Nai Tagata Faatauvaa

A o tamaitiiti, ou te manatua le o atu ma lo’u tama i le taavale ma vaaia ai tagata i tafaala o e sa feagai ma tulaga faigata po o e sa manaomia le fesoasoani. E fai pea lava e lo’u tama le upu “Pobrecito,” o lona uiga “nai tagata faatauvaa.”

E i ai taimi, sa ou matauina ai ma le naunautai a o fesoasoani atu lo’u tama i le toatele o nei tagata, aemaise pe a ma malaga i Mekisiko e vaai o’u matua matutua. E masani ona ia maua se tasi e manaomia le fesoasoani ona alu faanana lea ma tuuina atu le fesoasoani latou te manaomia. Sa ou iloa mulimuli ane e faapea sa fesoasoani o ia e lesitala i latou i a’oga, faatau ni nai meaai, pe saunia ma tuu atu i soo se auala mea mo lo latou soifua manuia. Sa auauna atu o ia i se “tagata mativa” e kolosia lona ala. O le mea moni, i tausaga o lo’u tuputupu ae, e le mafai ona ou manatua se taimi sa le’i i ai se tasi sa matou nonofo, o se tasi sa manaomia se mea e nofo ai, seia oo ina latou ola tutoatasi. O le matauina o nei aafiaga na fatuina ai ia te a’u se agaga o le agaalofa i o’u uso ma tuafafine ma mo i latou e manaomia.

I le Tala’i La’u Talalelei o loo ta’u mai ai: “Ua siomia outou e tagata. Tou te fetaui ma i latou i le alatele, asiasi ia i latou i o latou fale, ma malaga faatasi ma i latou. “O i latou uma o fanau a le Atua, o ou uso ma tuafafine. O le toatele o nei tagata o loo sailia le faamoemoega o le olaga. O loo atugalu i latou mo lo latou lumanai ma o latou aiga”(Tala’i La’u Talalelei: O Se Taiala i le Galuega Faafaifeautalai [2018], 1).

I le gasologa o tausaga ao auauna ai i le Ekalesia, sa ou taumafai e sailia i latou o e sa manaomia le fesoasoani i o latou olaga, i le faaletino ma le faaleagaga. E tele ina ou faalogoina le leo o lo’u tama o fai mai, “Pobrecito,” nai tagata fatauvaa.

I le Tusi Paia tatou te maua ai se faataitaiga matagofie o le amanaiaina o se tagata faatauvaa.

“Ua o ae faatasi Peteru ma Ioane i le malumalu i le ituaso e fai ai le tatalo, o le ituaso e iva lea.

“Ua ave foi le tasi tagata ua pipili talu ina fanau mai, ua tuuina ifo o ia e i latou i aso fai soo i le faitotoa o le malumalu ua igoa i le Matagofie, e faatoga atu i se mea alofa i e ulu atu i le malumalu;

“Ua iloa mai e ia o Peteru ma Ioane a ulu atu i le malumalu, ona faatoga lea o ia i se mea alofa.

“Ona pulatoa lea o Peteru ma Ioane ia te ia, ua faapea atu, Vaai mai ia ia te i maua.

“Ona naunau mai lea o ia ia te i laua, fā’i e maua se mea mai ia te i laua.

“Ona fai atu lea o Peteru, E leai sa’u ario po o sa’u auro; a o le mea ua ia te au, ou te avatu lea ia te oe, O le suafa o Iesu Keriso o le Nasareta, ina tu ai ia i luga, ina savali.

“Ona tago atu lea o ia i lona lima taumatau, ua faatu ia te ia i luga: ona faamalosia loa lea o ona vae ma ponaponāvae” (Galuega 3:1–7; ua faaopoopo le faamamafa).

I le faitauina o lenei tala, sa faagaeetia a’u i le faaaogaaga o le upu pulato’a. O le upu pulato’a o lona uiga o le taula’i sa’o atu o mata o se tasi, mafaufauga, po o le vaai ma se faamoemoe (tagai “fasten,” Dictionary.com). A o vaai atu Peteru i lenei tagata, na ese lana vaai atu ia te ia nai lo isi. Sa le’i vaai o ia i lona le mafai ona savali ma ona vaivaiga, ae sa mafai ona ia iloatino ua lava lona faatuatua e faamaloloina ai ma ulu atu i totonu o le malumalu ia maua ai faamanuiaga sa ia sailia.

Sa ou matauina na ia tago atu i lona lima taumatau, ua faatu ia te ia i luga. A o ia fesoasoani atu i lenei tagata faapea, sa faamaloloina faavavega e le Alii o ia, ma “faamalosia loa ona vae ma ponaponāvae” (Galuega 3:7). O lona alofa mo lenei tagata ma se naunauga e fesoasoani ia te ia na afua ai se faatelega o le malosi ma le gafatia i le tagata o le sa vaivai.

A o avea ai ma Fitugafulu Eria, sa ou faaavanoaina lava po o Aso Lua taitasi e faia ai asiasiga faaleauaunaga ma peresitene o siteki i la’u eria o o’u tiutetauave. Sa ou valaauliaina i latou e faatulaga ni taimi ma i latou o e manaomia se faauuga o le talalelei a Iesu Keriso po o e sa lei tausisia feagaiga na latou osia i lea taimi. Na ala i a matou auaunaga faifai pea ma le faamoemoe, sa faalauteleina ai e le Alii a matou taumafaiga ma sa mafai ona matou mauaina tagata ma aiga o e sa manaomia le fesoasoani. O i latou nei o “nai tagata faatauvaa” o e sa nonofo i siteki eseese sa matou galulue ai.

Sa i ai se tasi taimi, sa ma o ai ma Peresitene Bill Whitworth, o le peresitene o le Siteki a Sandy Canyon View, e fai ni asiasiga mo auaunaga. Sa tatalo o ia mo e e ao ona ma asia, ma taumafai ia maua le aafiaga lava e tasi e faapei o Nifae, o le “sa taitai e le Agaga, sa lei mua’i iloa muamua mea e tatau ona [ia] fai” (1 Nifae 4:6). Sa ia faapupulaina lena mea a o ma auauna atu, e ao ona taitai i tatou e ala i faaaliga ia i latou o e e aupito manaomia, e ese mai i le na ona faasolo i se lisi pe asiasi foi i tagata taitasi i se ala masani. E tatau ona taitaia i tatou e le mana o musumusuga.

Ou te manatuaina le o atu i le fale o se ulugalii talavou, o Jeff ma Heather, ma so la atalii laitiiti, o Kai. Na ola a’e Jeff o se tagata malosi i le Ekalesia. O se tagata afeleti talenia tele ma sa i ai sana matata manuia. Sa amata ona tafetafea ese atu o ia mai le Ekalesia i tausaga o lona talavou. Mulimuli ane, sa afaina i se faalavelave tautaavale, lea na suia ai le ala o lona olaga. A o ma afe atu i lo latou fale ma amata ona faamasani, sa fesili mai Jeff pe aisea na ma o atu ai e vaai lona aiga. Sa ma tali atu e faapea pe tusa ma le 3,000 tagata e nonofo i totonu o tuaoi o le siteki. Ona ou fesili atu lea ia te ia, “Jeff, mai aiga uma e mafai ona ma asia i le po nei, ta’u mai pe aisea na auina mai ai i ma’ua e le Alii iinei.”

O lena fesili, na amata ai ona ootia Jeff ma amata ai ona faasoa mai ia i ma’ua nisi o ona popolega ma ni nai faafitauli o loo latou feagai ai o se aiga. Sa amata ona ma faasoa atu i ai mataupu faavae eseese o le talalelei a Iesu Keriso. Sa ma valaaulia i latou e faia ni nai mea patino sa foliga mai e faigata i le taimi muamua ae e oo mai le taimi o le a aumaia ai ia i latou le fiafia ma le olioli tele. Ona tuuina atu lea e Peresitene Whitworth ia Jeff se faamanuiaga faaleperisitua e fesoasoani ai ia te ia e faatoilalo ona luitau. Sa malilie Jeff ma Heather e fai mea sa ma valaaulia i la’ua e fai.

Pe a ma se tausaga mulimuli ane, sa ou maua se avanoa taua e matau ai Jeff o papatisoina lona toalua, o Heather, o se tagata o Le Ekalesia a Iesu Keriso o le Au Paia o Aso e Gata Ai. Ua sauniuni nei i latou e ulu atu i le malumalu ina ia faamauina ai o se aiga i le olaga nei ma le faavavau atoa. O la ma asiasiga na suia ai le ala o o la’ua olaga i le faaletino ma le faaleagaga.

Ua fetalai mai le Alii:

“O le mea lea, ia e faamaoni; tu i le tofi ua ou tofia i ai oe; fesoasoani i e vaivai, sii i luga lima ua tautau i lalo, ma faamalosi tulivae ua vaivai” (MFF 81:5).

“Ma o le faia o ia mea o le a e faia ai mea lelei silisili atu mo ou uso a tagata, ma o le a e uunai lautele ai le mamalu o ia o le o lou Alii” (Mataupu Faavae ma Feagaiga 81:4).

Uso e ma tuafafine, sa aoao mai e le Aposetolo o Paulo se elemene autu i la tatou auaunaga. Na ia aoao mai e faapea o i tatou “o le tino o Keriso outou, ma itutino taitasi” (1 Korinito 12:27) ma e manaomia itutino taitasi o le tino ina ia mafai ai ona mautinoa ua faamalamalamaina le tino atoa. Ona ia aoao mai lea o se upumoni mamana sa loloto lona ulu mai i lo’u loto ina ua ou faitauina. Fai mai a ia, “Ae sili lava itutino e ta’ua e vaivai, e sili atu lo latou aoga: ma itutino ua ta’ua e i tatou e mataga, ua sili lo tatou ta’ulelei i ai” (1 Korinito 12:22–23; ua faaopoopo le faamamafa).

O le mea lea, i uarota ma paranesi taitasi tatou te manaomia tagata uma—o i latou atonu e malolosi ma i latou o loo feagai ma faigata. E tatau ai ma taua tagata uma i le faamalamalamaina o le “tino [atoa] o Keriso.” E tele taimi ou te tomanatu ai po o ai e le o i ai ia tatou faalapotopotoga eseese o le a faamalolosia ai i tatou ma faaatoatoaina ai i tatou.

Na aoao mai Elder D. Todd Christofferson: “I le Ekalesia e le gata ina tatou aoao ai aoaoga faavae paia; ae tatou te iloa foi lona faaaogaina. I le avea ai ma tino o Keriso, e feauauna ai ia tagata o le Ekalesia i le tulaga moni o le olaga i aso faisoo. O i tatou uma lava e le atoatoa. … I le tino o Keriso, e tatau ona tatou faia isi mau mea nai lo le na o le aoao o manatu faavae ma upu faaeaea ma ia i ai ni aafiaga tatou te ‘aofia patino’ ai a o tatou aoao e ‘nonofo faatasi i le alofa’ [Mataupu Faavae ma Feagaiga 42:45]” (“E Manaomia i Se A Le Ekalesia,” Liahona, Nov. 2015, 108–9).

I le 1849, sa fai ai se faalepo a Polika Iaga lea na ia vaai ai i le Perofeta o Iosefa Samita e foliga mai sa ia tata’iina atu se lafu tele o mamoe ma ‘oti. O nisi o nei manu sa lapopoa ma mananaia; o isi sa laiti ma palapala. Sa ta’ua e Polika Iaga lona tilotilo atu i mata o le Perofeta o Iosefa Samita ma fai atu, “Iosefa, ua ia te oe se lafu uiga ese … faatoa ou vaai lea i ai i lo’u olaga; o le a lau mea o le a fai i ai?” Sa na ona tali mai le Perofeta, o le sa foliga mai e le o ano i lana lafu amio le pulea, “[Polika,] o la e lelei uma lava i latou i o latou tulaga.”

Ina ua alafa’i mai Peresitene Iaga, sa malamalama o ia e faapea a o faapotopoto ai e le Ekalesia ni “mamoe ma ‘oti” eseese, o lona tiutetauave le aumaia uma i totonu ma faataga i latou taitoatasi ia iloa lo latou gafatia atoatoa a o latou nofoia o latou nofoaga i totonu o le Ekalesia. (Sii mai ia Ronald W. Walker, “Brigham Young: Student of the Prophet,” Ensign, Fep. 1998, 56–57.)

Uso e ma tuafafine, na oo mai le afuaga o la’u lauga ina ua ou mafaufau loloto e ugia i se tasi e le o auai atoatoa i le Ekalesia a Iesu Keriso. Mo sina taimi, ou te fia talanoa ia i latou taitoatasi. Sa aoao mai Elder Neal A. Maxwell e faapea “o na ituaiga o tagata e tele ina nonofo latalata mai—ae e le auai atoatoa i—le Ekalesia. O le a latou le o mai i totonu o le falesa, ae latou te le tuua foi le faapaologa. O i latou nei o e mafatia ma o loo manaomia e le Ekalesia, ae o e, i se isi itu, ‘e ola e aunoa ma le Atua i le lalolagi’ [Mosaea 27:31]” (“Why Not Now?,” Ensign, Nov. 1974, 12).

Ou te toe fia ta’ua le valaaulia a la tatou pele o Peresitene Russell M. Nelson ina ua ia faatoa saunoa i tagata o le Ekalesia o lo tatou perofeta fou. Na ia saunoa: “O lenei, i tagata taitoatasi o le Ekalesia ou te faapea atu: tumau i le ala o feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.”

Ona ia aioi mai lea: “Ia, afai la ua e laa ese mai le ala, ou te fia valaaulia oe ma le faamoemoe atoa i lo’u loto ina ia faamolemole toe foi mai. Po o a lava ou atugaluga, po o a lava ou luitau, o loo i ai se faamoemoega mo oe i lenei, le Ekalesia a le Alii. O le a faamanuiaina oe ma augatupulaga e lei faananau mai e ala ia outou galuega i le taimi nei ina ia toe foi mai i le ala o le feagaiga.” (“A’o Tatou Agai Faatasi Atu i Luma,” po o le Liahona, Ape. 2018, 7; faaopoopo le faamamafa).

Ou te tuuina atu la’u molimau e uiga ia te Ia, o Iesu Keriso, o le Alii Auauna ma le Faaola o i tatou uma. Ou te valaaulia i tatou taitoatasi ia sailia ia “pobrecitos,” “nai tagata faatauvaa” mai ia i tatou o e e manaomia le fesoasoani. O lo’u faamoemoega lea ma le tatalo i le suafa o Iesu Keriso, amene.