ya’el nge tin fayleng. Tomuren ke ragbug me meybil nib yul’yul’, ke yaen ma muruwel ninge gelnog e sikeng rok me taw’athnog e tabineaw rok.

Meybil ra chibiy daed nga lang ma mukungaed uta’abang ko bee’, tabinaew, galasia, ma fayleng. Meybil ra ayuweg pi scientist ningar piry’eged boech e vaccine ma falay ningar tungun re m’ar ney. Meybil ra ayuweg e gidii’ ke n’ag e bee’ nib t’uf. Ira powiy’daed ningad nanged e tin ko matangiy rodad.

Pi walageg, Gube ning chilyen ngom ningam fi’leg laniyaen’med ningam meybilgaed. Gube pinningem ningam meybil ulan singgil romed, fa nap’an e milekag rom, ulan tabinaew rom, fa ulane ward rom, ma gubin yal’ u lan gum’racha’med.¹²

Ni fan urngin e tiyugang’ ko Fare Galasia ku Yesus Kristus ni fan e Gidii’en Got ko Tin Tomur e Rran, Gube pinning e magaer ngomed ni fan e meybil romed ni fanmaed. Gube pinningmed ningam yul’yul’ mu meybilgaed ninge yoeg e yi’iy nge thogthog ngak fare Galasia nap’an e ningyal’ nib moem’aw ney.

Meybil ra thilyeg e yafas romed. Udakaen e meybil nib yul’yul’, rayog ningem fel’ rogom ngam ayuweg reb e gidii’ ningar rrin’ed ta’abrogon.

Guma nang e gelngin meybil. Kug fini paer ni go’ gag ulan office rog. Kug thapeg e medical procedure ko pa’ag Ke talmar, thow, ma bo’or e miith. Nap’an kug paer nga desk rog, Dabiyoeg ningu tiyaen’ ko muruwel nib gaa’fan bachane fare miith Rog.

Kug fith ngak Somoel ninge ayuwegeg ningu tiyaen’ Ningu mugu’uliy e muruwel rog. Kug sak’iy mug sulweg nga boech e babyor nga dakaen e desk rog. Me yibi buch, kug tiyaen u tafnay rog, rayog Ningu mugu’uliy e muruwel rog.

Magawoen ko fayleng chiney ba yoeg e tam’ra ngodaed nap’an ngad lemniged riy’. Machane i’ir e m’ag rog ni fa’an ngad meybilgaed ngak mag fithed Chitamangdaed nu Tharmiy ni fan e tin t’uf ko taw’ath nge powiy’, gadadra nang urrogon ningad taw’athnag pi tabinaew, yoror, gidii’, ma nam rodad.

En Somoel ke meybil ma Ke “yaen ninge rrin’ fatin fel’”¹³ udakaen e gaan ngak gidii’ nib gafgow, pii’ e gelbugwaen ma ayuweg e gidii’ nib t’uf, ufithik e t’ufeg, n’ag fan, gapas, ma tofan ngak en nira baed Ngak. Irma thamgiliy ninge thap ngodaed.

Gube pinnng urngin e Chongin ko Galasia, ma yoror ma fagar ko mich rodad ulongob e fayleng, ningar rrin’ed fatin ni ke fanow pi Galachalpen Somoel Rok: “Um pired ni kam fal’eged rogomed, ma gimed be meybil gubin ngiyal”¹⁴ ni fan e gapas, gol, matangiy, fa rogon ningad pigpigniged e gidii’.

Ba gaa’ gelngin e meybil, mab t’uf e meybil nib michaen ngak Got nge Fak nib T’uf Rok ulongeb e fayleng daba’! Ngad pugurrangaed mag falflaen’gaed ni fan e gelngin meybil. U dakean fithngan Yesus Kristus, amen.