Na Aduane Wɔ Hɔ

Ansa na akwantuo nhyehyɛɛ a yaredɔm a ɛwɔ hɔ nnɛ yi reba no, na meresan aba fie firi amannɔne akwantuo a metuui mu, ɛnam nhyehyɛɛ nnidisoɔ nti, Kwasiada too me wɔ ɔkwan mu. Menyaa berɛ wɔ me wiemhyɛn akɔneaba no ntam enti mekɔɔ Awurade adidie nhyiamu wɔ bea hɔ ara, a metumi kyɛɛ nkratoɔ tiawa bi. Nhyiamu no akyiri no deacon anikafoɔ bi baa me nkyɛn na ɔbisaa sɛ menim Titenani Nelson, na sɛ manya kwan bi akyea ne nsam pɛn a. Meyii ano sɛ menim no, na makyea ne nsam pɛn, na sɛ meka Ahwɛfoɔ Atitenafoɔ ho no nti na mewɔ akwannya sɛ mehyia Titenafoɔ Nelson ne n’afotufoɔ mpɛn bebree wɔ nnawɔtwe baako biara mu.

Deacon abarimaa no tenaa akonnwa mu, totoo ne nsa kɔɔ wiem, na ɔteaa mu sɛ “Yei ne ɛda kɛseɛ pa ara wɔ m’abrabɔ mu! Nnuanom mmarima ne mmaa, ɛbia merentoto me nsa wɔ wiem na merentea mu, nanso m’aseda nni awieɛ sɛ yɛwɔ nkɔmhyɛni teasefoɔ ne akwankyerɛ a yɛnya firi nkɔmhyɛfoɔ, adehunufoɔ ne adiyifoɔ titiriw wɔ mmerɛ a ɛmu yɛ den yi mu.

Ɛfiri berɛ ahyɛaseɛ mu, Awurade ama Ne nkorɔfoɔ akwankyerɛ ama aboa wɔn asisie wɔn ho, honhom mu ne honam mu, atia atoyerɛnkyɛm a Ɔnim sɛ ɛbɛba sɛ asetena mu suahunu. Saa atoyerɛnkyɛm yi bɛtumi aba ankorankorɛ anaa sɛ deɛ ɛka obiara, nanso Awurade akwankyerɛ bɛma yɛn ahobanbɔ na asɔ yɛn mu berɛ a yɛkɔso tie n’afotuo na yɛde yɔ adwuma. Wɔama nhwɛsoɔ nwanwasoɔ bi wɔ Gyenesis nwoma no mu, a yɛhunu fa Joseph a na ɔwɔ Misraim ne ne nkanyan nkyeraseɛ a ɔkyerɛɛ Farao daeɛ ase no.

“Na Yosef ka kyerɛɛ Farao sɛ, Onyankopɔn akyerɛ Farao deɛ ɔrebɛyɛ.

“Hwɛ, aduane bɛbuso mfeɛ nson wɔ Misraim asase nyinaa so.

Na ɛno akyiri no, ɔkɔm bɛba mfeɛ nson; na wɔwerɛ befiri dodoɔ no nyinaa wɔ Misraim asase no so.”¹

Farao tiee Yosef na, tiri a ɛyɛ, ɔyɛɛ deɛ Onyankopɔn akyerɛ no wɔ daeɛ mu no na ntɛm ara ɔhyɛɛ aseɛ siesie maa deɛ na ɛrebɛba no. Twerɛnsɛm no twerɛtohɔ:

“Na ahotɔ mfeɛ nson no mu no asase no baa aduane pii ma no buu so.

Na ɔboaboaa mfeɛ nson aduane no nyinaa ano.

“Na Yosef boaboaa ayuo ano pii pa ara te sɛ mpoano anwea de kɔsii sɛ wɔgyaee kan ɛfiri sɛ na ɛnni ano.”²

Berɛ a mfeɛ nson a aduane buu so no twaa mu no, wɔka kyerɛɛ yɛn sɛ, mfeɛ nson kɔm hyɛɛ aseɛ baeɛ, sɛdeɛ Yosef aka no ara pɛ. Nɔ ɔkɔm no baa asase no nyinaa so, nanso wɔ Misraim asase nyinaa so deɛ na aduane wɔ hɔ.”³

Ɛnnɛ, yɛayɛ nhyira sɛ nkɔmhyɛfoɔ di yɛn anim a wɔte hia a ɛhia sɛ yɛsiesie yɛn ho twɛn atoyerɛnkyɛm “a ɛbɛba”⁴ honam ne honhom nyinaa mu na afei yɛhunu sɛ yɛwɔ ho kwan anaa deɛ ɛkyekyere yɛn sɛ yɛbɛfa wɔn afotuo so.

Nteaseɛ pefee wɔ hɔ sɛ nsunsuansoɔ a COVID-19, ne abɔdeɛ mu atoyerɛnkyɛm ahodoɔ de aba no nnim nnipa atitire, ɛtra nnipakuo, ne ɔsom mu ahyeɛ a ɛwɔ asasepɔn biara so. Nnwuma asɛe na sikasɛm so ate, berɛ a akwanya a yɛde yɔ adwuma no nam ayideɛ so anya nsunsuansoɔ a ɛnam korona yareboa apɔmuden mu haw ahodoɔ so.

Wɔn a wɔn ho aka nyinaa, yɛkyerɛ yɛn nteaseɛ ne dwene a yɛdwene mo ho wɔ saa tebea yi mu na yɛwɔ gyedie mapa sɛ nna a ɛmu yɛ wɔ anim. Wɔahyira mo ne Ahwɛfoɔ ne nkorabata titenafoɔ a wɔhwehwɛ na wɔboa wɔn asɔremma a wɔwɔ honam mu adehiadeɛ na wɔsan nso wɔ akadeɛ ne mmoa a ɛbɛtumi aboa ama moasan asɔre, asan abɔ mo bra na ɛde mo asi ahotosoɔ kwan so berɛ a modi ahotosoɔ ahosiesie mmara so.

Wɔ nnɛ mmerɛ yi mu a, yaredɔm asɛe sikasɛm ne ankorankorɛ abrabɔ yi, ɛnyɛ n’akwan mu sɛ mma Agyenkwa mmɔborɔhunufoɔ no bɛyi nani afiri nokorɛ a ɛwɔ mu sɛ bebree rebrɛ, na waka akyerɛ wɔn anim-anim yi ara sɛ wɔnhyɛ aseɛ nsie aduane ne sika. Mmom ɛno nso nkyerɛ sɛ ɛsɛ sɛ yɛyi yɛn ani firi hia a ɛhia sɛ yɛyɛ ahosiesie nhyehyɛɛ afebɔɔ,”⁵ na mmom sɛ yɛde saa mmara yi bɛyɛ adwuma “wɔ nyansa ne ne kwanso so” ama yɛatumi aka , sɛdeɛ Yosef kaa wɔ Misraim no “ Na aduane wɔ hɔ.”⁶

Awurade nhwehwɛ sɛ yɛbɛyɛ akyɛn deɛ yɛbɛtumi ayɛ, mmom ɔhwehwɛ sɛ yɛyɛ deɛ yɛbɛtumi ayɛ berɛ a yɛbɛtumi ayɛ. Titenani Nelson kaeeɛ yɛn wɔ yɛn amansan nhyiamu a abɛsene no ase sɛ,”Onyankopɔn pɛ animia.”⁷

Mfoni

Woara wo sikasɛm akwankyerɛ Nwoma wɔ kasahodoɔ mu

Asɔre akandifoɔ taa hyɛ Nna a ɛdi Akyire Ahotefoɔ nkuran “sɛ yɛnsiesie yɛn ho ntwɛn asetena mu ahohiahia, sɛ yɛnkora aduane ne nsuo ne sika kakra wɔ sikakorabea.”⁸ Berɛkorɔ no ara wɔhyɛ yɛn sɛ “yɛnhunu nyansa” sɛdeɛ yɛnyɛ deɛ ɛtra so ”⁹ wɔ berɛ a yɛrebɔ mmɔden sɛ yɛbɛkora aduane wɔ fie ne sikakorae. Nnwoma boafoɔ bi a wato din Woankasa Sikasɛm wɔ Ahotosoɔ mu, a wɔtintimm wɔ 2017 a seesei ɛbi wɔ Asɔre Ntenten kwantenpɔn so ɛwɔ kasa 36 mu, hyɛ aseɛ de nkra a ɛfiri Atitenafoɔ a wɔdi Kan a ɛka sɛ:

“Awurade aka sɛ, ‘Ɛyɛ me botaeɛ sɛ me ma M’ahotefoɔ deɛ wɔhia.’ [Nkyerɛkyerɛ ne Apam 104:15]. Saa adiyie yi yɛ bɔhyɛ a ɛfiri Awurade hɔ sɛ Ɔbɛma asetena mu nhyira na wabue ɛpono ama ahotosoɔ.

Moregye ato mu, na mode saa mmara yi reyɛ adwuma no bɛboa mo ama moanya asetena mu nhyira sɛdeɛ Awurade ahyɛ bɔ no.

Yɛto nsa frɛ mo sɛ momfa nsiyɛ nsua, mfa nkyerɛkyerɛ mo abusuafoɔ. Berɛ a moreyɛ saa no, mo abrabɔ bɛyɛ nhyira [efiri sɛ] moyɛ yɛn Agya a Ɔwɔ soro no ba. Ɔdɔ wo na ɔmmpo wo da. Ɔdɔ wo na ɔreboa wo dabiarada, ɔnim wo na wayɛ krado sɛ ɔbɛma wo anya honhom ne honam mu nhyiraa a ɛwɔ ahotosoɔ mu.”¹⁰

Saa nneɛma yi wɔ etire a atu asi hɔ a ɛkyerɛkyerɛ fa sɛ woreyɛ sikasɛm ho nhyɛhyɛeɛ no pɛpɛɛpɛ worebɔ wabusua ho ban afiri ahokyerɛ mu, woretoto sikasɛm mu ahokyerɛ yie ne sɛ woreyɛ ntotoeɛ pa ama daakye, na ɛwɔ ho ma obi ara wɔ asɔre ntentan bea a ɛnam woakandifoɔ a wɔwɔ baabi a wowɔ.

Berɛ a yɛrɛ dwendwene ahosiesie mmra no, yɛbɛtumi abu nkɔmpɔ ahwɛ Yosef wɔ Misrem anya nkanyan. Na ɔnim deɛ ɛbesie nko ara ntumi mma wɔn ntumi nfa “ɔkɔm” mmerɛ no mu wɔ berɛ a wɔn ammia wɔn ani wɔ mmerɛ a na aduane abuso no mu Sɛ anka wɔbɛdi deɛ wɔnyaaɛ nyinaa no, wɔanyɛ no saa, na mmom wɔdii so, a na wɔma obiara nya deɛ ɔhia anim-anim yi ara, ne deɛ na wɔbɛhia no dabi. Na ɛnnwie hɔ sɛ wɔnim ara kwa sɛ mmerɛ a ɛmu yɛ den bɛba. Na ɛsɛ sɛ wɔtu anammɔn, na ɛnam wɔn mmɔdemmɔ nti, na aduane wɔ hɔ.”¹¹

Yei de yɛn kɔ asɛmmisa a ɛhohia bi mu: “Ɛno nti, deɛn?“ Baabi a ɛyɛ a ɛsɛ sɛ yɛhyɛ aseɛ ne sɛ yɛte aseɛ sɛ yɛte aseɛ sɛ biribiara yɛ honhom ma Awurade na berɛbiara nni hɔ a wama yɛn mmara a na ɛyɛ honhom mul.”¹² Eno nti, biribiara, kyerɛ Yesi Kristo so, sɛ fapem a ɛso na ɛsɛ sɛ yɛkyekyereɛ mpo wɔ yɛn honam mu ahosiesie mu.

Yɛreyɛ honam mu ahosiesie na yɛato yɛn ho so no bi ne sɛ: yɛnam Yesu Kristo adom anaa sɛ n’ahoɔden tumi no ne yɛn ara yɛn mmɔdummɔ so, yɛtumi nya honhom ne honam mu adehiadeɛ a ɛhia ma yɛ ne yɛn abusuafoɔ”¹³

Deɛ ɛka ho bio a ɛfa honhom ne honam mu ahosiesie bi ne sɛ: yɛreyɛ no wɔ nyansa ne ne kwan so,”¹⁴ a ɛkyerɛ sɛ, yɛfiri mmerɛ tenten akora aduane ama ho kwan na deɛ ɛtɔ so mmienu yɛregye akwan “nketenkete a ɛyɛ mmerɛ” ato mu ” ,¹⁵ no kyerɛ gyedie sɛ Awuradu bɛpagya yɛn nam yɛn mmɔdemmɔ nketenkete a yɛbɔ no daadaa no so.

Honhom mu fapem wɔ hɔ yi, yɛbɛtumi de nneɛma mmienu a ɛhia, a ɛyɛ honam mu ahosiesie—sikasɛm ntotoeɛ ne efie adekora a ayɛ adwuma wɔ nkonimdie mu.

Mmara a ɛhia sɛ yɛbɛtumi ama yɛatoto sikasɛm yie bi ne sɛ: yɛbɛtua ntotosoɔ du ne afɔrebɔ ahodoɔ; yɛbɛtua yɛn aka na yɛatwe yɛn ho afiri ɛka ho sɛdeɛ ɛbɛtumi ayɛ yie ama yɛn, yɛresiesie yɛn ho adi yɛn sikadie nhyehyeɛ so, na yɛakora sika ama daakye.

Efie adekora mmara a ɛhia pa ara bi ne aduane kora, nsu kora wɔ baabi a ɛbɛtumi ayɛyie; na afei ahiadeɛ afoforɔ a ɛgyina sɛdeɛ abusua no bɛhia so ne nyinaa ne sɛ “adekorabea a ɛyɛ pa ara” yɛ efie”¹⁶ ia ɛbɛyɛ akoradeɛ a yɛn nsa bɛtumi atɔ so wɔ dahia berɛ mu.”¹⁷

Berɛ a yɛregye honhom mu mmara ato mu na yɛahwehwɛ nkanyan afiri Awurade hɔ yɛbɛnya akwankyerɛ ama yɛhunu Awurade no pɛ a ɔwɔ ma yɛn sɛ ankorankorɛ ne sɛ mmusua ne ɔkwan pa a yɛbɛfaso de nkyerɛkyerɛ a ɛhia wɔ asetena mu ahosiesie ayɛ adwuma. Anammɔn a ɛhia pa ara wɔ ne nyinaa mu ne sɛ, yɛbɛhyɛ aseɛ.

Ɔpanin Bednar kyerɛkyerɛɛ saa mmara yi mu yie anoteɛ so berɛ a ɔkaa sɛ, “Moretu anammɔn kyerɛ gyedie anammɔntuo. Nokorɛ gyedie ne deɛ ɛwɔ na ɛgyina Yesu Kristo mu na ɛde kɔ anammɔntuo mu berɛ biara.”¹⁸

Anuanom mmarima ne mmaa, wɔ wiase a ɛresesa dabiara yi mu no, ɛsɛ sɛ yɛsiesie yɛn ho ma deɛ yɛn ani nna soɔ no. Sɛdeɛ ɛnnɛ wiase yi mu asetena ayɛ den ama dodoɔ a ɛwɔ wiase nyinaa no, yɛnim sɛ nkokoɔ ne bonhwa a ɛwɔ asetena mu bɛkɔ so. Bere a yɛrehwehwɛ sɛ yɛbɛsiesie yɛn ho wɔ honam mu no, yɛbɛtumi ahyia abrabɔ mu nsɔhwɛ nam awerɛhyɛm a ɛkɔ nkan, asomdwoeɛ wɔ yɛnakoma mu te sɛ Yosef a na ɔwɔ Misraim a, yɛbɛtumi aka sɛ, na Aduane wɔ hɔ.”¹⁹ Wɔ Yesu Kristo din mu, amen.