O Le Malamalama e Pipii i le Malamalama

O’u uso e ma tuafafine pele, ou te olioli faatasi ma outou i lenei Aso Sa manuia o le Eseta tatou te mafaufau ai i le malamalama mamalu na suluia ai le lalolagi i le Toetu o lo tatou Alii ma le Faaola o Iesu Keriso.

I le taimi o Lana misiona i le olaga nei, na fetalai ai Iesu: “O A’u nei o le malamalama o le lalolagi: o le mulimuli mai ia te au, e le savali o ia i le pouliuli, a e ia te ia le malamalama o le ola.”¹ Ua i ai le Agaga o Keriso “i totonu o mea uma [ma] lea ua tuuina le ola i mea uma.”² Ua ia manumalo i le pouliuli lea semanu e siomia ai i tatou.

I le tele o tausaga ua mavae, a o sailiilia ni mea fou, sa matou o faatasi ai ma o’u atalii e toalua ma se vaega o Alii Talavou i le Moaning Cavern [Ana Oi], ua faaigoaina ai ona o se leo sa manu mai lona gutu i se tasi o taimi. O le ana o se ana-vaiti lea e matala atu i se afeafe tu e 180-futu-le loloto (55 m), o le afeafe-ana tutasi aupito tele i Kalefonia.

Ata

Moaning Cavern [Ana Oi]

E na o le lua lava auala e o ai i lalo: o le alafaasitepu taamilomilo saogalemu po o le faasee i lalo i se maea; sa matou filifili ma o’u atalii e faasee i le maea. Na alu muamua lo’u atalii matua ae ma mulimuli ma lo’u atalii lona lua ma le faamoemoe ia ma o ifo faatasi i lalo.

Ina ua uma ona faatonu ma faamautu le saogalemu e o matou ta’ita’iala i le fusi faatasia o i ma’ua i se masini e taula ai i se maea malosi, sa matou me’i teisi i tua seia oo ina ma tutu i luga o se tama’i mati’e ma tuufaatasia ai lo ma talitonu mautinoa, aua o le toe nofoaga lenei e toe faliu ai, ma o le nofoaga mulimuli foi lenei e mafai ai ona ma vaai i se sulu o le la mai le gutu o le ana.

O le isi a ma la’a i tua na auato ifo ai i ma’ua i se afeafe tele o le ana, sa matua maualuga ma lautele ma e mafai lava ona ofi ai le Faatagata o le Saolotoga. O iina na ma taupeupe ai i se taavilivili faifai malie, a o taufetuunai o ma mata i le pogisa tele. A o faaauau pea ona ma faaifoifo i lalo, sa faamalamalamaina e le susulu o malamalama faaeletise se puipui ofoofogia o le fe’ilafi o le fausaga o papa ma le fausaga faaminerale sa taupe ifo i le taualuga o le ana.

E aunoa ma se lapataiga, sa faafuase’i ona pepe moli. A o faataupe ai i luga a’e o le ava ua foliga e leai se fola, sa ufitia i ma’ua i le pogisa ogaoga tele e oo lava i o ma lima i luga o maea i o ma luma sa le mafai ona iloa. Sa vave ona valaau mai se leo, “Tama, tama, o e i ai iina?”

“O lea ou te iinei atalii, lea ou te iinei,” sa ou tali atu ai.

O le pepe faafuasei o moli sa mamanuina e faailoa mai ai a leai se eletise, o le pogisa o le ana e le mafuatiaina. Na manuia; aua na ma “lagonaina” le pouliuli. Ina ua toe ola mai moli, sa mou vave loa le pogisa, aua e tatau lava ona siilima le pogisa i taimi uma, e oo lava i sina malamalama e tau le iloa. Sa matou o mai ma o’u atalii ma se aafiaga o se pogisa matou te lei iloaina lava muamua, ma se talisapaia sili atu o le malamalama o le a le mafai lava ona faagaloina, ma le mautinoa e le tuulafoaiina lava i matou i le pogisa.

O la matou o ifo i lena ana e i se itu e talitutusa ai ma la tatou malaga i le olaga nei. Sa tatou tuua le malamalama mamalu o le lagi ma o ifo ai e ala i le veli o le lotogalo i se lalolagi pogisa. E lei lafoa’iina e lo tatou Tama Faalelagi i tatou i le pogisa ae na Ia folafola mai ia i tatou le malamalama mo la tatou malaga e ala mai i Lona Alo pele, o Iesu Keriso.

Ua tatou iloa o le malamalama o le la e taua i ola uma i le lalolagi. E tutusa le taua i lo tatou ola faaleagaga, le malamalama lea e faapogai mai i lo tatou Faaola. I Lona alofa e atoatoa, ua ofo mai ai e le Atua le malamalama o Keriso i tagata uma “e o mai i le lalolagi”³ ia o latou “iloa le lelei mai le leaga”⁴ ma ia uunaia ai “e faia pea le lelei.”⁵ O lena malamalama, e faaalia mai o ia lava e ala i mea e masani ona tatou faaigoa o lo tatou manatu fuatiaifo, e valaaulia i tatou ia galulue ma ia sili atu, ia avea ma tagata sili e mafai ona tatou i ai.

A tatou faateleina lo tatou faatuatua ia Keriso, tatou te maua le malamalama i se fuataga ua faateleina seia oo ina tafiesea lea pogisa uma e ono lofituina ai i tatou. “O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai.”⁶

O le malamalama o Keriso e saunia ai i tatou ia maua le tosinaga faaleauaunaga a le Agaga Paia, o “le mana faatalitonu o le Atua … o le moni o le Talalelei.”⁷ O le sui auai lona tolu o le AigaAtua, o le Agaga Paia “o se peresona o le Agaga.”⁸ O le punavai aupito tele o le malamalama lea ua tuuina mai e le Tama Faalelagi ia te oe i le olaga nei, e maua mai e ala i le Agaga Paia, o lana tosinaga “o le a faamalamalama ai lou mafaufau [ma] faatumuina ai lou agaga i le olioli.”⁹

“I Le Ekalesia a Iesu Keriso o le Au Paia o Aso e Gata Ai, e ala i le pule o le perisitua ua toefuatai mai, e papatisoina ai oe e ala i le faatofuina mo le faamagaloina o agasala. Ona, faaee lea o lima i luga o lou ulu ma faaee atu i ou luga lenei “meaalofa le leoa” ofoofogia, o¹⁰ le Agaga Paia.

A mae’a, a faatotonugalemu ou manaoga ma faatinoga i luga o le ala o feagaiga, o le a faaali atu ia te oe e le Agaga Paia, e fai ma malamalama i totonu ia te oe, ma molimau atu i le upumoni,¹¹ lapataia oe i mea matautia, faamafanafana¹² ma faamama,¹³ ma avatu le filemu¹⁴ i lou agaga.

Ona o le “malamalama e pipii i le malamalama”¹⁵ o le mafutaga faifaipea a le Agaga Paia o le a ono taitai atu ai oe e faia filifiliga o le a tausisia ai oe i totonu o le malamalama; ae o filifiliga e faia e aunoa ma le tosinaga a le Agaga Paia o le a ono taitai atu ai oe i atalafoia ma le pogisa. Na aoao mai Elder Robert D. Hales: “A i ai le malamalama ona solaese lea o le pogisa ma ua tatau ona tuumuli ese. … A i ai le malamalama faaleagaga o le Agaga Paia, ona alu ese ai lea o le pouliuli o Satani.”¹⁶

Se’i ou fautauina atu lava e faapea, atonu o le taimi lenei e te fesili ifo ai ia te oe lava: Pe o ia te a’u lena malamalama i lo’u olaga? Afai e leai, o le a le taimi mulimuli na i ai ia te au?

E pei lava o le susulu o le la e suluia ai le lalolagi i aso uma e toe faafou ma tausia ai le ola, e mafai ona e faasusuluina i aso uma le malamalama i totonu ia te oe pe a e filifili e mulimuli ia te Ia—o Iesu Keriso.

O sina mataua o le lasusulu e faaopoopo i taimi taitasi e te sailia ai le Atua i le tatalo; suesue i tusitusiga paia e “faalogo ia te Ia”;¹⁷galue i le taitaiga ma faaaliga mai a tatou perofeta soifua; ma usitai ma tausia poloaiga ia “savali i sauniga uma a le Atua.”¹⁸

O le a e valaaulia le susulu faaleagaga i lou agaga ma le filemu i lou olaga i taimi taitasi e te salamo ai. A e taumafa i le faamanatuga i vaiaso taitasi ia tauaveina le suafa o le Faaola i ou luga, ia manatua pea o Ia ma tausi Ana poloaiga, o le a susulu Lona malamalama i totonu ia te oe.

E i ai le lasusulu i lou agaga i taimi taitasi e te faasoa atu ai le talalelei ma tuu atu lau molimau. O taimi taitasi e te auauna atu ai i le tasi ma le isi e pei ona sa faia e le Faaola, o le a e lagonaina Lona mafanafana i lou loto. O le malamalama o le Tama Faalelagi e nofo i taimi uma i totonu o Lona malumalu paia ma i luga o i latou uma o e tuuina atu i latou lava i le maota o le Alii. O Lona malamalama o ia te oe e faaleleia i au faatinoga o le agalelei, onosai, faamagaloga, ma le alofa mama ma e faaalia mai ia lava i ou foliga fiafia. I se isi itu, tatou te savavali i atalafoia pe a vave ona tatou ita pe faagesegese foi ona faamagalo atu. A o e savali pea agai i le malamalama, o le a pauu i ou tua ane ata lafoia o le olaga.”¹⁹

A o e ola ia agavaa mo le mafutaga ma le Agaga Paia, e te “faateleina moni lou gafatia faaleagaga e maua ai faaaliga.”²⁰

E aumai lava e le olaga luitau ma maagao, ma e tatau lava ia i tatou uma ona fetaiai ma ni nai aso pogisa ma afa. O nei mea uma, afai tatou te “tuu atu ia manumalo le Atua i o tatou olaga,”²¹ o le a faaalia mai lava e le malamalama o le Agaga Paia e i ai se faamoemoega ma se uiga o o tatou tofotofoga, o le a i’u ina faaliliuina ai i tatou i ni tagata e sili atu, ma sili atu le atoatoa faatasi ai ma se faatuatua ua mausali atu ma le faamoemoe susulu ia Keriso, ma le iloa sa faatasi i tatou ma le Atua i taimi uma. E pei ona sa fautua mai Peresitene Nelson, “O le faatupulaia o le pouliuli lea e ō mai faatasi ma puapuaga ua atili susulu malamalama ai le malamalama o Iesu Keriso.”²²

O vaitau o o tatou olaga e mafai ona avatu ai i tatou e le gata i nofoaga e lei faamoemoeina a o nofoaga e le manaomia. Afai na tata’i oe iina e le agasala, toso i tua le pupuni o le pogisa ma amata nei ona faalatalata atu ma le lotomaualalo i lou Tama Faalelagi ma se loto nutimomoia ma se agaga salamo, ma ia salamo. O le a Ia faafofoga i au tatalo faamaoni. Faatasi ai ma le lototoa i le asō, “faalatalata atu ia te [Ia] ma o le a faalatalata mai o [Ia] ia te oe.”²³ O le a e lē i tua atu lava o le mana faamalolo o le Togiola a Iesu Keriso.

Ou te sau mai ni matua lelei ma mai ni augatama faamaoni o e sa tali atu i le malamalama o Iesu Keriso ma Lana talalelei, ma sa faamanuiaina ai o latou olaga ma tupulaga na mulimuli mai i se malosi maufetuunai faaleagaga. E tele ina sa talanoa mai lo’u tama e uiga i lona tama, o Milo T. Dyches, ma sa faasoa maia le ala na avea ai lona faatuatua i le Atua ma se malamalama ia te ia i le ao ma le po. O Tamamatua o se sa vaaia le faasaoina o le vaomatua, ma e tele ina fealuai na o ia i atumauga, ma le talitonuga atoatoa e aunoa ma se masalosalo i lona olaga i le taitaiga ma le tausiga a le Atua.

I le tuneva o se tasi tautoulu, sa na o Tamamatua ai i atumauga maualuluga. Ua amata le taumalulu i le taimi sa ia faagutuina ai ana solofanua e fiafia i ai, o Pelenise matua, ma tietie atu ai i se ililaupapa e fua mai ia ogalaau a o lei tai’iliina e fai ai laupapa.

I le taupogipogi, na mae’a lana galuega ona toe oso lea i luga o lana solofanua. E oo atu i lena taimi, na vave ona mou le mafanafana ae ua lilofia le mauga i le kiona. I le leai o se malamalama po o se ala e taiala ai o ia, sa ia liliu Pelenise ise itu na ia manatu o le a toe tata’i ai o ia i le mea sa faamautu ai.

Ata

O Milo Dyches o loo faimalaga atu i se afā

Ina ua mavae le tele o maila o le malaga i le pogisa, sa faifai malie ia Pelenise ona tu lea. Sa uuna’i faafia e Tamamatua ia Pelenise i luma, ae sa musu le solofanua. Faatasi ai ma le kiona ua le iloa ai se mea ma ua felelea’i faataamilo ia i la’ua, na iloa e Tamamatua ua na manaomia le fesoasoani a le Atua. Pei ona sa ia faia i lona olaga atoa, sa ia “ole atu ma le [lotomaualalo] i le faatuatua, ma le le masalosalo.”²⁴ Sa tali ane se leo lemu, ma le itiiti, “Milo, faamatagataga le faagutu o Pelenise.” Sa usitai Tamamatua, ma ao ia faamama lana mau i luga o faagutu, sa toe liliu Pelenise ma savalivali patapatatū atu loa i se isi itu. Na mavae ni itula, sa toe tu foi Pelenise ma faagaugau lona ulu. Na vaaia e Tamamatua ua la taunuu saogalemu i le faitotoa o lo la lotoa, i le tetele o le kiona.

I le oso mai o le la, sa toe tulitatao ai e Tamamatua ia tulagavae ua tau le iloa o Pelenise i le kiona. Sa manavanava loloa o ia ina ua ia iloaina le mea na ia faamatagataga ai le faagutu o Pelenise: o le faatausiusiuga tonu o se mato i se mauga maualuga, lea e na o sina laa lava e tasi i luma o le a ato ifo ai le solofanua ma lē na tietie ai, i o la’ua tuugamau i papa gaoa i lalo ifo.

E faavae i lena aafiaga ma le tele o isi, sa tele ai ina fautua mai Tamamatua e faapea: “O le soa aupito sili ma maoae o le a e maua o lou lava Tama lea i le Lagi.” A faamatala mai e lo’u tama le tala ia Tamamatua, ou te manatua lona sii maia mai tusitusiga paia:

“Ia e faatuatua i le Alii ma lou loto atoa; ae aua le faalagolago i lou lava atamai.

“Ia e manatua o ia i ou ala uma, ona faatonuina ai lea e ia lava ou ala.”²⁵

Ata

O le Faaola o loo uuina se molī

Ou te molimau atu o Iesu Keriso o le malamalama e faavavau o loo “susulu i le pogisa.”²⁶ E leai se pogisa e mafai ona taotaomia, tape, soliina, pe faatoilaloina lena malamalama. E ofoina mai e lo tatou Tama Faalelagi e aunoa ma se tau lena malamalama ia te oe. E le o tuua lava na’o oe. E faafofoga mai o Ia ma tali mai i tatalo a tagata uma. Ua Ia “valaau ia te outou nai le pouliuli e oo i lona lava malamalama e matuā ofo ai.”²⁷ Pe a e fesili atu, “Tama, Tama, o E i ai ea iina?” O le a Ia tali mai i taimi uma, “O lea Ou te iinei, Lo’u atalii/afafine; o lea Ou te iinei lava.”

Ou te molimau atu ua faataunuu e Iesu Keriso le fuafuaga a le Tama Faalelagi, e fai ma o tatou Faaola ma lo tatou Togiola;²⁸ O Ia o lo tatou malamalama, o lo tatou ola, ma lo tatou ala. O le a le mou lava Lona malamalama;²⁹ o le a le muta lava Lona mamalu, o Lona alofa mo oe e faavavau—o ananafi, i le asō, ma le faavavau. I le suafa o Iesu Keriso, amene.