O Iesu Keriso: O Le Tausisoifua o o Tatou Agaga

O’u uso e ma tuafafine pele, i lenei taeao matagofie o le Eseta, ua olioli lo’u loto i le manatuaina o le faatinoga aupito ofoofogia, aupito mamalu, ma aupito lemafuatiaina na tupu i le talafaasolopito uma o le tagata soifua—o le taulaga togiola lea a lo tatou Alii o Iesu Keriso. O upu lauiloa a le perofeta o Isaia ua faalauteleina ai le maoae ma le le manatu faapito o le afio ifo o le Faaola ma le taulagaina e fai ma sui o fanau uma a le Atua:

“E moni ua na tauave o tatou tiga, ma na tauave o tatou faanoanoa: a ua tatou manatu o ia ua taia, ua fasia e le Atua, ma ua faatigaina.

“A ua manu’a o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea; o ona faalavalava foi ua malolo ai tatou.”¹

E ala i le tauaveina e Ia lava i Ona luga o agasala a tagata uma, na tu’itu’ia ma le faalealofa i luga o le satauro, ma faatoilalo ma le manumalo ai le oti i le aso tolu,² na tuuina mai ai e Iesu se faataua sili ona paia i le sauniga o le Paseka lea na faaee atu i luga o Isaraelu i aso anamua.³ I le faataunuuina o le valoaga, na Ia ofoina atu ai Lona lava tino ma le toto taua e avea ma taulaga faai’u ma le sili,⁴ ma ua faatino aloaia ai faailoga faaleuputu’u na faaaogaina i le faamanatuina o le Paseka a le Alii.⁵ O le faia o lena mea, na oo ai Keriso i mafatiaga faaletino ma faaleagaga lea e le mafai ona malamalama i ai le mafaufau o le tagata soifua. Sa fetalai mai le Faaola lava Ia:

“Aua faauta, o Au, le Atua, na mafatia i nei mea mo tagata uma, …

“O le mafatia lea na oo ai ia te a’u lava, o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou lē inuina le ipu oona, ma ma’e’e’e—

“E ui i lea, ia i ai i le Tama le viiga, ma sa ou inu ma faauma ai a’u tapenapenaga mo le fanauga a tagata.”⁶

Sa faataunuuina ma le faatamalaii e Keriso le finagalo o le Tama⁷ e ala i Lana taulaga e le i’u ma le alofa mutimutivale. Na Ia manumalo i le tui o le oti faaletino ma le faaleagaga,⁸ na folasia mai i le lalolagi e ala i le Pa’ū,⁹ ma ofoina mai ai ia i tatou le avanoa mo le faaolataga e faavavau.¹⁰

Ua na o Iesu lava le Tagata e mafai ona faataunuuina lenei taulaga e faavavau ma le atoatoa mo i tatou uma.¹¹ Sa filifilia o Ia ma muai faauuina i le Fono Sili i le Lagi, ma a o le’i faa’auiviina lenei lalolagi.¹² E le gata i lea, o le fanau mai i se tina i la le tino, na Ia maua ai le oti faaletino, ae mai le Atua, i le avea ai ma Alo e Toatasi na Fanaua a le Tama, na Ia maua ai le mana e tuu atu ai i lalo Lona lava soifua ma toe aumai.¹³ E le gata i lea, sa soifua Keriso i se soifuaga e atoatoa lelei lea sa aunoa ma se ila ma, o lea sa saoloto ai o ia mai poloaiga a le faamasinoga tonu.¹⁴ I isi taimi, sa aoao mai ai le Perofeta o Iosefa Samita:

“E le mafai ona oo mai le faaolataga i le lalolagi e aunoa ma le puluvaga a Iesu Keriso.

“Sa saunia e le … Atua se taulaga i le meaalofa o Lona lava Alo, o lē e tatau ona auina mai i le taimi e tatau ai e … tatalaina se faitotoa lea e mafai ai e le tagata ona ulufale atu i le afioaga o le Alii.”¹⁵

E ui ina sa aveese mai e le Faaola e aunoa ma ni tuutuuga ia aafiaga o le oti faaletino e ala i Lana taulaga,¹⁶ ae Na Te le’i aveesea ai lo tatou lava tiutetauave ia salamo mai solitulafono tatou te faia.¹⁷ Nai lo lena, ua Ia tuuina mai ia te i tatou se valaaulia agaalofa ia faalelei ma lo tatou Tama Faavavau. E ala atu ia Iesu Keriso ma Lana taulaga togiola, ua mafai ai ona tatou oo i se suiga tele o le mafaufau ma le loto, ma aumaia se uiga faaalia fou, e le gata i le Atua ae faapena i le olaga aoao.¹⁸ Pe a tatou salamo ma le lotofaamaoni mai a tatou agasala ma liliu atu o tatou loto ma agaga i le Atua ma Ana poloaiga, e mafai ona tatou maua Lana faamagaloga ma lagona le tosinaga tele naua a le Agaga Paia. Ma le alofa mutimutivale, tatou tele oo ai i le loloto o mafatiaga na onosa’ia e le Faaola.¹⁹

O le meaalofa o le salamo o se faaaliaga lea o le agalelei o le Atua i Ana fanau ma o le faapupulaga foi lea o Lona mana e lē mafaatusalia e fesoasoani ia tatou manumalo ai mai solitulafono tatou te faia. O se faamaoniga foi lea o le onosai ma le talitiga o lo tatou Tama Faalelagi alofa mo o tatou vaivaiga ma faaletonu faaletino. Sa ta’ua e Peresitene Russell M. Nelson, lo tatou perofeta pele, lenei meaalofa o “le ki i le fiafia ma le filemu o le mafaufau.”²⁰

A’u uo pele, ou te molimau atu ia te outou, a tatou salamo faamaoni mo a tatou agasala,²¹ ua tatou faatagaina le taulaga togiola a Keriso ia aoga atoatoa i o tatou olaga.²² O le a tatou saoloto mai le pologa o le agasala, maua le olioli i la tatou malaga i le lalolagi, ma agavaa e maua le faaolataga e faavavau, lea sa saunia mai le faavaega o le lalolagi mo i latou uma o e talitonu ia Iesu Keriso ma o mai ia te Ia.²³

E faaopoopo atu i lenei meaalofa mamalu o le faaolataga, ua ofoina mai foi e le Faaola mo i tatou le toomaga ma le faamafanafanaga ao tatou feagai ma puapuaga, tofotofoga, ma vaivaiga o le olaga nei, e aofia ai tulaga ua tatou oo i ai i le faama’i oti i le taimi nei. E mafai ona ou faamautinoa atu e silafia e le aunoa e Keriso ia faigata tatou te oo i ai i le olaga nei. E malamalama o Ia i mea oona, matuitui, mafatiaga, ma tiga faaletino uma faapea foi i luitau faalelagona ma faaleagaga tatou te fetaiai. Ua faatumulia le loto o le Faaola i le alofa mutimutivale, ma ua Ia saunia pea e fesoasoani mai ia i tatou. E mafai lenei mea ona sa Ia oo i ai ma tauaveina i Ona lava luga i le tino le tiga o o tatou vaivaiga ma lē atoatoa.²⁴

Faatasi ai ma le agamalu ma le maualalo o le loto, sa Ia afio ifo ai i lalo o mea uma ma taliaina le tauemuina, teenaina, ma le faamaasiasia e tagata, ma sa manu’a mo a tatou solitulafono ma amioleaga. Sa puapuagatia o Ia i nei mea mo tagata uma, ma tauaveina i Ona lava luga agasala uma a le lalolagi,²⁵ ma avea ai [o Ia] ma o tatou tausisoifua faaleagaga.

A tatou faalatalata atili atu ia te Ia, ma tuuina atu i tatou lava faaleagaga i Lana tausiga, o le a mafai ona tatou tauaveina i o tatou lava luga Lana amo, lea e faigofie, ma Lana avega, lea e mamā, ona tatou maua ai lea o lena faamafanafanaga ma le malologa folafolaina. E le gata i lea, o le a tatou maua le malosi tatou te manaomia uma e faatoilalo ai faigata, vaivaiga, ma faanoanoaga o le olaga, lea e matuai faigata lava ona onosaia e aunoa ma Lana fesoasoani ma le mana faamalolo.²⁶ Ua aoao mai tusitusiga paia ia i tatou “ia tuuina atu ia Ieova o mea e te popolevale ai, o ia lava na te tausia oe.”²⁷ “Ma ona talosia lea ia tuuina mai e le Atua ia te [i tatou] ia mama a [tatou] avega, e ala i le olioli o [Lona] Alo.”²⁸

Ata

O Regina ma Mario Emerick

Ina ua tulata i le faaiuga o le tausaga na te’a nei, sa ou faalogo ai ua maliliu se ulugalii pele, o Mario ma Regina Emerick, o e sa faamaoni i le Alii ma sa maliliu e fa aso na va ai le tasi mai le isi, ona o toatuga o le KOVITI-19.

O se tasi o o laua atalii, o loo avea ma se epikopo i le taimi nei i Pasila, na faamatala maia le tala lenei ia te a’u: “Sa matuai faigata tele le vaai atu i o’u matua ua tuua lenei lalolagi i lena tulaga, ae sa manino lo’u lagonaina o le aao o le Alii i lo’u olaga i le lotolotoi o lena mala, ona sa ou maua le malosiaga ma le filemu lea e sili mamao atu i lo’u malamalama. Na ala i lo’u faatuatua ia Iesu Keriso ma Lana Togiola, sa ou maua ai le fesoasoani faalelagi e faamalolosia ai ma faamafanafanaina tagata o lo’u aiga ma i latou uma o e sa fesoasoani ia i matou i le taimi o lenei aafiaga faigata. E ui ina sa le’i tupu le vavega lea sa faamoemoe i ai tagata uma, ae o a’u o se molimau patino i le tele o isi vavega na tutupu i lo’u lava olaga ma i olaga o tagata o lo’u aiga. Sa ou lagonaina le filemu e lē mafaamatalaina lea na tuia ai le o’oo’oga o lo’u loto, ma aumaia ai ia te au le faamoemoe ma le mautinoa i le alofa o le Faaola mo a’u ma i le fuafuaga o le fiafia a le Atua mo Ana fanau. Sa ou aoaoina e faapea, o aso e aupito sili ona tumu i le faavauvau, e faaloaloa mai ai pea lava aao alofa o le Faaola pe a tatou sailia o Ia ma o tatou loto, mana, mafaufau, ma le malosi atoa.”

Ata

Aiga o Emerick

O’u uso e ma tuafafine pele, i lenei Aso Sa o le Eseta, ou te tuuina atu la’u molimau aloaia na toetu mai Iesu mai le oti ma o loo soifua o Ia. Ou te molimau atu ia te outou e faapea, na ala mai ia te Ia ma Lana Togiola e le iu, na saunia ai e le Faaola mo i tatou le ala e faatoilalo ai le oti, i le faaletino ma le faaleagaga. E faaopoopo i nei faamanuiaga maoae, ua Ia ofoina mai mo i tatou le faamafanafanaga ma le faamautinoaga i taimi faigata. Ou te faamautinoa atu afai tatou te tuu atu lo tatou faatuatuaga ia Iesu Keriso ma Lana Togiola, ma tumau i lo tatou faatuatua e oo i le iuga, o le a tatou olioli i folafolaga a lo tatou Tama Faalelagi pele, o le o loo naunau e faia mea uma i Lona mana e fesoasoani ai ia te i tatou ia toe foi atu i Lona afioaga i se aso. O Lana galuega ma Lona mamalu lenei!²⁹ Ou te molimau atu ia te outou o Iesu o le Keriso, o le Togiola o le lalolagi, o le Mesia sa folafolaina, o le Toetu ma le Ola.³⁰ Ou te faasoa atu ai ia te outou nei upumoni, i Lona suafa paia, le Alo Pele e Toatasi na Fanaua o le Tama, o lo tatou Alii, o Iesu Keriso, amene.