O Loo ia i Tatou le Atua

A o ou manatunatu loloto i nei fesili, sa ou mafaufau e uiga i a tatou faifeautalai talavou Amerika o ē sa galulue ma i matou i na tausaga. Sa latou tuua le saogalemu o o latou aiga i se mea mamao na’ua ae malaga atu i Siamani—o le laueleele o o latou fili i lena taimi—e ofo atu le faamoemoe faalelagi i o matou tagata. Latou te le’i o mai e tuua’ia, fai ni tautalaga, pe faamaasiasia. Sa latou tuuina atu ma le loto o latou soifua talavou e aunoa ma se mafaufau ia maua ai ni mea faalelalolagi, ae sa na ona mananao e fesoasoani i isi ia maua le olioli ma le filemu sa o latou maua.

Ia te a’u, o nei alii ma tamaitai talavou sa atoatoa. Ou te talitonu sa i ai o latou faaletonu, ae ou te le’i vaai i ai. O le a ou mafaufau pea i le maualuga o o latou uiga auaumama—o agelu o le malamalama ma le mamalu, o faife’au o le mutimutialofa, agalelei, ma le upumoni.

E ui ina magoto ifo le lalolagi i le masalosalo, feitaga’i, feinoinoa’i, ma le atuatuvale, ae o faata’ita’iga ma a’oa’oga a nei talavou ua faatumuina ai a’u i le faamoemoe. O le savali o le talalelei sa latou ofoina mai na sopo’ia ai tuaoi faaupufai, talafaasolopito, inoino, faitioga, ma mea patino faaletagata. Na aumaia ai ni tali faalelagi i a matou fesili taua i na taimi faigata.

O le savali e faapea, sa soifua le Atua ma sa manatu popole mai ia i matou, e oo lava i na itula o fesoua’iga, femēmēa’i, ma le vevesi. Na Ia faaali moni mai i o tatou taimi e toefuatai mai le upumoni ma le malamalama—Lana talalelei ma Lana Ekalesia. Ua toe fetalai mai o Ia i perofeta; o loo i ai le Atua ma i tatou—ma o loo aofia patino ai i o tatou olaga ma o loo ta’ialaina Ana fanau.

E maofa i mea e mafai ona tatou a’oa’oina pe a tatou vaavaai teisi atu i le fuafuaga o le faaolataga ma le faaeaga a lo tatou Tama Faalelagi, le fuafuaga o le fiafia, mo Ana fanau. Pe a tatou lagonaina le faatauvaa, tuli’esea, ma le faagaloina, tatou te a’oa’o ai e mafai ona tatou mautinoa e le o faagaloina i tatou e le Atua—o le mea moni, ua Ia ofoina mai i Ana fanau uma se mea e le’i mafaufauina: ia avea ma “suli o le Atua ma suli-faatasi ma Keriso.”²

O le a le uiga o lea mea?

O le a tatou ola e faavavau, maua se atoaga o le olioli,³ ma maua le gafatia e “mautofi i nofoalii, malo, itumalo, ma mana, ma puleaga.”⁴

E matua faalotomaualaloina lava le iloa ai o lenei lumanai ofoofogia ma le paia e mafai ona maua—e le ona o o tatou tagata, ae ona o le Atua lava ia.

O le iloa ai la o lenei mea, pe mafai faapefea ona tatou muimui pe tumau pea i le ita? Pe mafai ea faapefea ona papa’u lo tatou faamoemoega mo i tatou lava, ae o loo valaaulia i tatou e le Tupu o tupu e sosola i se lumanai e le’i mafaufauina o le fiafia faalelagi?⁵

Ona o le alofa atoatoa o le Atua mo i tatou ma le taulaga e faavavau a Iesu Keriso, ua mafai ai ona soloiesea ma lē toe manatuaina a tatou agasala—tetelē ma laiti.⁶ E mafai ona tatou tutū atu i Ona luma ma le mamā a’iai, agavaa, ma ua faapaiaina.

Ua taumasuasua lo’u loto i le faafetai mo lo’u Tama Faalelagi. Ua ou iloaina Na te le’i faatafunaina Ana fanau e tautevateva i le olaga nei e aunoa ma se faamoemoe mo se lumanai susulu ma le faavavau. Sa Ia tuuina mai faatonuga e faaalia mai ai le ala e toe foi atu ai ia te Ia. Ma i le totonugalemu o nei mea uma o Lona Alo Pele, o Iesu Keriso⁷ ma Lana taulaga mo i tatou.

O le Togiola e le i’u a le Faaola ua suia atoa ai le ala e mafai ona tatou vaavaai atu ai i a tatou solitulafono ma ni lē atoatoa. Nai lo le nofoa’i i na mea ma lagonaina le lē matogiolaina, e mafai ona tatou a’oa’o mai ai ma lagonaina le faamoemoe.⁸ O le meaalofa faamamā o le salamo e mafai ai ona tatou tuua i tua a tatou agasala ma tutula’i a’e o ni tagata fou.⁹

Ona o Iesu Keriso, e le tau faamatalaina ai i tatou i o tatou to’ilalo. E mafai ona latou faaleleia i tatou.

E faapei o se fuafaatatau faamusika e faata’ita’i ai, e mafai ona tatou vaai i o tatou laasaga e misi, faaletonu, ma agasala o ni avanoa e te iloa atili ai oe lava ia, alofa loloto atu ma le faamaoni atili mo isi, ma le faaleleia atili e ala i le salamo.

Afai tatou te salamo, e lē faalēagavaaina i tatou e measese. O vaega na o lo tatou alualu i luma.

O tamameamea i tatou uma pe a faatusatusa i tagata o le mamalu ma le paia ua mamanu i tatou ia avea ai. E leai se tagata e totolo ma savali ma tamoe e aunoa ma le pa’ū faafia, feto’ai, ma ni uno’oa. O le auala lena tatou te aoao ai.

Afai tatou te faata’ita’i pea lava pea, ma tauivi e le aunoa e tausi i poloaiga a le Atua, ma tuuto atu a tatou taumafaiga ia salamo, tumau, ma faaaoga mea tatou te aoaoina, o lea fuaiupu ma lea fuaiupu, o le a tatou faaputuputuina le malamalama i o tatou agaga.¹⁰ E ui foi atonu tatou te lē malamalama atoatoa i lo tatou gafatia atoa i le taimi nei, ae “Ua tatou iloa, pe a faaali mai [le Faaola],” o le a tatou vaai i Ona foliga ia i tatou ma “o le a tatou vaai ia te ia e pei ona i ai o ia.”¹¹

E maeu lea folafolaga mamalu!

Ioe, ua matua vevesi le lalolagi. Ma ioe, e i ai o tatou vaivaiga. Ae e lē tatau ona tatou autilo i lalo ma le faasiasia, aua e mafai ona tatou faalagolago i le Atua, e mafai ona tatou faalagolago i Lona Alo, o Iesu Keriso, ma e mafai ona tatou taliaina le meaalofa o le Agaga e taialaina ai i tatou i luga o lenei ala agai atu i se olaga e tumu i le olioli ma le fiafia faalelagi.¹²

E tele ina ou tomanatu, Pe o le a se mea e a’oa’o mai e Iesu ma faia pe afai e i ai o Ia ma i tatou i le asō?

Ina ua mavae le Toetu, sa faataunuuina e Iesu Keriso Lana folafolaga e asiasi atu i “isi Ana mamoe.”¹³

O le Tusi a Mamona: O Se Tasi Molimau ia Iesu Keriso o loo talanoa i lena faaali atu i tagata o le konetineta o Amerika. Ua ia i tatou lea faamaumauga taua e fai ma molimau tino i le galuega a le Faaola.

O tagata o le Tusi a Mamona na nonofo i le isi itu o le lalolagi—o o latou talaaga, aganuu, ma tulaga faaupufai sa matuā ese lava mai tagata sa a’oa’o e Iesu i le taimi o Lana misiona i le tino. Ae na Ia a’oa’o atu ia i latou le tele o mea lava e tasi na Ia a’oa’o atu i le Nuu Paia.

Aisea na Ia faia ai lena mea?

E a’oa’o atu lava e le aunoa e le Faaola upumoni e faavavau. E faatatau i tagata o tupulaga uma ma soo se tulaga.

O Lana savali i lena taimi ma le taimi nei, o le savali o le faamoemoe—o se molimau e le’i tuulafoaiina lava e le Atua lo tatou Tama Faalelagi i tatou o Ana fanau.

O loo ia i Tatou le Atua!

Lua selau tausaga talu ai, na toe fo’i mai ai le Faaola i le Lalolagi. Faatasi ai ma le Atua le Tama, na faaali atu ai o Ia ia Iosefa Samita e 14-tausaga le matua ma amatalia ai le Toefuataiga o le talalelei ma le Ekalesia a Iesu Keriso. Mai lava i lena aso agai i luma, na tatalaina ai le lagi, ma afifio ifo ai avefeau faalelagi mai maota o le mamalu o le tino ola pea. Na liligi ifo le malamalama ma le poto mai le nofoalii selesitila.

Na toe fetalai mai le Alii o Iesu Keriso i le Lalolagi.

O le ā Lana fetalaiga?

Mo o tatou faamanuiaga, o le tele o Ana afioga o loo tusifaamaumauina i le Mataupu Faavae ma Feagaiga—o loo i ai mo soo se tasi i le lalolagi o ē fia mananao e faitau ma suesue i ai. E ma’eu le taua o nei afioga ia i tatou i le taimi nei!

Ma e le tatau ona ofo i le iloa ai na toe a’oa’o mai e le Faaola le savali autu o Lana talalelei: “Ia e alofa atu i le Alii lou Atua ma lou loto atoa, ma lou manatu atoa, mafaufau, ma le malosi; ma ia e auauna atu ia te ia i le suafa o Iesu Keriso.”¹⁴ Ua Ia musuia i tatou e saili le Atua¹⁵ ma ola i a’oa’oga ua Ia faaalia i Ana auauna, o perofeta.¹⁶

Ua Ia a’oa’o mai i tatou ia fealofani¹⁷ ma ia “tumu i le alofa mamā mo tagata uma.”¹⁸

Ua Ia valaaulia i tatou ina ia avea ma Ona a’ao, e o e fai mea lelei.¹⁹ “Aua ne’i tatou alolofa tau o le upu ma le gutu, a o le amio ma le faamaoni.”²⁰

Ua Ia lu’iina i tatou ia ua’i atu i Lana poloaiga sili: ia alolofa, ia fefaasoaa’i, ia valaaulia tagata uma i Lana talalelei ma Lana Ekalesia.²¹

Ua Ia poloaiina i tatou e fauina malumalu paia ma ia ulu atu i ai ma galulue ai iina.²²

Ua Ia a’oa’o mai i tatou ia avea ma Ona soo—e lē tatau ona tatou naunau atu i le malosi’aga faaletagata, tamao’aiga, faamaoniga, po o tulaga. Ua Ia a’oa’o mai i tatou ia “tuuese mea a lenei lalolagi, a ia saili i mea a se lalolagi sili atu.”²³

Ua Ia uunaia i tatou e saili le olioli, malamalamaaga, filemu, upumoni, fiafia,²⁴ ma le folafolaga o le tino ola pea ma le ola faavavau.²⁵

Ia tatou tuu atu i lenei mea se isi laasaga i luma. Faapea la na afio mai Iesu i le tou uarota, paranesi, po o lo outou fale i le asō. Pe mata na faape’ī?

Semanu e silasila tonu atu lava i lou loto. O le a le toe i ai se taua o foliga mai fafo. Semanu Na te silafia lelei lou tagata. Semanu Na te silafia lelei ou faanaunauga.

Semanu Na te si’i a’e e agamalu ma lotomaualalo.

Na te faamalolo i e mama’i.

Semanu Na te faatumuina e masalosalo i le faatuatua ma le lototoa e talitonu ai.

Semanu Na te aoao i tatou ia tatala atu o tatou loto i le Atua ma aapa atu i isi.

Semanu Na te faailoa aloaia ma faamamaluina lo tatou faamaoni, lotomaualalo, amiosa’o, faatuatua, agaalofa, ma le alofa mama.

Na o se tasi se vaai atu i Ona fofoga o le a le toe tutusa ma le mea na tatou i ai. Semanu o le a tatou suia e faavavau. E ao ina suia i tatou i le iloa maoae ua i ai, e moni, o loo ia i tatou le Atua.

Ou te toe mafaufau i tua ma le agalelei i lo’u talavou sa i ai i tausaga o lo’u tuputupu a’e. Pe ana mafai ona toe ki i tua le taimi, semanu ou te faamafanafanaina o ia ma ta’u atu ia te ia e saili pea. Ma o le a ou fai atu ia te ia e valaaulia Iesu Keriso i lona olaga, aua o loo i ai le Atua ma i tatou!

Ia te outou, o’u uso e ma tuafafine pele, ma ia te outou uma o ē o loo saili mo ni tali, upumoni, ma le fiafia, ou te ofoina atu lea lava fautuaga e tasi: Ia saili pea ma le faatuatua ma le onosai.²⁷

Ōle atu, ona outou maua ai lea. Tuʼituʼi atu, ma o le a tatala atu ia te outou²⁸ Ia faalagolago i le Alii.²⁹

I o tatou olaga i aso taitasi, o lo tatou tiute aupito taua ma le avanoa manuia o le fetaiai ma le Atua.

A tatou tuuese le faamaualuga ae faalatalata atu i Lona nofoalii ma se lotomomomo ma se agaga salamo,³⁰ o le a Ia faalatalata mai ia te i tatou.³¹

A tatou saili e mulimuli ia Iesu Keriso ma savavali i le ala o le avea ma so’o, i lea fuaiupu ma lea fuaiupu, o le a oo mai le aso o le a tatou maua ai lena meaalofa e le’i mafaufauina o le mauaina o se atoaga o le olioli.

A’u uo pele, e alofa lo outou Tama Faalelagi ia te outou i se alofa atoatoa. Ua Ia faamaonia mai Lona alofa i mau ala e lē uma, ae e sili atu i lo mea uma e ala i le ofoina mai o Lona Alo Pele e Toatasi na Fanaua e fai ma taulaga ma avea ma se meaalofa mo Ana fanau ina ia tino moni mai ai le toefoi atu i o tatou matua faalelagi.

Ou te tuuina atu la’u molimau o loo soifua lo tatou Tama Faalelagi, o Iesu Keriso o loo ta’iulu i Lana Ekalesia, ma o Peresitene Russell M. Nelson o Lana perofeta.

Ou te ofo atu ia te outou o’u alofa’aga ma faamanuiaga i lenei vaitau fiafia o le Eseta. Tatala atu o outou loto i lo tatou Faaola ma le Togiola, po o a lava ou tulaga o i ai, tofotofoga, mafatiaga, po o measese; e mafai lava ona outou iloa o loo soifua o Ia, e alofa o Ia ia te outou, ma ona o Ia, o le a le tuua ai na’o outou.

O loo ia i tatou le Atua.

Ou te molimau atu ai i nei mea i le suafa paia o Iesu Keriso, amene.