O Le A Tuu Sa’oloto Outou

Ou uso e ma tuafafine pele, ou te matua faafetai lava mo le avanoa e lauga atu ai ia te outou mai Aferika. O se faamanuiaga le i ai o le tekinolosi i le asō ma le faaaogaina i le auala sili ona lelei e oo atu ai ia te outou po o fea lava o outou i ai.

Ia Setema 2019, sa ma maua ai ma Sister Mutombo, a o avea ma taitai o le Misiona a Maryland Baltimore, le avanoa e asiasi ai i nisi o nofoaga o le talafaasolopito o le Ekalesia i Palamaira, Niu Ioka, a o auai ai i le semina a taitai o le misiona. Sa matou faaumaina la matou asiasiga i le Vao Paia. O lo matou faamoemoe i le asiasi atu i le Vao Paia e le o le maua ai o se faaaliga faapitoa po o se faaaliga vaaia, ae sa matou lagonaina le afio ai o le Atua i lenei nofoaga paia. Sa faatumulia o matou loto i le agaga faafetai mo le Perofeta o Iosefa Samita.

Ina ua matou toe foi, sa matauina e Sister Mutombo sa ou ataata tele a o aveina le taavale, o lea sa ia fesili mai ai, “O le a le mafuaaga o lou fiafia?”

Sa ou tali atu, “La’u pele Nathalie, o le a manumalo pea le upumoni i mea sese, ma o le a lē faaauau pea ona i ai le pogisa i le lalolagi ona o le talalelei toefuataiina a Iesu Keriso.”

Sa asiasi atu le Atua le Tama ma Iesu Keriso i le taulealea o Iosefa Samita e aumai i le malamalama le mea na natia, ina ia mafai ai ona tatou maua le “upumoni o le iloa lea o mea e pei ona i ai, … ma e pei ona sa i ai, ma e pei ona o le [a oo mai]” (Mataupu Faavae ma Feagaiga 93:24).

I le silia ma le 200 tausaga mulimuli ane, o loo saili pea e le toatele ia upumoni e manaomia ona saoloto ai mai nisi o tu ma aga ma talapepelo o loo faasalalau e le fili i le lalolagi atoa. E toatele ua “faatauasoina i le taufaasese poto o tagata” (Mataupu Faavae ma Feagaiga 123:12). I lana Tusi i Efeso, sa aoao atu ai Paulo: “Ala ia oe e moe na ma e tulai mai i e ua oti, ona faamalamalama mai lea o Keriso ia te oe” (Efeso 5:14). Sa folafola atu e le Faaola o le a avea o Ia ma malamalama i tagata uma o e faalogo i Ana afioga (tagai i le 2 Nifae 10:14).

I le 35 tausaga ua mavae, sa faatauasoina foi o’u matua ma sa matuai saili lava ia iloa le upumoni ma sa popole e uiga i le mea e maua ai. O o’u matua sa fananau uma i le nuu, i le mea e matuai mau’a’a ai tu ma aga i olaga o tagata taitoatasi ma aiga. Sa la taufai tuua lo la nuu a o laiti i laua ma o mai i le aai, ma vaavaai mo se olaga sili atu ona lelei.

Sa la faaipoipo ma amata lo la aiga i se auala tauagafau. Sa toeitiiti atoa le toavalu o i matou i se tamai fale—o oʻu matua, o oʻu tuafafine e toalua ma aʻu, ma se tausoga sa matou nonofo. Sa ou mafaufau pe o matou moni o se aiga, ona sa le faatagaina ona matou aai faatasi ma o matou matua i le laulau e tasi i le afiafi. Pe a foi mai lo matou tama mai le galuega, o le taimi lava e ulufale mai ai i le fale, e faatonu i matou e tuua le fale ma o i fafo. Sa pupuu lava o matou po, aua sa le mafai ona matou momoe ona o le leai o se lotogatasi ma le alofa moni i le ulugalii a o matou matua. O lo matou fale sa le gata ina laitiiti, ae o se nofoaga sa pogisa. Ae [matou] te leʻi feiloaʻi ma faifeʻautalai, sa eseese lotu matou te o i ai i Aso Sa uma. Na manino lava sa sailia e o matou matua se mea sa le mafai e le lalolagi ona aumaia.

Sa faaauau pea lenei mea seia oo ina matou feiloai ma Elder ma Sister Hutchings, o le uluai ulugalii faifeautalai matutua na valaauina e galulue i Zaire (ua lauiloa i le taimi nei o le FOMAI o Congo po o Congo-Kinshasa). Ina ua amata ona matou feiloai ma nei faifeautalai lelei, o e sa pei o ni agelu na o mai mai le Atua, sa ou matauina sa i ai se mea na amata ona suia i lo matou aiga. Ina ua mavae lo matou papatisoga, sa amata moni ona matou agai atu i se olaga fou ona o le talalelei toefuataiina. O afioga a Keriso na amata ona faalauteleina ai o matou agaga. Sa amata ona faamalamalamaina lo matou malamalama ma na avea ma se mea suamalie ia i matou, e pei o upumoni sa matou mauaina sa iloagofie ma sa mafai ona matou vaai i le malamalama, ma sa oo ina faateleina le susulu ma le susulu o lenei malamalama i aso uma.

O lenei malamalama i le aisea o le talalelei sa fesoasoani ia i matou e avea atili ai e faapei o le Faaola. E lei suia lava le toatele o lo matou fale; e faapena foi lo matou tulaga faaagafesootai. Ae sa ou molimauina se suiga o le loto o o’u matua a o matou tatalo i aso uma, i le taeao ma le afiafi. Sa matou suesueina le Tusi a Mamona; sa fai a matou afiafi faaleaiga; ma avea moni lava i matou o se aiga. O Aso Sa uma, matou te feala i luga i le 6:00 i le taeao e sauni e o i le lotu, ma matou malaga mo le tele o itula e auai ai i sauniga a le Ekalesia i vaiaso uma e aunoa ma se faitio. O se aafiaga matagofie tele le molimauina. O i matou, o e na savavali talu ai i le pogisa, ua tuli ‘ese le pogisa mai ia i matou (tagai i le Mataupu Faavae ma Feagaiga 50:25) ma sa vaaia le “malamalama tele” (2 Nifae 19:2).

Ou te manatua se tasi o aso, ina ua ou lē naunau e ala vave i le taeao mo a matou tatalo faaleaiga, sa ou muimui i o’u tuafafine, “E leai lava se isi mea e mafai ona tatou faia i lenei fale, na o le tatalo, tatalo, tatalo.” Sa faalogo lo’u Tama i o’u manatu faaalia. Ou te manatua lana tali mai, a o ia aoao a’u i le alofa ma le mausali, “O lou taimi atoa i totonu o lenei fale, o le a e tatalo tatalo, tatalo, tatalo.”

Na ou manatuaina upu a lo’u tama i aso uma. O le a so tou manatu i mea o loo ma faia ma Sister Mutombo ma le ma fanau i le asō? Matou te tatalo, tatalo, ma tatalo. O la matou talatuu lenei.

O le tagata na soifua mai e tauaso ma sa faamaloloina e Iesu Keriso, ina ua uma ona uunaia malosi e ona tuaoi ma le au Faresaio, sa fai mai:

“O le tasi tagata e igoa ia Iesu ua na faia le palapala, ua nini a’i o’u mata; ua fai mai foi ia te a’u, Alu ia i le taelega i Seloa, ma ia mulumulu ai: Ona ou alu ai lea, ma ou mulumuluina, ona ou vaai ai lea. …

“… O le mea e tasi [ua] ou iloa [o] … a’u le tauaso, ua ou vaai [nei]” (Ioane 9:11, 25).

Sa matou tauaso foi a ua mafai nei ona vaai. O le talalelei toefuataiina na faaaafiaina lo matou aiga talu mai lena taimi. O le malamalama i le aisea o le talalelei ua faamanuiaina ai augatupulaga e tolu o lo’u aiga ma o le a faaauau pea ona faamanuiaina ai le tele o augatupulaga o le a oo mai.

O Iesu Keriso, o le malamalama e susulu i le pogisa. O lē e mulimuli ia te Ia “e lē savali o ia i le pouliuli, a e ia te ia le malamalama o le ola” (Ioane 8:12).

Mo le toeitiiti atoa le tausaga i le va o le 2016 ma le 2017, na feagai ai tagata i le itulagi o Kasai ma se faalavelave matautia. O se vaitau sili ona pogisa mo tagata ona o se feteenaiga i le va o se vaega masani o le ‘au tau ma vaega o le malo. O le vevesi na salalau atu mai taulaga i Kasai Tutotonu i le itulagi lautele o Kasai. E toatele tagata na sosola ‘ese mai o latou fale mo le saogalemu ma lalafi i le vao. Sa leai ni a latou meaai po o ni vai, po o se isi lava mea, ma i le lotolotoi o i latou sa i ai ni tagata o Le Ekalesia a Iesu Keriso o le Au Paia o Aso e Gata Ai i le eria o Kananga. Sa fasiotia nisi o tagata o le Ekalesia e le vaegaau tuma’oti.

O uso Honoré Mulumba o le Uarota a Nganza i Kananga ma lona aiga o nisi o tagata toaitiiti o e sa lalafi i lo latou fale, ma le le iloa po o fea e o i ai ona sa suia magaala uma i fevaevaeaiga faifai pea ma taugafana. I se tasi aso sa matauina ai e nisi o alii o le vaegaau tumaoti i le tuaoi le i ai o Uso Mulumba ma lona aiga, e pei o se tasi o afiafi sa latou o atu ai e taumafai e sue ni fualaau faisua i le faatoaga a le aiga e aai ai. Sa o mai se vaega o le vaegaau tuma’oti i lo latou fale ma tatoso i fafo i latou ma fai atu i ai e filifili e usitai ia latou faiga faavaegaau tuma’oti pe o le a fasiotia i latou.

Sa tau atu ma le lototele e Uso Mulumba ia i latou, “O a’u o se tagata o Le Ekalesia a Iesu Keriso o le Au Paia o Aso e Gata Ai. Ua matou taliaina ma lo’u aiga Iesu Keriso ma ua faatuatua ia te Ia. O le a matou tumau faamaoni i a matou feagaiga ma o le a talia le oti.”

Sa latou ta’u atu ia i latou, “E pei ona outou filifilia Iesu Keriso, o le a ‘aina o outou tino e taifau,” ma sa latou folafola atu e toe foi mai. Ae latou te lei toe o mai lava, ma sa nonofo le aiga iina mo le lua masina ma e latou te lei toe vaai lava i ai. Sa tausia e Uso Mulumba ma lona aiga le sulu o lo latou faatuatua. Sa latou manatua a latou feagaiga ma sa puipuia.

O Iesu Keriso o le malamalama lea e tatau ona tatou uuina i luga e oo lava i taimi pogisa o lo tatou olaga i le tino (tagai i le 3 Nifae 18:24). A tatou filifili e mulimuli ia Keriso, ua tatou filifili ina ia suia. O se alii po o se tamaitai ua suia mo Keriso o le a taitaia e Keriso, ma o le a tatou ole atu, e pei ona sa faia e Paulo, “le Alii e, se a le mea e te finagalo i ai ou te faia?” (Galuega 9:6). O le a tatou “mulimuli atu i ona tulagāaao” (1 Peteru 2:21). O le a tatou “savavali, … faapei ona savali o ia” (1 Ioane 2:6). (Tagai i le Ezra Taft Benson, “Fanauina i La Le Atua,” Tambuli, Oke. 1989, 2, 6.)

Ou te molimau atu ia te Ia o Lē na maliu, sa tanumia, ma toetu mai i le aso lona tolu ma afio a’e i le lagi ina ia mafai ai e oe ma a’u ona maua faamanuiaga o le tino ola pea ma le faaeaga. O Ia “o le malamalama, … le ola, ma le upumoni” (Eteru 4:12). O Ia o le tali ma le vaifofo i le fenumiai o le lalolagi. O ia o le tagavai o le tulaga silisili mo le faaeaga, o Iesu Keriso lea. I le suafa, o Iesu Keriso, amene.